Dunando Jehova Loke E Ta Merecé

MANERA TIMOLEON VASILIOU A RELATA

Nan a arestá mi pasobra mi tabata duna les di Bijbel den e pueblo di Aidhonochori. E polisnan a kita mi sapatu i a cuminsá bati mi bou di mi plant’i pia. Segun cu nan a sigui bati mi, mi pia a bira doof i mi no tabata sinti dolor mas. Pero, promé cu mi splica kico a hiba na e caso di abusu aki, cu e tempu ei no tabata algu straño na Grecia, laga mi conta con mi a bira un siñadó di Bijbel.

DJIS despues cu mi a nace na 1921, mi famia a muda bai n’e stad Rodholívos, den e parti nort di Grecia. Durante mi hubentud mi a hiba un bida con-cu-ta. Mi a cuminsá huma cu 11 aña. Despues mi a bira un bebedó pisá i un gèmbeldó. I casi tur anochi mi tabata bai fiestanan indecente. Dor cu mi tabatin talento pa música, mi a djoin un banda local. Den mas of ménos un aña mi por a toca casi tur e instrumentonan den e banda. Tog, na mésun tempu mi tabata gusta siña i mi tabata stima husticia.

Na principio di 1940, miéntras cu Guera Mundial II tabata den su furia, nos banda a haña invitacion pa toca na entiero di un mucha muher chikitu. N’e graf, famia i amigunan tabata yora cu un tristesa incontrolabel. Nan situacion di puru desesperacion a haci un impresion profundo riba mi. Mi a cuminsá puntra mi mes: ‘Di con nos ta muri? Bida tin algu mas cu nos existencia corticu? Unda mi por haña un contesta?’

Un par di dia despues, mi a ripará cu tabatin un Testament Nobo riba un reki den mi cas. Mi a cog’é i a cuminsá lesa. Ora mi a lesa e palabranan di Jesus na Mateo 24:7 di cu guera na gran escala ta parti dje señal di su presencia, mi a cuminsá comprendé cu su palabranan mester tin aplicacion den nos tempu. Durante e simannan cu a sigui, mi a lesa e ehemplar aki dje Scritura Griego Cristian vários bes.

Anto na december 1940, mi a bishitá un famia cu tabata biba den becindario—un biuda cu su cincu yunan. Den nan zolder, entre un stapel di foyeto, mi a haña un foyeto cu tabatin e título Un Gobernacion Deseabel, publicá dor di Watch Tower Bible and Tract Society. Mi a pasa oranan eiriba den e zolder i a lesa henter e foyeto. Dor di loke mi a lesa, mi a keda plenamente convencí cu en berdad nos ta bibando den loke Bijbel ta yama “e último dianan,” i cu pronto Jehova Dios lo trece un fin n’e mal sistema di cosnan i reemplas’é cu un hustu mundu nobo.—2 Timoteo 3:1-5; 2 Pedro 3:13.

Loke foral a impresioná mi tabata e evidencia bíblico cu esnan fiel lo biba pa semper den paradijs riba tera, i cu lo no tin sufrimentu ni morto mas den e mundu nobo bou di gobernacion dje Reino di Dios. (Salmo 37:9-11, 29; Revelacion 21:3, 4) Miéntras mi tabata lesa, mi tabata gradicí Dios den oracion p’e cosnan aki, i mi a pidié mustra mi kico ta su rekisitonan. Mi a comprendé cu Jehova Dios ta merecé mi debocion di henter alma.—Mateo 22:37.

Mi Ta Actua na Armonia cu Loke Mi A Siña

For dje tempu ei padilanti mi a stop di huma, bebe burachi i gèmbel. Mi a yama e biuda su cincu yunan i mi tres rumannan mas chikitu huntu, i mi a splica nan loke mi a siña for dje foyeto. No a tarda mashá cu nos tur a cuminsá compartí e poco cu nos tabata sa. Den comunidad nos a bira conocí como Testigonan di Jehova, aunke nunca nos no a yega di topa ningun Testigo. For di principio, mi tabata dedicá mas cu shen ora pa luna na papia cu otro hende tocante e cosnan maraviyoso cu mi a siña.

Un pastor griego ortodox local a bai keha nos cerca e alcalde. Pero algun dia promé, sin cu nos tabata sa, un hóben Testigo a haña un cabai perdí i el a hib’é bek pa su doñonan. Tal onrades tabatin como resultado cu e alcalde a respetá Testigonan, i el a nenga di scucha e pastor.

Un dia, rond di october 1941, ora mi tabata duna testimonio den plasa, un persona a papia di un Testigo di Jehova cu tabata biba den un stad den cercania. E tabata un ex-polis cu yama Christos Triantafillou. Mi a bai bishit’é i mi a haña sa cu e tabata Testigo for di 1932. Esta contentu mi a keda ora el a duna mi vários publicacion ménos recien di Watch Tower! Nan a ègt yuda mi progresá spiritualmente.

Na 1943, mi a simbolisá mi dedicacion na Dios mediante bautismo bou di awa. P’e tempu ei, mi tabata conducí studio di Bijbel den tres pueblo bisiña, esta, Dhravískos, Palaeokomi i Mavrolofos. Mi a usa e buki E Harpa di Dios, como un yudansa pa studia Bijbel. Cu tempu, mi tabatin e privilegio di mira cuater congregacion di Testigonan di Jehova lanta den e área aki.

Nos Ta Predicá Apesar di Obstáculo

Na 1944, Grecia a libra for di ocupacion aleman, i algun tempu despues, nos a establecé comunicacion cu e oficina di sucursal di Sociedad Watch Tower na Aténas. Mi a haña invitacion for dje oficina di sucursal pa bai predicá den un teritorio caminda casi niun hende no a yega di tende e mensahe di Reino. Despues cu mi a muda bai einan, mi a traha tres luna na un hacienda i e resto di aña mi a pasa den e ministerio.

E aña ei mi tabatin e bendicion di mira mi mama bautisá, i tambe e biuda cu su yunan, cu excepcion di esun mas chikitu, Marianthi, kende a bautisá na 1943 i a bira mi kerida esposa na november dje aña ei. Trinta aña despues, na 1974, mi tata tambe a bira un Testigo bautisá.

Na principio di 1945, nos a ricibí e promé ehemplar di E Toren di Vigilancia di stencil for dje oficina di sucursal. E título dje artículo principal tabata “Bai, Haci Tur Nacion Disipel.” (Mateo 28:19, The Emphatic Diaglott) Mesora ami cu Marianthi a bandoná nos cas pa bai traha den teritorionan alehá, parti oost di riu Strymon. Despues otro Testigonan a bin djoin nos.

Hopi bes nos tabata cana pia abou kilometernan largu, crusando ravina i cerunan pa yega un pueblo. Nos tabata haci esaki pa spar nos sapatunan pasobra si nan a kibra, nos lo no tabatin otro pa bisti. Durante e añanan di 1946 pa 1949, guera civil tabata asotá Grecia, i biahamentu tabata hopi peligroso. No tabata straño pa mira cadaver bentá cantu di caminda público.

En bes di laga e dificultadnan aki desanimá nos, nos a sigui sirbi celosamente. Hopi biaha mi a sinti manera e salmista cu a skirbi: “Aunke mi cana den e vaye di sombra profundo, mi no ta teme nada malu, pasobra abo ta cu mi; bo garoti i staf ta e cosnan cu ta consolá mi.” (Salmo 23:4) Hopi bes nos a keda for di cas simannan largu durante e periodo aki, i tin biaha mi tabata dedicá 250 ora pa luna den e ministerio.

Nos Ministerio na Aidhonochori

Un dje pueblonan cu nos a bishitá na 1946 tabata Aidhonochori, situá te riba un ceru. Einan nos a topa un homber cu a bisa nos cu den e pueblo tin dos homber cu kier a tende e mensahe di Bijbel. Sin embargo, dor cu e homber ei tabatin miedu di su bisiñanan, e no kier a hiba nos cerca nan. Di tur manera nos a localisá nan casnan, i nan a ricibí nos hospitalariamente. De facto, despues di un par di minuut e sala tabata yen di hende! Esakinan tabata famia i amigunan yegá. Mi a keda tur asombrá di mira cu cuantu atencion nan a sinta scucha nos. Poco despues nos a haña sa cu nan tin tempu ta warda ansiosamente pa haña contacto cu Testigonan di Jehova. Pero durante e ocupacion aleman, no tabatin niun Testigo den e área ei. Kico a lanta nan interes?

E dos cabesnan di famia tabata personanan prominente den e partido comunista local, i nan a introducí ideanan comunista den e pueblo. Pero despues nan a topa cu un ehemplar dje buki Gobernacion, publicá dor di Sociedad Watch Tower. Nan a les’é i a keda convencí cu e Reino di Dios tabata e único speransa pa un gobernacion hustu i perfecto.

Nos a sinta papia cu e hombernan aki i nan amigunan te meianochi. Nan tabata completamente satisfecho cu e contestanan bíblico cu nan a haña pa nan preguntanan. Sin embargo, djis despues, e comunistanan den e pueblo a planea pa mata mi pasobra nan a considerá mi responsabel p’e combertimentu di nan ex-lidernan. Pa casualidad, e homber cu a conta nos dje personanan den e pueblo cu tabata interesá, tambe tabata entre esnan presente e promé anochi. Cu tempu, el a progresá den su conocimentu di Bijbel, a bautisá i despues a bira un anciano cristian.

Persecucion Brutal

No muchu tempu despues cu nos a topa cu e ex-comunistanan aki, dos agente policial a bula drenta den un cas caminda nos tabata teniendo un reunion. Nan a arestá nos cuater cu arma di mik riba nos i nan a escoltá nos bai warda di polis. Einan, un teniente cu tabatin bon relacion cu clero griego ortodox, a zundra nos. Finalmente, el a puntra: “Ehm, kico lo mi haci cu boso?”

Den un solo bos, e otro polisnan pará nos tras a grita: “Laga nos duna nan un bon halá di sota!”

Ya e ora ei tabata anochi lat. E polisnan a cera nos den bodega i nan a bai un bar pegá ei banda. Ora nan tabata bon burachi, nan a bini bek i a hiba mi ariba.

Ora mi a mira nan condicion, mi a realisá cu nan lo por a mata mi un ora pa otro. P’esei, mi a haci oracion pidi Dios fortalesa pa mi por wanta kico cu sosodé cu mi. Nan a coge un par di bara i, manera mi a conta na principio, nan a cuminsá bati mi bou di mi plant’i pia. Despues cu nan a bati mi rond mi curpa, nan a benta mi bek den bodega. Siguientemente, nan a saca un otro víctima i a cuminsá batié.

Miéntras tantu, mi a usa e oportunidad pa prepará e otro dos hóbennan Testigo pa nan por a enfrentá e prueba nan dilanti. Pero en bes di nan, e polisnan a scoge pa bolbe hiba ami ariba. Nan a kita mi pañanan i nan cincu a bati mi pa mas of ménos un ora. I nan a trapa mi cabes cu nan boetsnan militar. Despues nan a benta mi abou for di trapi, unda mi a keda for di conocimentu pa un 12 ora largu.

Ora cu finalmente nan a laga nos liber, un famia den e pueblo a laga nos pasa anochi cerca nan i nan a cuida nos. E siguiente dia, nos a sali pa bolbe nos cas. Nos tabata asina maltratá i agotá dor dje sotanan, cu nos a tuma ocho ora pa cana e caminda cu normalmente ta tuma nos dos ora. Mi tabata asina hinchá dor dje slanan cu casi Marianthi no por a reconocé mi.

Aumento Apesar di Oposicion

Na 1949, miéntras cu e guera civil tabata andando ainda, nos a muda bai Tesalónica. Mi a haña e asignacion pa sirbi como asistente dje sirbidó di congregacion den un dje cuater congregacionnan den e stad. Despues di un aña e congregacion a crece asina tantu cu nos a forma un otro, i mi a haña e asignacion di sirbidó di congregacion, esta superintendente presidente. Un aña despues e tamaño dje congregacion nobo a bira casi dòbel i cu tempu nos a forma un congregacion mas!

Opositornan tabata rabiá cu e crecementu di Testigonan di Jehova na Tesalónica. Un dia na 1952, ora mi a bini cas for di trabou, mi a haña cu nos cas a kima plat. Apénas Marianthi por a scapa su bida. E anochi ei na reunion, nos mester a splica e rumannan pakico nos pañanan tabata sushi, esta, cu nos a perde tur otro cos. Nos rumannan a mustra simpatia i nan a sostené nos.

Na 1961, mi a haña e asignacion pa haci e trabou biahero. Esei a nificá bishitá un congregacion diferente cada siman pa fortalecé e rumannan spiritualmente. Pa e siguiente 27 añanan, ami cu Marianthi a bishitá e circuito i distritonan di Macedonia, Tracia i Tesalia. Aunke mi kerida Marianthi tabata prácticamente ciegu for di 1948, yen di curashi el a sirbi huntu cu mi, soportando hopi prueba di su fe. Hopi bes nan a arestá e tambe, hib’é dilanti corte i cer’é. Anto su salú a cuminsá bai atras i el a muri na 1988, despues di a hiba un lucha largu contra cancer.

E mésun aña, mi a ser nombrá pa sirbi como pionero special na Tesalónica. Awor, despues di mas cu 56 aña di sirbishi na Jehova, ainda mi por traha duru i participá den tur rasgo dje ministerio. Tabatin bes cu mi a conducí te cu 20 studio di Bijbel pa siman cu personanan interesá.

Mi a bin comprendé cu di berdad nos ta na comienso di un gran programa di siñansa cu lo sigui te den Jehova su mundu nobo i pa mil aña mas. Tog, mi ta pensa cu esaki no ta e tempu pa nos bai mas trankil, pa posponé cosnan of pa usa nos tempu pa satisfacé nos deseonan carnal. Mi ta gradicí Dios cu el a yuda mi cumpli cu e promesa cu mi a haci for di principio ayá, pasobra di berdad Jehova merecé nos debocion i sirbishi di henter alma.

[Plachi na página 24]

Dunando un discurso tempu nos trabou di predicá tabata bou di prohibicion

[Plachi na página 25]

Huntu cu mi casá, Marianthi