Con Bo Por Tuma Decision Sabí

BOLUNTAD liber ta un don di Dios. Sin dje nos lo ta mescos cu robot, sin control riba nos accionnan. Sin embargo, awor cu nos tin e, nos ta enfrentá desafio. Dor cu nos tin boluntad liber, nos tin cu tuma decisionnan durante nos bida.

Claro cu hopi decision ta riba cosnan masha chikitu. Tin otro decisionnan cu por tin influencia riba henter nos futuro, manera ki carera bo mester scoge of si bo mester casa. Tin decision tambe cu ta afectá otro hende. Cierto decisionnan cu mayornan ta tuma tin un efecto profundo riba nan yunan. Fuera di esei, nos tin cu rindi cuenta na Dios pa hopi decision cu nos ta tuma.—Romanonan 14:12.

E Necesidad di Yudansa

Den tumamentu di decision, hende no a traha un bon nomber. Un di e promé decisionnan registrá cu hende a tuma tabata desastroso. Eva a dicidí di come for dje fruta cu Dios a prohibí specíficamente. Loke el a scoge pa haci, basá riba deseo egoista, a pone cu su esposo tambe a desobedecé Dios mescos cuné, i e resultado tabata gran sufrimentu pa humanidad. Den hopi caso, ainda hende ta basa nan decisionnan mas riba deseo egoista cu riba principionan hustu. (Génesis 3:6-19; Jeremías 17:9) I hopi bes nos ta conciente di nos limitacionnan ora nos tin cu tuma decisionnan serio.

P’esei, no ta straño cu ora nan tin cu tuma decisionnan importante, hopi hende ta busca yudansa for di fuentenan mas haltu cu hende. Bijbel ta mencioná un ocasion ora cu meimei di un campaña militar, Nabucodonosor mester a tuma un decision. Maske e tabata un rey, el a sinti e necesidad “pa recurí na wakmentu di destino,” esta, consultá cu spiritista. P’esei, e relato ta bisa: “El a sagudí e flechanan. El a puntra mediante terafim; el a wak den e higra.” (Ezekiel 21:21) Dje mes manera awe tambe, hopi hende ta consultá cu miradó di destino i astrólogo i otro medionan pa busca yudansa for dje spiritunan. Pero e fuentenan aki ta inconfiabel i engañoso.—Levítico 19:31.

Tin un Persona cu ta completamente confiabel i cu atrabes di historia a yuda hende tuma decision sabí. Aki nos ta papia di Jehova Dios mes. Por ehempel den antigwedad, Dios a duna su nacion di Israel e Urim i e Tumim, probablemente obhetonan sagrado di tira suerte cu nan tabata usa ora e nacion a hañ’é confrontá cu situacionnan di sumo importancia. Via e Urim i e Tumim, Jehova tabata contestá pregunta directamente i yuda e ancianonan di Israel haci sigur cu nan decisionnan tabata na armonia cu su boluntad.—Éxodo 28:30; Levítico 8:8; Númeronan 27:21.

Considerá un otro ehempel. Ora Gídeon a haña yamada pa dirigí e ehércitonan di Israel contra Madian, e mester a dicidí si e ta aceptá e privilegio noble ei of no. Gídeon tabata kier un garantia cu Jehova lo a apoy’é, i el a pidi pa un señal milagroso. El a resa pidi pa serena muha e pida lana cu el a laga pasa anochi pafó di cas, miéntras cu e tera rond di dje sí lo a keda secu. E siguiente anochi el a pidi p’e pida lana keda secu, pero p’e tera rond di dje sí keda papa muhá cu serena. Bondadosamente Jehova a duna Gídeon e señalnan cu el a pidi. Esei a pone cu Gídeon a tuma e decision corecto, i cu apoyo di Dios el a derotá e enemigunan di Israel completamente.—Huesnan 6:33-40; 7:21, 22.

Kico di Awe?

Awe ainda Jehova ta ofrecé su sirbidónan yudansa ora nan haña nan confrontá cu decisionnan importante. Con asina? Nos tambe mester haci manera Gídeon, esta, pidi Jehova ‘prueba di lana,’ of señal pa mustra nos cua caminda pa scoge? Un pareha tabata puntra nan mes si nan mester a muda bai sirbi caminda tin mas necesidad pa predicadó di Reino. Pa yuda nan dicidí, nan a formulá un test. Nan a pone nan cas na benta pa un cierto prijs. Si pa cierto fecha nan bende e cas pa e prijs stipulá of mas tantu, nan lo a aceptá esaki como un indicacion cu Dios tabata kier pa nan muda. Si nan no logra bende e cas, nan lo concluí cu Dios no tabata kier pa nan muda.

Nan no a bende e cas. Esei tabata un indicacion cu Jehova no tabata kier p’e pareha aki sirbi caminda tin mas necesidad? Claro cu nos no por tribi bisa categóricamente kico Jehova ta haci of laga di haci pa su sirbidónan. Nos no por bisa cu awendia Jehova nunca no ta intervení pa demostrá nos loke ta su boluntad. (Isaías 59:1) Sin embargo, nos no tin derecho di verwagt cu Dios ta intervení di tal forma ora nos tin cu tuma un decision importante, como si fuera nos ta laga e decision den man di Jehova. Sí, asta Gídeon, pa gran parti di su bida, mester a tuma decision sin señalnan milagroso for di Jehova!

No obstante, segun Bijbel, tin guia divino disponibel. Relacioná cu nos tempu, Bijbel a predicí: “Bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:21) Ora nos haña nos confrontá cu decisionnan importante, ta masha apropiado pa nos busca pa haci sigur cu nos decisionnan ta na armonia cu Dios su boluntad i cu nan ta reflehá su sabiduria superior. Con asina? Dor di consultá su Palabra i permití esaki sirbi como ‘lampi pa nos pia, i un lus pa nos caminda.’ (Salmo 119:105; Proverbionan 2:1-6) Pa nos haci esaki, nos tin cu cultivá e custumber di alimentá nos mes cu conocimentu exacto for di Bijbel. (Colosensenan 1:9, 10) I ora nos tin cu tuma un decision, nos tin cu studia cuidadosamente tur e principionan bíblico cu tin di haber cu e asuntu. Un estudio asina lo capacitá nos pa “haci sigur dje cosnan mas importante.”—Filipensenan 1:9, 10.

Tambe nos mester papia cu Jehova den oracion, cu e confiansa cu lo e scucha nos. E echo cu nos ta splica nos amoroso Dios e decision cu nos tin cu tuma i e alternativanan cu nos ta considerando, ta fortalecé nos! Despues, cu confiansa nos por pidié guia pa nos por tuma e decision corecto. Hopi bes e spiritu santu lo recordá nos di principionan bíblico cu ta aplicabel of lo e por yuda nos haña un comprendimentu hopi mas cla di un texto cu tin di haber cu nos situacion.—Santiago 1:5, 6.

Tambe Jehova ta percurá personanan maduro den e congregacion cu ken nos por papia tocante nos decisionnan. (Efesionan 4:11, 12) Pero ora nos ta consultá cu otro hende, nos no mester sigui e proceder di esnan cu ta acercá un persona tras di otro te ora nan haña un hende cu ta bisa loke nan kier tende. E ora ei, nan ta sigui su conseho. Tambe nos mester corda e ehempel spiertador di Rehoboam. Ora e mester a tuma un decision importante, el a ricibí excelente conseho for di e ancianonan cu a sirbi su tata. Sin embargo, en bes di sigui nan conseho, el a consultá cu e hóbennan cu a lanta huntu cuné. Siguiendo nan conseho, el a tuma un decision hopi bobo i esei tabatin como resultado cu el a perde un gran parti di su reino.—1 Reynan 12:1-17.

Ora bo ta busca conseho, acudí cerca hende cu tin experencia di bida i cu tin un bon conocimentu dje Scritura i cu tin un respet profundo pa principionan hustu. (Proverbionan 1:5; 11:14; 13:20) Ora ta posibel, tuma tempu pa meditá riba e principionan enbolbí i riba tur informacion cu bo a acumulá dor di haci investigacion. Segun cu bo ta cuminsá mira cosnan den lus dje Palabra di Dios, probablemente e decision corecto lo bira mas cla.—Filipensenan 4:6, 7.

Decisionnan Cu Nos Ta Tuma

Tin decision cu ta fácil pa tuma. Ora e apostelnan a haña mandato pa stop di predicá, nan tabata sa cu nan mester a sigui predicá tocante Jesus, i mesora nan a informá e Sanedrin di nan decision di obedecé Dios mas bien cu hende. (Echonan 5:28, 29) Kisas otro decisionnan ta exigí pa bo pensa mas ya cu no tin un declaracion bíblico directo cu ta trata e asuntu. Tog, por lo general principionan bíblico lo tira lus riba e mihó decision cu bo tin cu tuma. Por ehempel, maske hopi dje formanan di entretenimentu cu ta disponibel awe no a existí den tempu di Jesus, Bijbel ta mustra bon cla kico ta agradá Jehova i kico ta desagrad’é. Pues, cualkier cristian cu ta entretené su mes cu cosnan cu ta promové violencia, inmoralidad of rebeldia a opta pa loke ta malu.—Salmo 97:10; Juan 3:19-21; Galationan 5:19-23; Efesionan 5:3-5.

Tin bes por tin dos decision corecto. Sirbi caminda tin mas necesidad ta un privilegio maraviyoso i por hiba na hopi bendicion. Pero si pa un of otro motibu un persona dicidí pa no haci esei, tog e por haci un excelente trabou den su congregacion local. Sa sosodé cu nos por haña nos confrontá cu un decision cu lo duna nos e oportunidad pa demostrá con profundo nos debocion na Jehova ta of kico ta mas importante den nos bida. Asina, Jehova ta permití nos usa nos boluntad liber pa demostrá kico realmente tin den nos curason.

Frecuentemente, nos decisionnan tin efecto riba otro hende. Por ehempel, cristiannan di promé siglo a alegrá cu nan no tabatin nodi cumpli cu vários dje restriccionnan di e Ley. Esaki a nificá, por ehempel, cu nan por a sea aceptá of rechasá cuminda cu bou di Ley tabata impuru. No obstante, nan a ser animá pa ora nan ta haci uso di nan libertad di scoge, nan tene cuenta cu concenshi di otro hende. Nos por aplicá e palabranan di Pablo den e asuntu ei na hopi decision cu nos ta tuma: “Evitá di bira causa di tropieso.” (1 Corintionan 10:32) Un deseo pa no pone otro hende trompecá lo por ta un factor determinante den hopi di nos decisionnan. Al fin i al cabo, amor pa próhimo ta e di dos mandamentu mas grandi.—Mateo 22:36, 39.

E Resultado di Nos Decisionnan

Decisionnan basá riba un bon concenshi i principionan bíblico semper lo tin un bon resultado a largu plaso. Claro cu a corto plaso kisas nan ta resultá den cierto sacrificio personal. Ora e apostelnan a bisa e Sanedrin cu nan a dicidí di sigui predicá en cuanto Jesus, nan a suta nan cu bara promé cu a laga nan liber. (Echonan 5:40) Ora e tres hebreonan, Sadrac, Mesac i Abednego, a dicidí cu nan lo no buig p’e imágen di oro di Nabucodonosor, nan a pone nan bida na peliger. Nan tabata prepará pa enfrentá e posibilidad cu nan decision lo por a nificá nan morto. Pero nan tabata sa cu nan lo tabatin e aprobacion i bendicion di Dios.—Daniel 3:16-19.

Si nos haña nos cu problema despues cu nos a tuma un decision conciente i bon pensá, esei no ta motibu pa asumí cu e decision tabata robes. “Tempu i suceso imprevisto” por pone cu asta e decisionnan cu e mihó intencion por resultá den net lo contrario. (Eclesiástes 9:11) Ademas, tin bes Jehova ta permití nos pasa den dificultad pa test e profundidad di nos lealtad. Jacob mester a lucha henter un anochi cu un angel promé cu el a ricibí un bendicion. (Génesis 32:24-26) Podisé nos tambe tin cu lucha cu dificultad, asta ora nos ta haci loke ta corecto. Sin embargo, ora nos decisionnan ta na armonia cu e boluntad di Dios, nos por ta sigur cu lo e yuda nos wanta i cu finalmente lo e bendicioná nos.—2 Corintionan 4:7.

P’esei, ora bo ta tuma un decision importante, no dependé riba bo mes sabiduria. Busca principionan bíblico cu ta aplicabel n’e asuntu. Papia cu Jehova tocante e asuntu. Caminda ta posibel, consultá cu compañeronan cristian maduro. Anto tene curashi. Usa e don di boluntad liber cu Dios a duna bo den un manera responsabel. Tuma un decision sabí i demostrá Jehova cu bo curason ta recto pa cuné.

[Plachi na página 28]

Consultá cu e Palabra di Dios promé cu bo tuma decisionnan importante

[Plachinan na página 28, 29]

Papia cu Jehova tocante e decisionnan cu bo tin cu tuma

[Plachi na página 30]

Bo por considerá bo decisionnan importante cu cristiannan maduro