Tira Tur Boso Ansiedad Riba Jehova

“Humiyá boso mes . . . bou dje man poderoso di Dios, p’e por halsa boso n’e debido tempu; miéntras boso ta tira tur boso ansiedad riba dje, pasobra e ta interesá den boso.”​—⁠1 PEDRO 5:​6, 7.

ANSIEDAD por afectá nos bida dramáticamente. E por ser compará cu e interferencia cu tin biaha ta interumpí un melodia bunita cu bo ta tende na radio. Si no tin interferencia den e ondanan di radio, bo por disfrutá di melodianan agradabel i nan por tin un efecto calmante riba e oyente. Sin embargo, e zonidu rascante di interferencia por deformá asta e tono di mas dushi, causando iritacion i frustracion na nos. Ansiedad por tin un efecto similar riba nos trankilidad. E por deprimí nos asina tantu cu nos no por atendé na asuntunan vital. En berdad, “preocupacion ansioso den curason di un homber ta loke lo pon’é sak abou.”​—⁠Proverbio 12:⁠25.

² Jesucristo a papia tocante e peliger di ser distraí dor di ansiedad excesivo. Den su profecia tocante e último dianan, el a insta: “Presta atencion na boso mes pa boso curason nunca bira cargá cu comementu di mas i bebementu pisá i ansiedadnan di bida, i di ripiente e dia ei bini riba boso instantáneamente manera un las. Pasobra lo e bini riba tur esnan cu ta biba riba e cara dje tera. Keda lantá, anto, tur ora haciendo súplica pa boso por logra scapa di tur e cosnan aki cu ta destiná pa sosodé, i pa para dilanti e Yu di hende.” (Lucas 21:​34-36) Mescos cu comementu di mas i bebementu pisá por producí un estado mental floho, asina birando cargá cu e “ansiedadnan di bida” por pone nos perde perspectiva mental, cu resultadonan trágico.

Loke Ansiedad Ta

³ “Ansiedad” ta ser definí como “inkietud mental penoso of temeroso, general[mente] riba un contratempu menasante of anticipá.” E ta “preocupacion of interes yen di miedu” i tambe “un sintimentu abnormal i aplastante di temor i miedu hopi biaha caracterisá pa señalnan fisiológico (manera sodamentu, tension, i batimentu mas rápido di curason), causá dor di duda en cuanto e realidad i naturalesa dje menasa, i dor di duda den bo mes capacidad pa enfrent’é cu éxito.” (Webster’s Ninth New Collegiate Dictionary) Pues ansiedad por ta un problema complicá. Entre su hopi causanan tin enfermedad, biramentu bieu, miedu di crímen, pérdida di trabou, i preocupacion p’e bienestar di bo famia.

⁴ Claramente, tin gradonan di ansiedad, mescos cu tin vários condicion of circunstancia cu por caus’é. No ta tur hende ta reaccioná na un situacion den e mésun manera. P’esei, nos mester realisá cu asta ora algu no ta molestiá nos, e por ta e causa di ansiedad severo pa algun di nos co-adoradornan di Jehova. Kico nos por haci si ansiedad alcansá e punto caminda nos no por concentrá riba e berdadnan armonioso i deleitabel dje Palabra di Dios? Kico si nos bira asina afligí cu ansiedad cu nos ta incapas pa enfocá riba e cuestionnan dje soberania di Jehova i integridad cristian? Kisas nos no por cambia nos circunstancianan. Na lugá di esei, nos tin cu busca puntonan bíblico cu lo yuda nos enfrentá cu éxito indebido ansiedad causá pa problemanan difícil di bida.

Yudansa Ta Disponibel

⁵ Ora cristiannan mester di yudansa spiritual i ta cargá cu ansiedadnan, nan por saca consuelo for dje Palabra di Dios. E ta proveé guia confiabel i ta duna nos hopi siguransa cu nos no ta so como Jehova su sirbidornan leal. Por ehempel, e salmista David a canta: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Con nos por actua na armonia cu e palabranan aki? Dor di tira tur nos ansiedadnan, preocupacionnan, temornan i decepcionnan riba nos amoroso Tata celestial. Esaki lo yuda duna nos un sintimentu di siguridad i un trankilidad di curason.

⁶ Oracion sincero regular ta esencial si nos kier tira nos carga, incluyendo tur nos ansiedad, riba Jehova. Esaki lo duna nos pas interno, pasobra apostel Pablo a skirbi: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultadnan mental mediante Cristo Jesus.” (Filipense 4:​6, 7) E “pas di Dios” incomparabel ta un trankilidad excepcional cu Jehova su sirbidornan dedicá ta disfrutá di dje asta den e situacionnan di mas angustioso. E ta resultá for di nos relacion personal íntimo cu Dios. Segun cu nos ta resa pa spiritu santu i ta lagu’e motivá nos, nos no ta ser aliviá di tur problema di bida, pero sí nos ta disfrutá dje fruta di spiritu di pas. (Lucas 11:13; Galatio 5:​22, 23) Nos no ta ser aplastá dor di ansiedad, pasobra nos sa cu Jehova ta pone henter su pueblo fiel “biba den siguridad” i lo no laga nada sosodé cu lo causa nos daño permanente.​—⁠Salmo 4:⁠8.

⁷ Sin embargo, kico si nos ansiedad ta persistí, aunke nos ta meditando riba e Scritura i ta perseverando den oracion? (Romano 12:12) E ancianonan nombrá den e congregacion tambe ta Jehova su provision pa yuda nos spiritualmente. Nan por consolá nos i yuda nos dor di usa e Palabra di Dios i dor di resa cu nos i pa nos. (Santiago 5:​13-16) Apostel Pedro a insta su co-ancianonan pa pastoreá e tou di Dios di buena gana, cu empeño i den un manera ehemplar. (1 Pedro 5:​1-4) E hombernan aki ta sinceramente interesá den nos bienestar i tin deseo di yuda. Naturalmente, pa beneficiá plenamente dje yudansa dje ancianonan i pa bai bon spiritualmente den e congregacion, nos tur tin cu aplicá e conseho di Pedro: “Boso, hombernan mas hóben, sea sumiso n’e hombernan di mas edad. Pero boso tur faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde.”​—⁠1 Pedro 5:⁠5.

⁸ Pedro a agregá: “Humiyá boso mes, anto, bou dje man poderoso di Dios, p’e por halsa boso n’e debido tempu; miéntras boso ta tira tur boso ansiedad riba dje, pasobra e ta interesá den boso. Mantené boso sano huicio, sea vigilante. Boso adversario, e Diabel, ta cana rond manera un leon cu ta gruña, buscando un hende pa devorá. Pero tuma boso posicion contra dje, sólido den fe, sabiendo cu e mésun cosnan en cuanto sufrimentu ta realisando nan mes den henter e asociacion di boso rumannan den e mundu. Pero, despues cu boso a sufri un poco tempu, e Dios di tur bondad inmerecí, kende a yama boso pa su gloria eterno den union cu Cristo, e mes lo terminá boso entrenamentu, lo e haci boso firme, lo e haci boso fuerte. Na dje sea e poder pa semper. Amen.”​—⁠1 Pedro 5:​6-11.

⁹ Ki un consuelo pa realisá cu nos por ‘tira tur nos ansiedad riba Dios pasobra e ta interesá den nos’! I si algun di nos ansiedad ta resultá for dje intentonan dje Diabel pa destruí nos relacion cu Jehova dor di trece persecucion i otro sufrimentu riba nos, no ta maraviyoso pa sa cu tur cos lo sali bon pa wardadornan di integridad? Sí, despues cu nos a sufri un poco tempu, e Dios di tur bondad inmerecí lo terminá nos entrenamentu i lo haci nos firme i fuerte.

¹⁰ Promé Pedro 5:​6, 7 ta referí indirectamente na tres cualidad cu por yuda nos enfrentá ansiedad cu éxito. Unu ta humildad, of “humildad di mente.” Versículo 6 ta finalisá cu e expresion “n’e debido tempu,” sugiriendo un necesidad pa pacenshi. Versículo 7 ta mustra con cu confiansa nos por tira tur nos ansiedad riba Dios ‘pasobra e ta interesá den nos,’ i e palabranan ei ta animá confiansa absoluto den Jehova. Pues laga nos mira con humildad, pacenshi i confiansa absoluto den Dios por yuda aliviá ansiedad.

Con Humildad Por Yuda

¹¹ Si nos ta humilde, nos lo admití cu e pensamentunan di Dios ta inmensamente superior cu esnan di nos. (Isaías 55:​8, 9) Humildad ta yuda nos reconocé e alcanse limitá di nos abilidad di pensa na comparacion cu Jehova su perspectiva cu ta tene cuenta cu tur cos. E ta mira cosnan cu nos no ta dicerní, manera e caso dje hustu homber Job ta mustra. (Job 1:​7-12; 2:​1-6) Dor di humiyá nos mes “bou dje man poderoso di Dios,” nos ta reconociendo nos posicion inferior en relacion cu e Soberano Supremo. En buelta, esaki ta yuda nos enfrentá cu éxito e circunstancianan cu e ta permití. Nos curason por anhelá pa alivio inmediato, pero siendo cu Jehova su cualidadnan ta den balansa perfecto, e sa precisamente ki ora i con pa actua na nos fabor. Manera muchanan chikitu, anto, laga nos tene humildemente na Jehova su man poderoso, sigur cu lo e yuda nos enfrentá nos ansiedadnan cu éxito.​—⁠Isaías 41:​8-13.

¹² Humildad ta incluí nos buena gana pa aplicá conseho for dje Palabra di Dios, locual hopi biaha por mengua ansiedad. Por ehempel, si nos ansiedad a resultá di enbolbimentu profundo den siguimentu tras di cosnan material, lo ta bon pa nos reflehá riba Pablo su conseho: “Laga boso moda di biba sea liber di amor pa placa, miéntras boso ta contentu cu e cosnan actual. Pasobra [Dios] a bisa: ‘Lo mi no bandoná bo di ningun manera ni desampará bo di ningun manera.’ ” (Hebreo 13:⁠5) Dor di aplicá conseho asina humildemente, hopi hende a libra nan mes di gran ansiedad tocante siguridad material. Aunke nan condicion financiero kisas no a mehorá, e no ta dominá nan pensamentunan causando nan daño spiritual.

E Rol di Pacenshi

¹³ E expresion “n’e debido tempu” na 1 Pedro 5:6 ta sugerí e necesidad pa awante cu pacenshi. Tin biaha un problema ta persistí pa hopi tempu, i esei por aumentá ansiedad. Specialmente den un situacion asina nos mester laga asuntunan den man di Jehova. Disipel Santiago a skirbi: “Nos ta pronunciá felis esnan cu a wanta. Boso a tende dje awante di Job i a mira e resultado cu Jehova a duna, cu Jehova ta masha tierno den cariño i misericordioso.” (Santiago 5:11) Job a experenciá ruina económico, a perde dies yu den morto, a sufri di un malesa repugnante i tabata incorectamente condená dor di consoladornan falsu. Por lo ménos un cierto grado di ansiedad lo ta normal bou di circunstancianan asina.

¹⁴ Den tur sentido, Job tabata ehemplar den awante cu pacenshi. Si nos ta pasando dor di un prueba di fe severo, kisas nos tin cu spera pa alivio, mescos cu Job a haci. Pero Dios a actua na su fabor, aliviand’e eventualmente di su sufrimentu i recompensand’e abundantemente. (Job 42:​10-17) Sperando cu pacenshi riba Jehova ta desaroyá nos awante i ta revelá e profundidad di nos debocion na dje.​—⁠Santiago 1:​2-4.

Confia den Jehova

¹⁵ Pedro a insta compañénan creyente pa ‘tira tur nan ansiedad riba Dios pasobra e ta interesá den nan.’ (1 Pedro 5:⁠7) Asina nos tambe por i mester tin confiansa absoluto den Jehova. Proverbio 3:​5, 6 ta bisa: “Confia den Jehova cu tur bo curason i no dependé riba bo mes comprendimentu. Den tur bo camindanan tuma nota di dje, i e mes lo haci bo bereanan stret.” Debí na experencianan di pasado, algun persona cu ta yen di ansiedad ta haña ta difícil pa confia otro hende. Pero nos tin tur motibu pa confia nos Creador, e Fuente i Sostenedor di bida mes. Asta si nos no ta confia nos propio reaccion den un cierto asuntu, nos semper por dependé riba Jehova p’e libra nos for di nos calamidadnan.​—⁠Salmo 34:​18, 19; 36:9; 56:​3, 4.

¹⁶ Confia den Dios ta incluí obedecé su Yu, Jesucristo, kende a siña loke el a siña for di su Tata. (Juan 7:16) Jesus a insta su disipelnan pa ‘warda tesoro den cielu’ dor di sirbi Jehova. Pero kico di necesidadnan material cu ta enbolbé cuminda, paña i dak? “Stop di ansha,” Jesus a consehá. El a mustra cu Dios ta alimentá e paranan. E ta bisti e flornan di un manera bunita. Acaso e sirbidornan humano di Dios no ta bal mas cu esakinan? Naturalmente. P’esei, Jesus a insta: “Sigui, anto, buscando promé e reino i [Dios] su husticia, i tur e otro cosnan aki lo ser agregá na boso.” Jesus a sigui: “Pues, nunca bira anshá tocante e siguiente dia, pasobra e siguiente dia lo tin su mes ansiedadnan.” (Mateo 6:​20, 25-34) Sí, nos mester di cuminda, bebida, paña i dak, pero si nos confia den Jehova, nos lo no ta indebidamente preocupá tocante e cosnan aki.

¹⁷ Pa busca promé e Reino, nos mester confia den Dios i tene nos prioridadnan na nan debido lugá. Un sambuyadó sin aparato di hala rosea por duik bou di awa en busca di un oester cu un perla den dje. Esaki ta su medio pa percurá financieramente pa su famia. Un prioridad haltu, en berdad! Pero kico ta mas importante? Aire! E mester bini regularmente na superficie di awa pa yena su pulmonnan di nobo. Aire ta un prioridad mas haltu. Di igual manera, kisas nos mester ta un tiki enbolbí den e sistema di cosnan aki afin di obtené e necesidadnan di bida. Sin embargo, asuntunan spiritual mester bini na promé lugá pasobra e bida mes di nos famia ta dependé dje cosnan aki. Pa evitá indebido ansiedad riba necesidadnan material, nos mester tin confiansa absoluto den Dios. Ademas, ‘teniendo hopi di haci den e trabou di Señor’ por yuda aliviá ansiedad pasobra “e goso di Jehova” ta resultá di ta nos fortalesa.​—⁠1 Corintio 15:58; Nehemías 8:⁠10.

Sigui Tira Bo Ansiedad Riba Jehova

¹⁸ Pa por concentrá semper riba cosnan spiritual, nos mester sigui tira tur nos ansiedad riba Jehova. Corda semper cu e realmente ta interesá den su sirbidornan. Pa ilustrá: Debí n’e infieldad dje casa di un señora cristian pa cuné, su ansiedad a aumentá te n’e punto cu e no por a drumi mas. (Compará cu Salmo 119:28.) Sin embargo, den cama, e tabata tira tur su ansiedad riba Jehova. E tabata habri su curason na Dios, bisand’e dje dolor cu e i su dos yu muhernan chikitu tabata pasando. Despues di a sclama pa alivio den oracion ferviente, e semper por a pega soño, pasobra el a confia cu Jehova lo percurá p’e i su yunan. Awor, e señora bíblicamente divorciá aki ta felismente casá cu un anciano.

¹⁹ Como Jehova su pueblo, nos tin vários manera pa enfrentá ansiedad cu éxito. Aplicacion dje Palabra di Dios ta specialmente probechoso. Nos tin e cuminda spiritual ricu cu Dios ta proveé mediante “e esclabo fiel i discreto,” incluyendo artículonan probechoso i refrescante publicá den E Toren di Vigilancia i ¡Despertad! (Mateo 24:​45-47) Nos tin e yudansa dje spiritu santu di Dios. Oracion regular i ferviente ta beneficiá nos masha tantu. Ancianonan cristian nombrá ta cla i dispuesto pa proveé yudansa i consuelo spiritual.

²⁰ Nos mes humildad i pacenshi ta altamente beneficioso den trata cu ansiedad cu por afligí nos. Specialmente importante ta confiansa absoluto den Jehova, pasobra nos fe ta bira mas fuerte segun cu nos ta experenciá su yudansa i direccion. En buelta, fe den Dios por prevení cu nos ta bira indebidamente molestiá. (Juan 14:⁠1) Fe ta impulsá nos pa busca promé e Reino i pa keda ocupá den e trabou gososo di Señor, cua por yuda nos enfrentá ansiedad cu éxito. Tal actividad ta laga nos sinti nos sigur entre esnan cu lo canta Dios su alabansanan pa tur eternidad. (Salmo 104:33) P’esei, laga nos sigui tira tur nos ansiedad riba Jehova.

[Study Questions]

1. Con ansiedad por afectá nos, i con esaki por ser ilustrá?

2. Kico Jesucristo a bisa tocante e “ansiedadnan di bida”?

3. Con “ansiedad” a ser definí, i kico ta algun di su causanan?

4. (a) Kico ta bon pa corda en cuanto hende i nan ansiedadnan? (b) Si nos ta experenciando ansiedad, kico nos por haci?

5. Con nos por actua na armonia cu Salmo 55:⁠22?

6. Segun Filipense 4:​6, 7, kico oracion por haci pa nos?

7. Ki papel ancianonan cristian por hunga den yuda nos enfrentá ansiedad cu éxito?

8, 9. Ki consuelo nos por saca for di 1 Pedro 5:​6-11?

10. Promé Pedro 5:​6, 7 ta referí indirectamente na cua tres cualidadnan cu por yuda aliviá ansiedad?

11. Con humildad por yuda nos enfrentá ansiedad cu éxito?

12. Con ansiedad tocante siguridad material por ser afectá si nos aplicá humildemente e palabranan di Hebreo 13:⁠5?

13, 14. (a) En cuanto awante cu pacenshi, ki ehempel e homber Job a proveé? (b) Sperando cu pacenshi riba Jehova por haci kico pa nos?

15. Pakico nos mester tin confiansa absoluto den Jehova?

16. Kico Jesucristo a bisa tocante ansiedad riba cosnan material?

17. Con nos por ilustrá e necesidad pa busca promé e Reino?

18. Ki evidencia tin cu tirando tur nos ansiedad riba Jehova realmente por yuda nos?

19, 20. (a) Cua ta algun manera cu nos por enfrentá ansiedad cu éxito? (b) Kico nos mester sigui haci cu tur nos ansiedad?

[Caption on page 24]

Bo sa pakico Jesus a bisa, “Stop di ansha”?

[Caption on page 25]

Con Lo Bo Contestá?

◻ Con nos por definí ansiedad?

◻ Cua ta algun manera cu nos por enfrentá ansiedad cu éxito?

◻ Con humildad i pacenshi por yuda aliviá ansiedad?

◻ Ora di enfrentá ansiedad, pakico ta vital pa bo tin confiansa absoluto den Jehova?

◻ Pakico nos mester sigui tira tur nos ansiedad riba Jehova?