Modestia—Un Cualidad Cu Ta Promove Pas

Esta dushi mundu lo tabata si tur hende a desplegá modestia. Individuonan lo tabata ménos exigente, miembronan di famia ménos incliná na pleita, negoshinan ménos competitivo i nacionnan lo tabata ménos hostil. Abo lo kier biba den un mundu asina?

BERDADERO sirbidónan di Jehova Dios ta preparando pa su mundu nobo primintí, den cua tur hende lo mira modestia, no como un debilidad sino como muestra di fortalesa i birtud. (2 Pedro 3:13) De facto, nan ta cultivá e cualidad di modestia asta for di awor. Di con? Foral pasobra esaki ta loke Jehova ta rekerí di nan. Su profeta Mikéas a skirbi: “El a bisa bo, o hende terenal, loke ta bon. I kico Jehova ta pidi bek di bo sino di ehercé husticia i stima bondad i sea modesto canando cu bo Dios?”—Mikéas 6:8.

Modestia por nificá vários cos, manera, falta di orguyo of no pensa demasiado di bo mes, no gusta broma tocante bo abilidad, logro i posesionnan. Segun un buki di referencia, modestia ta nificá tambe, “keda denter di límite.” Un persona modesto ta keda denter dje límitenan di bon conducta. E ta reconocé cu tin límite na loke e tin cu haci i na loke e por haci. E sa cu tin cos cu e no tin derecho di haci. Hende modesto ta atraé nos sigur. Joseph Addison, poëta ingles, a skirbi: “No tin nada mas agradabel cu berdadero modestia.”

Modestia no ta un característica natural di hende imperfecto. Nos tin cu haci esfuerso pa desaroyá e cualidad aki. Pa animá nos, e Palabra di Dios ta describí un cantidad di incidente cu ta ilustrá e vários formanan di modestia.

Dos Rey Modesto

Un di Jehova su sirbidónan mas leal tabata David, kende tabata un hóben ora cu a ungié como e futuro rey di Israel. Despues di esei, e rey na mando, Saul, a pone David bou di hopi preshon dor di purba mat’é i dor di fors’é biba como fugitivo.—1 Samuel 16:1, 11-13; 19:9, 10; 26:2 3.

Asta bou di e circunstancianan ei, David a reconocé cu tabatin límite na loke e mester a haci pa protehá su bida. Na un ocasion den desierto, David a nenga di laga Abisai haci daño na rey Saul kende tabata na soño, bisando: “Di mi parti, mirá for dje punto di bista di Jehova, ta impensabel pa mi saca mi man contra e ungí di Jehova!” (1 Samuel 26:8-11) David tabata sa cu no a keda na dje pa remové Saul for dje puesto di rey. Pues, David a mustra modestia n’e ocasion aki dor di keda denter dje límitenan di conducta apropiado. Mescos tambe, sirbidónan di Dios awe sa cu “mirá for dje punto di bista di Jehova,” tin cosnan cu simplemente nan no por haci, ni sikiera ora bida di hende ta na peliger.—Echonan 15:28, 29; 21:25.

Na yong, Sálomon yu di rey David tambe a manifestá modestia, aunke den un manera un tiki diferente. Ora Sálomon a ser entronisá, el a sinti cu e tabata incapas pa cumpli cu e responsabilidad pisá di rey. El a haci oracion: “Jehova mi Dios, abo mes a haci bo sirbidó rey na lugá di David mi tata, i mi no ta mas cu un mucha chikitu. Mi no sa con pa sali ni con pa drenta.” Ta bisto cu Sálomon tabata conciente cu e tabata falta abilidad i experencia. Anto e tabata modesto, e no a mustra cu e tabata orguyoso of cu e tabata pensa demasiado di su mes. Sálomon a pidi Jehova dicernimentu, i el a haña loke el a pidi.—1 Reynan 3:4-12.

Mesías i Su Predecesor

Mas cu 1.000 aña despues dje dianan di Sálomon, Juan Bautista a efectuá un obra cu a prepará caminda p’e Mesías. Como e predecesor di Esun Ungí, Juan a cumpli cu profecia di Bijbel. Lo e por a broma tocante su privilegio. Tambe Juan lo por a purba trece onor pa su mes pasobra e tabata famia carnal dje Mesías. Pero Juan a bisa otro hende cu e no ta digno di ni sikiera los Jesus su sandalia. Anto ora Jesus a presentá su mes pa bautismo den riu Jordan, Juan a bisa: “Ami ta esun cu lo mester ser bautisá dor di bo, i abo ta bini cerca mi?” Esaki ta indicá cu Juan no tabata un persona cu gusta broma. E tabata modesto.—Mateo 3:14; Malakías 4:5, 6; Lucas 1:13-17; Juan 1:26, 27.

Despues cu Jesus a bautisá el a cuminsá den e ministerio di tempu completo, predicando e bon nobo dje Reino di Dios. Aunke Jesus tabata un homber perfecto, el a bisa: “Mi no por haci ni un solo cos di mi mes iniciativa . . . Mi no ta busca mi mes boluntad, sino e boluntad di esun cu a manda mi.” Ademas, Jesus no a busca onor for di hende, pero el a duna Jehova e gloria pa tur loke el a haci. (Juan 5:30, 41-44) Ki un modestia!

Ta bisto anto cu sirbidónan leal di Jehova—manera David, Sálomon, Juan Bautista i asta e homber perfecto Jesucristo—a desplegá modestia. Nan no a broma, nan no tabata pensa demasiado di nan mes ni nan no tabata orguyoso, i nan a keda denter di límitenan apropiado. Nan ehempel ta suficiente motibu pa sirbidónan di Jehova djawe desaroyá i desplegá modestia. Pero, ainda tin mas motibu pa nos desplegá modestia.

Den e tempu turbulento aki di historia di humanidad, modestia ta un cualidad di gran balor pa cristiannan berdadero. E ta haci posibel pa bo ta na pas cu Jehova Dios, cu bo próhimo i cu bo mes.

Pas cu Jehova Dios

Pas cu Jehova ta posibel solamente si nos mantené nos denter dje límitenan cu e ta pone pa adoracion berdadero. Nos promé mayornan, Adam cu Eva, a pasa over dje límitenan cu Dios a pone, i nan a bira e promé víctimanan di inmodestia. Nan a perde nan bon relacion cu Jehova i tambe nan hogar, nan futuro i nan bida. (Génesis 3:1-5, 16-19) Esta un prijs haltu nan a paga!

Laga nos siña for dje fayo di Adam cu Eva, ya cu adoracion berdadero ta pone límitenan n’e manera cu nos tin cu actua. Por ehempel, Bijbel ta bisa cu “ni fornicadó, ni idólatra, ni adúltero, ni homber wardá pa propósito innatural, ni homber cu ta drumi cu homber, ni ladron, ni haragan, ni buraché, ni zundradó, ni hende cu ta practicá extorsion lo heredá e reino di Dios.” (1 Corintionan 6:9, 10) Sabiamente Jehova ta pone e límitenan aki pa nos mes bon, i nos ta mustra sabiduria dor di keda denter di e límitenan aki. (Isaías 48:17, 18) Proverbionan 11:2 ta bisa nos: “Sabiduria ta cu esnan modesto.”

Kico si un organisacion religioso ta bisa nos cu nos por pasa por haltu dje límitenan aki i tog disfrutá di pas cu Dios? E organisacion ei ta purba gaña nos. Na otro banda, modestia ta yuda nos cultivá un relacion íntimo cu Jehova Dios.

Pas cu Bo Próhimo

Tambe modestia ta promové relacionnan pacífico cu otro hende. Por ehempel, ora mayornan ta un ehempel den keda contentu cu e cosnan necesario i den duna prioridad na asuntunan spiritual, ta mas probabel cu nan yunan lo adoptá e mésun actitud. E ora ei lo ta mas fácil p’e muchanan keda contentu, asta si kisas nan no ta haña semper loke nan kier. Esaki lo yuda nan hiba un bida modesto, i bida di famia lo ta mas trankil.

Esnan cu tin cu supervisá mester soru foral pa nan ta modesto i no abusá di nan autoridad. Por ehempel, cristiannan ta ser instruí pa: “No bai mas ayá di e cosnan skirbí.” (1 Corintionan 4:6) Ancianonan di congregacion ta realisá cu nan no tin cu purba imponé nan preferencianan personal riba otro hende. En bes di esei, nan ta usa e Palabra di Dios como base pa animá e curso corecto den asuntunan relacioná cu conducta, bistí, areglo personal of recreo. (2 Timoteo 3:14-17) Ora miembronan di congregacion ta ripará cu e ancianonan ta keda denter dje límitenan bíblico, esaki ta promové respet p’e hombernan aki i ta contribuí na un spiritu caluroso, amoroso i pacífico den e congregacion.

Pas cu Bo Mes

Esnan cu ta modesto ta ser recompensá cu pas interno. Un persona modesto no ta sinti cu ambicion ta com’é di paden. Esaki no kier men cu e no tin metanan personal. Por ehempel, kisas e ta deseá mas privilegio di sirbishi, pero e ta spera riba Dios, i e ta duna crédito na Jehova pa cualkier privilegio cristian cu e ricibí. E no ta mira nan como su logronan personal. Esaki ta hala un persona modesto mas cerca Jehova, “e Dios di pas.”—Filipensenan 4:9.

Suponé cu tin biaha nos ta haña cu hende ta pasa nos por haltu. Lo no ta mas mihó pa nan pasa nos por haltu dor cu nos ta modesto en bes di cu nos ta hala atencion na nos mes debí cu nos ta inmodesto? Ambicion no ta caba cu individuonan modesto. P’esei, nan ta na pas cu nan mes, i esaki ta beneficioso pa nan bienestar emocional i físico.

Con pa Desaroyá i Mantené Modestia

Adam cu Eva a sucumbí na inmodestia—un característica cu nan a pasa over na nan yunan. Kico por yuda nos evitá di haci e mésun fayo cu nos promé mayornan? Con nos por desaroyá e excelente cualidad di modestia?

Pa cuminsá, un comprendimentu exacto di nos posicion relacioná cu Jehova, e Creador di universo, lo yuda nos. Ki logronan personal nos lo por presentá cu hamas lo por compará cu loke Dios a realisá? Jehova a puntra su sirbidó fiel Job: “Unda bo tabata ora mi a funda e tera? Bisa mi, si en berdad bo ta conocé comprendimentu.” (Job 38:4) Job no por a contestá. Nos no tin e mésun limitacion den conocimentu, abilidad i experencia? No ta na nos beneficio pa nos reconocé nos limitacionnan?

Ademas, Bijbel ta bisa nos: “Na Jehova e tera i loke ta yen’é ta pertenecé, tambe e tera productivo i esnan cu ta biba den dje.” Esaki ta encerá ‘tur animal salbahe di mondi, e bestianan riba mil ceru.’ Jehova por bisa: “Plata ta di mi, i oro ta di mi.” (Salmo 24:1; 50:10; Ageo 2:8) Kico nos ta poseé cu por ta compará cu esnan di Jehova? Sí, asta e persona di mas ricu no tin motibu pa broma tocante loke e tin! P’esei, ta sabí pa sigui e conseho inspirá di apostel Pablo na cristiannan na Roma: “Mediante e bondad inmerecí cu a ser duná na mi, mi ta bisa cada un cu ta ei den boso pa no pensa mas di su mes cu ta necesario pa pensa.”—Romanonan 12:3.

Como sirbidónan di Dios cu ta deseá di cultivá modestia, nos mester pidi den oracion p’e frutanan di spiritu: amor, goso, pas, gran pacenshi, amabilidad, bondad, fe, suavedad i dominio propio. (Lucas 11:13; Galationan 5:22, 23) Di con? Pasobra cada un dje cualidadnan aki lo hacié mas fácil pa nos ta modesto. Por ehempel, amor pa próhimo lo yuda nos lucha contra un tendencia di broma of di ta orguyoso. I dominio propio lo pone nos para ketu i pensa promé cu nos actua den un manera inmodesto.

Laga nos tene cuidou! Constant nos mester vigilá contra trampanan di inmodestia. Dos dje reynan mencioná anteriormente, no tabata modesto na tur ocasion. Rey David a actua imprudente dor di tene un censo na Israel, algu cu tabata contra e boluntad di Jehova. Rey Sálomon a bira inmodesto asta te n’e punto cu el a participá den adoracion falsu.—2 Samuel 24:1-10; 1 Reynan 11:1-13.

Miéntras e sistema malbado aki ta dura, bo mester vigilá constant pa bo ta modesto. Sin embargo, e esfuerso ta bale la pena. Den Dios su mundu nobo, e sociedad humano lo consistí di hende modesto so. Nan lo mira modestia como un muestra di fortalesa i no como un debilidad. Lo ta ki maraviyoso ora tur individuo i famia ta bendicioná cu e pas cu modestia ta trece cuné!

[Plachi na página 23]

Cu modestia Jesus a duna crédito na Jehova pa tur loke el a haci