“Mi Yugo Ta Suave I Mi Carga Ta Lihe”

“Tuma mi yugo riba boso i siña di mi.”​—⁠MATEO 11:⁠29.

1, 2. (a) Kico bo a experenciá den bida cu ta duna bo refrescamentu? (b) Kico un hende mester haci pa ricibí e refrescamentu cu Jesus a primintí?

UN BAÑO refrescante na fin di un dia cayente i húmedo, of un bon soño di anochi despues di un biahe largu i pisá​—⁠o, ki refrescante! Asina ta ora un carga pisá ser kitá of ora picá i delitunan ta ser pordoná. (Proverbionan 25:25; Echonan 3:19) E refrescamentu cu tal experencianan animador ta producí ta rehubenecé nos, i nos ta ser yená cu energia pa haci mas.

² Tur persona cu ta sinti nan cargá i cansá por bini cerca Jesus, pasobra el a primintí nan net esei​—⁠refrescamentu. Sin embargo, pa haña e refrescamentu cu ta asina deseabel, tin algu cu un hende mester ta dispuesto pa haci. “Tuma mi yugo riba boso i siña di mi,” Jesus a bisa, “i boso lo haña refrescamentu pa boso alma.” (Mateo 11:29) Kico e yugo aki ta? Con e ta trece refrescamentu?

Un Yugo Suave

3. (a) Ki clase di yugo tabata ser usá den tempu bíblico? (b) Ki nificacion figurativo ta ser asociá cu un yugo?

³ Bibando den un sociedad di agricultura, Jesus i su oyentenan tabata sa bon kico ta un yugo. Básicamente, un yugo ta un biga largu di palu cu dos hol n’e parti abou pa nan pas riba e garganta di dos animal di hala carga, generalmente bué [os], pa mara nan huntu pa hala un ploeg, garoshi of algun otro carga. (1 Samuel 6:⁠7) Yugo pa hende tambe a ser usá. Esakinan tabata simpel biganan of palunan cargá riba e scoudernan cu un peso mará na cada banda. Cu nan, trahadornan por a hiba carga pisá. (Jeremías 27:2; 28:​10, 13) Debí na su asociacion cu carga i trabou, hopi biaha yugo ta ser usá figurativamente den Bijbel pa simbolisá dominacion i control.​—⁠Deuteronomio 28:48; 1 Reynan 12:4; Echonan 15:⁠10.

4. Kico e yugo cu Jesus a ofrecé na esnan cu ta bini cerca dje ta simbolisá?

⁴ Kico, anto, ta e yugo cu Jesus a invitá esnan cu bini cerca dje pa refrescamentu pa tuma riba nan? Corda cu el a bisa: “Tuma mi yugo riba boso i siña di mi.” (Mateo 11:29) Un persona cu ta siña ta un disipel. Pues, tuma Jesus su yugo ta nificá simplemente bira su disipel. (Filipensenan 4:⁠3) Sin embargo, esaki ta rekerí mas cu djis conocé su siñansanan. E ta rekerí accion na armonia cu nan​—⁠haci e trabou cu el a haci i biba manera el a biba. (1 Corintionan 11:1; 1 Pedro 2:21) E ta rekerí sumision boluntario na su autoridad i na esnan na ken e ta delegá autoridad. (Efesionan 5:21; Hebreonan 13:17) E ta nificá bira un cristian dedicá i bautisá, aceptando tur e privilegionan i responsabilidadnan cu ta compañá un dedicacion asina. Esei ta e yugo cu Jesus ta ofrecé tur cu ta bini cerca dje pa consuelo i refrescamentu. Bo ta dispuesto pa aceptá esei?​—⁠Juan 8:​31, 32.

5. Pakico lo no ta un experencia duru pa tuma Jesus su yugo?

⁵ Haña refrescamentu dor di tuma un yugo​—⁠esei no ta contradictorio? En realidad e no ta, siendo cu Jesus a bisa cu su yugo ta “suave.” E palabra aki tin e nificacion di tierno, placentero, agradabel. (Mateo 11:30; Lucas 5:39; Romanonan 2:4; 1 Pedro 2:⁠3) Como un carpinté profesional, Jesus cu tur probabilidad a traha ploeg i yugo, i lo e tabata sa con pa forma un yugo pa pas di manera cu lo por a haci e máximo trabou posibel dje manera mas comfortabel posibel. E por a fura e parti abou dje yugonan cu paña of cueru. Hopi yugo ta ser trahá asina ei pa nan no feila of frega muchu contra e garganta. Den e mésun manera, e yugo figurativo cu Jesus ta ofrecé nos ta “suave.” Maske ser un disipel di Jesus ta enbolbé cierto obligacion i responsabilidadnan, e no ta un experencia severo of opresivo sino unu refrescante. E mandamentunan di su Tata Celestial, Jehova, no ta pisá tampoco.​—⁠Deuteronomio 30:11; 1 Juan 5:⁠3.

6. Kico Jesus lo por tabata kier men ora el a bisa: “Tuma mi yugo riba boso”?

⁶ Tin algu mas cu ta haci Jesus su yugo “suave,” of fácil pa carga. Ora el a bisa: “Tuma mi yugo riba boso,” e por tabata kier men un dje siguiente dos cosnan. Si e tabatin e yugo dobel na mente, esta, e tipo cu ta mara dos bestia di carga na otro pa hala e carga, e ora ei e tabata invitando nos pa drenta bou di e mésun yugo cuné. Ki un bendicion esei lo ta​—⁠pa tin Jesus banda di nos halando nos carga cu nos! N’e otro banda, si Jesus tabatin na mente e yugo den forma di un bara cu e trahador comun tabata usa, e ora ei e tabata ofreciendo nos e medio cu por haci cualkier carga cu nos mester hiba mas fácil of mas manehabel. Sea cual sea, su yugo ta un fuente di berdadero refrescamentu pasobra e ta sigurá nos: “Pasobra mi ta di genio suave i humilde di curason.”

7, 8. Ki eror algun persona ta haci ora nan ta sinti nan bou di tension?

⁷ Kico, anto, nos mester haci si nos sinti cu e carga dje problemanan di bida cu nos ta hibando ta birando insoportabel i cu nos ta den un tension casi pa cai den un crísis di nervio? Algun, incorectamente, por haña cu e yugo di ser un disipel di Jesucristo ta muchu difícil of muchu exigente, maske ta e preocupacionnan di bida diario ta e causa di nan carga. Algun individuo den tal situacion ta stop di asistí na reunionnan cristian, of nan ta keda sin participá den e ministerio, pensando tal bes cu nan lo haña algun alivio. Sin embargo, esei ta un ekibocacion serio.

⁸ Nos ta apreciá cu e yugo cu Jesus ta ofrecé ta “suave.” Si nos no bistié bon, e por feila nos. Den tal caso nos mester examiná e yugo riba nos scouder mas djacerca. Si pa un of otro motibu, e yugo ta den mal estado of e no ta bistí corectamente, usand’e no solamente lo rekerí mas esfuerso di nos parti sino lo causa algun dolor como resultado. Cu otro palabra, si actividadnan teocrático cuminsá parce manera un carga pa nos, nos mester averiguá pa wak si nos ta atendiendo nan den e manera corecto. Kico ta nos motibu tras di loke nos ta haci? Nos ta adecuadamente prepará ora nos ta bai e reunionnan? Nos ta físicamente i mentalmente prepará ora nos ta participá den e ministerio di veld? Nos ta disfrutá di un relacion íntimo i saludabel cu otronan den e congregacion? I, riba tur cos, con nos relacion personal cu Jehova Dios i su Yu, Jesucristo ta?

9. Pakico e yugo cristian nunca mester ta un carga insoportabel?

⁹ Ora nos ta aceptá di henter curason e yugo cu Jesus ta ofrecé i ta siña pa cargu’é corectamente, no tin motibu pa e hamas parce un carga insoportabel. Realmente, si nos por visualisá e situacion​—⁠Jesus bou dje mésun yugo cu nos​—⁠no ta difícil pa nos mira ken realmente ta hibando e mayor parti dje carga. Ta mescos cu un mucha chikitu cu no sa cana bon ainda i cu ta wanta n’e man di su garoshi di baby, pensando cu e ta pushand’e padilanti, pero cu en realidad, naturalmente, ta e mayor ta esun cu ta pushand’e. Como un Tata amoroso, Jehova Dios ta bon na haltura di nos limitacion i debilidadnan, i e ta reaccioná na nos necesidadnan mediante Jesucristo. “Dios lo percurá completamente pa tur boso necesidadnan te n’e alcanse di su rikesanan den gloria, pa medio di Cristo Jesus,” Pablo a bisa.​—⁠Filipensenan 4:19; compará cu Isaías 65:⁠24.

10. Kico tabata e experencia di un persona cu ta tuma e encargo di ser disipel di Cristo na serio?

¹⁰ Hopi cristian dedicá a yega na apreciá esaki mediante experencia personal. Tuma por ehempel, Jenny, kende ta haña cu sirbiendo como pionero auxiliar tur luna i trahando tempu completo na un trabou seglar exigente ta pon’é bou di un gran tension. Sin embargo, e ta haña cu e trabou di pionero realmente ta yud’é mantené su balansa emocional. Yudando hende pa siña e berdad di Bijbel i mirando nan cambia nan bida pa gana e aprobacion di Dios​—⁠esaki ta loke ta trece p’e e goso di mas grandi den su bida ocupá. E ta uni su mes di henter curason cu e palabranan dje proverbio cu ta bisa: “E bendicion di Jehova​—⁠esei ta loke ta haci ricu, i e no ta agregá dolor cuné.”​—⁠Proverbionan 10:⁠22.

Un Carga Lihé

11, 12. Kico Jesus tabata kier men ora el a bisa: “Mi carga ta lihé”?

¹¹ Ademas di primintí nos un yugo “suave,” Jesus ta sigurá nos: “Mi carga ta lihé.” Un yugo “suave” so caba ta haci e trabou mas fácil; si e carga ta ser hací mas leve tambe, e trabou ta berdaderamente un placer. Sin embargo, kico Jesus tabatin na mente cu e declaracion ei?

¹² Considerá loke un cunukero lo haci si e tabata kier a cambia trabou pa su animalnan, por ehempel di ploeg un tereno pa hala un garoshi. Lo e kita e ploeg promé i despues pega e garoshi. Lo ta absurdo p’e mara tantu e ploeg como e garoshi n’e animalnan. Di igual manera, Jesus no tabata bisando e hendenan pa pone su carga riba esun cu nan tabata cargando caba. El a bisa su disipelnan: “Ningun criá di cas por ta esclabo di dos doño.” (Lucas 16:13) Pues, Jesus tabata ofreciendo e hendenan un escoho. Nan lo preferá di sigui hiba e carga pisá cu nan tabatin, of nan lo pone esei abou i aceptá loke e tabata ofreciendo? Jesus a duna nan e incentivo amoroso: “Mi carga ta lihé.”

13. Ki carga e hendenan den tempu di Jesus tabata hibando, i cu ki resultado?

¹³ Den tempu di Jesus, e pueblo tabata luchando bou di un carga pisá cu e gobernantenan romano opresivo i e lidernan religioso formalístico i hipócrita a imponé riba nan. (Mateo 23:23) Den un intento pa deshací dje carga romano, algun hende a purba na tuma asuntunan den nan mes man. Nan a bira enbolbí den batayanan político, solamente pa yega na un fin desastroso. (Echonan 5:​36, 37) Otronan tabata determiná pa mehorá nan situacion dor di bira profundamente enbolbí den empeñonan materialista. (Mateo 19:​21, 22; Lucas 14:​18-20) Ora Jesus a ofrecé nan e caminda di alivio invitando nan pa bira su disipelnan, no tur tabata cla pa aceptá. Nan tabata indeciso tocante ponementu abou dje carga cu nan tabata hibando, aunke e tabata pisá, i tuma esun di Jesus riba nan. (Lucas 9:​59-62) Ki un ekibocacion trágico!

14. Con ansiedadnan di bida i deseonan material ta pisa riba nos?

¹⁴ Si nos no ta cuidadoso, nos por cometé e mésun ekibocacion awe. Birando Jesus su disipel ta libra nos for di forsa tras dje mésun metanan i balornan cu e hendenan dje mundu ta forsa tras di dje. Aunke ainda nos tin cu traha duru pa obtené e necesidadnan di tur dia, nos no ta haci e cosnan aki e enfoke di nos bida. Sin embargo, e ansiedadnan di bida i e tentacion di comodidadnan material por tin un gara poderoso riba nos. Si nos permití esei, deseonan asina por asta sofocá e berdad cu nos a aceptá entusiásticamente. (Mateo 13:22) Nos por bira asina preocupá cu cumplimentu cu deseonan asina cu nos responsabilidadnan cristian ta bira obligacionnan pisá cu nos kier djis haci i kita lihé for di caminda. Nos siguramente no por spera ningun refrescamentu bini for di nos sirbishi na Dios si e ta ser hací cu e actitud mental ei.

15. Ki spiertamentu Jesus a duna en cuanto deseonan material?

¹⁵ Jesus a mustra cu un bida di contentamentu ta bini, no dor di forsa pa cumpli cu tur nos deseonan, sino dor di haci sigur dje cosnan mas importante den bida. “Stop di ta anshá tocante boso alma en cuanto loke boso lo come of loke boso lo bebe, of pa boso curpa en cuanto loke boso lo bisti,” el a spierta. “E alma no ta nificá mas cu cuminda i e curpa mas cu bistí?” Despues el a hala atencion n’e paranan di cielu i a bisa: “Nan no ta sembra ni cosechá ni recogé den mangasina; tog boso Tata celestial ta alimentá nan.” Refiriendo n’e lelinan di campo, el a bisa: “Nan no ta afaná, ni hila; pero mi ta bisa boso cu ni sikiera Sálomon den tur su gloria tabata bistí manera un di esakinan.”​—⁠Mateo 6:​25-29.

16. Kico experencia a demostrá pa loke ta e efectonan di empeñonan material?

¹⁶ Kico nos por siña for dje ehempelnan práctico aki? Ta un experencia comun cu mas duru un persona forsa pa mehorá su posicion económico den bida, mas enredá e ta bira den empeñonan mundano i mas pisá e carga riba su scoudernan ta bira. E mundu ta yen di empresario cu a paga nan éxitonan material cu famia kibrá, matrimonio naufragá, salú ruiná, i mas. (Lucas 9:25; 1 Timoteo 6:​9, 10) Ganador di premio Nobel, Albert Einstein a yega di bisa: “Semper mi a despreciá propiedad, aparente éxito, publicidad i bida luho. Mi ta kere cu mihó un hende hiba un bida senciyo i modesto.” E expresion aki simplemente ta ripití e conseho senciyo di apostel Pablo: “Ta un medio di gran ganashi, e debocion piadoso aki huntu cu autosuficiencia.”​—⁠1 Timoteo 6:⁠6.

17. Ki moda di biba Bijbel ta recomendá?

¹⁷ Tin un aspecto importante cu nos no mester pasa por haltu. Aunke “un bida senciyo i modesto” tin hopi bentaha, un bida simpel so no ta trece contentamentu. Tin hopi hende kende nan moda di biba ta simpel pa motibu di circunstancia, tog di ningun manera nan no ta contentu of felis. Bijbel no ta instando nos pa renunciá disfrute material i pa hiba e bida di un ermitaño [kluizenaar]. E énfasis ta riba debocion piadoso, no autosuficiencia. Ta solamente ora nos ta combiná e dos cosnan aki cu nos tin e “medio di gran ganashi.” Ki ganashi? Mas aleu den e mésun carta ei, Pablo ta mustra cu esnan cu ta “cifra nan speransa, no den rikesa insigur, sino den Dios” lo ta “atesorando pa nan mes cu siguridad un fundeshi excelente pa futuro, pa nan por haña un gara firme riba e berdadero bida.”​—⁠1 Timoteo 6:​17-19.

18. (a) Con un persona por haña berdadero refrescamentu? (b) Con nos mester mira e cambionan cu nos lo por tin cu haci?

¹⁸ Refrescamentu lo bini pa nos si nos ta siña pa pone un banda nos carga personal pisá cu nos por ta hibando i pa tuma e carga leve cu Jesus ta ofrecé. Hopi hende cu a reorganisá nan bida di manera cu nan por participá mas plenamente den e sirbishi di Reino a haña e caminda pa un bida di felicidad i contentamentu. Naturalmente, fe i curashi ta necesario pa un persona haci un cambio asina, i por tin obstáculonan den caminda. Pero Bijbel ta recordá nos: “Esun cu ta vigilando e bientu lo no sembra, i esun cu ta mirando e nubianan lo no cosechá.” (Eclesiástes 11:⁠4) Hopi cos realmente no ta dje difícil ei unabes cu nos a determiná pa haci nan. Ta parce cu e parti mas difícil ta pa determiná pa haci nan. Nos por cansa nos mes dor di lucha cu of resistí e idea di aceptá e tarea difícil. Si nos prepará nos mes mentalmente i aceptá e desafio, nos lo por keda sorprendí pa haña ki un bendicion esei lo resultá di ta. E salmista a insta: “Boso, purba i mira cu Jehova ta bon.”​—⁠Salmo 34:8; 1 Pedro 1:⁠13.

“Refrescamentu pa Boso Alma”

19. (a) Kico nos por spera segun cu condicionnan di mundu ta sigui deteriorá? (b) Miéntras cu nos ta bou di Jesus su yugo, di kico nos por ta sigur?

¹⁹ Apostel Pablo a recordá e disipelnan di promé siglo: “Nos mester drenta den e reino di Dios atrabes di hopi tribulacion.” (Echonan 14:22) Ainda esei ta aplicabel awe. Segun cu condicionnan di mundu ta sigui deteriorá, e presionnan cu ta bini riba tur hende cu ta determiná pa hiba un bida di husticia i debocion piadoso lo bira asta mas grandi. (2 Timoteo 3:12; Revelacion 13:​16, 17) Tog, nos ta sinti mescos cu Pablo a sinti ora el a bisa: “Nos ta ser oprimí den tur manera, pero no pertá di tal manera cu nos no por move; nos ta confundí, pero no absolutamente sin salida; nos ta ser persiguí, pero no lagá sin yudansa; nos ta ser tumbá, pero no destruí.” E motibu ta cu nos por conta riba Jesucristo pa duna nos e fortalesa mas ayá di loke ta normal. (2 Corintionan 4:​7-9) Dor di aceptá e yugo di bira disipel di henter nos curason, nos lo disfrutá dje cumplimentu di Jesus su promesa: “Boso lo haña refrescamentu pa boso alma.”​—⁠Mateo 11:⁠29.

Bo Por Splica?

◻ Kico ta e yugo suave cu Jesus a ofrecé?

◻ Kico nos mester haci si nos ta sinti cu nos yugo ta birando un carga?

◻ Kico Jesus tabata kier men ora el a bisa: “Mi carga ta lihé”?

◻ Con nos por haci sigur cu nos carga ta keda lihé?