Logrando Victoria Riba Debilidad Humano
“Fiha mente riba e carni kier men morto.”—ROMANONAN 8:6.
1. Ki punto di bista algun hende tin di e curpa humano, i cua ta e preguntanan cu ta merecé consideracion?
“LO MI alabá bo pasobra di un manera cu ta inspirá temor mi ta trahá maraviyosamente.” (Salmo 139:14) Esei ta loke salmista David a canta miéntras e tabata contemplá un di Jehova su creacionnan: e curpa humano. En bes di duna e alabansa bon fundá ei, algun lider religioso ta considerá e curpa como un lugá di sconde i un instrumento di picá. El a ser yamá “disfras di ignorancia, fundamentu di bicio, bui di corupcion, caha di scuridad, morto na bida, cadaver cu ta sinti i graf portátil.” Ta berdad cu apostel Pablo a bisa: “Den mi carni, no ta biba nada bon.” (Romanonan 7:18) Pero esei kier men cu nos ta atrapá sin speransa den un curpa pecaminoso?
2. (a) Kico “fiha mente riba e carni” kier men? (b) Ki conflicto entre “carni” i “spiritu” ta tuma lugá den hende cu ta deseá di agradá Dios?
2 Tin bes e Scritura ta referí na e curpa humano como “carni.” (1 Reynan 21:27) E Scritura tambe ta usa “carni” pa representá hende den su estado imperfecto como un desendiente pecaminoso di Adam rebelde. (Efesionan 2:3; Salmo 51:5; Romanonan 5:12) Loke nos a heredá di dje a producí ‘debilidad di carni.’ (Romanonan 6:19) I Pablo a spierta: “Fiha mente riba e carni kier men morto.” (Romanonan 8:6) “Fiha mente riba e carni” kier men ser controlá i motivá dor di e deseonan di e carni pecaminoso. (1 Juan 2:16) Pues si nos ta purba agradá Dios, lo tin un conflicto constant entre nos spiritualidad i nos naturalesa pecaminoso cu ta pone preshon di un forma persistente riba nos pa cumpli cu “e obranan di carni.” (Galationan 5:17-23; 1 Pedro 2:11) Despues di describí e conflicto doloroso aki cu tin den dje, Pablo a sclama: “Hende infelis cu mi ta! Ken lo rescatá mi for dje curpa padeciendo e morto aki?” (Romanonan 7:24) Pablo tabata un víctima indefenso di tentacion? Bijbel ta contestá cu un no resonante!
E Realidad di Tentacion i Picá
3. Con hopi hende ta mira picá i tentacion, pero con Bijbel ta spierta nos contra e tipo di actitud ei?
3 Pa hopi hende awe, picá ta un concepto inaceptabel. Algun hende ta usa e palabra “picá” como un término anticuá pa describí debilidad di hende den un manera humorístico. Nan no ta realisá cu “nos tur tin cu ser manifestá dilanti dje asiento di huicio di e Cristo, pa cada un haña su recompensa pa e cosnan hací via e curpa, segun loke el a practicá, sea cu ta cos bon of cos baho.” (2 Corintionan 5:10) Otronan kisas por haci e remarke den forma di burla: “Mi por resistí tur cos ménos tentacion!” Tin hende ta biba den un cultura caminda satisfaccion inmediato ta central, sea cu ta di cuminda, sex, placer of logro. No solamente nan kier tur cos pero nan kier e awor! (Lucas 15:12) Nan no ta wak mas ayá di e placer inmediato, na e futuro goso di “e berdadero bida.” (1 Timoteo 6:19) Sin embargo, Bijbel ta siña nos pa pensa cuidadosamente i pa mira mas aleu, pa keda leu di cualkier cos cu por perhudicá nos spiritualmente of di otro manera. Un proverbio inspirá ta bisa: “Esun spiertu a mira e calamidad i a sconde su mes; esun inexperenciá cu a sigui padilanti a sufri e castigu.”—Proverbionan 27:12.
4. Ki spiertamentu registrá na 1 Corintionan 10:12 i 13 Pablo a duna?
4 Ora Pablo a skirbi e cristiannan cu tabata biba den Corinto—un stad conocí pa su degradacion moral—el a duna un spiertamentu realístico contra tentacion i e poder di picá. El a bisa: “Laga esun cu ta kere cu e ta pará tene cuidou p’e no cai. Ningun tentacion a bini riba boso fuera di loke ta comun pa hende. Pero Dios ta fiel, i lo e no laga boso ser tentá mas ayá di loke boso por soportá, sino cu huntu cu e tentacion lo e percurá tambe p’e salida pa boso por want’é.” (1 Corintionan 10:12, 13) Nos tur—hóben i grandi, homber i muher—ta haña nos confrontá cu hopi tentacion na scol, na trabou of otro caminda. P’esei laga nos examiná Pablo su palabranan i mira ki nificacion nan tin pa nos.
No Sea Demasiado Confiá
5. Di con demasiado confiansa ta peligroso?
5 Pablo ta declará: “Laga esun cu ta kere cu e ta pará tene cuidou p’e no cai.” Demasiado confiansa en cuanto nos fortalesa moral ta peligroso. E ta revelá un falta di comprendimentu di e naturalesa i poder di picá. Nos lo tin cu sinti cu nos no ta vulnerabel, siendo cu hendenan manera Moises, David, Sálomon i apostel Pedro a cai den picá? (Númeronan 20:2-13; 2 Samuel 11:1-27; 1 Reynan 11:1-6; Mateo 26:69-75) Proverbionan 14:16 ta bisa: “E sabí ta teme i ta apartá di loke ta malu, pero e estúpido ta bira furioso i ta confia den su mes.” Ademas Jesus a bisa: ‘E spiritu ta ansioso, pero e carni ta swak.’ (Mateo 26:41) Siendo cu ningun hende imperfecto ta liber di deseo corupto, nos mester tuma Pablo su spiertamentu na serio i resistí tentacion, of nos ta core riesgo di cai.—Jeremías 17:9.
6. Ki ora i con nos mester prepará pa tentacion?
6 Ta sabí pa prepará pa problema cu lo por sosodé inesperadamente. Rey Asa a reconocé cu un periodo di pas tabata e tempu oportuno p’e traha riba su defensa. (2 Crónicanan 14:2, 6, 7) E tabata sa cu na momento di atake lo ta muchu lat pa prepará. Di igual manera, e mihó decisionnan tocante kico pa haci ora tentacion ta presentá ta ser tumá cu un mente calmu den un ambiente trankil. (Salmo 63:6) Daniel cu su amigunan temeroso di Dios a tuma nan decision di keda fiel na e ley di Jehova promé cu nan a ser preshoná pa come e alimentonan exkisito dje rey. P’esei, nan no a vacilá pa pega na nan conviccionnan i no a come cuminda impuru. (Daniel 1:8) Promé cu situacionnan tentador presentá, laga nos fortalecé nos determinacion pa keda moralmente limpi. E ora ei nos lo por resistí picá.
7. Di con ta un consuelo pa sa cu otronan a resistí tentacion cu éxito?
7 Cuanto consuelo nos ta saca for di Pablo su palabranan: “Ningun tentacion a bini riba boso fuera di loke ta comun pa hende”! (1 Corintionan 10:13) Apostel Pedro a skirbi: “Tuma boso posicion contra [e Diabel], sólido den fe, sabiendo cu e mésun cosnan en cuanto sufrimentu ta ser realisá den henter e asociacion di boso rumannan den mundu.” (1 Pedro 5:9) Sí, otro rumannan a enfrentá tentacionnan similar i a resistí nan cu éxito cu e yudansa di Dios, i nos por haci e mésun cos. Sin embargo, como cristian berdadero bibando den un mundu degradá, nos tur por spera di ser tentá tardi of trempan. Pues anto, con nos por tin confiansa di logra victoria riba debilidad humano i tentacion pa peca?
Nos Por Resistí Tentacion!
8. Cua ta un manera básico pa evitá tentacion?
8 Un manera básico pa stop di ta “esclabo di picá” ta dor di evitá tentacion ora ta posibel. (Romanonan 6:6) Proverbionan 4:14 i 15 ta urgi nos: “No subi e caminda dje malbadonan, i no cana bai derechitu riba caminda di esnan cu ta malu. Evit’é, no pasa riba dje; desviá for di dje i sigui cana.” Hopi bes nos sa di antemano si un cierto combinacion di circunstancia probablemente lo hiba na picá. P’esei, e mihó cos pa haci como cristian ta di “sigui cana,” keda leu di cualkier hende, cos i lugá cu por lanta deseonan robes i pasion impuru.
9. Con e Scritura ta enfatisá huimentu for di situacionnan comprometedor?
9 Hui di un situacion cu ta tenta nos ta un otro paso básico pa logra victoria riba tentacion. Pablo a consehá: “Hui di fornicacion.” (1 Corintionan 6:18) I el a skirbi: “Hui di idolatria.” (1 Corintionan 10:14) Ademas e apostel a spierta Timoteo pa hui for di un deseo irazonabel pa rikesa material, i tambe “for di e deseonan cu ta pertenecé na hubentud.”—2 Timoteo 2:22; 1 Timoteo 6:9-11.
10. Cua dos ehempel net contrario di otro ta mustra e balor di hui di tentacion?
10 Considerá e caso di rey David di Israel. Segun cu e tabata wak for di riba e dak di su palacio, el a mira un muher bunita ta baña, i deseonan robes a yena su curason. E mester a bai for dje dak i hui for di e tentacion. En bes di esei, el busca pa sa tocante e muher aki—Bat-seba—i e resultadonan tabata devastador. (2 Samuel 11:1–12:23) Di otro banda, con Josef a reaccioná ora cu e casá inmoral di su doño a suplik’é pa drumi cuné? E relato ta bisa nos: “Miéntras e tabata papia cu Josef dia tras dia, nunca Josef a scuch’é pa bin drumi banda di dje, pa keda cerca dje.” Asta sin e mandamentunan di e Ley di Moises, cu no a ser duná ainda, Josef a contest’é: “Con mi por cometé e gran maldad aki i realmente peca contra Dios?” Un dia e muher a gar’é, i a bisa: “Drumi cu mi!” Josef a keda ei i purba di razoná cuné? No. El “a hui i a sali pafó.” Josef no a duna tentacion sexual un chens pa venc’é. El a hui!—Génesis 39:7-16.
11. Kico por ta posibel si cada bes nos ta pasa dor di e mésun tentacion?
11 Hui bai dje situacion tin bes ta ser considerá como cobardia, pero apartá nos mes físicamente di un situacion hopi bes ta e rumbo sabí pa sigui. Kisas nos ta pasa cada bes dor di e mésun tentacion na trabou. Maske kisas nos no por cambia trabou, por tin otro maneranan pa apartá nos mes for di circunstancianan cu ta un tentacion pa nos. Nos mester hui di cualkier cos cu nos sa cu ta robes, i nos mester ta determiná pa haci solamente loke ta corecto. (Ámos 5:15) Otro camindanan, hui di tentacion lo rekerí evitá pornografia riba Internet i lugánan cuestionabel di entretenimentu. Tambe e por nificá benta un revista afó of busca un grupo di amigu nobo—esnan cu ta stima Dios i cu por yuda nos. (Proverbionan 13:20) Sea loke sea tenta nos pa peca, nos ta sabí si nos ta determiná pa rechas’é.—Romanonan 12:9.
Con Oracion Por Yuda
12. Kico nos ta pidi Dios ora nos ta resa: “No hinca nos den tentacion”?
12 Pablo ta duna e garantia alentador aki: “Dios ta fiel, i lo e no laga boso ser tentá mas ayá di loke boso por soportá, sino cu huntu cu e tentacion lo e percurá tambe p’e salida pa boso por want’é.” (1 Corintionan 10:13) Un manera cu Jehova ta yuda nos ta dor di contestá nos oracionnan cu nos ta haci pidiend’e yudansa pa trata cu e tentacion. Jesucristo a siña nos pa resa: “No hinca nos den tentacion, sino libra nos dje malbado.” (Mateo 6:13) Como contesta na tal oracion sincero, Jehova lo no laga nos bandoná durante e tentacion; lo e libra nos di Satanas i su obranan mañoso. (Efesionan 6:11, mira nota na pia di página.) Nos mester pidi Dios pa yuda nos reconocé tentacion i pa nos tin e forsa pa resistí nan. Si nos suplik’é pa no laga nos cai ora nos ta ser tentá, lo e yuda nos di tal manera cu Satanas “e malbado” lo no vence nos.
13. Kico nos mester haci si nos ta ser confrontá cu tentacion cu ta persistí?
13 Nos mester haci oracion ferviente specialmente ora nos ta haña nos cu tentacion cu ta persistí. Algun tentacion por causa un lucha interno fuerte, esta un lucha cu nos pensamentu i actitudnan cu ta recordá nos masha cla con débil nos realmente ta. (Salmo 51:5) Por ehempel, kico nos por haci si recuerdonan di cierto práctica degradá di pasado ta tormentá nos? Kico si nos ta ser tentá pa bolbe na dje? En bes di djis purba dominá e tipo di sintimentunan ei, trece e asuntu dilanti den oracion na Jehova—bes tras bes si ta necesario. (Salmo 55:22) Cu e poder di su Palabra i spiritu santu, lo e yuda nos limpia nos mente di inclinacionnan impuru.—Salmo 19:8, 9.
14. Di con oracion ta esencial pa yuda nos vence tentacion cu éxito?
14 Ora Jesus a ripará cu su apostelnan tabata cabishá den e hofi di Getsémani el a urgi nan: “Sigui vigilá i haci oracion continuamente, pa boso no cai den tentacion. E spiritu, naturalmente ta ansioso, pero e carni ta swak.” (Mateo 26:41) Un manera pa vence tentacion ta dor di ta alerto na e vários formanan di tentacion cu por presentá i sea sensitivo na e aspectonan sutil dje tentacion. Tambe ta vital pa nos haci oracion sin tarda tocante e tentacion pa nos por ta spiritualmente ekipá pa bring’é. Dor cu tentacionnan ta dal nos caminda nos ta mas vulnerabel, nos no por resistié nos so. Oracion ta esencial dor cu e fortalesa cu Dios ta duna por fortificá nos defensa contra Satanas. (Filipensenan 4:6, 7) Kisas nos mester di asistencia spiritual i oracion di “e ancianonan dje congregacion” tambe.—Santiago 5:13-18.
Resistí Tentacion Activamente
15. Kico resistí tentacion ta encerá?
15 Ademas di evitá un tentacion ora ta posibel, nos mester resistié activamente te ora e pasa of e situacion cambia. Ora Satanas a tenta Jesus, el a resistié te ora e Diabel a bai. (Mateo 4:1-11) Disipel Santiago a skirbi: “Oponé e Diabel, i lo e hui di boso.” (Santiago 4:7) Resistencia ta cuminsá dor di fortificá nos mente cu e Palabra di Dios i dor di dicidí cu nos definitivamente lo pega na su normanan. Nos ta haci bon di memorisá i meditá riba textonan clave cu ta trata cu nos debilidad specífico. Lo ta sabí pa busca un cristian maduro—kisas un anciano—cu kende nos por compartí nos preocupacion i cu nos por pidi yudansa ora tentacion ta presentá.—Proverbionan 22:17.
16. Con nos por keda moralmente limpi?
16 E Scritura ta urgi nos pa bisti e personalidad nobo. (Efesionan 4:24) Esaki ta nificá permití Jehova moldea i cambia nos. Ora Pablo a skirbi su compañero di trabou Timoteo, el a bisa: “Sigui tras di husticia, debocion na Dios, fe, amor, awante, genio suave. Lucha e lucha excelente di fe, haña un gara firme riba e bida eterno pa cua bo a ser yamá.” (1 Timoteo 6:11, 12) Nos por “sigui tras di husticia” dor di studia e Palabra di Dios diligentemente pa nos haña un conocimentu mas profundo di su personalidad i dor di comportá nos mes na armonia cu su rekisitonan. Loke ta vital tambe ta pa nos tin un programa yen di actividad cristian, manera predicá e bon nobo i asistí n’e reunionnan. Hala cerca Dios i probechá plenamente di su provisionnan spiritual lo yuda nos crece spiritualmente i keda moralmente limpi.—Santiago 4:8.
17. Con nos por sa cu Dios lo no bandoná nos durante tentacion?
17 Pablo ta sigurá nos cu cualkier tentacion cu nos pasa aden nunca lo ta mas ayá di e abilidad cu Dios ta duna nos pa trata cuné. Jehova lo ‘percurá p’e salida pa nos por want’é.’ (1 Corintionan 10:13) Sin duda, si nos sigui dependé riba Dios lo e no laga un tentacion bira asina insoportabel cu nos lo no tin suficiente forsa spiritual pa warda integridad na dje. E kier pa nos logra resistí tentacion pa haci loke ta malu den su bista, activamente. Ademas, nos por tin fe den su promesa: “Lo mi no bandoná bo di ningun manera ni desampará bo di ningun manera.”—Hebreonan 13:5.
18. Di con nos por ta sigur cu hende por logra victoria riba debilidad humano?
18 Pablo no tabata insigur en cuanto e resultado di su lucha personal contra debilidad humano. E no a considerá su mes un víctima cu ta duna lástima i impotente di su deseonan di carni. Al contrario, el a bisa: “E manera cu mi ta core no ta insigur; e manera cu mi ta dirigí mi golpinan no ta pa dal den laira; pero mi ta golpia mi curpa i ta hib’é manera un esclabo, pa, despues cu mi a predicá na otronan, mi mes no bira desaprobá di algun manera.” (1 Corintionan 9:26, 27) Nos tambe por bringa un bataya exitoso contra e carni imperfecto. Pa medio di e Scritura, publicacionnan basá riba Bijbel, reunionnan cristian i compañeronan cristian maduro, constant nos amoroso Tata celestial ta proveé recordatorionan cu ta yuda nos pa sigui tras di un curso recto. Cu su yudansa, nos por logra victoria riba debilidad humano!
Bo Ta Corda?
• Kico ta nificá pa “fiha mente riba e carni”?
• Con nos por prepará pa tentacion?
• Kico nos por haci pa trata cu tentacion?
• Ki rol oracion ta hunga den trata cu tentacion?
• Con nos por sa cu ta posibel pa logra victoria riba debilidad humano?
[Plachinan na página 10]
Bijbel no ta siña cu nos ta víctima impotente di nos deseonan di carni
[Plachi na página 12]
Hui di tentacion ta un manera básico pa evitá picá