Pregunta di Lektor

Ki guia Beibel ta duna tokante edukashon di yu ora un mayor ta Testigu di Yehova i e otro nò?

Tin dos prinsipio bíbliko básiko ku ta duna guia tokante edukashon di yu na un mayor Testigu ku ta kasá ku un persona ku no ta Testigu. Unu ta: “Nos mester obedesé Dios mas ku hende.” (Echonan 5:29) E otro ta: “E esposo ta kabes di e esposa, meskos ku Kristu tambe ta kabes di e iglesia.” (Efesionan 5:23) E último prinsipio ei no ta konta solamente pa esposanan ku tin un esposo Testigu, sino tambe pa esnan ku nan kasá no ta Testigu. (1 Pedro 3:1) Kon un mayor Testigu por kumpli ku tur e dos prinsipionan aki na un manera balansá ora e ta eduká su yunan?

Si e esposo ta un Testigu di Yehova, e ta responsabel pa perkurá tantu spiritualmente komo materialmente pa su famia. (1 Timoteo 5:8) Ounke e mama ku no ta Testigu ta pasa mas tantu tempu ku nan yunan, e tata Testigu mester siña su yunan dor di duna nan edukashon religioso na kas i dor di hiba nan reunionnan kristian, kaminda nan lo benefisiá di instrukshon moral i bon asosiashon.

Kiko si e esposa ku no ta Testigu ta insistí pa hiba nan yunan na su misa òf siña nan su kreensianan? Kisas e lei di e pais ta dun’é e derecho di hasi esei. Si e tata ta duna e muchanan bon edukashon spiritual, e chèns ta grandi ku nan no ta sinti nan inkliná pa partisipá den aktonan di adorashon den lugánan asina. Segun ku e muchanan ta bira mas grandi, e edukashon bíbliko di nan tata mester yuda nan sigui e bèrdat di e Palabra di Dios. E tata Testigu lo keda hopi kontentu si su yunan disidí di tuma nan posishon na fabor di e bèrdat!

Si ta e mama ta un Testigu di Yehova, e tin ku respetá e prinsipio ku ta e tata ta kabes di famia miéntras e komo un Testigu mester ta interesá den e bienestar eterno di su yunan. (1 Korintionan 11:3) Den hopi kaso, e esposo lo no tin nada kontra si su esposa Testigu ta duna nan yunan edukashon moral i spiritual, i e reunionnan di e pueblo di Yehova ta yuda nan risibí mas di e tipo di edukashon aki. E mama por yuda su kasá mira kua ta e benefisionan di e edukashon konstruktivo ku nan yunan ta risibí mediante e organisashon di Yehova. Usando takto, e por enfatisá e balor di inkulká e prinsipionan moral di Beibel den nan yunan, ya ku e muchanan ta konfrontá un mundu ku kada bes ta bai mas patras den sentido moral.

Sin embargo, e esposo ku no ta Testigu kisas ta insistí pa su yunan sigui su religion, i ta hiba nan na su misa i ta duna nan edukashon religioso segun su fe. Òf un esposo por ta kontra tur religion i no kier mes pa su yunan risibí ningun edukashon religioso. Komo kabes di e famia, e ta esun prinsipalmente responsabel pa tuma e desishon ei.a

Ounke un esposa kreyente ta respetá su kasá komo kabes di famia, komo un kristian dediká e mester kòrda riba e aktitut ku apòstel Pedro i Huan tabatin, kendenan a bisa: “Nos no por laga di papia loke nos a mira i tende.” (Echonan 4:19, 20) Komo muestra di su interes den e bienestar spiritual di e muchanan, un mama Testigu lo buska oportunidat pa duna nan guia moral. E tin un responsabilidat dilanti Yehova pa siña otro hende loke e sa di e bèrdat, i esei ta inkluí su yunan. (Proverbionan 1:8; Mateo 28:19, 20) Kon e mama Testigu por trata ku e dilema aki?

Tuma por ehèmpel e asuntu di kere den Dios. E esposa Testigu kisas no por tin un studio di Beibel formal ku su yunan pasobra su kasá ta prohibí esei. Esaki kier men ku e tin ku evitá di papia ku su yunan tokante Yehova? Nò. Su palabranan i su akshonnan di mes lo reflehá ku e ta kere den e Kreadó. Su yunan sin duda lo tin pregunta riba e tópiko ei. E mester sintié liber pa ehersé su libertat di religion dor di ekspresá su kreensia den e Kreadó, inkluso na su yunan. Asta si e no por kondusí un studio di Beibel ku e muchanan òf hiba nan reunion ku regularidat, e por siña nan konosé Yehova Dios.—Deuteronomio 6:7.

Apòstel Pablo a skirbi lo siguiente tokante e relashon entre un Testigu i su kasá inkrédulo: “E esposo ku no ta un kreyente ta santifiká dor di su esposa, i e esposa ku no ta un kreyente ta santifiká dor di su esposo ku ta un kreyente; pasobra di otro manera boso yunan ta impuru, ma awor nan ta santu.” (1 Korintionan 7:14) Yehova ta konsiderá e union matrimonial komo santu debí na e kasá kreyente, i e yunan ta ser konsiderá santu den bista di Yehova. E esposa Testigu mester hasi tur loke ta posibel bou di e sirkunstansianan ei pa yuda su yunan komprendé e bèrdat, lagando e resultado final den man di Yehova.

Segun ku e muchanan ta bira grandi, nan tin ku disidí ki posishon nan lo tuma basá riba e informashon ku nan a risibí for di nan mayornan. Nan por disidí di aktua di akuerdo ku e palabranan di Hesus: “Esun ku stima tata òf mama mas ku mi, no ta digno di mi.” (Mateo 10:37) Tambe Beibel ta manda nan: “Yunan, obedesé boso mayornan den Señor.” (Efesionan 6:1) Hopi hóben a disidí di “obedesé Dios” en bes di un mayor ku no ta Testigu, apesar di ku esaki a pone nan sufri difikultat na man di e mayor ei. Ki un gran rekompensa pa e mayor Testigu ora e mira su yunan disidí di sirbi Yehova apesar di oposishon!

[Nota]