Busca Berdadero Pas i Sigui Tras di Dje!
“Esun cu kier stima bida i mira bon dianan, . . . lagu’e apartá for di loke ta malu i haci loke ta bon; lagu’e busca pas i sigui tras di dje.”—1 PEDRO 3:10, 11.
1. Ki palabranan famoso di Isaías lo tin éxito sigur?
“NAN lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña mas di guera.” (Isaías 2:4) Aunke e famoso texto aki ta exhibí cerca dje sede mundial di Nacionnan Uní den New York City, den absolutamente ningun manera por bisa cu e organisacion mundial ei a cumpli cuné. Sin embargo, como parti dje palabra infalibel di Jehova Dios, e declaracion ei lo no ta sin resultado.—Isaías 55:10, 11.
2. Kico mester “sosodé den e parti final dje dianan,” segun Isaías 2:2, 3?
2 E palabranan hañá na Isaías 2:4 en realidad ta parti di un profecia maraviyoso, un profecia tocante berdadero pas—i e ta hañando cumplimentu netamente den nos mes tempu. Promé cu e proclamá e prospectonan emocionante di un mundu sin guera i arma di guera, e profecia ta bisa: “Mester sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i siguramente lo e ser halsá mas haltu cu e ceritunan; i na dje tur e nacionnan tin cu basha bai. I hopi pueblo siguramente lo bai i bisa: ‘Boso ban, i laga nos subi na e ceru di Jehova, n’e cas di e Dios di Jacob; i lo e instruí nos tocante su camindanan, i nos lo cana den su bereanan.’ Pasobra di Síon ley lo sali, i e palabra di Jehova for di Jerusalem.”—Isaías 2:2, 3.
Hende Por Bira Pacífico
3. Con un persona por cambia for di un buscador di guera pa un hende pacífico?
3 Ripará cu promé cu hende por sigui un curso pacífico, nan tin cu ser instruí den Jehova su camindanan. Ora un hende reaccioná obedientemente riba e siñansa di Jehova, esei por cambia su manera di pensa i actua, di manera cu un persona cu tabata buscador di guera ta bira pacífico. Con e transformacion aki ta ser lográ? Romanonan 12:2 ta bisa: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” Nos ta rehací nos mente, of motiv’é den un direccion diferente, dor di yen’é cu principionan i leynan for dje Palabra di Dios. Studio regular di Bijbel ta yuda nos haci e cambio aki i ta permití nos proba pa nos mes loke ta e boluntad di Jehova pa nos, di manera cu nos por mira claramente e caminda cu nos tin cu cana.—Salmo 119:105.
4. Con un hende ta bisti e personalidad nobo pacífico?
4 E berdad di Bijbel ta transformá no solamente nos patronchi di pensa sino tambe nos accionnan i personalidad. E ta yuda nos haci loke apostel Pablo a urgi: “Kita e personalidad bieu cu ta conforme cu boso manera di anda anterior i cu ta ser corumpí segun su deseonan engañoso; pero . . . [sea] hací nobo den e forsa cu ta impulsá boso mente, i . . . bisti e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:22-24) E forsa cu ta impulsá e mente ta interno. E ta ser transformá i ta bira poderoso segun cu nos amor pa Jehova i su leynan ta crece, i e ta haci nos hendenan spiritual i pacífico.
5. Con e “mandamentu nobo” cu Jesus a duna su disipelnan ta contribuí n’e pas entre nan?
5 E necesidad p’e transformacion aki ta ser mirá for dje instruccion cu Jesus a duna su disipelnan durante e último oranan cu e tabata cu nan: “Mi ta duna boso un mandamentu nobo, pa boso stima otro; mescos cu mi a stima boso, pa boso tambe stima otro. Den esaki tur lo sa cu boso ta mi disipelnan, si boso tin amor entre boso.” (Juan 13:34, 35) E amor inegoista aki, mescos cu esun cu Cristo a mustra, ta uni e disipelnan huntu den unidad perfecto. (Colosensenan 3:14) Solamente esnan cu ta dispuesto pa aceptá i biba segun e “mandamentu nobo” aki lo disfrutá dje pas cu Dios ta primintí. Acaso tin hende cu ta haci esaki awe?
6. Pakico Testigonan di Jehova ta disfrutá di pas, na contraste cu e hendenan dje mundu?
6 Testigonan di Jehova ta haci esfuerso pa mustra amor den nan hermandad mundial. Aunke nan ta for di tur nacion dje mundu, nan no ta enbolbé nan mes den e controversianan dje mundu, ni sikiera ora nan ta sometí bou di presion político i religioso severo. Como un pueblo uní, nan ta siñá pa Jehova, i nan ta disfrutá di pas. (Isaías 54:13) Nan ta keda neutral den conflictonan político, i nan no ta participá den guera. Algun cu ántes tabata violento a bandoná e estilo di bida ei. Nan a bira cristiannan stimador di pas, imitando e ehempel di Cristo Jesus. I di henter curason nan ta sigui e conseho di Pedro: “Esun cu kier stima bida i mira bon dianan, lagu’e frena su lenga di loke ta malu i su lipnan di papia engaño, pero lagu’e apartá for di loke ta malu i haci loke ta bon; lagu’e busca pas i sigui tras di dje.”—1 Pedro 3:10, 11; Efesionan 4:3.
Esnan cu Ta Siguiendo Tras di Pas
7, 8. Duna ehempel di hendenan cu a bandoná guera i a bira buscador di berdadero pas. (Relatá otronan cu tal bes bo conocé.)
7 Tuma por ehempel Rami Oved, un ex-oficial di un escuadron anti-terorista specialisá. El a ser entrená pa mata su enemigunan. E tabata kere fervientemente den su nacionalismo israelí, te riba e dia cu el a descubrí cu e rabinan no tabata kier p’e casa cu e muher cu e tabata stima simplemente pa motibu cu e muher tabata un asiático, un gentil. El a cuminsá busca e berdad den Bijbel. E ora ei el a bini den contacto cu Testigonan di Jehova. Su studio di Bijbel cu e Testigonan a convenc’é cu e no por sigui ta un fanático nacionalista mas. Amor cristian a nificá stop cu guera i uso di arma i siña stima hende di tur rasa. Ki sorprendí el a keda ora el a ricibí un carta bondadoso cu e palabranan di introduccion, “Mi Ruman Rami”! Kico tabata asina straño tocante esei? Esun cu a skirbié tabata un Testigo palestino. “Mi a haña cu esei tabata increibel,” Rami ta bisa, “ya cu palestinonan tabata mi enemigunan, i ata aki un di nan tabata yamá mi ‘Mi Ruman.’” Rami i su esposa awor ta sigui tras di berdadero pas den e caminda di Dios.
8 Un otro ehempel ta esun di Georg Reuter, cu a sirbi den e ehército aleman cu a invadí Rusia durante Guera Mundial II. Pronto el a desilusioná cu Hitler su plan grandioso pa dominacion mundial. Ora el a regresá for di guera, el a cuminsá studia Bijbel cu Testigonan di Jehova. El a skirbi: “Por fin cosnan a cuminsá bira claro pa mi. Mi a realisá cu bo no por culpa Dios pa tur e dramamentu di sanger . . . Mi a siña cu su propósito tabata pa establecé un paradijs mundial cu bendicionnan eterno pa humanidad obediente. . . . Hitler a gaba tocante su ‘Reich di Mil Aña’ pero a goberná pa solamente 12 [aña]—i cu ki un resultado horibel! Ta Cristo, i no Hitler, . . . cu por i lo establecé un reino di mil aña riba tera.” Pa rond di 50 aña awor, Georg ta sirbiendo como un mensahero di berdadero pas den e ministerio di tempu completo.
9. Con e experencia di Testigonan di Jehova na Alemania nazi ta proba cu nan tin curashi pero tog ta pacífico?
9 E integridad i neutralidad di Testigonan di Jehova na Alemania durante e régimen nazi te awe ta sigui duna un testimonio di nan amor pa Dios i pa pas, mas cu 50 aña despues. Un foyeto publicá dor dje Holocaust Memorial Museum na Washington, D.C., Merca, ta declará: “Testigonan di Jehova a soportá persecucion intenso bou dje régimen nazi. . . . E curashi cu e mayoria inmenso a desplegá dor di nenga di [renunciá nan religion], confrontá cu tortura, maltrato den camponan di concentracion, i algun biaha ehecucion, a haci nan gana e respet di hopi contemporáneo.” Anto e ta agregá: “Durante e liberacion for dje camponan, Testigonan di Jehova a sigui cu nan trabou, moviendo entre e sobrebibientenan, combirtiendo hende.”
Un Cambio Muchu Mas Grandi
10. (a) Ki cambio grandi ta necesario pa berdadero pas por bini? (b) Con esaki ta ser describí den e buki di Daniel?
10 Esaki ta nificá cu Testigonan di Jehova ta kere cu nan por trece pas den henter e mundu pa medio di un of otro combertimentu masal na un kerementu den neutralidad cristian? No! Pa pas por ser restorá na tera, un cambio muchu mas grandi ta necesario. Kico esei ta? Gobernacion humano violento, divisivo i opresivo mester traha lugá pa gobernacion mediante e Reino di Dios, pa cua Jesus a siña su disipelnan pidi. (Mateo 6:9, 10) Pero con esei lo tuma lugá? Den un soño inspirá dor di Dios, profeta Daniel a haña sa cu den e último dianan, e Reino di Dios, manera un piedra grandi ‘cortá no pa man di hende,’ lo kibra na werki un imágen gigantesco cu a representá gobernacion político di humanidad riba tera. Anto el a proclamá: “Den e dianan dje reynan ei e Dios di shelu lo establecé un reino cu nunca lo ser reducí na ruina. I e reino mes lo no ser pasá na ningun otro pueblo. Lo e aplastá i pone un fin na tur e reinonan aki, i e mes lo permanecé pa tempu indefiní.”—Daniel 2:31-44.
11. Pa medio di kico Jehova lo producí e cambio necesario pa pas?
11 Pakico e cambio radical aki den e situacion di mundu lo tuma lugá? Pa motibu cu Jehova a primintí cu lo e limpia e tera di tur esnan cu ta contamin’é i ruin’é. (Revelacion 11:18) E transformacion aki lo tuma lugá n’e guera hustu di Jehova contra Satanas i su mundu malbado. Nos ta lesa na Revelacion 16:14, 16: “Nan [esta, expresionnan inspirá impuru] realmente ta expresionnan inspirá dor di demoño i ta haci señalnan, i nan ta sali pa bai n’e reynan [e gobernantenan político] di henter e tera habitá, pa reuní nan huntu p’e guera dje gran dia di Dios e Todopoderoso. I nan a reuní nan huntu n’e lugá cu na hebreo ta ser yamá Har–Magedon.”
12. Con Armagedon lo ta?
12 Con Armagedon lo ta? Lo e no ta un apocalípsis nuclear of un desaster cu hende ta provocá. No, e ta e guera di Dios pa caba cu tur guera humano i eliminá tur esnan cu ta promové e gueranan ei. E ta e guera di Dios pa trece berdadero pas pa esnan cu ta stima pas. Sí, Armagedon ta bini manera Dios a proponé. Lo e no tarda. Su profeta Habacuc a ser inspirá pa skirbi: “E vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda, keda den expectativa di dje; pasobra lo e ser realisá sin falta. Lo e no ta lat.” (Habacuc 2:3) Pa motibu di nos sintimentu humano, por parce cu el a tarda, pero Jehova ta pega na su orario. Armagedon lo dal aden n’e ora cu Jehova a predeterminá.
13. Con Dios lo trata cu e berdadero culpabel, Satanas e Diabel?
13 E accion decisivo aki lo habri caminda pa berdadero pas! Pero pa berdadero pas keda firmemente establecí, algu otro mester ser hací—eliminacion di esun cu ta causa division, odio i contencion. I esei ta net loke Bijbel ta profetisá cu lo tuma lugá siguientemente—tiramentu di Satanas, e instigador di guera i tata di mentira, den abismo. Apostel Juan a mira e suceso aki den un vision profético, manera ta pará skirbí na Revelacion 20:1-3: “Mi a mira un angel bahando for di shelu cu e yabi dje abismo i un cadena grandi den su man. I el a gara e dragon, e colebra original, cu ta e Diabel i Satanas, i a mar’é pa mil aña. I el a tir’é den abismo i a cer’é i a sey’é riba dje, p’e no gaña e nacionnan mas te cu e mil aña a terminá.”
14. Con Jehova su accion triunfante contra Satanas por ser describí?
14 Esaki no ta un soño; e ta e promesa di Dios—i Bijbel ta bisa: “Ta imposibel pa Dios gaña.” (Hebreonan 6:18) Pues Jehova por a bisa mediante su profeta Jeremías: “‘Ami ta Jehova: Esun cu ta ehercé bondad amoroso, husticia i rectitud den e tera; pasobra den e cosnan aki di berdad mi tin deleite,’ ta e expresion di Jehova.” (Jeremías 9:24) Jehova ta actua den husticia i rectitud, i e tin deleite den e pas cu lo e trece n’e tera.
Gobernacion Mediante e Prins di Pas
15, 16. (a) Ken Jehova a scoge pa goberná como Rey? (b) Con e gobernacion ei ta ser describí, i ken lo participá den dje?
15 Pa garantisá cu berdadero pas lo bini pa tur esnan cu ta biba bou di su areglo di Reino, Jehova a duna e gobernacion n’e berdadero Prins di Pas, Jesucristo, manera Isaías 9:6, 7 a profetisá: “Un yu a nace na nos, un yu homber a ser duná na nos; i e gobiernu di prins lo yega di ta riba su scouder. I su nomber lo ser yamá Maraviyoso Consehero, Dios Poderoso, Tata Eterno, Prins di Pas. N’e abundancia dje gobiernu di prins i na pas lo no tin fin . . . E celo mes di Jehova di ehércitonan lo haci esaki.” E salmista tambe a skirbi proféticamente dje gobernacion pacífico dje Mesías: “Den su dianan e hustu lo spruit, i e abundancia di pas te cu luna no t’ei mas.”—Salmo 72:7.
16 Ademas, 144.000 ruman di Cristo, ungí cu spiritu, lo ta gobernando cuné den shelu. Esakinan ta co-herederonan cu Cristo di ken Pablo a skirbi: “Di su parti, e Dios cu ta duna pas lo aplastá Satanas bou di boso pianan pronto. Cu e bondad inmerecí di nos Señor Jesus sea cu boso.” (Romanonan 16:20) Sí, esakinan lo participá for di shelu den e victoria di Cristo riba e instigador di guera, Satanas e Diabel!
17. Kico nos tin cu haci pa heredá berdadero pas?
17 Pues awor e pregunta ta, Kico bo mester haci pa heredá berdadero pas? Berdadero pas por bini solamente n’e manera di Dios, i pa hañ’é bo tin cu dal pasonan positivo. Bo tin cu aceptá e Prins di Pas i pone bo fe den dje. Esaki ta nificá cu bo tin cu aceptá Cristo den su papel como Redentor i Rescatador di humanidad pecaminoso. Jesus mes a bisa e famoso palabranan: “Dios a stima e mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Bo ta dispuesto pa ehercé fe den Cristo Jesus como Dios su Agente pa trece berdadero pas i salbacion? No tin ningun otro nomber bou di shelu cu por establecé pas i garantis’é. (Filipensenan 2:8-11) Pakico? Pasobra Jesus ta e Scogí di Dios. E ta e mensahero di pas di mas grandi cu a yega di cana riba tera. Abo lo scucha Jesus i sigui su ehempel?
18. Kico nos mester haci como reaccion riba Jesus su palabranan registrá na Juan 17:3?
18 “Esaki ta nificá bida eterno,” Jesus a bisa, “cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Awor ta e tempu pa gana conocimentu exacto dor di asistí regularmente n’e reunionnan di Testigonan di Jehova na Salon di Reino. E reunionnan educativo aki lo motivá bo pa compartí bo conocimentu i bo speransa cu otronan. Abo tambe por bira un mensahero dje pas di Dios. Bo por disfrutá di pas awor dor di confia den Jehova Dios, manera Isaías 26:3 ta declará, segun e New International Version: “Lo bo mantené den pas perfecto esun kende su mente ta constante, pasobra e ta confia den bo.” Den ken bo mester confia? “Confia den Jehova pa semper, pasobra den Jah Jehova ta e Baranca pa tempu indefiní.”—Isaías 26:4.
19, 20. Kico ta spera esnan cu awe ta busca pas i ta sigui tras di dje?
19 Sea determiná awor pa scoge pa bida eterno den Dios su mundu nobo pacífico. Na Revelacion 21:3, 4, e Palabra di Dios ta sigurá nos: “Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i morto lo no t’ei mas, ni lo tin mas lamento ni sclamacion ni dolor. E cosnan anterior a pasa bai.” Esei no ta e futuro pacífico cu bo ta anhelá p’e?
20 Anto corda loke Dios a primintí. “E mansunan mes lo poseé e tera, i nan berdaderamente lo haña nan deleite exkisito den e abundancia di pas. Vigilá esun cu ta liber di culpa i mantené esun recto na bista, pasobra e futuro dje homber ei lo ta pacífico.” (Salmo 37:11, 37) Ora e dia felis ei bini, laga nos bisa cu gratitud, “Por fin berdadero pas! Danki na Jehova Dios, e fuente di berdadero pas!”
Bo Por Splica?
◻ Kico por yuda un persona haci cambio den pensamentu i accion?
◻ Con Testigonan di Jehova, individualmente i colectivamente, a demostrá nan amor pa berdadero pas?
◻ Con Jehova lo trata cu tur esnan cu ta promové odio i guera?
◻ Kico e gobernacion mediante e Prins di Pas lo haci pa humanidad?
[Plachinan na página 14]
E palabranan di Isaías ta ser cumplí, no dor di Nacionnan Uní, sino dor di esnan cu ta respondé na Jehova su siñansa
[Plachinan na página 15]
E dos hombernan aki a haci cambio pa sigui tras di pas
Rami Oved
Georg Reuter
[Plachi na página 16]
Berdadero pas lo prevalecé bou dje gobernacion dje Prins di Pas