Un Multitud Grandi Di Adoradornan Berdadero—di Unda Nan A Bini?

“Mira! un multitud grandi, . . . for di tur nacion i tribu i pueblo i lenga, pará dilanti e trono i dilanti e Lamchi.”—REVELACION 7:9.

 1. Pakico e visionnan profético den Revelacion ta di gran interes pa nos awe?

CERCA e fin dje promé siglo E.C., apostel Juan a mira visionnan di sucesonan maraviyoso en coneccion cu Jehova su propósito. Algun dje cosnan cu el a mira den vision ta ser cumplí awor aki mes. Otronan ta cerca di cumpli den e futuro cercano. Tur esakinan ta drei rond dje culminacion dramático di Jehova su magnífico propósito di santificá su nomber dilanti tur creacion. (Ezekiel 38:23; Revelacion 4:11; 5:13) Ademas, nan ta enbolbé e prospectonan di bida di nos cada un. Den ki sentido?

 2. (a) Kico apostel Juan a mira den su di cuater vision? (b) Ki preguntanan relacioná cu e vision aki nos ta bai considerá?

² Den e di cuater dje serinan di vision di Revelacion, Juan a mira angelnan wantando e bientunan di destruccion te ora “e esclabonan di nos Dios” ser seyá den nan frenta. Despues el a mira un desaroyo masha excitante—“un multitud grandi, cu ningun hende por a conta, for di tur nacion i tribu i pueblo i lenga,” uní den adorá Jehova i onra su Yu. Esakinan, a ser bisá na Juan, tabata hendenan cu lo a sali for dje tribulacion grandi. (Revelacion 7:1-17) Ken ta esnan describí como “esclabonan di nos Dios”? I ken lo forma e “multitud grandi” di sobrebibiente dje tribulacion? Abo lo ta un di nan?

Ken Ta “e Esclabonan di Nos Dios”?

 3. (a) Na Juan 10:1-18, con Jesus a ilustrá su relacion cu su siguidornan? (b) Kico Jesus a haci posibel pa su carnénan pa medio di su morto sacrificial?

³ Rond di cuater luna promé cu su morto, Jesus a papia di su mes como “e wardador excelente” i su siguidornan como “carnénan” pa kendenan lo el a entregá su bida. El a haci mencion special di carné cu el a haña den un curá di carné figurativo i cu despues di esei el a duna atencion special. (Juan 10:1-18)a Amorosamente, Jesus a entregá su alma na fabor di su carnénan, percurando e prijs di rescate cu tabata necesario pa nan por ser librá di picá i morto.

 4. Ken ta e proménan recogé como carné na armonia cu loke Jesus a bisa aki?

⁴ Sin embargo, promé cu el a haci esei, Jesus como e Wardador Excelente personalmente a recogé su disipelnan. E proménan a ser introducí na dje dor di Juan Bautista, e “portero” di Jesus su ilustracion. Jesus tabata buscando hende cu lo a reaccioná faborablemente n’e oportunidad di bira parti dje ‘desendencia componí di Abraham.’ (Génesis 22:18; Galatio 3:16, 29) El a cultivá den nan curason aprecio p’e Reino di cielu, i el a sigurá nan cu e tabata bai prepará un lugá pa nan den e cas di su Tata celestial. (Mateo 13:44-46; Juan 14:2, 3) El a bisa apropiadamente: “For dje dianan di Juan Bautista te awor e reino di cielu ta e meta cu hende ta forsa pa alcansá, i esnan cu ta haciendo esfuerso ta garand’e.” (Mateo 11:12) Esakinan cu a sigui’é pa asina alcansá e meta ei a resultá di ta den e curá di carné cu Jesus a papia di dje.

 5. (a) Ken ta “e esclabonan di nos Dios” na cua Revelacion 7:3-8 ta referí? (b) Kico ta mustra cu hopi hende mas lo uni den adoracion cu e israelitanan spiritual?

⁵ Na Revelacion 7:3-8, esnan cu exitosamente ta forsa pa alcansá e meta celestial ei ta ser referí tambe como “e esclabonan di nos Dios.” (Mira 1 Pedro 2:9, 16.) E 144.000 personanan cu ta ser mencioná ei ta solamente hudiunan natural? Esnan cu ta den e curá di carné figurativo di Jesus su ilustracion ta solamente hudiunan? Definitivamente cu no; nan ta miembro dje Israel spiritual di Dios, nan tur huntu socio cu Cristo den e desendencia spiritual di Abraham. (Galatio 3:28, 29; 6:16; Revelacion 14:1, 3) Naturalmente, eventualmente e tempu lo a yega ora cu e cantidad fiho lo a ser completá. Anto kico lo a sosodé e ora ei? Manera Bijbel a profetisá, otronan—un multitud grandi di nan—lo uni cu e israelitanan spiritual aki den adorá Jehova.—Zacarías 8:23.

E “Otro Carnénan”—Nan Ta Cristiannan Gentil?

 6. Na cua desaroyo Juan 10:16 ta señalá?

⁶ Despues di mencioná un curá di carné na Juan 10:7-15, Jesus a introducí un otro grupo den e cuadro, bisando: “Mi tin otro carnénan, cu no ta dje curá aki; nan tambe mi mester trece, i nan lo scucha na mi bos, i nan lo bira un solo tou, un solo wardador.” (Juan 10:16) Ken e “otro carnénan” ei ta?

 7, 8. (a) Pakico e idea cu e otro carnénan ta cristiannan gentil ta basá riba un suposicion incorecto? (b) Ki echonan en cuanto Dios su propósito p’e tera mester tin un efecto riba nos comprendimentu di ken e otro carnénan ta?

⁷ Comentaristanan di cristiandad generalmente ta di opinion cu e otro carnénan aki ta cristiannan gentil i cu esnan den e curá di carné mencioná anteriormente ta hudiunan, esnan cu tabata bou dje pacto di Ley, i cu ámbos grupo ta bai cielu. Pero Jesus a nace como hudiu i tabata di nacementu bou dje pacto di Ley. (Galatio 4:4) Ademas, esnan cu ta mira e otro carnénan como cristiannan gentil cu lo ser recompensá cu bida celestial no ta tumando na cuenta un aspecto importante dje propósito di Dios. Ora Jehova a crea e promé sernan humano i a pone nan den e hofi di Eden, el a haci cla cu su propósito tabata p’e tera ser habitá, p’e tera completo ser un paradijs, i pa su cuidadornan humano disfrutá di bida pa semper—cu e condicion cu nan ta respetá i obedecé nan Creador.—Génesis 1:26-28; 2:15-17; Isaías 45:18.

⁸ Ora Adam a peca, Jehova su propósito no a ser derotá. Amorosamente Dios a haci percuracion p’e desendientenan di Adam haña e oportunidad pa disfrutá di loke Adam a keda sin apreciá. Jehova a profetisá cu lo e lanta un libertador, un desendencia, mediante ken bendicionnan lo ser hací disponibel pa tur nacion. (Génesis 3:15; 22:18) E promesa ei no a nificá cu tur bon hende riba tera lo a ser hibá cielu. Jesus a siña su siguidornan pidi: “Laga bo reino bini. Laga bo boluntad sosodé, mescos cu den cielu, tambe riba tera.” (Mateo 6:9, 10) No hopi tempu promé cu el a papia e ilustracion registrá na Juan 10:1-16, Jesus a bisa su disipelnan cu tabata solamente na un “trupa chikitu” su Tata a aprobá di duna e Reino celestial. (Lucas 12:32, 33) Pues ora nos ta lesa Jesus su ilustracion di su mes como e Wardador Excelente cu ta entregá su alma na fabor di su carnénan, lo ta un eror pa excluí for dje cuadro e mayoria di esnan cu Jesus ta trece bou di su cuido amoroso, esnan cu ta bira súbditonan terenal di su Reino celestial.—Juan 3:16.

 9. For di 1884 caba, kico tabata e identidad dje otro carnénan segun e Studiantenan di Bijbel?

⁹ For di 1884 caba, e Toren di Vigilancia [na ingles] a identificá e otro carnénan como hende cu lo ser duná oportunidad pa biba riba e tera aki bou di condicionnan cu lo cumpli cu e propósito original di Dios. E Studiantenan di Bijbel ei di promé a realisá cu algun dje otro carnénan aki lo ta hende cu a biba i muri promé cu Jesus su ministerio terenal. Sin embargo, tabatin algun detaye cu nan no a comprendé corectamente. Por ehempel, nan a pensa cu e recogementu dje otro carnénan lo a tuma lugá despues cu tur esnan ungí a ricibí nan recompensa celestial. Tog, nan a realisá definitivamente cu e otro carnénan no tabata simplemente cristiannan gentil. E oportunidad pa bira un dje otro carnénan ta habrí pa tantu hudiu como gentil, pa hende di tur nacion i rasa.—Compará cu Echo 10:34, 35.

10. Pa nos por ta esnan ken Jesus realmente ta mira como su otro carnénan, kico mester ta cierto di nos?

¹⁰ Pa cuadra cu e descripcion cu Jesus a duna, e otro carnénan mester ta hende cu, sin importá nan antecedencia racial of étnico, ta reconocé Jesucristo como e Wardador Excelente. Kico esei ta incluí? Nan mester manifestá mansedumbre i un boluntad pa ser guiá, cualidadnan cu ta característica di carné. (Salmo 37:11) Mescos cu ta e caso cu e trupa chikitu, nan mester “conocé [e wardador excelente su] bos” i no permití nan mes ser desviá dor di otronan cu por purba influenciá nan. (Juan 10:4; 2 Juan 9, 10) Nan mester comprendé e importancia di loke Jesus a haci ofreciendo su alma na fabor di su carnénan i ehercé pleno fe den e percuracion ei. (Echo 4:12) Nan mester “scucha” n’e bos dje Wardador Excelente ora e ta insta nan pa rindi sirbishi sagrado solamente na Jehova, pa sigui busca promé e Reino, pa keda separá for dje mundu, i pa mustra amor di sacrificio propio un na otro. (Mateo 4:10; 6:31-33; Juan 15:12, 13, 19) Bo ta cuadra cu e descripcion ei di esnan cu Jesus ta considerá su otro carnénan? Bo kier cuadra cuné? Ki un relacion precioso ta bira disponibel pa tur cu berdaderamente ta bira Jesus su otro carnénan!

Respet pa Autoridad di Reino

11. (a) Den e señal di su presencia, kico Jesus a bisa tocante e carné i e cabritunan? (b) Ken ta e rumannan na kende Jesus ta referí?

¹¹ Vários luna despues cu el a duna e ilustracion mencioná ariba, atrobe Jesus tabata den Jerusalem. Ora e tabata sintá riba e Ceru di Olijfi cu bista riba e área dje tempel, el a duna su disipelnan detayenan di ‘e señal di su presencia i di e conclusion dje sistema di cosnan.’ (Mateo 24:3) Atrobe el a papia dje recogementu di carnénan. Entre otro cosnan, el a bisa: “Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso. I tur e nacionnan lo ser reuní su dilanti, i lo e separá hende un for di otro, mescos cu un wardador ta separá carné for di cabritu. I lo e pone e carnénan na su man drechi, pero e cabritunan na su man robes.” Den e comparacion aki, Jesus a mustra cu esnan cu dje manera ei ta haña atencion dje Rey lo ser husgá riba e base di con nan a trata su “rumannan.” (Mateo 25:31-46) Ken e rumannan aki ta? Nan ta cristiannan ungí cu spiritu i p’esei ta “yunan di Dios.” Jesus ta e Yu primogénito di Dios. P’esei, nan ta rumannan di Cristo. Nan ta “e esclabonan di nos Dios” mencioná na Revelacion 7:3, esnan scogí for di entre humanidad pa participá cu Cristo den su Reino celestial.—Romano 8:14-17.

12. Pakico e manera cu hende ta trata cu e rumannan di Cristo ta di gran importancia?

¹² E manera cu otro sernan humano ta trata cu e herederonan aki dje Reino ta di vital importancia. Abo ta mira nan manera Jesucristo i Jehova ta mira nan? (Mateo 24:45-47; 2 Tesalonicense 2:13) Un persona su actitud pa cu esnan ungí aki ta reflehá su actitud pa cu Jesucristo mes i pa cu su Tata, e Soberano Universal.—Mateo 10:40; 25: 34-46.

13. Te na ki grado e Studiantenan di Bijbel na 1884 a comprendé e comparacion dje carné i e cabritunan?

¹³ Den su edicion di augustus 1884, e E Toren di Vigilancia [na ingles] corectamente a mustra cu e “carnénan” den e comparacion aki ta esnan cu lo tin poní nan dilanti e prospecto di bida perfecto riba tera. Tambe e rumannan a comprendé cu e comparacion mester tin aplicacion ora Cristo ta reinando for di su glorioso trono celestial. Sin embargo, n’e tempu ei nan no a dicerní claramente ki ora lo el a cuminsá cu e trabou di separacion describí ei of cuantu tempu lo el a dura.

14. Con un discurso di congreso na 1923 a yuda e Studiantenan di Bijbel comprendé e tempu cu e comparacion profético di Jesus tabatin cu ser cumplí?

¹⁴ Sin embargo, na 1923, den un discurso di congreso, J. F. Rutherford, e tempu ei presidente di Watch Tower Society, a clarificá e tempu p’e cumplimentu dje comparacion dje carné i e cabritunan. Pakico? En parte, pasobra e comparacion ta mustra cu e rumannan dje Rey—por lo ménos algun di nan—ainda lo ta riba tera. Entre sernan humano, solamente su siguidornan ungí cu spiritu berdaderamente por ser yamá su rumannan. (Hebreo 2:10-12) Esakinan lo no ta riba tera atrabes dje Mil Aña, dunando hende oportunidad di haci bon na nan den e maneranan cu Jesus a describí.—Revelacion 20:6.

15. (a) Ki desaroyonan a yuda e Studiantenan di Bijbel identificá corectamente e carnénan di Jesus su comparacion? (b) Con e carnénan a duna evidencia di nan aprecio p’e Reino?

¹⁵ Den e discurso ei na 1923, un esfuerso a ser hací pa identificá esnan cu ta cuadra cu e descripcion di Señor dje carné i e cabritunan, pero otro asuntunan mester a ser comprendé promé cu e pleno nificacion dje comparacion lo tabata claro. Durante e siguiente añanan, Jehova progresivamente a trece e detayenan importante aki na atencion di su sirbidornan. Esakinan a incluí e comprendimentu claro, na 1927, cu “e esclabo fiel i discreto” ta henter e cuerpo di cristiannan ungí cu spiritu riba tera; tambe e comprendimentu, na 1932, dje necesidad pa identificá bo mes sin miedu cu Jehova su sirbidornan ungí, manera Jonadab a haci cu Jehú. (Mateo 24:45; 2 Rey 10:15) N’e tempu ei, a base di Revelacion 22:17, esnan semehante na carné aki a ser animá specíficamente pa participá den hiba e mensahe di Reino na otronan. Nan aprecio p’e Reino Mesiánico lo a impulsá nan pa no simplemente extendé bondad humanitario n’e ungínan di Señor sino pa dedicá nan bida na Jehova mediante Cristo i pa bira estrechamente asociá cu su ungínan, participando celosamente den e trabou cu nan ta haciendo. Abo ta haciendo esei? Na esnan cu ta haci’é, e Rey lo bisa: “Bini, boso cu a ser bendicioná dor di mi Tata, heredá e reino prepará pa boso for dje fundamentu dje mundu.” Dilanti nan lo tin e prospecto magnífico di bida eterno den perfeccion den e dominio terenal dje Reino.—Mateo 25:34, 46.

E “Multitud Grandi”—Unda Nan Ta Bai?

16. (a) Ki conceptonan robes e Studiantenan di Bijbel di promé tabatin relacioná cu e identidad dje multitud grandi, di Revelacion 7:9? (b) Na ki tempu i riba ki base nan punto di bista a ser corigí?

¹⁶ Pa un tempu Jehova su sirbidornan a kere cu e multitud grandi di Revelacion 7:9, 10 tabata diferente for dje otro carnénan di Juan 10:16 i e carnénan di Mateo 25:33. Debí cu Bijbel ta bisa cu nan ta “pará dilanti e trono,” e rumannan a kere cu nan lo ta den cielu, no riba trononan, reinando como co-heredero cu Cristo, sino den un lugá secundario dilanti dje trono. Nan a ser considerá como cristiannan ménos fiel, esnan cu no a mustra un spiritu di berdadero sacrificio propio. Na 1935 e punto di bista ei a ser corigí.b Un examinacion di Revelacion 7:9 den lus di textonan manera Mateo 25:31, 32 a haci cla cu hende aki riba tera lo por ta “dilanti e trono.” Tambe e examinacion a mustra cu Dios no tin dos norma di fieldad. Tur persona cu tin su aprobacion mester mantené integridad na dje.—Mateo 22:37, 38; Lucas 16:10.

17, 18. (a) Ki factor a hiba n’e gran aumento, desde 1935, den e cantidad di hende cu ta anticipando bida eterno riba tera? (b) Den ki trabou vital esnan dje multitud grandi ta participando celosamente?

¹⁷ Pa hopi aña Jehova su pueblo a papia tocante e promesanan di Dios relacioná cu e tera. Pa motibu di loke nan a spera pa sosodé aya den añanan 20, nan a proclamá cu “Miyones di Hende Na Bida Awor Lo No Muri Nunca.” Pero no tabatin miyones di hende cu a aceptá e percuracionnan di Dios pa bida n’e tempu ei. Den e mayoria cu sí a aceptá e berdad, spiritu santu a engendrá e speransa di bida celestial. Sin embargo, specialmente desde 1935, un cambio notabel a tuma lugá. No ta asina cu E Toren di Vigilancia a ignorá e speransa di bida eterno riba tera. Pa décadanan Jehova su sirbidornan a papia tocante esaki i a busca ken ta cuadra cu e descripcion bíblico. Pero, na Jehova su debido tempu el a dirigí asuntunan pa e miembronan prospectivo aki dje multitud grandi manifestá nan mes.

¹⁸ E registronan di asistencia disponibel ta mustra cu pa hopi aña mayoria di esnan cu a asistí na Memorial a tuma dje pan i biña. Pero dentro di 25 aña despues di 1935, e asistencia n’e Memorial anual dje morto di Cristo a subi drásticamente na cien biaha mas tantu e cantidad di esnan cu a participá dje emblemanan. Ken e otronan aki tabata? Miembronan prospectivo dje multitud grandi. Claramente, Jehova su tempu a yega pa recogé nan i pa prepará nan pa sobrebibí e tribulacion grandi djis cerca. Manera a ser profetisá, nan a bini “for di tur nacion i tribu i pueblo i lenga.” (Revelacion 7:9) Nan ta participando celosamente den e trabou cu Jesus a profetisá ora el a bisa: “E bon nobo di reino aki lo ser predicá den tur e tera habitá pa un testimonio na tur nacion; i anto e fin lo yega.”—Mateo 24:14.

[Notanan]

Kico Ta Bo Comentario?

◻ Pakico e vision den Revelacion capítulo 7 ta di interes special?

◻ Pakico e otro carnénan di Juan 10:16 no ta limitá na cristiannan gentil?

◻ Kico mester ta e caso di esnan cu ta cuadra cu e descripcion bíblico dje otro carnénan?

◻ Con e comparacion dje carné i e cabritunan ta resaltá respet pa autoridad di Reino?

◻ Kico ta indicá na ki momento Jehova su tempu a yega pa recogé e multitud grandi di Revelacion 7:9?