Apolos—Un Proclamador Elocuente dje Berdad Cristian

SEA nan ta miembro dje congregacion cristian pa hopi aña of pa solamente un par di aña, tur proclamador di Reino mester ta interesá den haci progreso como predicador dje bon nobo. Esei ta implicá aumentá nos conocimentu dje Palabra di Dios i nos abilidad pa siñ’é na otronan. Pa algun, e por nificá enfrentá desafionan, vence dificultadnan, of haci nan mes disponibel pa mas actividad.

Bijbel ta contené vários ehempel di homber i muhernan deboto di antigwedad cu, den diferente manera, a logra haci gran progreso spiritual i a cosechá recompensanan pa nan esfuersonan. Un di nan tabata Apólos. Ora e Scritura ta introducié na nos, e ta un individuo cu un comprendimentu incompleto dje siñansanan cristian; sin embargo, djis un par di aña despues, e ta actuando como un representante biahero dje congregacion di promé siglo. Kico a capacit’é pa haci tal progreso? E tabata poseé cualidadnan cu nos tur lo haci bon di imitá.

“Bon Versá den e Scritura”

Rond di aña 52 E.C., segun e escritor di Bijbel Lucas, “un cierto hudiu yamá Apólos, un nativo di Alehandria, un homber elocuente, a yega na Efeso; i e tabata bon versá den e Scritura. E homber aki a ser instruí oralmente den e caminda di Jehova i, briyando cu spiritu, el a cuminsá papia i siña cu exactitud e cosnan tocante Jesus, pero conociendo solamente e bautismo di Juan. I e homber aki a cuminsá papia cu frankesa den e snoa.”—Echonan 18:24-26.

Alehandria, Egipto, tabata e di dos stad di mas grandi na mundu despues di Roma i tabata un dje centronan cultural di mas importante dje tempu ei tantu pa hudiunan como pa griegonan. Probablemente, Apólos a gana su conocimentu sólido dje Scritura Hebreo i un cierto grado di elocuencia como resultado di un educacion den e comunidad hudiu grandi dje stad ei. Ta mas difícil pa suponé na unda Apólos a siña di Jesus. “E tabata evidentemente un biahero—tal bes un comerciante ambulante,” e erudito F. F. Bruce ta indicá, “i e por a topa predicadornan cristian den cualkier un di un cantidad di lugá cu el a bishitá.” Sea cual sea e caso, maske el a papia i siña cu exactitud tocante Jesus, ta parce cu el a ricibí testimonio promé cu Pentecoste di 33 E.C., siendo cu e tabata ‘conocé solamente e bautismo di Juan.’

Como esun cu a bai dilanti Jesus, Juan Bautista a duna un testimonio poderoso na henter e nacion israelita, i hopi persona a ser bautisá na su man como símbolo di repentimentu. (Marco 1:5; Lucas 3:15, 16) Segun un cantidad di historiador, entre e poblacion hudiu dje Imperio Romano, hopi hende su conocimentu di Jesus tabata limitá na loke Juan Bautista a predicá na oriya di Riu Jordan. “Nan cristianismo tabata na e mésun punto cu e tabata pará na cuminsamentu dje ministerio di nos Señor,” W. J. Conybeare i J. S. Howson ta bisa. “Nan tabata ignorante dje nificacion completo dje morto di Cristo; posiblemente nan no tabata ni sikiera sa dje echo di Su resureccion.” Ta parce cu Apólos tabata ignorante tambe dje dramamentu di spiritu santu na Pentecoste 33 E.C. No obstante, el a haña algun informacion corecto tocante Jesus, i e no a ten’é pa su mes. Realmente, cu curashi el a busca oportunidad pa papia di loke e tabata sa. Sin embargo, ainda su celo i entusiasmo no tabata segun conocimentu exacto.

Celoso Pero Humilde

E relato di Lucas ta continuá: “Ora Prisila i Aquila a tend’é, nan a hib’é cu nan den nan compania i a splik’é e caminda di Dios mas corectamente.” (Echonan 18:26) Aquila i Prisila mester a reconocé cu Apólos su fe tabatin hopi cos en comun cu esun di nan mes, pero prudentemente nan no a purba corigí su comprendimentu incompleto den público. Probablemente nan tabatin un cantidad di combersacion personal cu Apólos, cu e meta di yud’é. Con Apólos, un homber “poderoso . . . den e Scritura,” a reaccioná? (Echonan 18:24, Kingdom Interlinear) Cu tur probabilidad, Apólos tabata predicando su mensahe incompleto den público pa algun tempu promé cu el a topa Aquila i Prisila. Un persona orguyoso fácilmente lo por a nenga di aceptá cualkier coreccion, pero Apólos tabata humilde i gradicidu di por a completá su conocimentu.

E mésun actitud sin pretension di Apólos ta evidente tambe den su disponibilidad pa aceptá un carta di recomendacion for dje rumannan efesio p’e congregacion na Corinto. E relato ta sigui: “Ademas, dor cu e tabata kier a crusa i drenta den Acaya, e rumannan a skirbi e disipelnan, exhortando nan pa ricibié bondadosamente.” (Echonan 18:27; 19:1) Apólos no a exigí p’e ser aceptá riba su propio méritonan sino cu modestia a sigui e areglo dje congregacion cristian.

Na Corinto

E resultadonan inicial di Apólos su ministerio na Corinto tabata excelente. E buki di Echonan ta informá: “Ora el a yega ei, el a yuda mashá esnan cu a kere debí n’e bondad inmerecí di Dios; pasobra cu intensidad el a proba cabalmente cu e hudiunan tabata ekibocá públicamente, miéntras cu el a demostrá usando e Scritura cu Jesus ta e Cristo.”—Echonan 18:27, 28.

Apólos a pone su mes disponibel pa sirbi e congregacion, animando e rumannan dor di su preparacion i celo. Kico tabata e clave pa su éxito? Apólos siguramente tabatin abilidad natural i tabatin curashi pa tene un debate público cu e hudiunan. Pero mas importante, el a razoná usando e Scritura.

Aunke Apólos tabatin un influencia poderoso entre e corintionan, desafortunadamente su predicacion a producí efectonan negativo inesperá. Con asina? Tantu Pablo como Apólos a contribuí hopi n’e plantamentu i muhamentu dje simia dje berdad di Reino na Corinto. Pablo a predicá ei rond di aña 50 E.C., mas o ménos dos aña promé cu e yegada di Apólos. P’e tempu cu Pablo a skirbi su promé carta n’e corintionan, mas o ménos na 55 E.C., divisionnan a desaroyá. Algun tabata mira Apólos como nan lider, miéntras cu otronan tabata na fabor di Pablo of Pedro of a mira solamente Cristo como nan Lider. (1 Corintionan 1:10-12) Algun tabata bisa: ‘Ami ta pertenecé na Apólos.’ Pakico?

E mensahe cu Pablo i Apólos a predicá tabata mescos, pero nan tabatin personalidadnan diferente. Manera Pablo mes a admití, e tabata “inexperto den papiamentu”; Apólos, di otro banda, tabata “elocuente.” (2 Corintionan 10:10; 11:6) E tabatin abilidadnan cu a permitié haña audiencia entre algun hende dje comunidad hudiu na Corinto. E tabatin éxito den “proba cabalmente cu e hudiunan tabata ekibocá,” miéntras cu Pablo, no muchu tempu promé, a bandoná e snoa.—Echonan 18:1, 4-6.

Esaki por tabata e motibu pa algun haña e tendencia pa sigui Apólos? Segun teoria di un cantidad di comentarista, un pasion natural pa discusion filosófico entre e griegonan por a hiba algun na preferá e método mas stimulador di Apólos. Guiseppe Ricciotti ta indicá cu “[Apólos] su idioma colorido i su bunita expresionnan simbólico a hacié gana e admiracion di hopi persona cu a preferá é riba Pablo, un orador sin pretension i sin elocuencia.” Si en berdad cierto personanan incorectamente a permití tal preferencianan personal crea division entre e rumannan, ta fácil pa comprendé pakico Pablo a criticá severamente e halsamentu di “e sabiduria dje sabínan.”—1 Corintionan 1:17-25.

Sin embargo, e crítica ei no ta nificá cu tabatin friccion entre Pablo i Apólos. Aunke algun a imaginá nan mes sin tabatin base p’esei cu e dos predicadornan aki tabata oponentenan amargo cu tabata lucha pa gana cariño dje corintionan, e Scritura no ta mencioná algu asina. En bes di purba haci su mes e lider di un faccion, Apólos a bandoná Corinto, a regresá Efeso i tabata huntu cu Pablo ora el a skirbi e promé carta n’e congregacion dividí.

No tabatin desunion ni rivalidad entre nan; mas bien, e dos rumannan evidentemente tabata cooperando pa resolvé e problemanan den Corinto cu confiansa mutuo. Tal bes Pablo tabatin su dudanan tocante algun ruman den Corinto pero siguramente no tocante Apólos. E trabou dje dos hombernan aki tabata na armonia completo; nan siñansanan a complementá otro. Pa cita Pablo su mes palabranan: “Ami a planta, Apólos a muha,” pasobra tur dos tabata “colaboradornan di Dios.”—1 Corintionan 3:6, 9, 21-23.

Mescos cu Pablo, e corintionan tabatin hopi aprecio pa Apólos, deseando pa ricibí un bishita mas for di dje. Pero ora Pablo a invitá Apólos pa regresá Corinto, e alehandrino a nenga. Pablo ta bisa: “Awor en cuanto Apólos nos ruman, mi a suplik’é mashá pa bai cerca boso . . . , pero no tabata su boluntad di ningun manera pa bin awor; pero lo e bin ora e tin e oportunidad.” (1 Corintionan 16:12) Apólos kisas no tabatin masha gana di regresá pa temor di lanta mas division, of simplemente pasobra e tabata ocupá otro caminda.

E último biaha cu Apólos ta ser mencioná den e Scritura, e tabata biahando pa Creta i tal bes mas aleu cu Creta. Atrobe Pablo ta mustra aprecio en particular pa su amigu i colaborador, pidiendo Tito pa duna Apólos i su compañero di biahe, Zénas, tur loke nan por tabatin mester pa nan biahe. (Tito 3:13) P’e tempu aki, despues di mas o ménos dies aña di entrenamentu cristian, Apólos a haci suficiente progreso pa actua como un representante biahero dje congregacion.

Cualidadnan Piadoso cu Ta Facilitá Crecementu Spiritual

E predicador alehandrino a pone un ehempel excelente pa tur predicador actual dje bon nobo i, efectivamente, pa tur cu ta deseá di haci progreso spiritual. Kisas nos no ta mes elocuente cu e tabata, pero siguramente nos por haci esfuerso pa imitá su conocimentu i abilidad den e uso dje Scritura, yudando asina buscadornan sincero dje berdad. Dor di su ehempel di actividad celoso, Apólos “a yuda mashá esnan cu a kere.” (Echonan 18:27) Apólos tabata humilde, dispuesto pa haci sacrificio propio, i dispuesto pa sirbi otronan. El a comprendé bon cu no tin lugá pa rivalidad ni ambicion den e congregacion cristian, pasobra nos tur ta “colaboradornan di Dios.”—1 Corintionan 3:4-9; Lucas 17:10.

Nos, mescos cu Apólos, por haci progreso spiritual. Nos ta dispuesto pa mehorá of expandé nos sirbishi sagrado, poniendo nos mes den un posicion pa ser usá mas plenamente dor di Jehova i su organisacion? Den e caso ei nos lo ta studiantenan i proclamadornan celoso dje berdad cristian.