Nan A Haci Jehova Su Boluntad

E Homber Mas Importante Ta Efectuá un Servicio Humilde

JESUS tabata sa cu su último oranan huntu cu e apostelnan lo tabata di hopi balor. Dentro di poco, nan lo a arest’é i, mas cu nunca promé, su fe lo a ser poné na prueba. Jesus tabata conciente tambe di e gran bendicionnan cu tabata sper’é. Pronto lo el a ser halsá na man drechi di Dios i lo el a haña “e nomber cu ta riba tur otro nomber, di manera cu den e nomber di Jesus tur rudia mester dobla, di esnan den shelu i di esnan cu ta riba tera i di esnan bou di tera.”​—Filipensenan 2:​9, 10.

Tog, ni ansiedad debí na su morto inminente, ni deseo intenso pa su recompensa primintí, no a pone Jesus perde e necesidadnan di su apostelnan for di bista. Mas despues, Juan a skirbi den su Evangelio cu Jesus “a stima nan te na fin.” (Juan 13:1) I den e último oranan crucial aki di su bida como hende perfecto, Jesus a siña su apostelnan un les vital.

Un Les di Humildad

E apostelnan tabata huntu cu Jesus den un sala djariba na Jerusalem pa nan celebrá Pascu. Mas promé, Jesus a tende nan ta pleita tocante cua di nan tabata mas importante. (Mateo 18:1; Marco 9:​33, 34) El a considerá e asuntu aki cu nan i el a trata di coregí nan punto di bista. (Lucas 9:46) Sin embargo, awor Jesus a enfatisá e lesnan aki dor di usa un táctica diferente. El a dicidí pa no papia so cu nan tocante humildad, sino tambe pa duna nan un ehempel práctico.

Juan ta skirbi cu Jesus “a lanta for dje cena i a pone su bistí exterior un banda. Tumando un serbete, el a faha su mes. Despues di esei el a pone awa den un conchi i a cuminsá laba e pianan dje disipelnan i seca nan cu e serbete cu cua e tabata fahá.”​—Juan 13:​4, 5.

Den e clima cayente di Medio Oriente di antigwedad, hende tabatin e custumber di bisti sandalia ora nan tabata cana riba caminda di tera. Ora nan yega cas di un hende comun, e anfitrion ta cumindá nan, i e ta percurá conchi cu awa pa nan por laba pia. Den casnan cu mas moda, un criá ta cumpli cu e tarea di laba pia dje bishitantenan.​—Huesnan 19:21; 1 Samuel 25:​40-42.

Den e sala djariba, Jesus cu su apostelnan no tabata huésped di ningun hende. No tabatin anfitrion pa percurá conchi, i no tabatin criá pa laba nan pia. Ora Jesus a cuminsá laba pia dje apostelnan, el a pone nan cara na bergwensa. Ata e Persona mas importante cu nan tur, ta efectuá e tarea di mas humilde!

Na principio, Pedro a nenga di laga Jesus laba su pia. Pero Jesus a bis’é: “A ménos cu mi laba bo, lo bo no tene ningun parti cu mi.” Ora Jesus a caba di laba pia di tur su apostelnan, el a bisa: “Boso sa loke mi a haci cu boso? Boso ta yama mi: ‘Maestro,’ i ‘Señor,’ i boso ta papia corectamente, pasobra mi ta tal. P’esei, si ami, aunke mi ta Señor i Maestro, a laba boso pia, boso tambe mester laba pia di otro. Pasobra mi a pone e modelo pa boso, pa, mescos cu mi a haci cu boso, boso mester haci tambe.”​—Juan 13:​6-15.

Jesus no tabata instituyendo un rito di labamentu di pia. Mas bien, el a yuda su disipelnan adoptá un otro actitud, unu humilde i dispuesto pa cumpli cu e tareanan di mas humilde na fabor di nan rumannan. Evidentemente, nan a capta e sentido. Considerá loke a pasa añanan despues ora e cuestion tocante circuncision a lanta. Maske tabatin “hopi discusion,” esnan presente a mantené ordu i respetuosamente nan a scucha opinion di otro. Ademas, ta parce cu esun cu a presidí e reunion ei tabata disipel Santiago, i no un dje apostelnan, manera nos lo por a verwagt, ya cu nan tabata presente. E detaye aki den e relato di Echonan ta mustra cu e apostelnan a progresá hopi den mustra humildad.​—Echonan 15:​6-29.

Les pa Nos

Dor di laba pia di su disipelnan, Jesus a percurá un ehempel poderoso den humildad. Sí, cristiannan no mester pensa cu nan ta asina importante cu otronan semper mester sirbi nan, ni tampoco nan no tin cu aspirá posicion di onor i prestigio. En bes di esei, nan tin cu sigui e ehempel di Jesus, esun cu “a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:28) Sí, Jesus su siguidónan mester ta dispuesto pa efectuá e servicio di mas humilde pa otro.

Cu bon motibu Pedro a skirbi: “Faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde.” (1 Pedro 5:5) E palabra griego pa “faha” ta bini dje palabra cu ta nificá “frescot (lantera) di un esclabo,” bou di cua tabatin un paña mará. Acaso Pedro tabata referí n’e echo cu Jesus a faha su mes cu un serbete i laba pia di su apostelnan? Nos no por bisa esaki cu siguransa. Sin embargo, Jesus su servicio humilde a haci un impresion permanente riba Pedro su curason, i esei mester ta e caso cu tur siguidó di Cristo.​—Colosensenan 3:​12-14.