Saulo—Un Wea Scogí pa Señor

SAULO di Tarso tabata un oponente cu instinto asesino contra e siguidónan di Cristo. Pero Señor tabatin un futuro diferente wardá p’e. Saulo mester a bira un representante sobresaliente net dje causa cu el a oponé cu asina fervor. Jesus a bisa: “E homber aki [Saulo] ta un wea scogí pa hiba mi nomber na e nacionnan i tambe na reynan i na e yunan di Israel.”—Echonan 9:15.

Saulo su bida como “un homber insolente” a cambia completamente ora misericordia a ser mustrá na dje i el bira e “wea scogí” di Señor Jesucristo. (1 Timoteo 1:12, 13) Ora Saulo a bira e apostel cristian Pablo, el a dirigí e energia cu a motiv’é pa participá den piedramentu di Esteban i den otro atakenan contra disipelnan di Jesus, riba obhetivonan totalmente diferente. Evidentemente, Jesus a mira rasgonan deseabel den Saulo. Ki tipo di rasgo? Ken Saulo tabata? Con su antecedente a hacié útil p’e adelantamentu di adoracion berdadero? Nos por siña algu for di su experencia?

Antecedente Familiar di Saulo

Saulo tabata un “hóben” tempu cu nan a mata Esteban, djis despues di Pentecoste 33 E.C. Ora el a skirbi Filemon rond di aña 60 pa 61 E.C., e tabata “un homber di edad.” (Echonan 7:58; Filemon 9) Eruditonan ta pensa cu, di acuerdo cu e manera di considerá edad den tempu di antigwedad, “hóben” casi sigur a nificá un edad entre 24 i 40 aña, miéntras cu “un homber di edad” lo tabata di 50 pa 56 aña. Pues, probablemente Saulo a nace djis un par di aña despues di Jesus.

E tempu ei, tabatin hudiu den hopi parti di mundu. Algun dje causanan pakico nan a plama for di Hudea tabata conkista dor di otro nacionnan, sclabitud, deportacion, negoshi i imigracion boluntario. Aunke Saulo su famia tabata entre e hudiunan cu a plama, el a enfatisá nan lealtad n’e Ley, bisando cu e tabata “circuncidá riba e di ocho dia, di desendencia di famia di Israel, dje tribu di Benjamin, un hebreo nací di hebreo, en cuanto ley, un fariseo.” Saulo tabatin e mésun nomber hebreo cu un miembro prominente di su tribu—e promé rey di Israel. Como un romano di nacementu, Saulo di Tarso tabatin un nomber latin tambe, esta, Paullus.—Filipensenan 3:5; Echonan 13:21; 22:25-29.

E echo cu Saulo a nace como romano a nificá cu un di su antepasadonan masculino a adkerí e privilegio di ciudadania. Den ki manera? Tin vários posibilidad. Fuera di por heredá ciudadania, hende individual i tambe gruponan por a ricibié dor di mérito special, djis pa un bentaha político of como un recompensa pa un servicio extraordinario rindí na Estado. Un catibu cu por a cumpra su libertad for di un romano of unu cu un ciudadano romano a dun’é su libertad, ta bira un romano di mes. Mescos ta conta pa un veterano dje forsanan armá cu a haña retiro for dje ehército romano. Cu tempu, nativonan cu tabata biba den colonianan romano por a bira ciudadano. Tambe nan ta bisa cu den cierto periodonan nan tabata cumpra ciudadania pa montantenan haltu. Con Saulo su famia a haña ciudadania romano ta algu desconocí.

Nos sa cu Saulo a bini di Tarso, e stad principal i capital dje provincia romano Cilicia (awe den sur di Turkia). Aunke tabatin un comunidad hudiu basta grandi den e área, bida einan lo a pone Saulo den contacto cu cultura gentil tambe. Tarso tabata un stad grandi i próspero, famoso como un centro di educacion helenístico, esta, griego. Segun cálculonan, su poblacion den e promé siglo tabata entre 300.000 pa 500.000 persona. E tabata un centro comercial riba e caretera principal entre Asia Menor, Siria i Mesopotamia. Tarso tabata próspero debí na comercio i n’e fertilidad dje yanura den becindario cu a producí principalmente grano, biña i linen. Ta for di su industria próspero di tela a bini e tela di lana di cabritu for di cua nan a traha tent.

Saulo Su Educacion

Saulo, of Pablo, a percurá onestamente pa su mes i a sostené su actividadnan como misionero dor di traha tent. (Echonan 18:2, 3; 20:34) E ofishi di traha tent tabata algu típico di su stad natal, Tarso. Probablemente tempu e tabata hóben, Saulo a siña e ofishi di traha tent for di su tata.

Saulo su conocimentu di idioma—foral su dominio di griego, e lenga comun dje Imperio Romano—tambe a resultá di ta di balor incalculabel den su trabou como misionero. (Echonan 21:37–22:2) Hende cu a analisá loke el a skirbi ta bisa cu su griego ta excelente. Su vocabulario no ta clásico ni literario, pero mas bien, e ta mescos cu esun di Septuaginta, e traduccion griego dje Scritura Hebreo cu hopi bes el a cita of parafraseá. A base dje evidencia aki, vários erudito ta asumí cu Saulo a haña por lo ménos un bon educacion básico na griego, probablemente na un scol hudiu. E erudito Martin Hengel ta bisa: “Den tempu antiguo, un bon educacion—foral un educacion griego—no tabata pornada; pa regla, e tabata mará di antemano na un cierto contribucion material.” Pues Saulo su educacion ta indicá cu el a bini di un famia prominente.

Probablemente, ora e no tabatin mas cu 13 aña di edad, Saulo a sigui su educacion na Jerusalem, un 840 kilometer for di su cas. El a ricibí su instruccion na pia di Gamaliel, un maestro di tradicion farisaico, bon conocí i hopi respetá. (Echonan 22:3; 23:6) E estudio aki, comparabel awe cu un estudio universitario, a habri e oportunidad p’e logra prominencia den hudaismo.a

El A Haci Bon Uso di Su Abilidadnan

Dor cu Saulo a nace den un famia hudiu den un stad griego romano, el a pertenecé na tres mundu. No tin duda cu un antecedente cosmopolitano i multilingwe, a yud’é “bira tur cos pa tur clase di hende.” (1 Corintionan 9:19-23) Despues, su ciudadania romano a permitié defendé su ministerio legalmente i hiba e bon nobo dilanti e autoridadnan di mas haltu den e Imperio Romano. (Echonan 16:37-40; 25:11, 12) Naturalmente, e Jesus resucitá tabata sa di Saulo su antecedente, su educacion i personalidad, i el bisa Ananías: “Cuminsá cana, pasobra e homber aki ta un wea scogí pa hiba mi nomber na e nacionnan i tambe na reynan i na e yunan di Israel. Pasobra lo mi mustr’é claramente cuantu cos e tin cu sufri pa mi nomber.” (Echonan 9:13-16) Ora a canalisá Saulo su celo den e direccion corecto, e tabata un gran yudansa den plama e mensahe di Reino den teritorionan leu.

E echo cu Jesus a scoge Saulo pa un comision special, tabata un suceso único den historia cristian. Sin embargo, tur cristian djawe tin abilidad i característicanan individual cu nan por usa eficasmente den plama e bon nobo. Ora Saulo a comprendé loke Jesus tabata kier di dje, e no a para ketu. El a haci tur loke e tabata por pa promové interesnan di Reino. Ta asina abo ta haci?

[Nota]

[Kuadro/​Plachi na página 30]

Registracion i Certificacion di Ciudadania Romano

Mediante dos statuto cu a drenta na vigor na aña 4 i 9 E.C., Augusto a establecé e ley di registrá yunan legítimo di ciudadanonan romano. E registracion mester a tuma lugá denter di 30 dia despues di nacementu. Den e provincianan, dilanti un magistrado den e oficina cu ta ser usá specialmente como registro civil, un famia mester a declará cu e yu tabata legítimo i cu e tabatin ciudadania romano. Nan tabata registrá tambe nomber dje mayornan, sexo i nomber dje yu i su fecha di nacementu. Asta promé cu introduccion dje leynan aki, nan tabata renobá e registracion dje ciudadanonan mediante un censo cada cincu aña, den tur municipio, colonia i distrito romano.

Pues, un hende por a proba su estado civil dor di referí na un archivo bon tené. Por a obtené ehemplarnan certificá di e registronan ei den forma di díptico (tabla cu ta dobla) di palu portátil. Na opinion di algun erudito, ora Pablo tabata bisa cu e tin ciudadania romano, podisé e por a presentá un certificado pa confirmá esei. (Echonan 16:37; 22:25-29; 25:11) Dor cu nan a considerá ciudadania romano casi como un “cualidad sagrado” i e tabata duna un persona derecho riba hopi privilegio, falsificacion dje documentonan ei tabata un crímen hopi serio. Falsificacion di un persona su estado civil tabata ser castigá cu morto.

[Rekonosementu]

Historic Costume in Pictures/​Dover Publications, Inc., New York

[Kuadro/​Plachi na página 31]

Saulo Su Nomber Romano

Tur ciudadano romano masculino tabatin por lo ménos tres nomber. E tabatin su nomber dilanti, un fam (conectá cu su tribu of gens) i un bijnaam. Gayo Julio César ta un ehempel famoso. Bijbel no ta mencioná nombernan romano completo, pero segun fuentenan seglar, Agripa tabata yama Marco Julio Agripa. Galion su nomber tabata Lucio Junio Galion. (Echonan 18:12; 25:13) Ehempelnan bíblico di e último dos nombernan di un persona, kende su nomber tabata consistí di tres parti, ta Poncio Pilato (letternan grabá abou), Sergio Paulo, Claudio Lisias i Porcio Festo.—Echonan 4:27; 13:7; 23:26; 24:27.

No ta posibel pa bisa sigur cu Paullus tabata Saulo su nomber dilanti of cu e tabata su bijnaam. No tabata straño pa informalmente agregá un otro nomber cu famia i conocínan di un persona ta yam’é. Tambe, nan por a usa un nomber no-romano manera Saulo como substituto. “[Saulo] nunca lo por a pasa pa un nomber romano,” segun un erudito, “pero como un nomber nativo duná como signum, esta, nomber di cariño na un ciudadano romano sí lo e por a pasa masha bon.” Den áreanan multilingwe, e situacion lo por a determiná cua nomber un persona lo a scoge pa usa.

[Rekonosementu]

Potret di Israel Museum, ©Israel Antiquities Authority