Ora No Tin Picá Mas

“NOS a nace cu picá?” E pregunta ei a confundí un studiante di universidad na Merca djis despues cu el a cuminsá studia Bijbel. Debí na su antecedente hindú, e idea di picá heredá tabata algu straño p’e. Pero el a razoná cu si en berdad hende ta heredá picá, no tin sentido pa nengu’é of ignor’é. Con un hende por a haña e contesta riba e pregunta aki?

Si picá ta ser heredá, e mester a cuminsá un caminda. E promé hende a ser creá malbado, di manera cu el a pasa característicanan malbado pa su yunan? Of e defecto a desaroyá mas despues? Exactamente na ki tempu picá a cuminsá? Di otro banda, si picá ta solamente un realidad conceptual of principio malbado externo, nos por spera di ser librá un dia for di dje?

Segun creencia hindú, sufrimentu i maldad ta parti di creacion. Un erudito hindú ta remarcá cu “sufrimentu [of maldad], mescos cu reumatismo crónico, solamente ta move di un lugá pa otro pero no por ser eliminá totalmente.” Maldad siguramente tabata parti dje mundu di humanidad atrabes di historia registrá. Si e ta data promé cu e registronan histórico di hende, contestanan confiabel tocante su orígen necesariamente tin cu bini di un fuente superior cu hende. E contestanan tin cu bini di Dios.—Salmo 36:9.

Hende—Creá Sin Picá

E filósofo hindú Nikhilananda ta reconocé cu e descripcionnan dje creacion di hende cu e Vedanan ta duna, ta figurativo. Di igual manera, mayoria religion oriental ta duna solamente splicacionnan mitológico di creacion. Tog, tin motibunan tantu lógico como científico pa kere e relato dje creacion dje promé hende den Bijbel.a Su promé capítulo caba ta declará: “Dios a procedé na crea hende den su imágen, den imágen di Dios el a cre’é; machu i hembra el a crea nan.”—Génesis 1:27.

Kico kier men ser creá “den imágen di Dios”? Simplemente esaki: Hende a ser trahá den e semehansa di Dios, teniendo atributonan divino—manera husticia, sabiduria i amor—cu a distinguié for di animal. (Compará cu Colosensenan 3:9, 10.) E cualidadnan aki a duna hende e abilidad di scoge pa haci bon of malu, dunand’e un boluntad liber. No tabatin picá den e promé hende, ni maldad of sufrimentu den su bida, ora el a ser creá.

Jehova Dios a pone e mandamentu aki riba e homber Adam: “Bo por come di tur palu dje hofi te na satisfaccion. Pero en cuanto e palu di conocimentu di bon i malu, bo no mag come di dje, pasobra den e dia cu bo come di dje lo bo muri positivamente.” (Génesis 2:16, 17) Dor di scoge pa obedecé, Adam i su esposa, Eva, por a trece alabansa i onor na nan Creador i keda liber di picá. Di otro banda, un acto di desobedencia lo a indicá cu nan no a cumpli cu e normanan perfecto di Dios i lo a haci nan imperfecto—pecaminoso.

Adam i Eva no a ser creá cu un naturalesa divino. Sin embargo, sí nan tabatin un midí di atributonan divino i e capacidad pa tuma decision moral. Siendo Dios su creacion, nan tabata sin picá, esta perfecto. (Génesis 1:31; Deuteronomio 32:4) E creacion di Adam cu Eva no a desbaratá e armonia cu a prevalecé entre Dios i e universo pa hopi tempu te n’e ora ei. Con, anto, picá a cuminsá?

E Orígen di Picá

Picá a tuma lugá pa promé biaha den e region di spiritu. Promé cu e creacion di tera i hende, Dios a crea criaturanan spiritual inteligente—e angelnan. (Job 1:6; 2:1; 38:4-7; Colosensenan 1:15-17) Un dje angelnan aki tabatin masha idea di su mes bunitesa i inteligencia. (Compará cu Ezekiel 28:13-15.) For dje instruccion cu Dios a duna Adam i Eva pa producí yu, e angel aki por a mira cu pronto henter e tera lo tabata yená cu hende hustu, tur adorando Dios. (Génesis 1:27, 28) E criatura spiritual aki a deseá nan adoracion pa su mes. (Mateo 4:9, 10) Concentrando riba e deseo aki a hib’é na tuma un curso robes.—Santiago 1:14, 15.

Papiando cu Eva mediante un colebra, e angel rebelde a bisa cu dor di prohibí pa come for dje fruta dje palu di conocimentu di bon i malu, Dios tabata reteniendo conocimentu cu e mester a haña. (Génesis 3:1-5) Esei tabata un mentira baho—un acto di picá. Dor di declará e mentira aki, e angel a haci su mes un pecadó. Como resultado, a yam’é e Diabel, un calumniadó, i Satanas, un opositor di Dios.—Revelacion 12:9.

Satanas su argumento persuasivo tabatin un efecto adverso riba Eva. El a laga e Tentadó seducié dor di pone confiansa den su palabranan i a come dje fruta dje palu prohibí. Su esposo, Adam, a djoin e i a come dje fruta, i dje forma ei nan tur dos a bira pecadó. (Génesis 3:6; 1 Timoteo 2:14) Claramente, dor di scoge pa desobedecé Dios, nos promé mayornan a hera e marca di perfeccion i a haci nan mes pecadó.

Kico dje yunan di Adam cu Eva? Bijbel ta splica: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) E ley di herencia tabata na vigor caba. Adam no por a pasa pa su yunan loke e mes no tabatin. (Job 14:4) Despues cu nan a perde perfeccion, e promé pareha tabata pecadónan ora nan yunan a ser concibí. Como resultado, nos tur—sin excepcion—a heredá picá. (Salmo 51:5; Romanonan 3:23) En buelta, picá no a producí nada otro sino maldad i sufrimentu. Ademas, pa motibu di dje, nos tur ta bira bieu i ta muri, “pasobra e pago cu picá ta paga ta morto.”—Romanonan 6:23.

Concenshi Ta “Acusá” of “Dispensá”

Considerá tambe e efecto di picá riba e comportacion dje promé pareha humano. Nan a cubri partinan di nan curpa i a purba sconde nan mes pa Dios. (Génesis 3:7, 8) Pues picá a pone nan sinti culpabilidad, ansiedad i bergwensa. Awe humanidad ta bon conocí cu e emocionnan aki.

Ken no a yega di sinti su mes incómodo debí cu el a keda sin mustra bondad na un persona den necesidad of ken no a sinti remordimentu pa motibu cu el a bisa palabranan cu e no mester a expresá nunca? (Santiago 4:17) Pakico nos tin sintimentunan inkietante asina? Apostel Pablo ta splica cu ‘ley ta skirbí den nos curason.’ Aménos cu nos concenshi a bira duru, cualkier violacion dje ley ei ta producí un trastorno interno. Dje manera ei e bos di concenshi ta “acusá” of “dispensá” nos. (Romanonan 2:15; 1 Timoteo 4:2; Tito 1:15) Sea nos ta realisá esei of no, nos tin un sintimentu interno di loke ta malu, di picá!

Pablo tabata masha conciente di su tendencianan pecaminoso. “Ora mi ta deseá di haci loke ta corecto, loke ta malu ta presente cu mi,” el a admití. “Realmente mi tin deleite den e ley di Dios segun e homber cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.” P’esei Pablo a puntra: “Ken lo rescatá mi for dje curpa padeciendo e morto aki?”—Romanonan 7:21-24.

Liber di Picá—Con?

“Liberacion, den e tradicion hindú,” un erudito ta bisa, “ta liberacion for dje ripitido reencarnacionnan.” Como solucion, budismo di igual manera ta señalá na Nirvana—un estado di ta inconciente dje realidad externo. Hinduismo no a capta e concepto di picá heredá, p’esei e por primintí solamente un escape for di existencia.

Di otro banda, Bijbel su medio di liberacion ta resultá den e eliminacion mes dje condicion pecaminoso. Despues di puntra con e por ser rescatá for di picá, apostel Pablo ta pasa na contestá: “Gracias na Dios mediante Jesucristo nos Señor!” (Romanonan 7:25) Sí, e rescate ta bini for di Dios mediante Jesucristo.

Segun e Evangelio di Mateo, “e Yu di hende,” Jesucristo, a bini “pa duna su alma como rescate en cambio pa hopi.” (Mateo 20:28) Segun 1 Timoteo 2:6, Pablo a skirbi cu Jesus “a duna su mes como un rescate corespondiente pa tur.” E palabra “rescate” ta nificá paga e prijs p’e liberacion di prezunan. E echo cu e ta un rescate corespondiente ta enfatisá e eficacia dje prijs den balansá e skalchinan legal di husticia. Pero con e morto di un solo homber por ser considerá “un rescate corespondiente pa tur”?

Adam a bende henter humanidad, incluyendo nos, den picá i morto. E prijs, of castigu, cu el a paga tabata su bida humano perfecto. Pa cubri esaki, un otro bida humano perfecto—un rescate corespondiente—mester a ser pagá. (Exodo 21:23; Deuteronomio 19:21; Romanonan 5:18, 19) Siendo cu ningun hende imperfecto por a percurá e rescate aki, Dios, den su sabiduria infinito, a habri un caminda p’e situacion penoso aki. (Salmo 49:6, 7) El a transferí e bida perfecto di su Yu unigénito for di shelu p’e matris di un bírgen riba tera, lagand’e nace como un hende perfecto.—Lucas 1:30-38; Juan 3:16-18.

Afin di cumpli cu e trabou di rescatá humanidad, Jesus tabatin cu mantené su integridad tur e tempu cu e tabata riba tera. El a haci esaki. Anto el a muri un morto sacrificial. Den e manera aki Jesus a haci sigur cu e balor di un bida humano perfecto—di su mes—lo tabata disponibel pa paga como rescate pa libra humanidad.—2 Corintionan 5:14; 1 Pedro 1:18, 19.

Loke e Rescate di Cristo Por Haci pa Nos

Jesus su sacrificio di rescate por beneficiá nos awor aki mes. Dor di ehercé fe den dje, nos por disfrutá di un posicion limpi dilanti Dios i por bini bou di Jehova su cuido amoroso i tierno. (Echonan 10:43; Romanonan 3:21-24) En bes di ser aplastá cu sintimentu di culpa pa picánan cu nos por a cometé, nos por busca pordon libremente cerca Dios riba base dje rescate.—Isaías 1:18; Efesionan 1:7; 1 Juan 2:1, 2.

Den futuro, e rescate lo haci posibel e sanacion completo di humanidad su condicion enfermo causá dor di picá. E último buki di Bijbel ta describí “un riu di awa di bida” cu ta sali for dje trono di Dios. Cantu dje oriyanan dje riu tin un abundancia di palu di fruta cu tin blachi “pa e curacion dje nacionnan.” (Revelacion 22:1, 2) Bijbel ta papia aki simbólicamente dje Creador su percuracion maraviyoso pa libra humanidad for di picá i morto pa semper riba e base di Jesus su sacrificio di rescate.

E visionnan profético dje buki di Revelacion lo ser realisá pronto. (Revelacion 22:6, 7) E ora ei tur hende di curason recto lo bira perfecto, siendo “librá for di sclabitud na corupcion.” (Romanonan 8:20, 21) Esaki no mester impulsá nos pa siña mas tocante Jehova Dios i su Yu leal, Jesucristo, kende a bira e rescate?—Juan 17:3.

[Nota]

[Plachi na página 6]

Adam a trece picá i morto riba humanidad

[Plachi na página 7]

Jesus su sacrificio di rescate ta trece libertad for di picá i morto