“E Berdad Lo Haci Boso Liber”

“Boso lo conocé e berdad, i e berdad lo haci boso liber.” Asina Jesus a declará ora e tabata siña e multitudnan den e tempel na Jerusalem. (Juan 8:32) Jesus su apostelnan por a reconocé e siñansanan di Jesus mesora como e berdad. Nan a mira evidencia abundante dje orígen divino di nan maestro.

PERO, awe algun hende por haña cu ta difícil pa identificá e berdad cu Jesus a papia di dje. Mescos cu den e dianan dje profeta Isaías, awe tin “hende cu ta bisa cu bon ta malu i cu malu ta bon, hende cu ta pone scuridad pa lus i lus pa scuridad, hende cu ta pone marga pa dushi i dushi pa marga.” (Isaías 5:20) Ya cu tin un cantidad di opinion, filosofia i estilo di bida cu ta ser promové awendia, hopi hende ta sinti cu tur cos ta relativo i cu no tin un cos cu bo por yama e berdad.

Ora Jesus a bisa su auditorio cu e berdad lo a haci nan liber, nan a respondé bisando: “Nos ta desendiente di Abraham i nunca tabata esclabo di ningun hende. Con por ta cu bo ta bisa: ‘Boso lo bira liber’?” (Juan 8:33) Nan no a sinti un necesidad pa ningun persona ni nada haci nan liber. Pero e ora ei Jesus a splica: “Cu mayor berdad mi ta bisa boso: Tur hacidó di picá ta esclabo di picá.” (Juan 8:34) E berdad cu Jesus tabata papia di dje por habri caminda pa haña libertad for di picá. Jesus a bisa: “Si e Yu haci boso liber, boso lo ta realmente liber.” (Juan 8:36) P’esei e berdad cu ta libra hende ta e berdad tocante Jesucristo, Yu di Dios. Ta solamente pa medio di fe den e sacrificio di Jesus su bida humano perfecto un hende por ser librá for di picá i morto.

Na un otro ocasion Jesus a bisa: “Santificá nan pa medio dje berdad; bo palabra ta e berdad.” (Juan 17:17) E palabra di Dios manera e ta expresá den Bijbel, ta e berdad cu por libra hende di supersticion i adoracion falsu. Bijbel ta contené e berdad tocante Jesucristo, cu ta hiba hende na pone fe den dje i ta habri caminda pa un speransa briyante pa futuro. Ta algu magnífico pa yega na conocé e berdad dje Palabra di Dios!

Con vital ta pa conocé e berdad? Aunke hopi religion awe ta pretendé di sigui Bijbel, filosofia i tradicion humano tin hopi influencia riba nan. Hopi bes, lidernan religioso ta parce mas interesá pa hende aceptá nan, cu nan ta interesá pa nan mensahe ta exacto. Algun ta haña cu Dios ta keda contentu cu cualkier forma di adoracion, basta e ta sincero. Pero Jesucristo a splica: “E ora ta bini, i ta awor, ora e berdadero adoradónan lo adorá e Tata cu spiritu i cu berdad, pasobra, en realidad, e Tata ta busca hende asina pa ador’é.”—Juan 4:23.

Si nos kier adorá Dios di un manera aceptabel, nos tin cu conocé e berdad. Esaki ta un cuestion importante. Nos felicidad eterno ta dependé di dje. P’esei, nos cada un mester puntra nos mes: ‘Mi forma di adoracion ta aceptabel pa Dios? Mi ta berdaderamente interesá pa siña e berdad dje Palabra di Dios? Of mi tin miedu di loke un investigacion cuidadoso lo por revelá?’