Jehova Ta Duna Poder na Esun Cansá

“Esnan cu ta sperando den Jehova lo recobrá poder. Nan lo subi cu hala manera águila.”—ISAIAS 40:31.

 1, 2. Kico Jehova ta duna esnan cu ta confia den dje, i kico nos lo considerá awor?

AGUILA ta entre e paranan di mas poderoso den e cielunan. Nan por zweef distancianan grandi sin ni sikiera klap nan halanan. Cu halanan cu por span mas cu dos meter, “e Rey di Paranan,” e águila di oro, ta “un dje águilanan di mas impresionante di tur águila; lantando riba ceru i vayenan, [e] ta zweef den laira pa oranan riba algun cadena di ceru, anto bai laira den spiral te ora e parce manera un mancha scur den cielu.”—The Audubon Society Encyclopedia of North American Birds.

² Cu e abilidadnan di bula dje águila na mente, Isaías a skirbi: “[Jehova] ta dunando poder na esun cansá; i esun sin energia dinámico e ta haci abundá den pleno potencia. Mucha hombernan lo cansa i tambe fatigá, i hóbennan mes sin falta lo trompecá, pero esnan cu ta sperando den Jehova lo recobrá poder. Nan lo subi cu hala manera águila. Nan lo core i lo no fatigá; nan lo cana i lo no cansa.” (Isaías 40:29-31) Ta ki un consuelo pa sa cu Jehova ta duna esnan cu ta confia den dje e poder pa sigui padilanti, como si fuera ekipando nan cu e halanan aparentemente incansabel dje águila cu ta subi na haltu! Considerá, awor, algun dje percuracionnan cu el a haci pa duna poder na esun cansá.

E Poder di Oracion

 3, 4. (a) Jesus a urgi su disipelnan pa haci kico? (b) Kico nos por spera pa Jehova haci como contesta riba nos oracionnan?

³ Jesus a urgi su disipelnan pa “semper haci oracion i no entregá.” (Lucas 18:1) Habriendo nos curason na Jehova realmente por yuda nos recobrá poder i evitá di entregá ora presionnan di bida ta parce aplastante? Sí, pero tin algun cos cu nos mester tene na mente.

⁴ Nos mester ta realístico den loke nos ta spera pa Jehova haci como contesta riba nos oracionnan. Un ruman muher cristian cu a cai den depresion profundo, mas despues a remarcá: “Mescos cu ta e caso cu otro enfermedadnan, Jehova no ta efectuá milager n’e tempu aki. Pero sí e ta yuda nos lucha cuné i cura te n’e grado cu nos por den e sistema aki.” Splicando pakico su oracionnan a haci e diferencia, el a agregá: “Mi tabatin acceso 24 ora pa dia na Jehova su spiritu santu.” Pues, Jehova no ta protehá nos for dje presionnan di bida cu por deprimí nos, pero sí e ta “duna spiritu santu na esnan cu ta pidié!” (Lucas 11:13; Salmo 88:1-3) E spiritu ei por ekipá nos pa enfrentá cualkier prueba of presion cu nos por encontrá. (1 Corintionan 10:13) Si ta necesario, e por duna nos e “poder mas ayá cu loke ta normal” pa wanta te ora e Reino di Dios eliminá tur problema cu ta causa tension den e mundu nobo cu ta asina cerca.—2 Corintionan 4:7.

 5. (a) Pa nos oracionnan por ta eficas, cua dos cosnan ta vital? (b) Con nos por haci oracion si nos ta luchando cu un debilidad di carni? (c) Kico nos oracionnan persistente i specífico lo demostrá na Jehova?

⁵ Sin embargo, pa nos oracionnan por ta eficas, nos mester perseverá, i nos mester ta specífico. (Romanonan 12:12) Por ehempel, si bo cansa na cierto ocasion debí cu bo ta luchando cu un debilidad di carni, na cuminsamentu di cada dia, pidi Jehova yudá bo evitá di sucumbí n’e debilidad specífico ei durante e dia. Haci oracion di igual manera durante e dia i promé cu bo bai drumi tur anochi. Si bo hañá bo cu un recaida, roga Jehova pa su pordon, pero tambe papia cuné tocante loke a hiba n’e recaida i loke bo por haci pa evitá e circunstancianan ei den futuro. Tal oracionnan persistente i specífico lo demostrá n’e “Tendedor di oracion” e sinceridad di bo deseo pa gana e bataya.—Salmo 65:2; Lucas 11:5-13.

 6. Pakico nos por spera hustamente pa Jehova tende nos oracionnan asta ora nos sinti nos mes indigno pa haci oracion?

⁶ No obstante, tin biaha esnan cu a cansa por sinti nan mes indigno pa haci oracion. Un muher cristian kende a sinti su mes asina a remarcá despues: “Esei ta un pensamentu masha peligroso pasobra e ta nificá cu nos a tuma riba nos mes pa husga nos mes, pero e husgamentu ei no ta pertenecé na nos.” En berdad, “Dios mes ta Hues.” (Salmo 50:6) Bijbel ta sigurá nos cu aunke “nos curason por condená nos . . . , Dios ta mas grandi cu nos curason i sa tur cos.” (1 Juan 3:20) Ta ki un consuelo pa sa cu ora nos kisas ta husga nos mes como indigno pa haci oracion, Jehova kisas no ta pensa asina di nos! E “sa tur cos” tocante nos, incluyendo e circunstancianan den nos bida cu por a pone nos sinti nos mes asina indigno. (Salmo 103:10-14) Su misericordia i profundidad di comprendimentu ta impuls’é pa tende oracionnan for di “un curason kibrá i aplastá.” (Salmo 51:17) Con e por nenga di tende nos clamornan pa yudansa ora e mes ta condená “cualkier un cu ta tapa su orea n’e clamor kehoso di esun di condicion humilde”?—Proverbionan 21:13.

E Calor dje Hermandad

 7. (a) Kico ta un otro percuracion cu Jehova a haci pa yuda nos recobrá poder? (b) Sabiendo kico tocante nos hermandad por ta fortalecedor pa nos?

⁷ Un otro percuracion cu Jehova a haci pa yuda nos recobrá poder ta nos hermandad cristian. Ta ki un privilegio precioso pa ser parti di un famia mundial di rumannan! (1 Pedro 2:17) Ora e presionnan di bida ta deprimí nos, e calor di nos hermandad por yuda nos recobrá poder. Con asina? Sabiendo cu nos no ta nos so enfrentando e desafionan cu ta causa tension por ta fortalecedor riba su mes. No tin duda cu entre nos rumannan tin algun cu a enfrentá presionnan of pruebanan similar i cu a experenciá sintimentunan hopi parecido na esnan di nos. (1 Pedro 5:9) Ta un consuelo pa sa cu loke nos ta pasando aden no ta algu straño i cu nos sintimentunan no ta fuera di lo comun.

 8. (a) Ki ehempelnan ta mustra con nos por haña hopi yudansa i consuelo necesario den nos hermandad? (b) Den ki manera abo personalmente a ser yudá of consolá dor di “un berdadero compañero”?

⁸ Den e calor dje hermandad nos por haña ‘berdadero compañero’ kendenan, ora nos ta afligí, por duna hopi yudansa i consuelo necesario. (Proverbionan 17:17) Hopi biaha, tur loke esei ta exigí ta algun palabra bondadoso of accionnan atento. Un cristian kende a lucha cu sintimentunan di indignidad ta corda: “Tabatin amigunan cu tabata papia cu mi di cosnan positivo tocante mi mes pa yudá mi vence e pensamentunan negativo cu mi tabatin.” (Proverbionan 15:23) Despues dje morto di su yu muher yong, un ruman muher a haña cu na principio tabata difícil pa canta cantica di Reino na reunionnan di congregacion, specialmente canticanan cu a mencioná e resureccion. E ta corda cu “un biaha, un ruman muher cu tabata sinta den un otro rij a mirá mi yora. El a bini cerca mi, a pone su brasa rond di mi, i a canta e resto dje cantica huntu cu mi. Mi a sintí mi asina yená cu amor p’e rumannan i asina contentu cu nos a bai n’e reunionnan, realisando cu ta ei nos yudansa ta, ei n’e Salon di Reino.”

 9, 10. (a) Con nos por contribuí n’e calor di nos hermandad? (b) Ken specialmente mester di asociacion saludabel? (c) Kico nos por haci pa yuda esnan cu tin mester di animacion?

⁹ Naturalmente, nos cada un tin un responsabilidad pa contribuí n’e calor dje hermandad cristian. Pues, nos curason mester “hancha” pa incluí tur nos rumannan. (2 Corintionan 6:13) Lo ta ki tristu pa esnan cu a cansa sinti cu e amor dje hermandad a fria pa cu nan! Tog, algun cristian ta informá cu nan ta sinti nan so i neglishá. Un ruman muher kende su esposo ta oponé e berdad a roga: “Ken no ta deseá i tin mester di amistad edificante, animacion i asociacion amoroso? Por fabor, corda nos rumannan cu nos mester di nan!” Sí, specialmente esnan kende nan circunstancianan den bida ta deprimí nan—esnan cu tin partner incrédulo, mayornan soltero, esnan cu problemanan crónico di salú, esnan di edad i otronan—tin mester di asociacion saludabel. Algun di nos mester ser recordá riba esei?

¹⁰ Kico nos por haci pa yuda? Laga nos hancha nos mes den expresá nos amor. Ora nos ta extendé hospitalidad, laga nos no lubidá esnan cu tin mester di animacion. (Lucas 14:12-14; Hebreonan 13:2) En bes di asumí cu nan circunstancianan ta prevení nan di aceptá un invitacion, pakico no invitá nan tog? Anto laga nan dicidí. Asta si nan no por acept’é, nan sin duda lo sinti nan animá sabiendo cu otro rumannan a pensa riba nan. Esei por ta net loke nan mester pa recobrá poder.

11. Esnan cu ta deprimí por tin mester di yudansa den ki maneranan?

¹¹ Esnan cu ta deprimí por tin mester di yudansa den otro maneranan. Un mama soltero, por ehempel, por tin mester di un ruman homber maduro pa mustra interes den su yu homber sin tata. (Santiago 1:27) Un ruman homber of muher cu un problema serio di salú por tin mester di un of otro yudansa cu hacimentu di cómpras of cu tareanan di cas. Un ruman di edad kisas ta anhelá pa algun compañerismo of tin mester di algun yudansa pa sali den e ministerio di veld. Ora tin un necesidad continuo pa tal yudansa, e ta presentá un berdadero ‘prueba di con genuino nos amor ta.’ (2 Corintionan 8:8) En bes di alehá for di esnan den necesidad debí n’e tempu i esfuerso enbolbí, laga nos pasa e prueba di amor cristian dor di ser sensitivo i dispuesto pa respondé n’e necesidadnan di otronan.

E Poder dje Palabra di Dios

12. Con e Palabra di Dios ta yuda nos recobrá poder?

¹² Un persona cu ta stop di come pronto lo perde su fortalesa of poder. Den mésun sentido, un otro manera cu Jehova ta duna nos e poder pa sigui padilanti ta dor di percurá pa nos ta bon alimentá spiritualmente. (Isaías 65:13, 14) Ki alimento spiritual el a percurá p’e? Riba tur cos, su Palabra, e Bijbel. (Mateo 4:4; compará cu Hebreonan 4:12.) Con esei por yuda nos recobrá poder? Ora e presionnan i problemanan cu nos ta enfrentá cuminsá caba cu nos forsa, nos por saca fortalesa for di lesa tocante e sintimentunan i batayanan di bida real di homber i muhernan fiel den tempu bíblico. Aunke nan tabata ehempelnan sobresaliente di integridad, nan tabata hende “cu sintimentunan mescos cu di nos.” (Santiago 5:17; Echonan 14:15) Nan a enfrentá pruebanan i presionnan similar na esun di nos. Considerá algun ehempel.

13. Ki ehempelnan bíblico ta mustra cu homber i muhernan fiel den tempunan bíblico tabatin sintimentunan i experencianan hopi parecido na esnan di nos?

¹³ E patriarca Abraham a lamentá e morto di su esposa profundamente aunke e tabatin fe den e resureccion. (Génesis 23:2; compará cu Hebreonan 11:8-10, 17-19.) Un David repentí a sinti cu su picánan a hacié indigno pa sirbi Jehova. (Salmo 51:11) Moises tabatin sintimentu di incapacidad. (Exodo 4:10) Epafrodito a bira deprimí ora a bira conocí cu un malesa serio a limitá su actividad den “e trabou di Señor.” (Filipensenan 2:25-30) Pablo tabatin cu lucha contra e carni pecaminoso. (Romanonan 7:21-25) Evodia i Síntike, dos ruman muher ungí den e congregacion na Filípos, aparentemente no tabata sali bon cu otro. (Filipensenan 1:1; 4:2, 3) Ta ki un animacion pa sa cu e personanan fiel aki tabatin sintimentu i experencianan mescos cu esnan di nos, tog nan no a entregá! Jehova no a bandoná nan tampoco.

14. (a) Ki instrumento Jehova a usa pa yuda nos saca fortalesa for di su Palabra? (b) Pakico e revistanan Toren di Vigilancia i Spierta! a contené artículonan riba cuestionnan social, familiar i emocional?

¹⁴ Pa yuda nos saca fortalesa for di su Palabra, Jehova ta usa e esclabo fiel i discreto pa duna nos un fluho constante di “alimento n’e tempu apropiado.” (Mateo 24:45) Pa hopi tempu e esclabo fiel a usa e revistanan Toren di Vigilancia i Spierta! pa defendé e berdad di Bijbel i proclamá e Reino di Dios como hende su único speransa. Specialmente den e último par di décadanan, e revistanan aki a contené artículonan bíblico oportuno riba desafionan social, familiar i emocional cu asta algun persona dje pueblo di Dios ta encontrá. Pa ki propósito e informacion ei a ser publicá? Siguramente pa yuda esnan cu ta experenciando e desafionan aki saca fortalesa i animacion for dje Palabra di Dios. Pero e artículonan ei ta yuda nos tur tambe haña un comprendimentu mas claro di loke algun di nos rumannan por ta pasando aden. Pues nos ta mihó ekipá pa tuma e palabranan di Pablo na cuenta: “Papia di un manera consolador cu e almanan deprimí, apoyá e débilnan, mustra gran pacenshi pa cu tur.”—1 Tesalonicensenan 5:14.

Ancianonan cu Ta “un Lugá di Sconde For di Bientu”

15. Kico Isaías a profetisá tocante esnan cu ta sirbi como anciano, i ki responsabilidad esaki ta pone riba nan?

¹⁵ Jehova a percurá algu mas pa yuda nos ora nos cansa—e ancianonan dje congregacion. Di esakinan profeta Isaías a skirbi: “Cada un mester resultá di ta manera un lugá di sconde for di bientu i un lugá di sconde for dje tempestad di awaceru, manera coriente di awa den un pais secu, manera e sombra di un baranca skerpi i pisá den un tera agotá.” (Isaías 32:1, 2) Ancianonan, anto, tin un responsabilidad pa cumpli cu loke Jehova a profetisá tocante nan. Nan “mester resultá di ta” fuentenan di consuelo i refrescamentu pa otronan i ser dispuesto pa “sigui wanta e carga [of, “cosnan problemático”; literalmente, “cosnan pisá”] di otro.” (Galationan 6:2, nota) Con nan por haci esaki?

16. Kico e ancianonan por haci pa yuda un persona cu ta sinti su mes indigno pa haci oracion?

¹⁶ Manera a ser mencioná anteriormente, tin biaha un persona cu a cansa por sinti su mes indigno pa haci oracion. Kico e ancianonan por haci? Nan por haci oracion cu of p’e persona. (Santiago 5:14) Simplemente haciendo oracion na Jehova, na bos haltu pa esun cansá tende, pidiendo pa yuda esun ei comprendé cuantu Jehova i otronan ta stim’é, siguramente lo ta masha consolador. Tendiendo e oracion ferviente i sincero di un anciano por yuda fortalecé e confiansa di un persona afligí. E por ser yudá pa razoná cu si e ancianonan tin e confiansa cu Jehova lo contestá oracionnan na fabor di dje, anto e tambe por tin e confiansa ei.

17. Pakico ancianonan mester ta scuchadornan compasivo?

¹⁷ “Tur hende mester ta lihé pa tende, slow pa papia,” Santiago 1:19 ta bisa. Pa yuda esnan cansá recobrá poder, ancianonan mester ta tambe scuchadornan compasivo. Den algun caso miembronan dje congregacion por ta luchando cu problemanan of presionnan cu no por ser resolvé den e sistema di cosnan aki. Loke nan kisas mester anto, no ta algun solucion pa “resolvé” nan problema sino simplemente pa papia cu un bon scuchador—un persona cu lo no bisa nan con nan lo mester sinti sino cu lo scucha sin husga nan.—Lucas 6:37; Romanonan 14:13.

18, 19. (a) Con siendo lihé pa tende por yuda un anciano evitá di haci e carga di un persona cansá asta mas pisá? (b) Kico ta resultá ora ancianonan ta mustra “sintimentu di compañero”?

¹⁸ Ancianonan, siendo lihé pa scucha por yuda boso evitá di inconcientemente haci e carga di un persona cansá asta mas pisá. Por ehempel, si un ruman a falta algun reunion of a slow den e ministerio di veld, e realmente mester di conseho tocante haci mas den e ministerio of tocante ser mas regular na reunionnan? Tal bes. Pero bo tin un cuadro completo di su situacion? Tin problemanan creciente di salú? Responsabilidadnan di famia a cambia recientemente? Tin otro circunstancianan of presionnan cu ta forma un peso grandi riba dje? Corda, e persona por ta sintiendo su mes masha culpabel caba cu e no por haci mas.

¹⁹ Con, anto, bo por yuda e ruman? Promé cu bo saca conclusion i ofrecé conseho, scucha! (Proverbionan 18:13) Cu preguntanan dicernidor ‘saca afó’ e sintimentunan dje curason dje persona. (Proverbionan 20:5) No ignorá e sintimentunan aki—reconocé nan. Kisas e persona cansá mester ser trankilisá cu Jehova ta interesá den nos i ta comprendé cu tin biaha nos circunstancianan por limitá nos. (1 Pedro 5:7) Ora ancianonan ta mustra tal “sintimentu di compañero,” esnan cansá lo ‘haña refrescamentu pa nan alma.’ (1 Pedro 3:8; Mateo 11:28-30) Ora nan haña tal refrescamentu, lo no tin nodi bisa nan pa haci mas; nan curason lo impulsá nan pa haci tur loke nan razonablemente por haci den sirbi Jehova.—Compará cu 2 Corintionan 8:12; 9:7.

20. Cu e fin dje generacion malbado aki asina cerca, kico nos mester ta determiná pa haci?

²⁰ Berdaderamente nos ta bibando den e tempu di mas exigente di henter historia humano. E presionnan di biba den Satanas su mundu ta aumentando segun cu nos ta yega mas cerca dje tempu di fin. Corda, mescos cu un leon cu ta yag, e Diabel ta spera pa nos cansa i entregá di manera cu e por probechá di nos como víctima fácil. Ki gradicidu nos por ta cu Jehova ta duna poder na esun cansá! Laga nos saca pleno probecho dje percuracionnan cu el a haci pa duna nos e poder pa sigui padilanti, como si fuera dunando nos e halanan poderoso di un águila cu ta subiendo na haltu. Cu e fin dje generacion malbado aki asina cerca, awor no ta tempu pa stop di core den nos careda p’e premio—bida eterno.—Hebreonan 12:1.

Kico Ta Bo Contesta?

◻ Kico nos por spera pa Jehova haci como contesta riba nos oracionnan?

◻ Den ki maneranan nos por saca fortalesa for di nos hermandad cristian?

◻ Con e Palabra di Dios ta yuda nos recobrá poder?

◻ Kico ancianonan por haci pa yuda esnan cansá recobrá poder?

[Plachi na página 17]

Ora nos ta extendé hospitalidad, laga nos no lubidá esnan cu tin mester di animacion

[Plachi na página 18]

Ancianonan por pidi Jehova yuda esnan cansá comprendé cuantu nan ta ser stimá