“Sigui Mi Kontinuamente”

“Boso a wòrdu yamá pa e propósito aki, komo ku Kristu tambe a sufri pa boso, lagando un ehèmpel pa boso, pa boso sigui den su pasonan.”—1 PEDRO 2:21.

1, 2. Dikon Hesus su ehèmpel perfekto komo maestro no ta muchu elevá pa nos imitá?

HESUKRISTU tabata sin duda e Maestro di mas grandi ku mundu a yega di konosé. Ademas e tabata perfekto. Nunka el a peka den henter su bida komo hende. (1 Pedro 2:22) Pero akaso esei ta nifiká ku su ehèmpel komo maestro ta muchu elevá pa nos komo hende imperfekto imitá? Di ningun manera.

² Manera e artíkulo anterior a mustra, Hesus a siña hende a base di amor. I amor ta algu ku nos tur por desaroyá. E Palabra di Dios ta animá nos hopi bes pa laga nos amor krese, i pa e bira mas kompleto. (Filipensenan 1:9; Kolosensenan 3:14) Nunka Yehova no ta spera algu di su kriaturanan ku nan no por logra. De echo, ya ku “Dios ta amor” i el a traha nos segun su imágen, nos por asta bisa ku nos ta trahá pa mustra amor. (1 Huan 4:8; Génesis 1:27) P’esei, ora nos lesa e palabranan di apòstel Pedro den nos teksto prinsipal, nos por tin e konfiansa ku nos por kumpli ku loke e ta bisa. Nos por sigui den Kristu su pasonan. De echo, nos por obedesé e mandamentu aki ku Hesus mes a duna: “Sigui mi [“kontinuamente,” NW].” (Lukas 9:23) Laga nos wak kon nos por imitá e amor ku Kristu a mustra. Promé nos lo wak kon pa imitá e amor ku el a mustra pa e bèrdatnan ku el a siña hende, i despues su amor pa e hendenan ku el a siña.

Desaroyá Amor pa e Bèrdatnan Ku Nos Siña

 3. Dikon algun hende tin difikultat pa studia, pero kiko Proverbionan 2:1-5 ta animá nos pa hasi?

³ Pa nos por stima e bèrdatnan ku nos ta siña hende, promé nos mes mester gusta siña tokante e bèrdatnan ei. Den e mundu djawe, no ta semper fásil pa nos desaroyá amor pa siñamentu. Sistema di enseñansa defisiente, mal kustumber formá durante hubentut i otro faktornan ta pone ku hopi hende no gusta siña òf studia. Pero ta esensial pa nos siña for di Yehova. Proverbionan 2:1-5 ta bisa: “Mi yu, si bo kier risibí mi palabranan i warda mi mandamentunan den bo, hasi bo orea atento na sabiduria, i inkliná bo kurason na komprendementu; pasobra si bo sklama pa disernimentu, halsa bo bos pa komprendementu, si bo busk’é manera plata, i rondi’é manera tesoro skondí, e ora ei lo bo diserní e temor di SEÑOR, i deskubrí e konosementu di Dios.”

 4. Kiko kier men ku nos mester “inkliná” nos kurason, i ki manera di mira kosnan lo yuda nos den esaki?

⁴ Paga tinu ku versíkulo 1 pa 4 ta animá nos bes tras bes pa no solamente “risibí” i “warda” sino tambe ‘buska’ i ‘rondia.’ Pero ku ki motivashon nos lo mester hasi tur esaki? Wèl, wak kaminda e ta bisa: “Inkliná bo kurason na komprendementu.” Un obra di referensia ta bisa ku e animashon aki “no ta djis un yamada pa presta atenshon; e ta mustra ku nos mester tin un sierto aktitut: nos mester ta ansioso pa risibí e siñansanan.” I kiko por hasi nos reseptivo i ansioso pa siña loke Yehova ta siña nos? Nos manera di mira kosnan. Nos mester mira “e konosementu di Dios” manera “plata” i “tesoro skondí.”

5, 6. (a) Kiko lo por sosodé ku tempu, i kon nos por evitá esei? (b) Dikon nos mester sigui oumentá e tesoro di konosementu ku nos a haña den Beibel?

⁵ No ta difísil pa siña mira e “konosementu di Dios” di e manera ei. Por ehèmpel, kasi sigur un dje kosnan ku bo a siña komo parti di “e konosementu di Dios” ta ku Yehova tin e propósito pa tur hende obediente biba pa semper den Paradeis riba tera. (Salmo 37:28, 29) Ora ku bo a kaba di siña e bèrdat ei, sin duda lo e tabata manera un berdadero tesoro pa bo. Lo el a yena bo mente i bo kurason ku speransa i goso. Pero kon ta awor? E apresio ku bo tabata sinti pa bo tesoro a bira dòf segun ku tempu a pasa? Si ta asina, bo tin ku purba hasi dos kos. Di promé, bo tin ku haña bo apresio di ántes bèk. Bo tin ku keda kòrda bo mes regularmente dikon bo ta balorá kada bèrdat ku Yehova a siña bo, inkluso esnan ku bo a siña hopi aña pasá.

⁶ Di dos, bo tin ku keda oumentá bo tesoro. Kon ku bai bin, si pa kasualidat bo koba haña un piedra presioso, kiko lo bo hasi? Lo bo djis hink’é den bo saku i kana bai satisfecho? Òf lo bo sigui koba pa wak si no tin mas? E Palabra di Dios ta yen di bèrdat manera piedra presioso i pipita di oro. Ni maske kuantu di nan bo a haña kaba, ainda tin mas. (Romanonan 11:33) Kada bes ku bo koba saka un pipita di bèrdat, puntra bo mes: ‘Dikon e ta un tesoro? E ta yuda mi komprondé Yehova su personalidat i su propósito mas mihó? E ta duna mi guia práktiko ku por yuda mi sigui e pasonan di Hesus?’ Dor di meditá riba e tipo di preguntanan ei bo por oumentá e amor ku bo tin pa e bèrdatnan ku Yehova a siña bo.

Mustra Amor pa e Bèrdatnan Ku Nos Ta Siña Hende

7, 8. Menshoná algun manera pa nos laga hende mira ku nos ta stima e bèrdatnan ku nos a siña for di Beibel. Duna un ehèmpel.

⁷ Kon nos por mustra ku nos ta stima e bèrdatnan ku nos a siña for dje Palabra di Dios ora nos ta instruí otro hende? Dor di sigui e ehèmpel di Hesus i usa Beibel hopi komo base ora nos ta prediká i siña hende. Últimamente e pueblo di Dios rònt mundu a haña e animashon pa usa Beibel mas tantu den nan ministerio públiko. Segun ku bo ta hasi esei, buska manera pa bo laga e doño di kas sinti ku abo mes tambe ta balorá loke bo ta kompartí kuné for di Beibel.—Mateo 13:52.

⁸ Por ehèmpel, nèt despues dje atake terorista di aña pasá na New York, un ruman muhé kristian a kompartí Salmo 46:1 i 11 ku e hendenan ku el a topa ora e tabata prediká. Promé e tabata puntra nan kon ta bai ku nan despues di e tragedia ku a tuma lugá. E tabata skucha ku atenshon na loke nan tabata respondé, mustra ku el a komprendé, anto bisa: “Mi tin mag di kompartí un teksto di Beibel ku bo ku a yuda ami hopi den e tempu difísil aki?” Masha poko hende a nenga, i e ruman a hiba hopi kòmbersashon ekselente. Ora e mesun ruman muhé aki ta papia ku un hóben, hopi bes e ta bisa: “Mi tin mas ku 50 aña ta siña hende Beibel, i bo ke sa algu? Nunka mi no a haña mi ku un problema ku e buki aki no por yuda bo sali afó.” Dor di aserká hende ku sinseridat i entusiasmo, nos ta mustra nan ku nos ta balorá i ta stima loke nos a siña for dje Palabra di Dios.—Salmo 119:97, 105.

9, 10. Dikon ta importante pa nos usa Beibel pa kontestá pregunta tokante nos kreensianan?

⁹ Ora un hende puntra nos tokante nos kreensianan, nos tin un bon chèns pa mustra ku nos ta stima e Palabra di Dios. Meskos ku Hesus a siña nos ku su ehèmpel, nos lo no duna un kontesta basá djis riba nos propio ideanan. (Proverbionan 3:5, 6) Mas bien nos lo usa Beibel pa kontest’é. Bo tin miedu ku un hende por hasi bo un pregunta ku bo no por kontestá? Awèl wak dos paso konkreto ku bo por dal.

¹⁰ Te kaminda bo por, sea prepará. Apòstel Pedro a skirbi: “Santifiká Kristu komo Señor den boso kurason, i sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sin embargo ku suavedat i reverensia.” (1 Pedro 3:15) Bo ta semper kla i dispuesto pa defendé bo kreensianan? Por ehèmpel, si un hende kier sa dikon bo no ta partisipá den un sierto kustumber òf práktika ku no ta kuadra ku Beibel, no keda satisfecho pa djis bisa: “E ta bai kontra mi religion.” Si bo bisa asina, por parse ku bo ta laga otro hende tuma desishon pa bo, i hende por kere ku bo ta miembro di un sekta religioso. Kisas ta mihó si bo bisa: “Beibel, e Palabra di Dios, ta prohibí e kos ei” òf: “Mi Dios lo no keda kontentu.” Anto duna e hende un splikashon rasonabel dikon bo ta bisa asina.—Romanonan 12:1, NW.

11. Ki yudansa nos tin pa por ta prepará pa kontestá pregunta tokante e bèrdatnan den e Palabra di Dios?

¹¹ Si bo no ta sinti bo prepará, dikon bo no ta dediká un tiki tempu na studia e buki Rasonamentu for dje Skritura?a Skohe un par di tema ku kasi sigur hende lo puntra bo di dje, anto memorisá un par di punto bíbliko. Tene bo buki Rasonamentu i bo Beibel na man. No duda pa usa niun di nan dos. Bisa e persona ku bo tin un buki ku por yuda bo haña kontesta bíbliko.

12. Kiko nos lo por bisa si nos no sa kon pa kontestá un pregunta bíbliko?

¹² Purba di no preokupá innesesariamente. Niun ser humano imperfekto no tin kontesta pa tur kos. P’esei, ora nan hasi bo un pregunta bíbliko ku bo no por kontestá, bo por bisa nan asin’akí libremente: “Mi ta kontentu ku bo a bini ku un pregunta asina interesante. Pa mi ta franko, mi no sa e kontesta. Pero mi ta sigur sí ku Beibel ta toka e tema ei. Komo ku mi gusta hasi investigashon bíbliko, lo mi wak bo pregunta mas aleu i laga bo sa.” Si bo trata e asuntu di un manera franko i humilde asina, posiblemente lo bo habri kaminda pa bolbe kòmbersá mas aleu ku e persona.—Proverbionan 11:2.

Amor pa Esnan Ku Nos Ta Instruí

13. Dikon nos mester keda positivo tokante e hendenan ku nos ta prediká na dje?

¹³ Hesus a mustra amor pa e hendenan ku el a siña. Kon nos lo por imit’é den esaki? Nunka nos no mester haña un aktitut sin heful pa e hendenan rònt di nos. Ta bèrdat ku “e guera di e gran dia di Dios Todopoderoso” ta yega dia pa dia mas serka, i hopi dje míles di miónes di hendenan riba mundu lo ser destruí. (Revelashon 16:14; Yeremías 25:33) Pero nos no sa ken lo skapa i ken lo muri. E desishon hudisial ei tin ku tuma lugá den futuro ainda, i ta Hesukristu, esun ku Yehova a nombra, mester tum’é. Tanten ku e huisio ei no a tuma lugá, nos ta mira tur hende komo posibel sirbidónan di Yehova.—Mateo 19:24-26; 25:31-33; Echonan 17:31.

14. (a) Kon nos lo por eksaminá nos mes pa wak si nos ta sinti pa hende? (b) Na ki maneranan práktiko nos por mustra ku nos ta sinti pa hende i ku nos tin interes personal den nan?

¹⁴ Nos ta purba mustra empatia, esta, sinti pa hende meskos ku Hesus a hasi. Nos lo por puntra nos mes: ‘Mi ta sinti pa hende engañá dor dje mentira- i desepshonnan astuto di religion, polítika i komersio dje mundu aki? Ora nan ta parse di no tin kunes ku e mensahe ku mi ta trese pa nan, mi ta purba komprendé dikon nan ta sinti asina? Mi ta rekonosé ku sea ami mes òf otronan ku aktualmente ta sirbi Yehova fielmente a yega di pensa meskos ku nan? Mi a adaptá mi manera di aserká nan pa mi por lanta nan interes tòg? Òf mi ta djis pensa ku no tin speransa pa hende asina?’ (Revelashon 12:9) Ora hende nota ku di bèrdat nos ta sinti pa nan, tin mas chèns pa nan reakshoná bon na nos mensahe. (1 Pedro 3:8) Ademas, si nos ta sinti pa hende, esei por motivá nos pa mustra mas interes den esnan ku nos topa den nos ministerio. Kisas nos lo por anotá ki pregunta nan tin, i kiko ta preokupá nan. Ora nos bolbe serka nan, nos por mustra nan ku nos a pensa riba e kosnan ku nan a bisa último bes ku nos a topa. I si n’e momentu ei nan ta den un nesesidat urgente, kisas nos por ofresé nan yudansa práktiko.

15. Dikon nos mester purba mira e banda bon den hende, i kon nos lo por hasi esei?

¹⁵ Meskos ku Hesus, nos tambe ta konsentrá riba e bon kualidatnan di hende. Kisas un mayor soltero ta hasiendo un esfuerso atmirabel pa lanta su yunan, òf un hòmber ta lucha pa mantené su famia. Òf kisas un hende di edat ta mustra interes den kos spiritual. Nos ta paga tinu riba e tipo di kosnan ei di e hendenan ku nos topa? Nos ta elogiá nan pa e kosnan ei? Dor di hasié, nos ta enfatisá e base komun ku tin entre nan i nos i asina nos por habri kaminda pa nos duna un testimonio dje Reino.—Echonan 26:2, 3.

Humildat Ta Esensial pa Mustra Amor

16. Dikon ta importante pa nos keda suave i respetuoso ku e hendenan ku nos ta prediká na dje?

¹⁶ Amor pa e hendenan ku nos ta siña lo motivá nos pa obedesé e spièrtamentu sabí aki di Beibel: “Konosementu ta hasi arogante, ma amor ta edifiká.” (1 Korintionan 8:1) Hesus tabatin masha hopi konosementu, pero nunka e no tabata arogante. P’esei, ora bo ta kompartí bo kreensianan, evitá di tin un tono di diskutí òf un aktitut di superioridat. Nos meta ta pa yega na kurason di hende i atraé nan na e bèrdatnan ku nos ta stima asina tantu. (Kolosensenan 4:6) Kòrda ku ora Pedro a konsehá kristiannan pa nan ta kla pa duna un defensa, el a rekòrdá nan mesora ku nan mester hasié “ku suavedat i reverensia [òf, “rèspèt profundo,” NW].” (1 Pedro 3:15) Si nos ta suave i respetuoso, nos lo tin mas chèns di atraé hende na e Dios ku nos ta sirbi.

17, 18. (a) Kon nos mester reakshoná ora hende ta pensa ku nos no ta kapasitá p’e ministerio? (b) Dikon no ta nesesario pa un studiante di Beibel sa idiomanan bíbliko antiguo?

¹⁷ Nos no tin nodi impreshoná hende ku kuantu kos nos sa, ni kon bon edukashon nos tin. Si tin hende den bo teritorio ku ta nenga di skucha ken ku no tin sierto diploma òf título universitario, no laga nan aktitut desanimá bo. Hesus no a preokupá su mes ku esnan ku a bisa ku e no a haña siñansa na niun dje skolnan rabíniko prestigioso di su tempu, ni e no a laga e prehuisionan ei influensi’é pa purba impreshoná hende ku tur loke e sa.—Huan 7:15.

¹⁸ Humildat i amor ta hopi mas importante pa un minister kristian, ku kualkier kantidat di edukashon ku e por tin. E Gran Edukadó Yehova ta kapasitá nos p’e ministerio. (2 Korintionan 3:5, 6) I ni maske kiko lidernan religioso di kristiandat bisa, nos no tin nodi siña idioma bíbliko antiguo pa nos bira maestro dje Palabra di Dios. Yehova a inspirá e eskritornan di Beibel pa skirbi di un manera asina kla i konkreto, ku práktikamente tur hende por komprendé e bèrdatnan presioso ku tin den dje. E bèrdatnan ei ta keda intakto, apesar ku a tradusí nan den sentenáres di idioma. P’esei, maske de bes en kuando ta útil si nos konosé e idiomanan antiguo, e no ta nesesario. Ademas, si nos bira orguyoso dor ku nos tin abilidat ku idioma, esei por pone nos pèrdè un karakterístika ku sí ta nesesario pa kristian berdadero: ser dispuesto pa siña.—1 Timoteo 6:4.

19. Den ki sentido nos ministerio kristian ta un servisio útil?

¹⁹ No por tin duda ku nos ministerio kristian ta un trabou ku ta eksigí un aktitut humilde. Regularmente nos ta eksponé nos mes na oposishon, indiferensia i asta persekushon. (Huan 15:20) Sin embargo, ora nos efektuá nos ministerio fielmente, nos ta rindiendo un servisio vital. Si nos sigui sirbi hende humildemente asina den e trabou aki, nos lo ta imitando e amor ku Hesukristu a mustra pa hende. Pensa bo un ratu: Si nos tin ku prediká na mil hende indiferente òf ku ta kontra, djis pa nos por alkansá un solo persona manera karné, esei lo no bale la pena? Klaru ku sí! P’esei, dor di persistí den e trabou aki sin nunka entregá, nos ta rindiendo un servisio fiel na e hendenan manera karné ku nos falta pa alkansá ainda. Sin duda, Yehova i Hesus lo hasi sigur pa nos haña hopi mas dje hendenan presioso ei promé ku e fin yega.—Hageo 2:7.

20. Kua ta algun manera ku nos por siña hende ku nos ehèmpel?

²⁰ Un otro manera ku nos por mustra ku nos ta dispuesto di sirbi hende ta dor di siña nan ku nos ehèmpel. Por ehèmpel, nos kier siña hende ku e mihó manera pa biba, i e mihó manera pa haña satisfakshon den bida ta dor di sirbi Yehova “e Dios felis.” (1 Timoteo 1:11, NW) Ora nan mira kon nos ta trata ku nos bisiñanan i nos kompañeronan di skol i di trabou, nan por mira ku di bèrdat nos ta felis i satisfecho? Otro kos: Nos ta siña studiantenan di Beibel ku e kongregashon kristian ta un refugio di amor den un mundu friu i feros. E studiantenan por mira fásilmente ku nos ta stima tur hende den kongregashon i ta traha duru pa mantené pas ku otro?—1 Pedro 4:8.

21, 22. (a) Un eksaminashon propio pa loke ta nos ministerio lo por motivá nos pa probechá di ki oportunidatnan? (b) Kiko un seri di artíkulo den e siguiente edishon di E Toren di Vigilansia ta bai trata?

²¹ Tin bes, dor ku nos kier hasi mas tantu posibel den nos sirbishi, nos ta sinti nos motivá pa eksaminá nos mes di nobo. Hasiendo esei ku frankesa, hopi ruman ta deskubrí ku nan ta den posishon pa hasi mas den e ministerio dor di kuminsá sirbishi di tempu kompleto, òf dor di muda bai biba un kaminda ku tin mas nesesidat. Tin ruman a disidí di siña un otro idioma pa nan yuda e komunidat kresiente di imigrante den nan propio teritorio. Si bo ta den posishon pa hasi e kosnan aki, pensa bon riba nan huntu ku orashon. Un bida di sirbi ta duna hopi goso, satisfakshon i pas mental.—Eklesiástes 5:12.

²² Laga nos sigui imitá Hesukristu di tur manera ku nos por, dor di oumentá tantu e amor ku nos tin p’e bèrdatnan ku nos ta siña hende, komo e amor ku nos tin pa e hendenan ku nos ta siña. Si nos desaroyá e amor aki anto demostr’é den e dos formanan aki, esei lo ta un ekselente fundeshi pa nos por ta maestro manera Kristu. Pero kon nos por edifiká riba e fundeshi ei? Den e siguiente edishon di E Toren di Vigilansia lo sali un seri di artíkulo ku lo trata algun dje métodonan di siña spesífiko ku Hesus a usa.

[Nota]

Kon Lo Bo Kontestá?

• Kon nos por ta sigur ku e ehèmpel di Hesus komo maestro no ta muchu elevá pa nos imitá?

• Kon nos por mustra ku nos ta stima e bèrdatnan ku nos a siña for di Beibel?

• Dikon ta importante pa nos keda humilde segun ku nos konosementu ta oumentá?

• Kua ta algun manera ku nos por mustra ku nos ta stima e hendenan ku nos ta purba siña?

[Plachinan na página 16]

Te kaminda bo por, sea prepará

[Plachinan na página 16, 17]

Si bo ta balorá “e konosementu di Dios,” lo bo por usa Beibel na un manera efikas

[Plachi na página 18]

Nos ta mustra ku nos ta stima hende dor di kompartí e bon nobo ku nan