Un Jerusalem Consistente cu Su Nomber
“Sea gososo pa semper den loke mi ta creando. Pasobra ata mi ta creando Jerusalem un causa pa goso.”—ISAIAS 65:18.
1. Con Esdras a sinti pa cu e stad scogí di Dios?
COMO un studiante sincero dje Palabra di Dios, e sacerdote hudiu Esdras a apreciá e coneccion cu Jerusalem tabatin un tempu cu Jehova su adoracion puru. (Deuteronomio 12:5; Esdras 7:27) Su amor p’e stad di Dios ta ser revelá den e parti di Bijbel cu el a ser inspirá pa skirbi—Promé i Segundo Crónicanan i Esdras. Den e registronan histórico aki, e nomber Jerusalem ta ser hañá casi un cuarta parti dje mas cu 800 biahanan cu e ta aparecé den henter Bijbel.
2. Ki nificacion profético nos por mira den loke e nomber Jerusalem ta nificá?
2 Den hebreo bíblico, “Jerusalem” por para pa un forma dje idioma hebreo yamá e forma dòbel. E forma dòbel ta ser usá mayoria bes p’e partinan di curpa na par, manera wowo, orea, man i pia. Den e forma dòbel aki, e nomber Jerusalem por ser mirá como profético di un pas cu e pueblo di Dios lo a experenciá den un sentido dòbel: spiritualmente i físicamente. E Scritura no ta revelá si Esdras a comprendé esaki completamente. Sin embargo, como sacerdote el a haci su best pa yuda e hudiunan disfrutá di pas cu Dios. I e sigur a traha duru pa Jerusalem por a cumpli cu e nificacion di su nomber, esta “Posesion [of, Fundeshi] di Pas Dòbel.”—Esdras 7:6.
3. Cuantu aña ta pasa promé cu nos ser introducí atrobe n’e actividadnan di Esdras, i den ki circunstancianan nos ta hañ’é?
3 Bijbel no ta bisa unda Esdras tabata durante e 12 añanan cu a pasa entre su bishita na Jerusalem i ora Nehemías a yega n’e stad. E condicion spiritual pober dje nacion durante e tempu ei ta indicá cu Esdras tabata ausente. Pero, nos ta haña Esdras sirbiendo atrobe como un sacerdote fiel den Jerusalem djis despues cu a reconstruí e muraya dje stad.
Un Dia di Asamblea Maraviyoso
4. Kico tabata significativo tocante e promé dia dje di shete luna na Israel?
4 A terminá e muraya di Jerusalem net na tempu p’e luna festivo importante di tisri, e di shete luna riba Israel su kalender religioso. E promé dia di tisri tabatin un bankete special di luna nobo yamá Fiesta di Supla Trompet. Riba e dia ei, sacerdotenan a supla trompet miéntras tabata ofrecé sacrificio na Jehova. (Númeronan 10:10; 29:1) E dia aki a prepará e israelitanan p’e Dia anual di Expiacion riba e di 10 dia di tisri i e gososo Fiesta di Recogementu for di dia 15 pa 21 dje mésun luna.
5. (a) Con Esdras i Nehemías a haci bon uso di “e promé dia dje di shete luna”? (b) Pakico e israelitanan a yora?
5 Riba “e promé dia dje di shete luna,” “henter e pueblo” a bini huntu, probablemente riba animacion di Nehemías i Esdras. A incluí homber, muher i “tur suficiente inteligente pa scucha.” Di manera cu tabatin mucha chikitu presente i nan tabata scucha cu atencion segun cu Esdras, pará riba un podio, tabata lesa e Ley “for di ora cu mainta a habri te merdia.” (Nehemías 8:1-4) Cada tantu ratu, e levitanan tabata yuda e pueblo comprendé loke tabata ser lesá. Ora e israelitanan a realisá cuantu nan i nan antepasadonan a faya den obedecé e Ley di Dios, nan a cuminsá yora.—Nehemías 8:5-9.
6, 7. Kico cristiannan por siña for di loke Nehemías a haci pa stop e hudiunan di yora?
6 Pero esaki no tabata tempu pa yora di tristesa. E tabata un fiesta, i e pueblo a caba di completá e trabou di reconstruí e muraya di Jerusalem. P’esei Nehemías a yuda nan haña e actitud apropiado, bisando: “Bai, come e cosnan vet i bebe e cosnan dushi, i manda porcionnan pa esun pa ken nada a ser prepará; pasobra e dia aki ta santu pa nos Señor, i no sinti boso heridá, pasobra e goso di Jehova ta boso fortalesa.” Obedientemente, “henter e pueblo a bai come i bebe i manda porcionnan i tene un gran alegria, pasobra nan a comprendé e palabranan cu a duna nan di conocé.”—Nehemías 8:10-12.
7 E pueblo di Dios djawe por siña hopi for dje relato aki. Esnan cu tin e privilegio di duna parti na reunion i asambleanan mester tene lo anterior na mente. Ademas di duna conseho corectivo cu tin biaha ta necesario, ocasionnan asina ta resaltá e beneficio i bendicionnan cu ta bini dor di cumpli cu e rekisitonan di Dios. E pueblo di Dios ta haña encomendacion pa obranan excelente i animacion pa perseverá. Nan mester sali for di e reunionnan ei cu goso di curason debí n’e instruccion edificante cu nan a ricibí for dje Palabra di Dios.—Hebreonan 10:24, 25.
Un Otro Reunion Gososo
8, 9. Ki reunion special a tuma lugá riba e di dos dia dje di shete luna, resultando den kico p’e pueblo di Dios?
8 E di dos dia dje luna special ei, “e cabesnan dje tatanan di henter e pueblo, e sacerdotenan i e levitanan, a reuní rond di Esdras e copista, asta pa haña perspicacia den e palabranan dje ley.” (Nehemías 8:13) Esdras tabata bon cualificá pa conducí e reunion aki, ya cu el “a prepará su curason pa consultá e ley di Jehova i pa cumpli cuné i pa siña regulacion i husticia den Israel.” (Esdras 7:10) Sin duda, e reunion aki a resaltá áreanan den cua e pueblo di Dios mester a cumpli mihó cu e pacto di Ley. Loke tabata preocupá nan n’e momento ei tabata pa haci e debido preparacionnan pa celebrá e binidero Fiesta di Cabaña.
9 Nan a celebrá e fiesta aki, cu ta dura un siman, den e manera corecto, cu tur e pueblo bibando den lugánan temporal trahá di rama i blachi di vários tipo di palu. E pueblo a lanta e cabañanan aki riba nan dak plat, den nan patio, den e patio dje tempel i riba e plasanan público di Jerusalem. (Nehemías 8:15, 16) Esaki tabata un oportunidad excelente pa congregá e pueblo i lesa pa nan for dje Ley di Dios! (Compará cu Deuteronomio 31:10-13.) Nan a haci esaki tur dia, “for dje promé dia te n’e último dia” dje fiesta, i el a resultá den un “alegria masha grandi” p’e pueblo di Dios.—Nehemías 8:17, 18.
Nos No Mester Neglishá e Cas di Dios
10. Pakico a organisá un reunion special riba e di 24 dia dje di shete luna?
10 Tin un tempu i lugá apropiado pa corigí faltanan serio den e pueblo di Dios. Aparentemente, realisando cu esaki tabata un ocasion asina, Esdras i Nehemías a organisá un dia di yunamentu riba e di 24 dia dje luna di tisri. A bolbe lesa e Ley di Dios, i e pueblo a haci confesion di nan picánan. Despues e levitanan a repasá Dios su trato misericordioso cu su pueblo desobediente, a haci bunita expresionnan di alabansa na Jehova, i a cera “un areglo fidedigno” validá dor dje seyo di nan prins, levita i sacerdotenan.—Nehemías 9:1-38.
11. Na ki “areglo fidedigno” e hudiunan a obligá nan mes?
11 E pueblo en general a hura cu nan lo a efectuá e “areglo fidedigno” cu a ser poní por escrito. Nan lo a “cana den e ley dje Dios berdadero.” I nan a bai di acuerdo pa no drenta den aliansa matrimonial cu e “pueblonan dje tera.” (Nehemías 10:28-30) Ademas, e hudiunan a obligá nan mes pa warda sabat, pa duna un contribucion financiero anual pa sostené adoracion berdadero, pa suministrá palu p’e altar di sacrificio, pa duna e primogénito di nan tou di baca i di carné pa sacrificio, i pa trece e promé fruta di nan tera n’e comedornan dje tempel. Claramente, nan tabata determiná ‘pa no descuidá e cas di nan Dios.’—Nehemías 10:32-39.
12. Kico no descuidá e cas di Dios ta encerá awe?
12 Awe, e pueblo di Jehova tin cu percurá pa no neglishá nan privilegio di ‘rindi sirbishi sagrado’ den e pationan di Jehova su gran tempel spiritual. (Revelacion 7:15) Esaki ta encerá oracionnan sincero hací cu regularidad p’e adelanto dje adoracion di Jehova. Biba na armonia cu e oracionnan ei ta rekerí prepará pa reunionnan cristian i tuma parti den nan, participá den areglonan pa predicá e bon nobo, i yuda hende interesá dor di rebishitá nan i, si ta posibel, conducí studio di Bijbel cu nan. Hopi ruman cu no kier descuidá e cas di Dios ta duna contribucion financiero p’e obra di predicá i pa por mantené lugánan di adoracion berdadero. Tambe nos lo por duna sosten na construccion di lugánan di reunion urgentemente necesario i tambe mantené nan limpi i na ordu. Un manera importante pa mustra amor p’e cas spiritual di Dios ta di traha pa promové pas entre compañeronan creyente i yuda cualkier cu tin mester di yudansa material of spiritual.—Mateo 24:14; 28:19, 20; Hebreonan 13:15, 16.
Un Inauguracion Gososo
13. Ki asuntu urgente a rekerí atencion promé cu por a inaugurá e muraya di Jerusalem, i ki ehempel excelente hopi persona a pone?
13 E “areglo fidedigno” seyá den tempu di Nehemías a prepará Dios su pueblo di antigwedad p’e dia di inauguracion dje muraya di Jerusalem. Pero un otro asuntu urgente ainda tabatin mester di atencion. Rondoná awor pa un muraya grandi cu 12 porta, Jerusalem tabatin mester di un poblacion mas grandi. Aunke tabatin algun israelita ta biba einan, “e stad tabata hanchu i grandi, i tabatin poco hende aden.” (Nehemías 7:4) Pa resolvé e problema aki, e pueblo “a tira lot pa trece un di cada dies pa biba den Jerusalem e stad santu.” E reaccion di buena gana riba e areglo aki a conmové e pueblo pa bendicioná “tur e hombernan cu a ofrecé nan mes boluntariamente pa biba den Jerusalem.” (Nehemías 11:1, 2) Ki un ehempel excelente pa adoradónan berdadero awe kende nan circunstancianan ta permití nan muda bai caminda tin mas necesidad di yudansa di cristiannan maduro!
14. Kico a sosodé riba e dia di inauguracion dje muraya di Jerusalem?
14 Pronto a cuminsá preparacionnan importante p’e gran dia di inauguracion dje muraya di Jerusalem. Músico i cantante a bini huntu for dje stadnan rond di Huda. A forma esakinan den dos coro grandi di gradicimentu, cada un siguí pa un procesion. (Nehemías 12:27-31, 36, 38) Cada coro i su procesion a cuminsá for di un punta riba e muraya mas leu for dje tempel, probablemente for dje Porta di Vaye, i a marcha den direccion contrario te ora nan a topa n’e cas di Dios. “Nan a pasa na sacrificá riba e dia ei sacrificionan grandi i a alegrá, pasobra e Dios berdadero mes a pone nan alegrá cu un gran goso. I tambe e muhernan i e muchanan mes a alegrá, di manera cu djaleu por a tende e alegria di Jerusalem.”—Nehemías 12:43.
15. Pakico e dedicacion dje muraya di Jerusalem no tabata un causa di goso permanente?
15 Bijbel no ta duna e fecha dje celebracion gososo aki. Sin duda, e tabata un punto sobresaliente, si no ta e culminacion, di Jerusalem su restoracion. Naturalmente, mester a haci hopi trabou di construccion den e stad. Cu tempu, Jerusalem su ciudadanonan a perde nan bon posicion spiritual. Por ehempel, ora Nehemías a bishitá e stad pa un di dos biaha, el a haña cu e cas di Dios tabata descuidá atrobe i cu e israelitanan tabata casa cu muhernan pagano atrobe. (Nehemías 13:6-11, 15, 23) E mésun mal condicionnan aki ta ser confirmá den e skirbimentunan di profeta Malakías. (Malakías 1:6-8; 2:11; 3:8) Di manera cu e dedicacion dje muraya di Jerusalem no tabata un causa di goso permanente.
Un Causa di Goso Eterno
16. Ki sucesonan culminante e pueblo di Dios ta spera cu anticipacion?
16 Awe, e pueblo di Jehova ta anhelá e tempu ora Dios lo triunfá riba tur su enemigunan. Esaki lo cuminsá cu e destruccion di “Babilonia e Grandi”—un stad figurativo cu ta encerá tur forma di adoracion falsu. (Revelacion 18:2, 8) E destruccion di religion falsu lo marca e promé fase dje binidero tribulacion grandi. (Mateo 24:21, 22) Dilanti nos tambe tin un suceso berdaderamente trasedental: e matrimonio celestial di Señor Jesucristo cu su bruid di 144.000 ciudadano di “Jerusalem Nobo.” (Revelacion 19:7; 21:2) Nos no por bisa exactamente ki ora e union culminante ei lo ser completá, pero sigur lo e ta un suceso gososo.—Mira La Atalaya di 15 di augustus 1990, página 30-1.
17. Kico nos sa tocante e realisacion di Jerusalem Nobo?
17 Nos sa sí cu Jerusalem Nobo ta masha cerca di ser completá. (Mateo 24:3, 7-14; Revelacion 12:12) Distinto dje stad terenal di Jerusalem, hamas lo e ta un causa di decepcion. Esaki ta pasobra tur su ciudadanonan ta siguidó di Jesucristo ungí cu spiritu, probá i refiná. Cu nan fieldad te na morto, cada un lo a duna prueba di ta eternamente leal n’e Soberano Universal, Jehova Dios. Esei tin un nificacion importante p’e resto di humanidad—e bibu i mortonan!
18. Pakico nos mester ‘hubilá i ser gososo pa semper’?
18 Considerá loke lo sosodé ora Jerusalem Nobo dirigí su atencion na hende cu ta ehercé fe den Jesus su sacrificio di rescate. “Mira!” apostel Juan a skirbi. “E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.” (Revelacion 21:2-4) Ademas, Dios lo usa e areglo aki cu parce un stad pa elevá humanidad na perfeccion humano. (Revelacion 22:1, 2) Esakinan sí ta motibunan maraviyoso pa ‘hubilá i ser gososo pa semper den loke Dios ta creando awor’!—Isaías 65:18.
19. Kico ta e paradijs spiritual den cua cristiannan a ser reuní?
19 Sin embargo, hende repentí no tin nodi warda te n’e tempu ei pa ricibí yudansa di Dios. Na aña 1919, Jehova a cuminsá reuní e miembronan final dje 144.000 den un paradijs spiritual, caminda e frutanan dje spiritu di Dios—manera amor, goso i pas—ta abundá. (Galationan 5:22, 23) Un rasgo sobresaliente dje paradijs spiritual aki ta e fe di su habitantenan ungí, cu tabata maraviyosamente productivo den hiba delantera den e trabou di predicá e bon nobo di Reino den tur e tera habitá. (Mateo 21:43; 24:14) Como resultado, casi seis miyon ‘otro carné,’ cu tin un speransa terenal, tambe a ser permití pa drenta e paradijs spiritual i disfrutá di trabou productivo. (Juan 10:16) Nan a cualificá pa esaki dor di dedicá nan mes na Jehova Dios a base di nan fe den e sacrificio di rescate di su Yu, Jesucristo. Nan asociacion cu e miembronan prospectivo di Jerusalem Nobo en berdad a resultá di ta un bendicion. Pues, dor di Jehova su trato cu cristiannan ungí, el a pone un fundeshi firme pa “un tera nobo,” esta, un sociedad di hende temeroso di Dios cu lo heredá e region terenal dje Reino celestial.—Isaías 65:17; 2 Pedro 3:13.
20. Con Jerusalem Nobo lo cumpli cu e nificacion di su nomber?
20 E condicionnan pacífico cu e pueblo di Jehova ta disfrutá di dje awor den nan paradijs spiritual, pronto lo ser experenciá den un paradijs físico riba tera. Esei lo sosodé ora Jerusalem Nobo baha for di shelu pa bendicioná humanidad. E pueblo di Dios lo disfrutá den un manera dòbel dje condicionnan pacífico primintí na Isaías 65:21-25. Como Jehova su adoradónan uní den e paradijs spiritual, e ungínan cu ainda mester tuma nan lugá den e Jerusalem Nobo celestial i esnan dje “otro carnénan” ta experenciando awor e pas cu Dios ta duna. I e pas ei lo extendé te den e Paradijs físico, ora cu ‘e boluntad di Dios sosodé riba henter e tera, mescos cu den shelu.’ (Mateo 6:10) Sí, Dios su glorioso stad celestial lo resultá di ta consistente cu e nomber Jerusalem como e ‘Fundeshi di Pas Dòbel.’ Pa tur eternidad, lo e duna crédito como algu digno di alabansa na su Magnífico Creador, Jehova Dios, i na su Rey Bruidegom, Jesucristo.
Bo Ta Corda?
◻ Kico a ser lográ ora Nehemías a reuní e pueblo den Jerusalem?
◻ Kico hudiunan di antigwedad tabatin cu haci pa no descuidá e cas di Dios, i kico ta ser pidí di nos pa haci?
◻ Den ki manera “Jerusalem” ta enbolbí den realisacion di goso i pas duradero?
[Mapa na página 23]
(For fully formatted text, see publication)
PORTANAN DI JERUSALEM
E cifranan ta representá e halturanan djawe na meter
PORTA DI PISCÁ
PORTA DJE STAD BIEU
PORTA DI EFRAIM
PORTA DI SKINA
Muraya Hanchu
Plasa Público
PORTA DI VAYE
SEGUNDO BARIO
Promé Muraya Parti Nort
STAD DI DAVID
PORTA DJE MONTON DI SHINISHI
Vaye di Hínom
Kasteel
PORTA DI CARNÉ
PORTA DJE GUARDIA
Area dje Tempel
PORTA DI INSPECCION
PORTA DI CABAI
OFEL
Plasa Público
PORTA DI AWA
Fuente di Awa di Gihon
PORTA DI FONTEIN
Hofi di Rey
En-roguel
Vaye di Tiropeon (Central)
Vaye Torencial di Kídron
740
730
730
750
770
770
750
730
710
690
670
620
640
660
680
700
720
740
730
710
690
670
Probabel tamaño dje muraya di Jerusalem tempu cu e stad a ser destruí i ora Nehemías a hiba delantera den reconstruccion dje muraya