Vigila Bo Sentido di Urgencia

CUA ta un manera sigur, aprobá pa Dios pa sigui sirbi Jehova cu henter alma? Esei ta pa nos tin un sentido genuino di urgencia profundo den nos curason. Sirbi Dios cu henter alma ta nificá sirbié cu henter nos ser, i esei ta rekerí obedencia sincero i absoluto na tur loke e ta pidi nos haci.

Profeta Moises a enfatisá e necesidad aki ora el a instruí e nacion di Israel: “Bo mester stima Jehova bo Dios cu tur bo curason i cu tur bo alma i cu tur bo forsa vital.” (Deuteronomio 6:5) Siglonan despues e mésun mandamentu ei a ser ripití dor di Cristo Jesus: “Bo mester stima Jehova bo Dios cu henter bo curason i cu henter bo alma i cu henter bo mente.” (Mateo 22:37) Apostel Pablo a referí n’e mésun rekisito aki ora el a bisa e efesionan pa haci “e boluntad di Dios cu henter boso alma,” i ora el a urgi e colosensenan: “Cualkier cos cu boso ta haciendo, traha na dje cu henter boso alma como pa Jehova, i no pa hende.”—Efesionan 6:6; Colosensenan 3:23.

Sin embargo, ta difícil pa hinca nos curason i alma den nos sirbishi na Dios si nos no tin un sintimentu di urgencia profundo den nos mes of si e sentido di urgencia cu nos tabatin un tempu awor a bira dof—tal bes perdí totalmente. Awe, nos ta biba den un tempu di urgencia cu ningun otro periodo den historia di humanidad por igualá.

Periodonan Specífico di Urgencia

Den tempu pre-cristian tabatin vários periodo di urgencia. E dia di Noe i e periodo cu a hiba n’e destruccion di Sódoma i Gomora siguramente tabata tempunan di berdadero urgencia. (2 Pedro 2:5, 6; Hudas 7) E añanan promé cu Diluvio tabata indudablemente yená cu actividad urgente. Maske Noe i su famia no tabata sa precisamente ki tempu e Diluvio lo a cuminsá, nan “temor piadoso” lo a garantisá cu nan no a tarda pa tuma accion.—Hebreonan 11:7.

Di igual manera, promé cu e destruccion di Sódoma i Gomora, e angelnan “a cuminsá pura Lot” i a bis’é: “Hui pa bo alma!” (Génesis 19:15, 17) Sí, n’e ocasion ei tambe, urgencia a salba bidanan hustu. Siglonan despues prezunan hudiu na Babilonia a ser spiertá: “Apartá boso, apartá boso, sali for djei, no mishi cu nada impuru; sali for di meimei di dje.” (Isaías 52:11) Na 537 P.E.C., rond di 200.000 exiliado a sali purá for di Babilonia den obedencia n’e mandamentu profético urgente ei.

E sentido di urgencia den cada un dje situacionnan ei a resultá den sirbishi di henter alma dor di esnan cu a sinti i a mantené un conviccion cu nan tabata bibando den tempu urgente.

Urgencia den Tempu Cristian

Econan di urgencia tambe por ser tendé atrabes dje Scritura Griego Cristian. “Sigui busca,” “keda lantá,” “sigui vigilá,” “mustra cu boso ta prepará”—tur esakinan ta expresionnan cu Cristo Jesus a usa pa inculcá un sentido apropiado di urgencia den su siguidornan. (Mateo 24:42-44; Marco 13: 32-37) Ademas, su ilustracionnan relacioná cu e dies bírgennan, e esclabo malbado, e talentonan i e separacion di carné for di cabritu tur ta incitá anticipacion i ta generá un sintimentu di urgencia.—Mateo 25:1, 14, 15, 32, 33.

Jesus no solamente a papia tocante urgencia sino tambe el a pone forsa tras dje realismo di su palabranan dor di obra cu urgencia. Na un ocasion el a bisa e multitudnan ora nan a purba deten’é: “Tambe na otro stadnan mi tin cu declará e bon nobo dje reino di Dios, pasobra pa esaki mi a ser mandá.” (Lucas 4:42, 43) Ademas, el a animá su disipelnan pa roga e Doño dje cosecha pa manda mas trahador den Su cosecha pasobra “e cosecha ta grandi, pero e trahadornan ta poco.” (Mateo 9:37, 38) Un peticion sincero asina na Dios en berdad ta expresá un spiritu di urgencia.

Un Urgencia Asina Tabata Ekibocá?

Algun hende por lanta e pregunta lógico, Pakico un sentido di urgencia tabata necesario den e tempu ei si e “tribulacion grandi” profetisá tabata siglonan leu?—Mateo 24:21.

Nos por ta sigur cu no tabata simplemente un triki Jesus a usa pa tene su siguidornan ocupá den e trabou di predicá i di siña. No, tabata e amor di Cristo pa su disipelnan, i tambe su comprendimentu perfecto di Jehova su punto di bista di tempu, cu tabata e base pa su conseho riba urgencia. Sí, Cristo Jesus tabata sa cu un spiritu di urgencia tabata necesario pa cumpli cu Jehova su boluntad segun e propósito di Dios. Ademas, e tabata sa cu su disipelnan mes lo a saca beneficio spiritualmente dor di mantené un sentido di urgencia te na su regreso.

Jesucristo a indicá claramente cu tabatin un trabou mundial di duna testimonio pa ser realisá i den un tempu limitá. (Mateo 24:14; Marco 13:10) E etapanan progresivo dje asignacion aki a ser revelá únicamente segun cu e trabou a desaroyá. Pero urgencia tabata necesario pa cumpli cu cada stap. Jesus a indicá e secuencia dje asignacion aki ora el a bisa: “Boso lo ta testigo di mi tantu den Jerusalem i den tur Hudea i Samaria i te n’e parti mas lehano dje tera.” (Echonan 1:8) I asina e asignacion a desaroyá te n’e dia djawe. Esei a nificá algun sorpresa pa Dios su sirbidornan den transcurso di tempu, haciendo avéces necesario ahustenan den comprendimentu.

E sentido cristian di urgencia a sirbi Jehova su propósito. El a yuda Cristo su disipelnan cumpli cu e secuencia di nan asignacion segun Jehova su orario infalibel. I asina awe, mirando casi 2.000 aña atras, nos ta comprendé e orario divino ei mas plenamente.

Urgencia cristian a yuda e disipelnan duna un testimonio cabal den Jerusalem, Hudea, Samaria i n’e hudiunan plamá promé cu 36 E.C. ora fabor special pa cu Israel a yega na su final. (Daniel 9:27; Echonan 2:46, 47) Di igual manera, urgencia cristian a yuda e congregacion di promé duna un spiertamentu claro na tur hudiu cu dentro di poco nan sistema lo a terminá. (Lucas 19:43, 44; Colosensenan 1:5, 6, 23) I despues cu el a terminá inesperadamente na 70 E.C., urgencia a yuda Cristo su testigonan di promé siglo proclamá e speransa celestial na hopi persona promé cu e apostasia profetisá a plama su scuridad spiritual mortífero. (2 Tesalonicensenan 2:3; 2 Timoteo 4:2) Anto, atrabes dje siglonan dje Epoca di Scuridad, e poco cristiannan semehante na trigu a mantené e speransa di Reino na bida, manera Cristo Jesus a predicí. (Mateo 13:28-30) Finalmente, na su tempu señalá, Jehova a lanta un congregacion vigoroso di tempu moderno, stimulá padilanti dor di su mensahe di huicio urgente pa esnan cu ta bibando den e generacion final aki.—Mateo 24:34.

Mescos cu Daniel di antigwedad, Dios su fiel Testigonan di tempu moderno hamas lo tribi cuestioná Jehova, puntrand’e: “Kico bo tabata haciendo?” (Daniel 4:35) Nan tin confiansa cu Jehova sa exactamente loke ta necesario pa su trabou ser hací precis segun orario. Pues en bes di cuestioná Jehova su manera di areglá asuntunan, nan ta contentu cu Dios a duna nan e oportunidad pa traha huntu cuné den e tempu transendental aki.—1 Corintionan 3:9.

Un Animacion Adicional pa Urgencia

Un otro motibu pa urgencia ta nos inabilidad pa señalá e dia i ora exacto pa e cuminsamentu di ripiente dje tribulacion grandi. Cristo Jesus tabata explícito cu ningun hende riba tera sa e dia i ora predeterminá dje cuminsamentu dje suceso crucial ei. (Mateo 24:36) Na un otro ocasion el a bisa su apostelnan ansioso: “No ta pertenecé na boso pa haña conocimentu di tempu of temporada cu e Tata a pone bou di su mes hurisprudencia.” (Echonan 1:7) Si, e resultado ta claro, pero simplemente no ta keda na nos pa sa tur e detayenan.

Apostel Pablo tabatin e actitud corecto di urgencia. Tal bes e tabatin Jesus su palabranan na mente ora el a skirbi n’e tesalonicensenan tocante Cristo su presencia: “Awor en cuanto e tempu i temporadanan, rumannan, boso no tin mester pa nada ser skirbí na boso.” (1 Tesalonicensenan 5:1) El a skirbi e carta aki rond di 17 aña despues cu Jesus a bisa: “Boso lo ta testigo di mi . . . te n’e parti mas lehano dje tera.” (Echonan 1:8) N’e tempu ei nada mas no por a ser skirbí pasobra nada mas no a ser revelá. Asina mes nan por tabatin confiansa cu e dia di Jehova definitivamente lo bini “manera un ladron den anochi” ora cu cristiannan lo ta predicando urgentemente ainda.—1 Tesalonicensenan 5:2.

Lo parce improbabel cu, cu e palabranan aki na mente, cristiannan di promé siglo a pensa cu e dia di Jehova tabata despues di hopi siglo. Ta cierto cu nan tabata sa di Jesus su comparacionnan tocante e rey cu a bai na un tera leu i tocante e homber cu a biaha bai den stranheria. Nan tabata sa, tambe, cu e comparacionnan a mustra cu e rey lo regresá “eventualmente” i e biahero “despues di un tempu largu.” Pero indudablemente nan a keda confundí riba preguntanan manera, Ki tempu ta “eventualmente”? I kico kier men “despues di un tempu largu”? Dies aña? Binti aña? Cincuenta aña? Of mas? (Lucas 19:12, 15; Mateo 25:14, 19) Jesus su palabranan lo a sigui zona den nan oreanan: “Boso tambe, mantené boso prepará, pasobra na un ora cu boso no ta pensa ta probabel, e Yu di hende ta bini.”—Lucas 12:40.

Efecto Positivo di Urgencia

Sí, e sentido di urgencia stimulá dor di Dios tabatin un efecto maraviyosamente animador riba e cristiannan di promé siglo, yudando nan pa keda ocupá den e trabou importantísimo di predicá i siña. E ta prevení nos di bira complaciente of ‘cansa di haci bon.’ (Galationan 6:9, King James Version) E ta protehá nos for di enbolbé nos demasiado cu e mundu i su materialismo engañoso. E ta tene nos mente riba “e berdadero bida.” (1 Timoteo 6:19) Señor Jesus a bisa cu su disipelnan lo ta manera “carné meimei di lobo,” i e tabata sa dje necesidad pa nos mantené un bista determiná i fiho afin di combatí e mundu. Sí, nos a ser salbaguardiá, protehá dor di nos sentido cristian di urgencia.—Mateo 10:16.

Jehova Dios den su sabiduria infinito semper a duna su sirbidornan suficiente informacion pa nan mantené nan sentido di urgencia bibu. El a sigurá nos bondadosamente cu nos ta den “e último dianan” dje sistema di cosnan corupto aki. (2 Timoteo 3:1) Nos ta ser recordá continuamente cu nos mester briya como iluminadornan te ora e generacion den cua nos ta biba pasa forbij den e tribulacion grandi, cu su culminacion na Armagedon.—Filipensenan 2:15; Revelacion 7:14; 16:14, 16.

Sí, un sentido piadoso di urgencia ta un parti integral di sirbishi di henter alma na Jehova. E ta protehá contra i ta yuda stroba e intentonan dje Diabel pa causa cu e sirbidornan di Dios “bira cansá i perde ánimo den [nan] alma.” (Hebreonan 12:3) Pa tur eternidad, debocion di henter alma lo pone Jehova su sirbidornan obedec’é, pero awor, den e dianan aki promé cu Armagedon, un sentido genuino i profundo di urgencia ta un parti esencial di debocion di henter alma.

Cu Jehova nos Dios yuda nos tur vigilá nos sentido di urgencia miéntras nos ta sigui resoná e palabranan di apostel Juan: “Amen! Bini, Señor Jesus.”—Revelacion 22:20.