Apesar di Prueba, Pega na Bo Fe!

“Consider’é tur goso, mi rumannan, ora boso ta topa cu vários prueba.”—SANTIAGO 1:2.

 1. Apesar di kico e pueblo di Jehova ta sirbié den fe i cu “goso di curason”?

E PUEBLO di Jehova ta sirbié como su Testigonan cu fe den dje i “goso di curason.” (Deuteronomio 28:47; Isaías 43:10) Nan ta haci esaki aunke nan ta rondoná cu hopi prueba. Apesar di nan dificultadnan, nan ta saca consuelo for dje palabranan: “Consider’é tur goso, mi rumannan, ora boso ta topa cu vários prueba, ya cu boso sa cu e cualidad probá aki di boso fe ta obra awante.”—Santiago 1:2, 3.

 2. Kico ta conocí tocante e escritor dje carta di Santiago?

² Disipel Santiago, un mitar ruman di Jesucristo, a skirbi e declaracion ei rond di 62 E.C. (Marco 6:3) Santiago tabata un anciano den e congregacion di Jerusalem. De facto, e, Céfas (Pedro) i Juan a “parce di tabata pilarnan”—fuerte, apoyadónan firmemente establecí dje congregacion. (Galationan 2:9) Ora a presentá e cuestion di circuncision dilanti “e apostelnan i e ancianonan” na aña 49 E.C., Santiago a haci un proposicion basá riba e Scritura cu e cuerpo gobernante ei dje promé siglo a adoptá.—Echonan 15:6-29.

 3. Kico tabata algun dje problemanan cu e cristiannan di promé siglo a enfrentá, i con nos por saca e mayor beneficio for dje carta di Santiago?

³ Como un wardadó spiritual interesá, Santiago ‘tabata conocé aparencia dje tou.’ (Proverbionan 27:23) El a realisá cu e tempu ei cristiannan tabata enfrentando pruebanan severo. Algun tabatin cu reahustá nan manera di pensa, pasobra nan tabata mustra faboritismo na e ricunan. Tabatin algun pa ken adoracion tabata un simpel formalidad. Algun tabata causa daño cu nan lenga ingobernabel. Un spiritu mundano tabatin efectonan perhudicial, i hopi no tabatin pacenshi ni no tabata incliná na haci oracion. E realidad ta cu algun cristian a bira spiritualmente enfermo. E carta di Santiago ta trata e problemanan ei den un manera edificante, i su conseho ta mes práctico awe cu e tabata den e promé siglo E.C. Nos lo saca hopi beneficio si nos considerá e carta aki como unu skirbí na nos personalmente.a

Ora Nos Ta Pasa dor di Prueba

 4. Con nos mester considerá pruebanan?

⁴ Santiago ta mustra nos con pa considerá prueba. (Santiago 1:1-4) Sin mencioná e echo cu e tabata mitar ruman dje Yu di Dios, humildemente e ta yama su mes “un esclabo di Dios i dje Señor Jesucristo.” Santiago ta skirbi na “e diesdos tribunan” di Israel spiritual “plamá tur caminda,” inicialmente debí na persecucion. (Echonan 8:1; 11:19; Galationan 6:16; 1 Pedro 1:1) Como cristian, nos tambe ta haña persecucion, i nos ta “topa cu vários prueba.” Pero si nos corda cu ora nos wanta prueba esei ta fortalecé nos fe, nos lo “consider’é tur goso” ora nan bini riba nos. Si nos mantené nos integridad na Dios durante prueba, esaki lo trece felicidad duradero pa nos.

 5. Den ki pruebanan nos por haña nos mes, i kico ta sosodé ora nos wanta nan cu éxito?

⁵ Entre nos pruebanan tin contratempunan cu ta comun pa humanidad. Por ehempel, malesa por bati nos. Dios no ta efectuando curacionnan milagroso awor, pero sí e ta contestá nos oracionnan pa haña e sabiduria i fortalesa necesario pa trata cu enfermedad. (Salmo 41:1-3) Como Testigo di Jehova cu ta ser persiguí, nos ta sufri tambe pa causa di husticia. (2 Timoteo 3:12; 1 Pedro 3:14) Ora nos ta wanta pruebanan asina exitosamente, nos fe ta ser di test, e ta bira unu di “cualidad probá.” I ora nos fe ta triunfá, esaki ta “obra awante.” Fe hací mas firme mediante prueba lo yuda nos wanta futuro pruebanan.

 6. Con ‘awante ta completá su obra,’ i ki pasonan práctico nos por dal ora nos ta bou di prueba?

⁶ “Pero,” Santiago ta bisa, “laga awante completá su obra.” Si nos permití un prueba sigui su curso sin purba finalis’é lihé cu medionan no-bíblico, awante lo efectuá e “obra” di haci nos completo como cristiannan, sin falta fe. Naturalmente, si un prueba ta revelá algun debilidad, nos mester busca e yudansa di Jehova pa venc’é. Kico si e prueba ta un tentacion pa participá den inmoralidad sexual? Laga nos haci oracion tocante e problema ei anto actua na armonia cu nos oracionnan. Kisas nos tin cu cambia nos lugá di empleo of dal otro pasonan pa mantené nos integridad na Dios.—Génesis 39:7-9; 1 Corintionan 10:13.

E Búskeda pa Sabiduria

 7. Con nos por ser yudá pa trata cu prueba?

⁷ Santiago ta mustra nos kico pa haci si nos no sa con pa trata cu un prueba. (Santiago 1:5-8) Jehova lo no reprochá nos si nos falta sabiduria i ta pidié den oracion cu fe. Lo e yuda nos mira un prueba n’e manera corecto i lo yuda nos want’é. Compañeronan creyente, studio personal of reunionnan por hala nos atencion riba cierto textonan di Bijbel. Sucesonan cu ta ser maniobrá mediante guia divino por permití nos mira loke nos mester haci. Tal bes e spiritu di Dios ta guia nos. (Lucas 11:13) Claro cu pa disfrutá di beneficionan asina, nos tin cu pega na Dios i na su pueblo.—Proverbionan 18:1.

 8. Pakico un persona cu ta duda lo no ricibí nada for di Jehova?

⁸ Jehova ta duna nos sabiduria pa enfrentá prueba si nos ta “sigui pidi cu fe, sin duda nada.” Un persona cu ta duda ‘ta manera un ola di laman cu bientu ta hiba’ caprichosamente. Si den sentido spiritual nos ta asina instabil, ‘nos no mester suponé cu nos lo ricibí algu for di Jehova.’ Laga nos no ta “indeciso” ni “inconstante” den nos oracion of den otro maneranan. Mas bien, laga nos tin fe den Jehova, e Fuente di sabiduria.—Proverbionan 3:5, 6.

Ricu i Pober Por Hubilá

 9. Como adoradónan di Jehova, pakico nos tin motibu pa hubilá?

⁹ Asta si pobresa ta un di nos pruebanan, laga nos tene na mente cu tantu cristiannan ricu como pober por hubilá. (Santiago 1:9-11) Promé cu e cristiannan di promé a bira siguidó di Jesus, mayoria di nan tabatin poco recurso material i mundu a despreciá nan. (1 Corintionan 1:26) Pero nan por a hubilá riba nan “exaltacion” n’e posicion di heredero di Reino. (Romanonan 8:16, 17) Di otro banda, hende ricu cu un tempu a ser onrá, ta experenciá “humiyacion” como siguidó di Cristo pa motibu cu mundu ta despreciá nan. (Juan 7:47-52; 12:42, 43) Sin embargo, como sirbidó di Jehova, nos tur por hubilá pasobra rikesa di mundu i posicion social ta nada na comparacion cu e rikesanan spiritual cu nos ta disfrutá di dje. I ki gradicidu nos ta cu entre nos no tin lugá pa orguyo pa loke ta posicion social!—Proverbionan 10:22; Echonan 10:34, 35.

10. Con un cristian mester mira rikesa material?

¹⁰ Santiago ta yuda nos mira cu nos bida no ta dependé riba rikesa ni logro den mundu. Mescos cu e bunitesa di un flor no por prevení cu e ta muri den e “calor ardiente” di solo, asina e rikesa di un hende ricu no por alargá su bida. (Salmo 49:6-9; Mateo 6:27) Tal bes e por muri miéntras e ta sigui su “camindanan di bida,” kisas den negoshi. P’esei, e cos importante ta pa ser “ricu pa cu Dios” i pa haci tur loke nos por pa promové interesnan di Reino.—Lucas 12:13-21; Mateo 6:33; 1 Timoteo 6:17-19.

Felis Ta Esnan Cu Ta Wanta Prueba

11. Kico ta e prospectonan pa esnan cu ta pega na nan fe ora nan ta enfrentá cu prueba?

¹¹ Ricu of pober, nos por ta felis solamente si nos wanta nos pruebanan. (Santiago 1:12-15) Si nos wanta pruebanan asina i nos fe keda intacto, nos por ser pronunciá felis, pasobra tin goso den haci loke ta corecto den bista di Dios. Dor di pega na nan fe te na morto, cristiannan ungí cu spiritu ta ricibí “e corona di bida,” inmortalidad den shelu. (Revelacion 2:10; 1 Corintionan 15:50) Si nos tin speransa terenal i ta mantené nos fe den Dios, nos por anticipá bida eterno riba un tera paradísico. (Lucas 23:43; Romanonan 6:23) Ki bon Jehova ta pa cu tur esnan cu ta ehercé fe den dje!

12. Ora nos ta experenciá contratempu, pakico nos no mester bisa: “Dios ta someté mi na prueba”?

¹² Ta posibel cu Jehova mes ta pone nos na prueba cu calamidad? No, nos no mester bisa: “Dios ta someté mi na prueba.” Jehova no ta purba provocá nos pa cometé picá, ma e ta cla pa yuda nos i duna nos e fortalesa necesario pa wanta prueba si nos permanecé firme den fe. (Filipensenan 4:13) Dios ta santu, p’esei e no ta hinca nos den circunstancianan cu lo debilitá nos resistencia contra malecho. Si nos hinca nos mes den un situacion cu segun Bijbel ta imprudente i cometé un of otro picá, nos no mester culp’é, “pasobra cu cos malu Dios no por ser sometí na prueba, ni e mes no ta someté ningun hende na prueba.” Aunke Jehova por permití un prueba disipliná nos pa nos bon, e no ta pone nos na prueba cu mal intencion. (Hebreonan 12:7-11) Satanas por tenta nos pa haci malu, pero Dios por libra nos for dje malbado ei.—Mateo 6:13.

13. Kico por sosodé si nos no rechasá un mal deseo?

¹³ Nos tin cu haci oracion pasobra un cierto situacion por hiba na un mal deseo cu por inducí nos na cometé picá. Santiago ta bisa: “Cada un ta ser probá dor di ser atraí i tentá pa su mes deseo.” Si nos alimentá nos curason cu deseo pecaminoso, nos no por culpa Dios pa nos picá. Si nos no deshací di un mal deseo, ‘e ta bira fértil,’ ta ser alimentá den e curason, i “ta duna lus na picá.” Ora picá ser realisá, e “ta producí morto.” Ta obvio cu nos tin cu vigilá nos curason i resistí inclinacionnan pecaminoso. (Proverbionan 4:23) Dios a spierta Cain cu picá tabata cerca di venc’é, pero e no a resistí. (Génesis 4:4-8) Pues, anto, kico si nos a cuminsá sigui un curso no-bíblico? Siguramente nos mester ta gradicidu ora ancianonan cristian trata na reahustá nos pa nos no peca contra Dios.—Galationan 6:1.

Dios—E Fuente di Bon Cosnan

14. Den ki sentido nos por bisa cu e donnan di Dios ta “perfecto”?

¹⁴ Nos mester corda cu Jehova ta e Fuente, no di prueba, sino di bon cosnan. (Santiago 1:16-18) Santiago ta dirigí su mes na su co-creyentenan como “rumannan stimá” i ta mustra cu Dios ta e Dunador di ‘tur bon don i regalo perfecto.’ Jehova su donnan spiritual i material ta “perfecto,” of completo, i no ta falta nada. Nan ta bini “di ariba,” for di Dios su lugá di habitacion den shelu. (1 Reynan 8:39) Jehova ta “e Tata dje lusnan celestial”—solo, luna i streanan. Tambe e ta duna nos iluminacion spiritual i e berdad. (Salmo 43:3; Jeremías 31:35; 2 Corintionan 4:6) Distinto for di solo cu ta pone sombra cambia segun cu e ta move i ta na su punto mas haltu solamente 12 or di merdia, Dios semper ta na su máximo den proveé loke ta bon. Sigur sigur lo e ekipá nos pa enfrentá prueba si nos ta saca pleno probecho di su percuracionnan spiritual suministrá mediante su Palabra i “e esclabo fiel i discreto.”—Mateo 24:45.

15. Kico ta un di Jehova su donnan mas excelente?

¹⁵ Kico tabata un di Dios su donnan mas excelente? El a producí mediante e spiritu santu yunan spiritual cu ta obra huntu cu e bon nobo, of “palabra dje berdad.” Esnan cu ta experenciá un nacementu spiritual ta “cierto promé frutanan,” scogí for di entre humanidad pa ta un “reino i sacerdotenan” celestial. (Revelacion 5:10; Efesionan 1:13, 14) Kisas Santiago tabata pensando riba e promé frutanan di cebada cu nan a ofrecé dia 16 di nísan, e fecha riba cua Jesus a resucitá, i e ofrenda di dos pan di trigu riba e dia di Pentecoste, ora e spiritu santu a ser dramá. (Levítico 23:4-11, 15-17) Den e caso ei, Jesus lo ta e promé frutanan i su co-herederonan “cierto promé frutanan.” Kico si nos tin un speransa terenal? Wel, si nos ten’é na mente, nos lo ser yudá pa pega na nos fe den e Dunador di “tur bon don,” kende a haci bida eterno posibel bou dje gobernacion di Reino.

Sea un ‘Hacidó dje Palabra’

16. Pakico nos mester ta ‘lihé pa tende pero slow pa papia i rabia’?

¹⁶ Sea nos ta pasando den un prueba di fe n’e momento aki of no, nos mester ta “hacidónan dje palabra.” (Santiago 1:19-25) Nos mester ta “lihé pa tende” e palabra di Dios, i ser hacidónan obediente di dje. (Juan 8:47) Di otro banda, laga nos ta “slow pa papia,” pisando nos palabranan cuidadosamente. (Proverbionan 15:28; 16:23) Santiago por ta urgiendo nos pa no sea lihé pa bisa cu nos pruebanan ta originá cu Dios. Tambe nos ta ser consehá pa ta “slow pa rabia; pasobra rabia di hende no ta obra husticia di Dios.” Si nos rabia pa loke un hende bisa, laga nos ‘no actua lihé’ pa asina evitá un contesta vengativo. (Efesionan 4:26, 27) Un spiritu di rabia cu por causa problema pa nos i bira un prueba pa otronan no por producí e conducta cu fe den nos Dios hustu ta rekerí di nos. Ademas, si nos ta “abundante den dicernimentu,” nos lo ta “slow pa rabia,” i nos rumannan lo sinti nan atraí na nos.—Proverbionan 14:29.

17. Kico nos ta logra dor di eliminá maldad for di curason i mente?

¹⁷ Siguramente nos mester ta liber di “tur contaminacion”—tur loke ta disgustá Dios i ta promové rabia. Ademas, nos mester ‘kita e cos cu ta di mas ei, maldad.’ Nos tur mester eliminá cualkier accion of actitud impuru for di nos bida. (2 Corintionan 7:1; 1 Pedro 1:14-16; 1 Juan 1:9) Dor di eliminá maldad for di curason i mente nos a ser yudá pa “aceptá cu suavedad e inculcacion dje palabra” dje berdad. (Echonan 17:11, 12) Sin importá cuantu tempu nos tin como cristian, nos mester sigui permití mas berdad bíblico ser inculcá den nos. Pakico? Pasobra pa medio dje spiritu di Dios, e palabra inculcá ta producí “e personalidad nobo” cu ta hiba na salbacion.—Efesionan 4:20-24.

18. Con un persona cu ta solamente un tendedó dje palabra ta diferenciá for di unu cu ademas ta un hacidó di dje tambe?

¹⁸ Con nos ta mustra cu e palabra ta nos guia? Dor di ta ‘hacidónan obediente dje palabra, i no tendedónan so.’ (Lucas 11:28) “Hacidónan” tin fe cu ta producí obranan manera actividad celoso den e ministerio cristian i participacion regular na reunionnan dje pueblo di Dios. (Romanonan 10:14, 15; Hebreonan 10:24, 25) Un simpel tendedó dje palabra “ta manera un homber cu ta mira su cara natural den un spiel.” E ta tira un bista, anto ta kita bai i lubidá kico por ta necesario pa corigí su aparencia. Como “hacidónan dje palabra,” nos ta studia cuidadosamente i ta obedecé e “ley perfecto” di Dios cu ta encerá tur loke E ta rekerí di nos. E libertad cu nos ta disfrutá di dje asina ta net contrario cu sclabitud na picá i morto, pasobra e ta hiba na bida. P’esei laga nos ‘persistí den e ley perfecto’ dor di scudriñ’é i obedec’é constantemente. I djis corda esaki! Como ‘hacidónan dje obra, no tendedó lubidadó,’ nos tin e goso cu ta bini dor di tin e fabor di Dios.—Salmo 19:7-11.

Muchu Mas cu Adoradónan pa Formalidad

19, 20. (a) Segun Santiago 1:26, 27, kico adoracion limpi ta rekerí di nos? (b) Kico ta algun ehempel di adoracion incontaminá?

¹⁹ Si nos kier disfrutá di fabor divino, nos tin cu corda cu adoracion berdadero no ta djis un formalidad. (Santiago 1:26, 27) Nos por pensa cu nos ta sirbiendo Jehova aceptablemente como ‘adoradónan formal,’ pero loke realmente ta conta ta e manera cu e ta evaluá cada un di nos. (1 Corintionan 4:4) Keda sin ‘frena e lenga’ por ta un defecto serio. Nos lo ta gañando nos mes si nos pensa cu nos ta agradá Dios cu nos adoracion ora nos ta calumniá otronan, papia mentira of malusá e lenga den otro maneranan. (Levítico 19:16; Efesionan 4:25) Siguramente, nos no kier pa nos “forma di adoracion” ta “en bano” i inaceptabel pa Dios pa ningun motibu.

²⁰ Aunke Santiago no ta cita tur aspecto di adoracion limpi, e ta bisa cu esei ta incluí “cuida huérfanonan i biudanan den nan tribulacion.” (Galationan 2:10; 6:10; 1 Juan 3:18) E congregacion cristian ta mustra interes special pa percurá pa biudanan. (Echonan 6:1-6; 1 Timoteo 5:8-10) Siendo cu Dios ta e Protector dje biudanan i esnan sin tata, laga nos cooperá cuné haciendo loke nos por pa yuda nan den sentido spiritual i material. (Deuteronomio 10:17, 18) Adoracion limpi ta nificá tambe “mantené bo mes sin mancha di mundu,” e sociedad humano inhustu drumí den poder di Satanas. (Juan 17:16; 1 Juan 5:19) P’esei, laga nos keda liber di mundu su conducta malbado di manera cu nos por glorificá Jehova i ser útil den su sirbishi.—2 Timoteo 2:20-22.

21. En coneccion cu e carta di Santiago, ki preguntanan mas ta merecé nos consideracion?

²¹ E conseho di Santiago cu nos a considerá te asina leu mester yuda nos wanta prueba i pega na nos fe. E mester aumentá nos aprecio pa e Dunador amoroso di bon donnan. I e palabranan di Santiago ta yuda nos practicá adoracion limpi. Kico mas e ta trece na nos atencion? Ki pasonan mas nos por dal pa proba cu nos tin berdadero fe den Jehova?

[Nota]

Con Lo Bo Contestá?

◻ Kico lo yuda nos wanta prueba?

◻ Apesar di prueba, pakico cristiannan por hubilá?

◻ Con nos por ta hacidónan dje palabra?

◻ Kico adoracion limpi ta enbolbé?

[Plachi na página 9]

Ora bo ta bou di prueba, ehercé fe den Jehova su poder pa contestá oracion

[Plachinan na página 10]

“Hacidónan dje palabra” ta proclamando e Reino di Dios rond mundu