Gobernantenan Den E Region Spiritual
KEN ta goberná e mundu? Ta existí un sorto di supervision sobrehumano? Of Dios a laga hende pa nan mes cuenta? Den nos buscamentu di contesta p’e preguntanan aki, laga nos considerá promé un incidente cu a tuma lugá durante e ministerio terenal di Jesucristo.
Djis despues di su bautismo, Jesus a ser tentá dor di un criatura spiritual invisibel yamá Satanas e Diabel. Citando un dje tentacionnan, Bijbel ta bisa: “E Diabel a hiba [Jesus] cuné na un ceru excepcionalmente haltu, i a mustr’é tur e reinonan dje mundu i nan gloria.” (Mateo 4:8) Satanas a bisa Jesus e ora ei: “Lo mi duná bo tur e autoridad aki i e gloria di nan, pasobra el a ser entregá na mi, i na ken cu mi kier mi ta dun’é. P’esei, si bo haci un acto di adoracion dilanti mi, tur esei lo ta di bo.”—Lucas 4:6, 7.
Satanas a afirmá cu e ta poseé autoridad riba tur e reinonan, of gobiernunan, dje mundu aki. Jesus a nenga e afirmacion aki? No. En realidad, el a confirm’é na un otro ocasion ora el a referí na Satanas como “e gobernante dje mundu.”—Juan 14:30.
Segun Bijbel, Satanas ta un angel malbado cu ta poseé gran poder. Apostel cristian Pablo ta asociá Satanas cu “e forsanan spiritual malbado” i ta papia di nan como “e gobernantenan di mundu dje scuridad aki.” (Efesionan 6:11, 12) Ademas, apostel Juan a bisa cu “e mundu henter ta drumí den poder dje malbado.” (1 Juan 5:19) E buki bíblico di Revelacion ta declará cu Satanas ta “gañando henter e tera habitá.” (Revelacion 12:9) Den términonan simbólico, Revelacion ta describí Satanas tambe como un dragon cu ta duna e sistema político dje mundu “su poder i su trono i gran autoridad.”—Revelacion 13:2.
Sucesonan di mundu ta duna testimonio tambe cu tin un poder malbado ta activo, manipulando hende pa nan daño. Pa ki otro motibu gobiernunan humano ta faya pa promové pas? Kico otro ta causa cu hende ta odia i mata otro? Hororisá dor dje matansa i morto den un guera civil, un testigo ocular a bisa: “Mi no sa con bini e atrocidad aki por a sosodé. E ta mas cu odio. E ta un spiritu malbado cu ta usando e sernan humano aki pa destruí un e otro.”
Un Persona Real na Oposicion cu Dios
Awe, hopi hende no ta kere den Satanas e Diabel. Tog, e no ta simplemente e cualidad di maldad den humanidad, manera algun ta kere. Tantu Bijbel como sucesonan di mundu ta mustra cu e ta un persona real. Ademas, Satanas ta liña recta na oposicion cu Jehova Dios. Naturalmente, Satanas no ta igual cu Dios. Siendo cu Jehova ta e Creador todopoderoso, e ta e Gobernante legítimo riba henter creacion.—Revelacion 4:11.
Dios no a crea un criatura malbado na oposicion cu su mes. Mas bien, un dje ‘yunan angelical di Dios’ a desaroyá un deseo egoista pa tuma pa su mes e adoracion cu legítimamente ta pertenecé na Jehova. (Job 38:7; Santiago 1:14, 15) E deseo aki a hib’é na cuminsá un curso di rebelion contra Dios. Dor di rebelá, e criatura spiritual aki a haci su mes Satanas (nificando “resistidor”) i Diabel (nificando “calumniador”). Considerando tur esaki, bo por puntra bo mes pakico Satanas a ser permití pa goberná e mundu.
Pakico Satanas A Ser Permití pa Goberná
Bo ta corda kico Satanas a bisa Jesus tocante gobernacion riba e tera? “Lo mi duná bo tur e autoridad aki . . . pasobra el a ser entregá na mi,” Satanas a bisa. (Lucas 4:6) E declaracion ei ta mustra cu Satanas e Diabel ta ehercé autoridad solamente cu permit di Dios. Pero pakico Dios ta tolerá Satanas?
E contesta riba e pregunta ei ta relacioná cu sucesonan den e hofi di Eden, caminda Satanas a cuminsá su carera como gobernante di mundu. Ei Satanas a insinuá cu Dios tabata gobernando na un mal manera dor di retené algu bon for dje promé homber i muher, Adam i Eva. Segun Satanas, si nan a come e fruta prohibí dor di Dios, nan lo a ser librá. Adam i Eva lo tabata liber i independiente for di Jehova. Nan lo tabata manera Dios mes!—Génesis 2:16, 17; 3:1-5.
Gañando den e manera aki i seduciendo Eva i mediante dje induciendo Adam pa kibra e ley di Dios, Satanas a trece e promé pareha humano bou di su liderato i control. Asina e Diabel a bira nan dios, unu na oposicion cu Jehova. Sin embargo, en bes di liberacion, Adam i Eva a experenciá sclabitud na Satanas, na picá i na morto.—Romanonan 6:16; Hebreonan 2:14, 15.
Na armonia cu su husticia perfecto, mesora Jehova por a ehecutá Satanas i su dos siguidornan nobo. (Deuteronomio 32:4) Sin embargo, tabatin un cuestion moral enbolbí. Satanas a desafiá e rectitud di Jehova su manera di goberná. Den su sabiduria, Dios a permití tempu pasa di manera cu prueba por a ser duná cu independencia for di dje ta trece desaster. Jehova a permití e rebeldenan sigui biba pa un tempu, permitiendo Adam i Eva haña yu.—Génesis 3:14-19.
Aunke mayoria dje desendencia di Adam no a someté nan na Jehova su gobernacion, Dios su trato cu Su adoradornan a demostrá e superioridad di su mando. Debido reconocimentu di Jehova su autoridad ta trece felicidad i berdadero siguridad. N’e otro banda, miseria i insiguridad a resultá for di gobernacion humano bou dje influencia di Satanas. Sí, “hende a dominá hende pa su daño.” (Eclesiástes 8:9) Hende no a haña berdadero siguridad i felicidad duradero bou di gobernacion humano den e mundu aki drumí den poder di Satanas. Sin embargo, tin un motibu sólido pa optimismo.
Satanas Su Tempu Ta Corticu!
Satanas su influencia riba tera ta temporal. Jehova lo no tolerá gobernacion satánico pa hopi tempu mas! Pronto e Diabel lo ser poné fuera di accion. Un gobernante nobo lo tuma control dje tera, un rey hustu scogí dor di Dios mes. E Rey ei ta Jesucristo. Relacioná cu su entronisacion den cielu, Revelacion ta bisa: “E reino di mundu sí a bira e reino di nos Señor [Jehova] i di su Cristo.” (Revelacion 11:15) Cronologia di Bijbel, huntu cu e cumplimentu di profecia bíblico, ta duna prueba cu e suceso aki a tuma lugá na aña 1914.—Mateo 24:3, 6, 7.
Bijbel ta describí tambe loke a sosodé djis despues di Jesus su entronisacion. E ta bisa: “Guera a cuminsá den cielu: Miguel [Jesucristo] i su angelnan a batayá cu e dragon [Satanas e Diabel], i e dragon i su angelnan a batayá pero no a triunfá, ni un lugá no a ser hañá mas pa nan den cielu. Pues e dragon grandi a ser tirá abou, e colebra original, esun yamá Diabel i Satanas, cu ta gaña henter e tera habitá; el a ser tirá abou n’e tera, i su angelnan a ser tirá abou huntu cuné.”—Revelacion 12:7-9.
Kico lo ta e resultado di Satanas su expulsion for di cielu? Esnan cu ta den cielu por a alegrá, pero kico dje habitantenan dje tera? “Ai dje tera i dje laman,” Revelacion 12:12 ta bisa, “pasobra e Diabel a baha cerca boso, teniendo gran rabia, sabiendo cu e tin un periodo corticu di tempu.” En berdad, e tiramentu di Satanas for di cielu a trece ai p’e tera. The Columbia History of the World ta declará: “E gran catástrofe dje Guera di Cuater Aña di 1914-1918 . . . a mustra e mundu occidental cu e no por a protehá civilisacion for di su propio stupides of impulso malbado. E spiritu dje mundu occidental nunca a realmente recuperá for dje desintegracion ei.”
E ainan dje generacion aki ta marcá cu muchu mas cu un spiritu aplastá. Jesus a profetisá: “Nacion lo lanta contra nacion i reino contra reino, i lo tin scarcedad di cuminda i temblor den un lugá tras di otro.” Tambe el e profetisá di pest. (Mateo 24:7, 8; Lucas 21:11) Ademas, Bijbel ta bisa cu den “e último dianan” di Satanas su sistema di cosnan, hopi lo ta “stimador di nan mes, stimador di placa, . . . desobediente na mayornan, . . . no dispuesto na ningun acuerdo.” Tambe hende lo ta “stimador di placer mas bien cu stimador di Dios.”—2 Timoteo 3:1-5.
Guera, pest, scarcedad di cuminda, temblor i un deterioro di balornan moral—tur e cosnan ei a tuma lugá riba un escala sin precedente desde 1914, net manera Bijbel a pronosticá. Nan ta indicá cu e enemigu furioso di Dios i di hende—Satanas e Diabel—a ser tirá for di cielu i awor mester limitá su rabia n’e dominio dje tera. Pero Bijbel ta mustra tambe cu Satanas lo no ser permití pa funcioná pa hopi tempu mas. E tin solamente “un periodo corticu di tempu” mas te Armagedon, ora Dios destruí e sistema di mundu cu Satanas ta dirigí.
Kico lo sosodé cu Satanas ora e periodo breve ei terminá? Apostel Juan a skirbi: “Mi a mira un angel baha for di cielu cu e yabi dje abismo i un cadena grandi den su man. I el a gara e dragon, e colebra original, cu ta e Diabel i Satanas, i a mar’é pa mil aña. I el a tir’é den e abismo i a cer’é i a sey’é riba dje.” (Revelacion 20:1-3) Ki un alivio pa humanidad cu ta sufriendo!
Alegrando Bou di Gobernacion di Reino
Cu Satanas kitá for di caminda, e Reino di Dios bou di Jesucristo lo tuma control completo di asuntunan di humanidad. En bes di tin hopi gobiernu riba tera, solamente un gobiernu celestial lo permanecé pa goberná riba henter e planeta. Guera lo ta un cos di pasado, i pas lo prevalecé tur caminda. Bou dje gobernacion dje Reino di Dios, tur hende lo biba huntu den un hermandad amoroso.—Salmo 72:7, 8; 133:1; Daniel 2:44.
Ki sorto di gobernante Jesus lo resultá di ta? Ora e tabata riba tera, el a manifestá un amor profundo pa hende. Jesus compasivamente a duna cuminda na esnan hambrá. El a cura e enfermonan i a restorá bista n’e ciegunan, abla n’e mudanan, i sanacion n’e cohonan. Jesus asta a trece e mortonan bek na bida! (Mateo 15:30-38; Marco 1:34; Lucas 7:11-17) E milagernan ei tabata un bista di antemano dje cosnan maraviyoso cu lo e haci den futuro como Rey. Ki maraviyoso lo ta pa tin un gobernante bondadoso asina!
Esnan cu ta someté nan na Jehova su soberania lo experenciá bendicionnan sin fin. E Scritura ta primintí: “N’e tempu ei wowo dje ciegunan lo ser habrí, i orea mes dje surdunan lo ser destapá. N’e tempu ei esun coho lo subi ceru net manera un biná ta haci, i e lenga di esun muda lo sclama cu alegria.” (Isaías 35:5, 6) Señalando n’e dia grandioso ei, apostel Juan a skirbi: “Mi a tende un bos duru for dje trono bisa: ‘Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no existí morto mas, ni lamento ni sclamacion ni dolor lo no existí mas. E cosnan anterior a pasa caba.’ ”—Revelacion 21:3, 4.
E deleitenan cu e gobernacion di Jehova Dios ta duna mediante su Yu, Jesucristo, lo haci mas cu compensá pa cualkier sufrimentu cu nos por a experenciá den e sistema actual di cosnan dominá pa Satanas e Diabel. Den Dios su mundu nobo primintí, hende lo no puntra nan mes, ‘Ken realmente ta gobernando?’ (2 Pedro 3:13) Humanidad obediente lo ta felis i sigur den e dominio terenal dje Gobernantenan amoroso den e region spiritual, Jehova i Cristo. Pakico no hacié bo speransa pa ta entre nan súbditonan?
[Plachi na página 7]
Humanidad lo tin siguridad den e region terenal dje Reino di Dios
[Plachi Rekonosementu na página 4]
Foto di NASA