Salbacion—Loke Realmente E Ta Nifica

‘ABO ta salbá?’ Hopi biaha, esnan cu ta haci e pregunta aki ta kere cu nan ta salbá dor cu nan ‘a aceptá Jesus como nan Salbador.’ Otronan ta kere cu tin vários caminda cu ta hiba na salbacion i cu tanten ‘Jesus ta den bo curason,’ no ta importá kico bo ta kere ni sikiera na cua iglesia bo ta pertenecé.

Bijbel ta bisa cu ta e boluntad di Dios pa “tur clase di hende ser salbá.” (1 Timoteo 2:3, 4) P’esei salbacion ta disponibel pa tur esnan cu kier acept’é. Pero kico exactamente ta nificá ser salbá? E ta realmente algu cu simplemente ta sosodé cu bo, sin cu bo haci mashá of ningun esfuerso?

E palabra “salbacion” ta nificá “liberacion for di peliger of destruccion.” Pues berdadero salbacion ta encerá mas cu un estado mental calmu. E ta nificá ser salbá for dje destruccion dje sistema actual di cosnan malbado aki i finalmente salbá for di morto mes! Pero ta ken Dios lo salba? Pa contestá esei, laga nos examiná loke Jesucristo a siña riba e tópico aki. E resultadonan di nos investigacion kisas lo sorprendé bo.

Por Haña Salbacion den Tur Religion?

Na un ocasion, Jesus tabatin un combersacion cu un muher samaritano. Aunke e muher no tabata un hudiu, el a comprendé perfectamente cu e Mesías, “cu yama Cristo,” lo a bini. (Juan 4:25) E creencia ei tabata suficiente p’e ser salbá? No, pasobra cu frankesa Jesus a bisa e muher: “Boso ta adorá loke boso no conocé.” Jesus tabata sa cu pa e muher aki haña salbacion, lo e tabatin cu ahustá su forma di adorá. P’esei Jesus a splik’é: “No obstante, e ora ta bini, i ta awor, ora e berdadero adoradónan lo adorá e Tata cu spiritu i cu berdad, pasobra, en realidad, e Tata ta busca hende asina pa ador’é.”—Juan 4:22, 23.

Un otro ocasion ora Jesus a revelá su punto di bista di salbacion a enbolbé e fariseonan, un secta religioso prominente di hudaismo. E fariseonan a desaroyá un sistema di adorá i a kere cu e tabatin e aprobacion di Dios. Pero scucha Jesus su palabranan n’e fariseonan: “Hipócritanan! Isaías tabatin rason ora el a profetisá tocante boso: ‘E hendenan aki ta onrá mi cu nan lip, pero nan curason ta leu fo’i mi. Nan ta adorá mi en bano; nan siñansanan no ta nada mas cu reglanan cu hende ta siña.’”—Mateo 15:7-9, New International Version.

Kico dje hopi gruponan religioso awe cu ta bisa di ta kere den Cristo? Jesus lo respaldá nan tur como maneranan legítimo pa haña salbacion? Nos no tin nodi rei tocante esaki, pasobra Jesus a bisa claramente: “No ta tur hende cu ta bisá mi, ‘Señor, Señor,’ lo drenta e reino di shelu, sino esun cu ta haci e boluntad di mi Tata cu ta den shelu. Hopi lo bisá mi den e dia ei, ‘Señor, Señor, nos no a profetisá den bo nomber, i a expulsá demoñonan den bo nomber, i a ehecutá hopi obra poderoso den bo nomber?’ I sin embargo, e ora ei lo mi confesá na nan: Nunca mi a conocé boso! Bai for di mi, boso, hacidónan di maldad.”—Mateo 7:21-23.

Conocimentu Exacto di Jesus Ta Vital pa Salbacion

E palabranan aki di Jesus tin implicacionnan serio. Nan ta indicá cu hopi hende deboto no ‘ta haciendo e boluntad dje Tata.’ Con, anto, hende por haña berdadero salbacion? Promé Timoteo 2:3, 4 ta contestá: “[Dios] su boluntad ta pa tur clase di hende ser salbá i yega na un conocimentu exacto dje berdad.”—Compará cu Colosensenan 1:9, 10.

E conocimentu ei ta crucial pa haña salbacion. Ora un wardadó di prezu romano a puntra apostel Pablo i su compañero, Sílas, “Kico mi mester haci pa ser salbá?” nan a contestá: “Kere den e Señor Jesus i lo bo ser salbá, abo i bo famia di cas.” (Echonan 16:30, 31) Esei a nificá cu tur loke e wardadó di prezu i su famia tabatin cu haci tabata di tin un cierto sintimentu den nan curason? No, pa motibu cu nan no por a berdaderamente “kere den e Señor Jesus” a ménos cu nan tabatin algun comprendimentu di ken Jesus tabata, kico el a haci i kico el a siña.

Por ehempel, Jesus a siña cu un gobiernu celestial lo a ser establecé—“e reino di Dios.” (Lucas 4:43) Tambe el a describí principionan pa moralidad i conducta cristian. (Mateo, capítulo 5-7) El a describí e posicion cu su disipelnan lo tuma ora ta trata di asuntunan político. (Juan 15:19) El a establecé un programa mundial di siñansa i a comisioná su siguidónan pa participá den dje. (Mateo 24:14; Echonan 1:8) Sí, ‘kere den Jesus’ a nificá comprendé hopi cos! Nada straño, anto, cu Pablo i Sílas “a papia e palabra di Jehova [cu e wardadó di prezu] i tambe cu tur esnan den su cas” promé cu e creyentenan nobo aki a ser bautisá.—Echonan 16:32, 33.

Conocimentu Exacto di Dios Tambe Ta Vital

Kere berdaderamente den Jesus ta enbolbé tambe cu hende mester adorá e Dios cu Jesus mes ta adorá. Jesus a bisa den oracion: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

Durante su ministerio terenal, e Yu di Dios semper a dirigí atencion na su Tata i no na su mes. Nunca el a pretendé di ta Dios Todopoderoso. (Juan 12:49, 50) Na numeroso ocasion Jesus a splica masha cla kico ta su posicion den e areglo di Dios dor di declará cu e tabata subordiná na su Tata. (Lucas 22:41, 42; Juan 5:19) Wel, Jesus a declará: “E Tata ta mayor cu mi.” (Juan 14:28) Bo iglesia a siñá bo e berdadero relacion entre Dios i Cristo? Of nan a hací bo kere cu Jesus mes ta Dios Todopoderoso? Bo salbacion ta dependé di cu bo tin e comprendimentu corecto.

Den e Oracion di Nos Tata, Jesus a urgi su disipelnan pa pidi: “Laga bo nomber sea santificá.” (Mateo 6:9) Mayoria traduccion di Bijbel a sconde e nomber di Dios, traduciend’e como “Señor.” Pero den copianan antiguo dje “Testament Bieu,” e nomber di Dios a aparecé mas cu seis mil bes! P’esei Salmo 83:18 ta bisa: “Pa hende por sa cu abo, kende su nomber ta Jehova, abo so ta e Haltísimo riba tur e tera.” Nan a siñá bo usa e nomber di Dios, Jehova? Si no ta asina, bo salbacion ta na peliger, pasobra “tur hende cu ta inbocá e nomber di Jehova lo ser salbá”!—Echonan 2:21; compará cu Joël 2:32.

Cu Spiritu i cu Berdad

Tambe Jesucristo a dirigí atencion n’e Palabra di Dios, Bijbel. Ora e tabata splica Dios su punto di bista riba cierto asuntunan, e tabata bisa frecuentemente: “Ta pará skirbí.” (Mateo 4:4, 7, 10; 11:10; 21:13) E anochi promé cu el a muri, Jesus a haci oracion tocante su disipelnan: “Santificá nan pa medio dje berdad; bo palabra ta e berdad.”—Juan 17:17.

Pues un otro rekisito pa salbacion ta pa tin un comprendimentu dje siñansanan dje Palabra di Dios, Bijbel. (2 Timoteo 3:16) Ta Bijbel so ta contestá preguntanan manera: Kico ta e propósito di bida? Pakico Dios a permití maldad sigui pa asina tantu tempu? Kico ta sosodé cu un persona ora e muri? Di berdad Dios ta torturá hende den un fiernu di candela? Kico ta e propósito di Dios p’e tera?a Un hende no por adorá Dios bon sin comprendé e cuestionnan aki dje manera corecto, pasobra Jesus a bisa: “Berdadero adoradónan lo adorá e Tata cu spiritu i cu berdad.”—Juan 4:23.

Fe Ta Impulsá Hende na Accion

Salbacion ta encerá mas cu simplemente adkerí informacion. Den un curason receptivo, conocimentu exacto di Dios ta producí fe. (Romanonan 10:10, 17; Hebreonan 11:6) Un fe asina ta impulsá hende na accion. Por ehempel, Bijbel ta spierta: “P’esei, repentí i combertí pa boso picánan ser kitá, pa temporadanan di refrescamentu por bini di parti dje persona di Jehova.”—Echonan 3:19.

Sí, salbacion ta encerá tambe armonisá bo bida na Dios su normanan di conducta i moralidad. Bou dje influencia transformador dje Palabra di Dios, hende ta siña practicá onestidad i papia berdad na lugá di hábitonan cu nan tabatin henter nan bida manera gañamentu i falsedad. (Tito 2:10) Prácticanan inmoral, manera homosexualidad, adulterio i fornicacion, ta ser bandoná i reemplasá pa conducta moral decente. (1 Corintionan 6:9-11) Esaki no ta un abstinencia temporal basá riba emocion, sino un cambio permanente cu ta resultá dor di studia i aplicá e Palabra di Dios cuidadosamente.—Efesionan 4:22-24.

Cu tempu, amor i aprecio pa Dios ta impulsá un persona di curason onrado pa haci un dedicacion completo na Dios i pa simbolisá esei cu bautismo bou di awa. (Mateo 28:19, 20; Romanonan 12:1) Cristiannan bautisá ta salbá den bista di Dios. (1 Pedro 3:21) Durante e binidero destruccion dje mundu malbado aki, Dios lo salba nan completamente dor di conserbá nan atrabes dje tribulacion ei.—Revelacion 7:9, 14.

Loke Salbacion Por Nificá pa Bo

For dje consideracion breve aki a bira claro cu pa bo haña salbacion, esei ta encerá mas cu ‘tin e Señor Jesus den bo curason.’ E ta nificá gana conocimentu exacto di Jehova Dios i di Jesucristo i haci cambionan necesario den bo bida. Por parce un tarea difícil pa haci esaki, pero Testigonan di Jehova ta dispuesto pa yudá bo den e empeño aki. Pa medio di un studio di Bijbel grátis na cas, nan por yudá bo cuminsá cana riba e caminda pa berdadero salbacion.b

Mirando con cerca Dios su binidero dia di huicio ta, ta mas urgente cu nunca promé pa haci esei! Awor ta e tempu pa haci caso dje palabranan dje profeta: “Promé cu e dia di rabia di Jehova bini riba boso, busca Jehova, boso tur, e mansunan dje tera, boso cu a practicá Su mes decision hudicial. Busca husticia, busca suavedad. Probablemente boso lo ser scondí den e dia di rabia di Jehova.”—Sofonías 2:2, 3.

[Nota]

[Kuadro na página 6]

Salbacion Ta Bini di . . .

◻ Gana conocimentu exacto di Dios i di Jesus.—Juan 17:3.

◻ Ehercé fe.—Romanonan 10:17; Hebreonan 11:6.

◻ Repentí i combertí.—Echonan 3:19; Efesionan 4:22-24.

◻ Dedicacion i bautismo.—Mateo 16:24; 28:19, 20.

◻ Sigui haci declaracion público.—Mateo 24:14; Romanonan 10:10.

[Plachinan na página 7]

Studia Bijbel, aplicá loke bo ta siña, dedicá i bautisá ta pasonan cu ta hiba na salbacion