Bo Por Cultiva Mas Dicernimentu?

DICERNIMENTU ta “e poder of facultad dje mente mediante cua e ta distinguí un cos for di otro.” Tambe e por ta “huicio penetrante” of e “poder di percibí diferencia di cosnan of ideanan.” Asina Webster’s Universal Dictionary ta bisa. Claramente, dicernimentu ta un cualidad pa ser deseá. Su balor ta ser mirá den e palabranan di Sálomon: “Ora sabiduria drenta den bo curason i conocimentu mes bira agradabel pa bo alma mes, . . . dicernimentu mes lo protehá bo, pa librá bo for di e mal caminda.”—Proverbionan 2:10-12.

Sí, dicernimentu lo yuda nos resistí “e mal caminda,” cu ta existí na abundancia awe. I e ta trece hopi otro beneficio. Por ehempel, mayornan hopi bes ta tende nan yunan bisa, ‘Boso simplemente no ta comprendé!’ Cu poco sondeamentu, mayornan cu tin dicernimentu sa con pa saca afó e sintimentu i cuestionnan cu ta molestiando nan yunan. (Proverbionan 20:5) Un esposo cu dicernimentu lo scucha na su esposa i adkerí perspicacia den su forma di pensa i sintimentunan en bes di core saca conclusionnan. E esposa lo haci mescos cu su esposo. Asina, “dor di sabiduria un famia lo ser edificá i dor di dicernimentu lo e resultá di ta firmemente establecí.”—Proverbionan 24:3.

Dicernimentu ta yuda un persona manehá situacionnan exitosamente. Proverbionan 17:27 ta bisa: “Ken cu ta frena su palabranan ta poseé conocimentu i un hende di dicernimentu tin un spiritu trankilu.” Un persona cu dicernimentu no ta impetuoso, core drenta den tur situacion sin pensa. Cuidadosamente e ta meditá riba e posibel resultadonan promé cu e comprometé su mes. (Lucas 14:28, 29) E ta disfrutá tambe di relacionnan mas pacífico cu otronan pasobra un “boca di discrecion” ta dirigi’é pa scoge su palabranan cuidadosamente. (Proverbionan 10:19; 12:8) Pero, di mas importante, un persona cu dicernimentu humildemente ta reconocé su mes limitacionnan i ta acudí na Dios mas bien cu na hende pa haña guia. Esaki ta agradá Jehova i ta un otro motibu pa cultivá dicernimentu.—Proverbionan 2:1-9; Santiago 4:6.

Israel Su Falta di Dicernimentu

E peliger di keda sin ehercé dicernimentu ta ser mirá den un suceso na principio dje historia di Israel. Refleccionando riba e tempu ei, e salmista inspirá a bisa: “En cuanto nos antepasadonan den Egipto, nan no a demostrá ningun perspicacia den bo obranan maraviyoso. Nan no a corda e abundancia di bo gran bondad amoroso, sino a comportá nan mes rebeldemente na e laman, na e Laman Corá.”—Salmo 106:7.

Ora Moises a dirigí Israel for di Egipto, Jehova a demostrá caba su poder i su determinacion pa libra su pueblo dor di trece dies plaga riba e poder mundial poderoso ei. Despues cu Fárao a laga e israelitanan bai, Moises a dirigí nan na e oriya dje Laman Corá. Sin embargo, e ehércitonan di Egipto a marcha tras di nan den persecucion. A parce como si fuera e israelitanan tabata atrapá i cu nan libertad recien hañá lo a dura masha poco. Pues e registro bíblico ta bisa: “E yunan di Israel a haña hopi miedu i a cuminsá sclama na Jehova.” I nan a bira contra Moises, bisando: “Kico e cos aki ta cu bo a haci cu nos sacando nos for di Egipto? . . . Pasobra ta mihó pa nos sirbi e egipcionan cu pa nos muri den e desierto.”—Exodo 14:10-12.

Nan temor por parce comprendibel te ora cu nos corda cu nan ya caba a mira dies demostracion sobresaliente di e poder di Jehova. Nan personalmente tabata sa loke Moises lo a recordá nan un 40 aña despues: “Jehova a saca nos for di Egipto cu un man fuerte i un brasa extendí i cu gran teror i cu señalnan i milagernan.” (Deuteronomio 26:8) P’esei, manera e salmista a skirbi, ora e israelitanan a bai contra Moises su guia, “nan no a demostrá ningun perspicacia.” No obstante, Jehova, cumpliendo fielmente cu su promesa a causa un derota sorprendente riba e forsanan militar di Egipto.—Exodo 14:19-31.

Nos fe di igual manera por faya si nos enfrentá pruebanan cu duda of indecision. Dicernimentu lo yuda nos wak cosnan semper den perspectiva, cordando cuantu mas grandi Jehova ta cu cualkier persona cu por ta oponiendo nos. Dicernimentu tambe lo yuda nos tene na mente loke Jehova a haci caba pa nos. Lo e yuda nos pa nunca perde for di bista e echo cu e ta Esun cu ta “protehá tur esnan cu ta stim’é.”—Salmo 145:18-20.

Adkiriendo Dicernimentu Spiritual

Dicernimentu no ta bini automáticamente cu mas edad. E mester ser cultivá. E rey sabí Sálomon, kende a gana fama internacional pa su dicernimentu, a bisa: “Felis ta e hende cu a haña sabiduria, i e hende cu ta obtené dicernimentu, pasobra teniend’e como ganashi ta mihó cu teniendo plata como ganashi i teniend’e como producto, mas cu oro mes.” (Proverbionan 3:13, 14) Unda Sálomon a haña su dicernimentu? For di Jehova. Ora Jehova a puntra Sálomon ki bendicion e tabata kier, Sálomon a contestá: “Bo mester duna na bo sirbidor un curason obediente pa husga bo pueblo, pa dicerní entre bon i malu.” (1 Reynan 3:9) Sí, Sálomon a acudí na Jehova como su yudante. El a pidi pa dicernimentu i Jehova a dun’é esei na un grado extraordinario. E resultado? “Sálomon su sabiduria tabata hopi mas grandi cu e sabiduria di tur e orientalnan i mas cu tur e sabiduria di Egipto.”—1 Reynan 4:30.

Sálomon su experencia ta mustra nos unda pa acudí den nos búskeda pa dicernimentu. Mescos cu Sálomon, nos mester acudí na Jehova. Di ki manera? Wel, Jehova a percurá su Palabra, e Bijbel, locual ta duna nos perspicacia den su forma di pensa. Ora nos lesa e Bijbel, nos ta cobando den un fuente balioso di conocimentu cu lo percurá e base pa dicernimentu spiritual. Mester meditá riba e informacion cu nos ta acumulá for di nos lesamentu di Bijbel. E ora ei por us’é pa tuma decisionnan corecto. Cu tempu, nos facultadnan di percibí ta desaroyá te n’e grado cu nos ta bira “maduro den facultadnan di comprendimentu,” capas pa “distinguí [of, dicerní entre] tantu bon como malu.”—1 Corintionan 14:20; Hebreonan 5:14; compará cu 1 Corintionan 2:10.

Interesantemente, nos por beneficiá ainda for di e dicernimentu cu Jehova a duna Sálomon. Di ki manera? Sálomon a bira ábil den expresá sabiduria den forma di proverbionan, locualnan tabata, en realidad cápsulanan di sabiduria divinamente inspirá. Hopi dje dichonan aki ta conserbá den e buki bíblico di Proverbionan. Studiando e buki ei ta yuda nos beneficiá for di Sálomon su dicernimentu i tambe pa nos mes desaroyá dicernimentu.

Pa yuda nos den nos studio di Bijbel, nos por usa yudansanan pa studio di Bijbel, manera e revistanan Toren di Vigilancia i Spierta! Pa mas cu 116 aña E Toren di Vigilancia a bin ta anunciá Jehova su Reino na hendenan di curason onrado. E revista Spierta! i su predesesornan a bin ta comentá riba condicionnan di mundu desde 1919. E dos revistanan aki ta examiná berdadnan bíblico i ta percurá iluminacion spiritual progresivo cu ta yuda nos dicerní erornan, sea cu nan ta ser siñá dor di cristiandad of ta ser hañá den nos mes patronchinan di pensamentu.—Proverbionan 4:18.

Un otro yudansa pa desaroyá dicernimentu ta asociacion corecto. Un dje proverbionan di Rey Sálomon ta bisa: “Esun cu ta cana cu hende sabí lo bira sabí, pero esun cu tin trato cu hende estúpido lo bai malu cuné.” (Proverbionan 13:20) Ta lástima cu Rey Sálomon su yu homber Rehóboam no a corda riba e proverbio aki na un momento vital den su bida. Despues di morto di su tata, e tribunan di Israel a bini cerca dje pa exigi’é aliviá nan carganan. Promé, Rehóboam a consultá cu e hombernan di mas edad i esakinan a demostrá dicernimentu ora nan a anim’é pa scucha na su súbditonan. Despues, el a bai cerca e hombernan mas yong. Esakinan a demostrá falta di experencia i un falta di dicernimentu, animando Rehóboam pa contestá e israelitanan cu menasa. Rehóboam a scucha na e hombernan mas yong. E resultado? Israel a rebelá i Rehóboam a perde un gran parti di su reino.—1 Reynan 12:1-17.

Un parti vital den desaroyá dicernimentu ta e buscamentu dje yudansa di spiritu santu. Repasando e trato di Jehova cu e israelitanan despues di nan liberacion for di cautiverio den Egipto, e escritor bíblico Nehemías a bisa: “Bo spiritu bon bo a duna pa haci nan prudente.” (Nehemías 9:20) E spiritu di Jehova tambe por yuda pa haci nos prudente. Segun cu bo ta pidi den oracion pa e spiritu di Jehova duná bo dicernimentu, haci oracion cu confiansa pasobra Jehova ta “duna generosamente na tur i sin reprochá.”—Santiago 1:5; Mateo 7:7-11; 21:22.

Dicernimentu i Perspicacia

Apostel Pablo a demostrá dicernimentu ora el a predicá e berdad na hendenan dje nacionnan. Na un ocasion, por ehempel, miéntras e tabata den Aténas, e tabata “pasando i observando cuidadosamente” nan obhetonan di veneracion. Pablo tabata rondoná dor di ídolonan i su spiritu a bira iritá den dje. Awor e tabatin cu tuma un decision. Lo e mester sigui e proceder sin peliger i keda ketu? Of e mester papia francamente tocante e idolatria plamá cu el a haña asina iritante, aunke haciendo esei lo por ta peligroso?

Pablo a actua cu dicernimentu. El a mira un altar cu e inscripcion: “Na un Dios Desconocí.” Cu tacto, Pablo a reconocé nan debocion na ídolonan i despues a usa e altar ei como un manera pa introducí e tema di “e Dios cu a traha mundu i tur cos den dje.” Sí, Jehova tabata e Dios cu nan no tabata conocé! Di e manera ei Pablo a tuma na cuenta nan sensitividad riba e asuntu i por a duna un testimonio maraviyoso. Cu ki resultado? Un cantidad di hende a aceptá e berdad, incluyendo “Dionisio, un hues dje corte di Aerópago i un muher yamá Damaris i otronan ademas di nan.” (Echonan 17:16-34) Ki un ehempel di dicernimentu Pablo tabata!

Sin discusion, dicernimentu no ta bini fácilmente of di mes. Pero cu pacenshi, oracion, esfuerso sincero, asociacion sabí, studio i meditacion riba Bijbel i dependencia riba e spiritu di Jehova, bo tambe por cultiv’é.