Bibando Conforme Nos Dedicacion “Dia Tras Dia”

“Si cualkier hende kier siguí mi, lagu’é nenga su mes i coge su staca di tormento dia tras dia i siguí mi continuamente.”​—⁠LUCAS 9:⁠23.

1. Cua ta un manera cu nos por midi nos éxito como cristian?

“NOS tabata hombernan berdaderamente dedicá?” E contesta riba e pregunta aki, segun John F. Kennedy, e di 35 presidente di Merca, ta un factor den midi e éxito di esnan cu tin posicionnan di responsabilidad gubernamental. E pregunta lo por sirbi cu un nificacion mas profundo como un examinacion di nos éxito como minister cristian.

2. Con un diccionario ta definí e palabra “dedicacion”?

² Sin embargo, kico ta dedicacion? Webster’s Ninth New Collegiate Dictionary ta defini’é como “un acto of rito di dedicá na un ser divino of na un sirbishi sagrado,” “consagrá of apartá pa un propósito particular,” “debocion di sacrificio propio.” John F. Kennedy aparentemente tabata usa e palabra nificando “debocion di sacrificio propio.” Pa un cristian, dedicacion ta nificá hopi mas.

3. Kico ta dedicacion cristian?

³ Jesucristo a bisa su disipelnan: “Si cualkier hende kier sigui tras di mi, lagu’e nenga su mes i coge su staca di tormento i siguí mi continuamente.” (Mateo 16:24) Siendo apartá pa uso divino no ta enbolbé simplemente haci un acto di adoracion riba diadomingo of ora bishitá cierto lugá di adoracion. E ta enbolbé henter un persona su estilo di bida. Ser un cristian ta nificá nenga of rechasá bo mes miéntras cu bo ta sirbiendo e Dios cu Jesucristo a sirbi, Jehova. Ademas, un cristian ta coge su “staca di tormento” dor di cobra ánimo bou di cualkier sufrimentu cu por bini riba dje debí cu e ta un siguidor di Cristo.

E Ehempel Perfecto

4. Kico Jesus su bautismo a simbolisá?

⁴ Tempu cu Jesus tabata riba tera, el a demostrá kico dedicacion di bo mes na Jehova ta enbolbé. Su sintimentunan tabata: “Sacrificio i ofrenda bo no tabata kier, sino bo a prepará un curpa pa mi.” Anto el a agregá: “Mira! Mi a bini (den e rol dje buki ta pará skirbí tocante mi) pa haci bo boluntad, O Dios.” (Hebreonan 10:​5-7) Como miembro di un nacion dedicá, e tabata dedicá na Jehova for di nacementu. Tog, na cuminsamentu di su ministerio terenal, el a ofrecé su mes pa bautismo como símbolo dje presentacion di su mes pa haci e boluntad di Jehova, locual pa e lo a incluí ofrecé su bida como un sacrificio di rescate. Asina el a pone un ehempel pa cristiannan haci loke sea ta e boluntad di Jehova.

5. Con Jesus a demostrá un punto di bista ehemplar di cosnan material?

⁵ Despues di su bautismo Jesus a sigui un curso di bida cu finalmente a hib’é na un morto sacrificial. E no tabata interesá den gana placa of den hiba un bida comfortabel. Mas bien, su bida a drei rond di su ministerio. El a spierta su disipelnan pa “sigui . . . busca promé e reino i su husticia,” i e mes a biba conforme e palabranan aki. (Mateo 6:33) Wel, un biaha el a asta bisa: “Zoronan tin cueba i paranan di cielu tin lugá di sosegá, pero e Yu di hende no tin caminda di pone su cabes.” (Mateo 8:20) E por a adaptá su siñansanan p’e ranca placa for di su siguidornan. Siendo un carpinté e por a kita tempu for di su ministerio p’e traha un bunita artículo di mobilario pa bende pa asina e por a gana algun pida di plata extra. Pero e no a usa su abilidadnan pa busca prosperidad material. Como sirbidornan dedicá di Dios, nos ta imitando Jesus den tene e perspectiva corecto di cosnan material?​—⁠Mateo 6:​24-34.

6. Con nos por imitá Jesus den ser sirbidornan di Dios dedicá i cu un spiritu di sacrificio propio?

⁶ Poniendo su sirbishi na Dios promé, Jesus no a busca su propio interesnan. Su bida durante e tres aña i mei di su ministerio público tabata unu di sacrificio propio. Na un ocasion despues di un dia ocupá, sin sikiera a tuma e tempu pa come un cuminda, Jesus tabata dispuesto pa siña hende cu tabata “soyá i plamá manera carné sin wardador.” (Mateo 9:36; Marco 6:​31-34) Aunke e tabata “cansá dje biahe,” el a tuma e iniciativa pa papia cu un muher samaritano kende a bini n’e fuente di Jacob na Sicar. (Juan 4:​6, 7, 13-15) Semper el a considerá e bienestar di otronan promé cu esun di su mes. (Juan 11:​5-15) Nos por imitá Jesus dor di sacrificá generosamente nos propio interesnan pa sirbi Dios i otro hende. (Juan 6:38) Dor di pensa den término di con nos berdaderamente por agradá Dios mas bien cu haci solamente e mínimo rekerí, nos lo ta bibando conforme nos dedicacion.

7. Con nos por imitá Jesus den semper duna onor na Jehova?

⁷ Di ningun manera Jesus tabata tratando pa atraé atencion na su mes yudando hende. E tabata dedicá na Dios pa haci Su boluntad. Pues semper el a haci sigur cu Jehova, su Tata, a ricibí tur e gloria pa cualkier cos cu el a logra. Ora un cierto gobernante a yam’é “Bon Maestro,” usando e palabra “bon” como título, Jesus a corigi’é bisando: “Ningun hende ta bon, sino un so, Dios.” (Lucas 18:​18, 19; Juan 5:​19, 30) Mescos cu Jesus, nos ta lihé pa dirigí onor na Jehova en bes di na nos mes?

8. (a) Como un homber dedicá, con Jesus a apartá su mes for dje mundu? (b) Con nos mester imit’é?

⁸ Atrabes di su curso di bida dedicá riba tera, Jesus a demostrá cu el a apartá su mes pa sirbishi piadoso. El a mantené su mes limpi p’e por a ofrecé su mes como “un lamchi sin mancha i inmaculá” pa sirbi como e sacrificio di rescate. (1 Pedro 1:19; Hebreonan 7:26) El a warda tur e preceptonan dje Ley di Moises, cumpliendo asina cu e Ley ei. (Mateo 5:17; 2 Corintionan 1:20) El a biba conforme cu su mes siñansa riba asuntunan moral. (Mateo 5:​27, 28) Ningun hende por a hustamente acus’é di mal motivacion. En realidad, el a “odia maldad.” (Hebreonan 1:⁠9) Como esclabonan di Dios, laga nos imitá Jesus den mantené nos bida i asta nos motivacionnan limpi den Jehova su bista.

Ehempelnan Spiertador

9. Na ki ehempel spiertador Pablo a referí, i pakico nos mester considerá e ehempel aki?

⁹ Na contraste cu Jesus su ehempel, nos tin e ehempel spiertador dje israelitanan. Asta despues cu nan a declará cu nan lo haci tur loke Jehova a bisa nan haci, nan a keda sin haci su boluntad. (Daniel 9:11) Apostel Pablo a animá cristiannan pa siña for di loke a sosodé cu e israelitanan. Laga nos examiná algun incidente cu Pablo a referí na dje den su promé carta n’e corintionan i mira ki trampanan sirbidornan dedicá di Dios mester evitá den nos tempu.​—⁠1 Corintionan 10:​1-6, 11.

10. (a) Con e israelitanan a ‘deseá cosnan perhudicial’? (b) Pakico e israelitanan tabata mas responsabel e di dos biaha cu nan a murmurá tocante cuminda, i kico nos por siña for dje ehempel spiertador aki?

¹⁰ Na promé lugá, Pablo a spierta nos pa no “deseá cosnan perhudicial.” (1 Corintionan 10:⁠6) Esei por poné bo corda dje ocasion ora e israelitanan a keha cu nan tabatin solamente mana pa come. Jehova a manda sloke [patrishi] pa nan. Algu similar a sosodé rond di un aña mas promé den e desierto di Sin, djis promé cu e israelitanan a declará nan dedicacion na Jehova. (Exodo 16:​1-3, 12, 13) Pero e situacion no tabata exactamente mescos. Ora Jehova a percurá sloke e promé biaha, e no a tene e israelitanan responsabel pa nan murmuramentu. Sin embargo, e biaha aki sí cosnan tabata diferente. “Ainda e carni tabata entre nan djentenan, promé cu e por a ser di kou, ora e rabia di Jehova a cende contra e pueblo, i Jehova a cuminsá heridá e pueblo cu un matansa sumamente grandi.” (Númeronan 11:​4-6, 31-34) Kico a cambia? Como un nacion dedicá, awor nan a ser tené responsabel pa nan accionnan. Nan falta di aprecio pa Jehova su provisionnan a pone nan keha contra Jehova, apesar cu nan a primintí di haci tur loke Jehova a papia! Kehando tocante Jehova su mesa ta similar awe. Algun persona no ta apreciá Jehova su provisionnan spiritual atrabes di “e esclabo fiel i discreto.” (Mateo 24:​45-47) Sin embargo, corda cu nos dedicacion ta rekerí pa nos tene na mente cu gratitud loke Jehova a haci pa nos i aceptá e alimento spiritual cu Jehova ta suministrá.

11. (a) Con e israelitanan a contaminá nan adoracion di Jehova cu idolatria? (b) Con nos por ser afectá pa un clase di idolatria?

¹¹ Siguientemente, Pablo a spierta: “Ni bira idólatra, manera algun di nan a bira.” (1 Corintionan 10:⁠7) Aki e apostel tabata refiriendo aparentemente n’e adoracion di bisé cu a tuma lugá net despues cu e israelitanan a cera e pacto cu Jehova na Ceru di Sínai. Kisas bo ta bisa, ‘Como sirbidor dedicá di Jehova, ami nunca lo cai den idolatria.’ Sin embargo, ripará cu for dje punto di bista dje israelitanan, nan no a stop di adorá Jehova; pero tog, nan a introducí un práctica di adoracion di bisé​—⁠algu repugnante pa Dios. Kico e forma di adoracion aki a enbolbé? E pueblo a haci sacrificio dilanti e bisé, i despues nan a “sinta pa come i bebe. Anto nan a lanta pa dibertí nan mes.” (Exodo 32:​4-6) Awe, algun persona por pretendé cu nan ta adorá Jehova. Pero kisas nan bida ta concentrá, no riba adoracion di Jehova, sino riba disfrute dje cosnan dje mundu aki, i nan ta purba ahustá nan sirbishi na Jehova rond dje cosnan aki. Ta cierto cu esaki no ta mes extremo cu buigmentu dilanti un bisé di oro, pero fundamentalmente e no ta masha diferente. Traha un dios for di bo propio deseo ta leu for di biba conforme bo dedicacion na Jehova.​—⁠Filipensenan 3:⁠19.

12. For dje experencia dje israelitanan cu Baal di Peor, kico nos ta siña tocante nengamentu di nos mes?

¹² Tabatin tambe un clase di entretenimentu enbolbí den e siguiente ehempel spiertador cu Pablo a mencioná. “Ni laga nos practicá fornicacion, manera algun di nan a cometé fornicacion, solamente pa cai, bintitres mil di nan den un dia.” (1 Corintionan 10:⁠8) E israelitanan, tentá dor di placer inmoral ofrecí dor dje yu muhernan di Moab, a ser hibá den adoracion di Baal di Peor na Sitim. (Númeronan 25:​1-3, 9) Nengando nos mes pa haci Jehova su boluntad lo incluí aceptá su normanan pa loke ta moralmente limpi. (Mateo 5:​27-30) Den e era aki di deterioro di normanan, nos ta ser recordá dje necesidad pa mantené nos mes limpi for di tur sorto di conducta inmoral, sometiendo nos mes n’e autoridad di Jehova pa dicidí loke ta bon i loke ta malu.​—⁠1 Corintionan 6:​9-11.

13. Con e ehempel di Finehas ta yuda nos comprendé loke dedicacion na Jehova ta incluí?

¹³ Aunke hopi persona a cai den e trampa di fornicacion na Sitim, algun sí a biba conforme e dedicacion nacional na Jehova. Di nan, Finehas tabata sobresaliente den celo. Ora el a haña bista di un hefe israelita treciendo un muher madianita den su tent, Finehas mesora a coge un lansa den su man i puñalá nan. Jehova a bisa Moises: “Finehas . . . a bira mi rabia for di riba e yunan di Israel pasobra e no a tolerá ningun rivalidad pa cu mi meimei di nan, di manera cu mi no a exterminá e yunan di Israel den mi insistencia riba debocion exclusivo.” (Númeronan 25:11) Tolerando absolutamente ningun rivalidad pa cu Jehova​—⁠esei ta loke dedicacion ta nificá. Nos no por permití nada tuma e lugá cu dedicacion na Jehova mester ocupá den nos curason. Nos celo pa Jehova tambe ta impulsá nos pa tene e congregacion limpi dor di informá e ancianonan di inmoralidad grave, no tolerand’e.

14. (a) Con e israelitanan a pone Jehova na prueba? (b) Con un dedicacion completo na Jehova ta yuda nos pa no “cansa”?

¹⁴ Pablo a referí na un otro ehempel spiertador: “Ni laga nos pone Jehova na prueba, manera algun di nan a pon’é na prueba, pa solamente perecé dor dje colebranan.” (1 Corintionan 10:⁠9) Aki Pablo tabata papiando dje tempu ora e israelitanan a keha contra Dios cerca Moises ora nan “a cuminsá cansa pa motibu dje caminda.” (Númeronan 21:⁠4) Abo a yega di haci e eror ei? Ora bo a dedicá bo mes na Jehova, bo a pensa cu Armagedon tabata djis tras di porta? Jehova su pacenshi tabata mas largu cu bo a spera? Corda, nos no a dedicá nos mes na Jehova solamente pa un cierto periodo di tempu of simplemente te cu Armagedon. Nos dedicacion ta sigui pa semper. Pues, anto, “laga nos no entregá den hacimentu di loke ta excelente, pasobra n’e debido tempu nos lo cosechá si nos no cansa.”​—⁠Galationan 6:⁠9.

15. (a) Contra ken e israelitanan a murmurá? (b) Con nos dedicacion na Jehova ta impulsá nos pa respetá autoridad teocrático?

¹⁵ Finalmente, Pablo a spierta tocante bira “murmurador” contra e sirbidornan nombrá di Jehova. (1 Corintionan 10:10) E israelitanan a murmurá amargamente contra Moises i Aron ora 10 dje 12 spionnan mandá pa investigá e tera di Canan a trece bek mal informenan. Nan asta a papia di reemplasá Moises como nan lider i bai bek Egipto. (Númeronan 14:​1-4) Awe, nos ta aceptá e liderato cu a ser duná na nos mediante e obramentu di Jehova su spiritu santu? Mirando e mesa spiritual abundante cu a ser proveé dor dje clase di esclabo fiel i discreto, ta bisto ken Jesus ta usando pa repartí “cuminda n’e debido tempu.” (Mateo 24:45) Dedicacion di henter alma na Jehova ta rekerí pa nos mustra respet pa su sirbidornan nombrá. Laga nos nunca bira manera algun murmurador djawe cu a acudí na un lider nobo, na moda di papia, pa hiba nan bek den e mundu.

Esei Ta Tur Loke Mi Por?

16. Ki preguntanan sirbidornan di Dios dedicá lo mester haci nan mes?

¹⁶ E israelitanan lo no a cai den tal erornan penoso si nan a corda cu nan dedicacion na Jehova tabata incondicional. Diferente for dje israelitanan sin fe ei, Jesucristo a biba conforme su dedicacion te na final. Como siguidornan di Cristo, nos ta imitá su ehempel di debocion di henter alma, hibando nos bida “no mas p’e deseonan di hende, sino p’e boluntad di Dios.” (1 Pedro 4:2; compará cu 2 Corintionan 5:15.) Awe, Jehova su boluntad ta pa “tur sorto di hende ser salbá i yega na un conocimentu exacto dje berdad.” (1 Timoteo 2:⁠4) Cu e obhetivo ei, nos ta predicá “e bon nobo dje reino aki” promé cu e fin yega. (Mateo 24:14) Cuantu esfuerso nos ta hinca den e sirbishi aki? Nos lo mester puntra nos mes, ‘Esei ta tur loke mi por?’ (2 Timoteo 2:15) Circunstancianan ta varia. Jehova ta contentu pa ser sirbí “segun loke un persona tin, no segun loke un persona no tin.” (2 Corintionan 8:12; Lucas 21:​1-4) Ningun hende mester husga e profundidad i sinceridad dje dedicacion di un otro. Cada persona mester evaluá personalmente e grado di su mes debocion na Jehova. (Galationan 6:⁠4) Nos amor pa Jehova mester impulsá nos pa puntra, ‘Con mi por haci Jehova felis?’

17. Kico ta e relacion entre debocion i aprecio? Ilustrá.

¹⁷ Nos debocion na Jehova ta bira mas profundo segun cu nos ta crece den nos aprecio p’e. Un hobencito di 14 aña di edad na Hapon a dedicá su mes na Jehova i a simbolisá e dedicacion aki mediante bautismo bou di awa. Mas despues, e kier a sigui un educacion mas haltu i bira un científico. E nunca a pensa dje ministerio di tempu completo, pero como un sirbidor dedicá, e no kier a bandoná Jehova i su organisacion visibel. Pa realisá su meta di carera, el a asistí na un universidad. Ei el a mira con graduadonan dje universidad a ser forsá pa dedicá henter nan bida na nan compania of na nan estudio. El a puntra su mes, ‘Kico mi ta haciendo aki? Realmente mi por sigui nan caminda di bida i dedicá mi mes na trabou seglar? Mi no ta dedicá caba na Jehova?’ Cu aprecio renobá, el a bira un pionero regular. Su comprendimentu di su dedicacion a bira mas profundo i a conmov’é pa determiná den su curason pa bai cualkier caminda cu tabatin mester di dje. El a asistí n’e Scol di Entrenamentu Ministerial i a ricibí un asignacion pa sirbi como misionero den un pais stranhero.

18. (a) Dedicacion na Jehova ta enbolbé cuantu cos? (b) Ki recompensa nos por cosechá for di nos dedicacion na Jehova?

¹⁸ Dedicacion ta enbolbé henter nos bida. Nos mester nenga nos mes i sigui “dia tras dia” Jesus su ehempel excelente. (Lucas 9:23) Despues di a nenga nos mes, nos no ta pidi Jehova un verlof. Nos bida ta cumpli cu e principionan cu Jehova ta establecé pa su sirbidornan. Asta den áreanan unda nos por haci un scogementu personal, ta beneficioso pa nos mira si nos ta haciendo nos best pa hiba un bida dedicá na Jehova. Segun cu nos ta sirbi’é dia tras dia, haciendo nos sumo posibel pa agrad’é, nos lo tin éxito como cristian i lo ser bendicioná cu un sonrisa di aprobacion for di Jehova, Esun cu ta digno di nos debocion di henter alma.

Bo Por Splica?

◻ Kico dedicacion a enbolbé pa Jesucristo?

◻ Pakico nos mester evitá di murmurá contra Jehova?

◻ Den ki manera nos por evitá di laga idolatria infiltrá sutilmente den nos bida?

◻ Recordando kico lo yuda nos pa no “cansa” den hacimentu dje boluntad di Dios?

[Plachi na página 17]

Cristiannan dedicá “no ta entregá den hacimentu di loke ta excelente”