“E Lo Hala Serka Boso”

“[Dios] no ta leu di kada un di nos.”—ECHONAN 17:27.

1, 2. (a) Ora nos mira shelu yen di strea, ki pregunta tokante e Kreadó por lanta serka nos? (b) Kon Beibel ta sigurá nos ku hende apsolutamente no ta insignifikante den Yehova su bista?

BO A yega di hisa kara mira shelu yen di strea riba un anochi kla, i keda asombrá? Nos ta sinti atmirashon i rèspèt profundo ora nos pensa kuantu strea tin, i kon enorme espasio ta. Tera ta manera un punta chikitu den e universo inmenso aki. Esei kier men ku e Kreadó, “e Haltísimo riba henter tera,” ta muchu haltu pa e mustra interes den hende, òf muchu distante i inkomprendibel pa nos por konos’é?—Salmo 83:18.

² Beibel ta sigurá nos ku hende apsolutamente no ta insignifikante den Yehova su bista. De echo, e Palabra di Dios ta animá nos pa busk’é, bisando: “E no ta leu di kada un di nos.” (Echonan 17:27; 1 Krónikanan 28:9) Sí, ora nos dal paso pa hala serka Dios, e tambe ta hasi di su banda. Den ki manera? E palabranan di nos teksto pa aña 2003 ta duna e kontesta konmovedor aki: “E lo hala serka boso.” (Santiago 4:8) Laga nos papia tokante algun bendishon maravioso ku Yehova ta drama riba hende ku a hala serka dje.

Un Regalo Personal di Yehova

 3. Ki regalo Yehova ta duna na hende ku a hala serka dje?

³ Di promé, Yehova su sirbidónan tin un regalo presioso ku el a reservá pa su pueblo. Ni tur poder, rikesa ni edukashon ku e mundu aki por ofresé nos no por garantisá nos e regalo aki. E ta un regalo personal ku Yehova ta duna únikamente na hende ku a hala serka dje. Kiko e ta? E Palabra di Dios ta duna e kontesta: “Si bo . . . halsa bo bos pa komprondementu, si bo busk’é manera plata, i rondi’é manera tesoro skondí, e ora ei lo bo diserní e temor di SEÑOR, i deskubrí e konosementu di Dios. Pasobra SEÑOR ta duna sabiduria.” (Proverbionan 2:3-6) Imaginá bo: hende imperfekto por haña “e konosementu di Dios”! Beibel ta kompará e regalo ei, esta, e konosementu ku tin den e Palabra di Dios, ku “tesoro skondí.” Dikon?

4, 5. Dikon nos por bisa ku “e konosementu di Dios” ta manera “tesoro skondí”? Duna un ehèmpel.

⁴ Pa kuminsá, konosementu di Dios tin un gran balor. Un di e bendishonnan mas presioso ku nos por haña pa medio di dje ta bida eterno. (Huan 17:3) Pero for di awor e konosementu ei ta enrikesé nos bida. Por ehèmpel, dor ku nos a studia e Palabra di Dios ku atenshon nos a haña kontesta riba algun pregunta importante, manera: Kiko Dios su nòmber ta? (Éksodo 3:14, 15, Beibel na papiamentu koriente) Den ki estado hende morto ta realmente? (Eklesiástes 9:5, 10) Ki propósito Dios tin pa tera i pa hende? (Isaías 45:18) Tambe nos a siña ku e mihó manera pa biba ta dor di apliká e konsehonan sabí di Beibel. (Isaías 30:20, 21; 48:17, 18) Pues, nos tin un bon guia ku ta yuda nos enfrentá ansiedat di bida, i biba na un manera ku ta duna nos berdadero felisidat i satisfakshon. Mas ku tur kos, dor di studia e Palabra di Dios nos a siña konosé Yehova su kualidatnan maravioso mas mihó, i nos a siña kon pa hala serka dje. Kiko por tin mas balor ku un relashon íntimo ku Yehova basá riba “e konosementu di Dios”?

⁵ Tin un otro motibu pa bisa ku e konosementu di Dios ta manera “tesoro skondí.” E konosementu ei ta meskos ku tesoro; bo no ta hañ’é unda ku ta den e mundu aki. Di tur e seis mil mion hendenan riba tera, ta rònt di seis mion so ta adorá Yehova. Esei kier men ku ta mas o ménos 1 di kada 1.000 hende so a deskubrí “e konosementu di Dios.” Pa yudá bo komprondé kon tiki hende tin e privilegio di sa e bèrdat di e Palabra di Dios, tuma djis un pregunta di Beibel so komo ehèmpel: Kiko ta pasa ku un hende ora e muri? For di Beibel nos sa ku alma ta muri i ku hende morto no sa di nada. (Ezekiel 18:4) Pero mayoria religion ta aseptá e kreensia falsu di ku tin un kos den hende ku ta sigui biba despues di morto. E ta un parti sentral di religionnan di Kristiandat. Den budismo, islam, shintoismo, taoismo, yainismo i religion hindú, hudiu i sikh tambe e kreensia aki ta ampliamente aseptá. Imaginá bo: e siñansa falsu aki so kaba tin míles di miónes di hende gañá!

6, 7. (a) Ken so por haña “e konosementu di Dios”? (b) Ki ehèmpel ta mustra ku Yehova a bendishoná nos ku un nivel di komprondementu ku hopi hende ‘sabí i inteligente’ no tin?

⁶ Dikon mas hende no a deskubrí “e konosementu di Dios”? Pasobra sin Dios su yudansa bo no por komprondé e nifikashon di su Palabra kompletamente. Kòrda ku ta un regalo e konosementu aki ta. Yehova ta duna e regalo aki únikamente na esnan ku ta dispuesto pa investigá su Palabra ku honestidat i humildat. Kisas nan no ta “sabí segun karni.” (1 Korintionan 1:26) Kisas mundu ta asta haña ku hopi di nan no ta ni “eduká ni siñá.” (Echonan 4:13) Pero esei no ta importante. Yehova ta rekompensá nos ku “e konosementu di Dios” debí na e kualidatnan ku e ta mira den nos kurason.

⁷ At’akí un ehèmpel. Hopi eksperto di kristiandat a produsí un kantidat di buki masha diki tokante Beibel. Algun di e obranan ei ta splika ‘background’ históriko, nifikashon di palabra hebreo i griego, i hopi mas. Pero apesar di tur nan edukashon, nos por bisa ku e ekspertonan ei di bèrdat a logra haña “e konosementu di Dios”? Wèl, nan ta komprondé bon kiko e tema di Beibel ta, esta, ku e Reino di shelu lo konfirmá Yehova su derecho di goberná henter kreashon? Nan sa ku Yehova Dios no ta parti di un Trinidat? Nos sí ta komprondé e kosnan ei bon. Dikon? Debí ku Yehova a bendishoná nos ku un komprondementu profundo di kos spiritual, algu ku hopi di e “sabínan i inteligentenan” no tin. (Mateo 11:25) Mira kuantu Yehova ta bendishoná hende ku ta hala serka dje!

‘Yehova Ta Warda Tur Hende Ku Ta Stim’é’

8, 9. (a) Kon David a deskribí un otro bendishon ku tin pa esnan ku hala serka Yehova? (b) Dikon kristiannan berdadero tin mester di Dios su protekshon?

⁸ Un otro bendishon di hala serka Yehova ta ku bo ta risibí Dios su protekshon. David, e skirbidó di salmo ku tabata sa bon kiko kier men pasa den tempunan difísil, a skirbi: “SEÑOR ta serka di tur esnan ku ta sklama na dje, serka di tur esnan ku ta sklama na dje den bèrdat. E lo kumpli ku e deseo di esnan ku ta tem’é; tambe e lo tende nan sklamashon i lo salba nan. SEÑOR ta warda tur ku ta stim’é.” (Salmo 145:18-20) Sí, Yehova ta serka di esnan ku ta stim’é, i e ta kla pa respondé ora nan sklama pa su yudansa.

⁹ Dikon nos tin mester di Dios su protekshon? E “tempunan trabahoso” aki ta afektá kristiannan berdadero tambe, i ademas nos ta un blanko spesial di Yehova su Atversario prinsipal, Satanas e Diabel. (2 Timoteo 3:1) E enemigu astuto ei ta buskando manera pa “devorá” nos. (1 Pedro 5:8) Satanas ta persiguí nos, pone preshon riba nos i hinka nos den tentashon. Tambe e ta purba haña aktitut den nos mente òf kurason ku e por usa pa su propósito. E tin un meta: suak nos fe i kaba ku nos spiritualidat. (Revelashon 12:12, 17) Ya ku nos tin ku enfrentá un enemigu asina poderoso, no ta bon pa sa ku Yehova ta “warda tur ku ta stim’é”?

10. (a) Kon Yehova ta kuida su pueblo? (b) Kua tipo di protekshon ta mas importante, i dikon?

¹⁰ Pero, kon Yehova ta kuida su pueblo? E echo ku e ta primintí nos su protekshon no ta un garantia ku nos lo tin un bida sin problema den e mundu aktual. Tampoko e no kier men ku Dios ta obligá di hasi milager na nos fabor. Tòg Yehova ta protehá su pueblo komo grupo sí. Al fin i al kabo, nunka lo e no permití Diabel kaba ku adoradónan berdadero for di riba mundu! (2 Pedro 2:9) Yehova ta protehá nos prinsipalmente den sentido spiritual. E ta duna nos tur loke nos tin mester pa por soportá prueba i kuida nos relashon kuné. Na final di kuenta, ta protekshon spiritual ta e tipo di protekshon mas importante. Dikon? Pasobra tanten ku nos tin un bon relashon ku Yehova, nada, ni sikiera morto, no por perhudiká nos pa semper.—Mateo 10:28.

11. Kiko Yehova a perkurá komo protekshon spiritual pa su pueblo?

¹¹ Yehova a perkurá protekshon spiritual na abundansia pa hende ku ta hala serka dje. Den su Palabra, Beibel, e ta duna nos sabiduria pa enfrentá diferente tipo di prueba. (Santiago 1:2-5) Si nos apliká e konsehonan práktiko den e Skritura, esei mes ta sirbi komo protekshon. Ademas, Yehova ta duna “spiritu santu na esnan ku pidié.” (Lukas 11:13) E spiritu ei ta e forsa mas poderoso di universo. Pues, ta sigur ku e por fortalesé nos pa enfrentá tur prueba i tentashon ku éksito. Pa medio di Kristu, Yehova ta duna ‘donnan den hende’ tambe. (Efesionan 4:8) E hòmbernan spiritualmente kapas aki ta hasi nan bèst pa reflehá e mesun kompashon profundo ku Yehova tin ora nan ta yuda nan kompañeronan di adorashon.—Santiago 5:14, 15.

12, 13. (a) Via ki medio Yehova ta duna nos kuminda spiritual n’e debido tempu? (b) Kon abo ta sinti tokante tur loke Yehova ta perkurá pa nos bienestar spiritual?

¹² Otro kos ku Yehova ta perkurá komo protekshon pa nos ta kuminda spiritual n’e debido tempu. (Mateo 24:45) Pa medio di publikashonnan manera E Toren di Vigilansia i Spièrta!, i tambe pa medio di reunion, asamblea i kongreso, Yehova ta duna nos loke nos tin mester, ora nos tin mester di dje. Bo por ta kòrda un okashon ku bo a tende algu na un reunion kristian, un asamblea òf un kongreso ku a toka bo kurason, fortalesé bo òf konsolá bo? Bo a yega di lesa un artíkulo den un di e revistanan menshoná aki riba anto sinti ku e tabata skirbí spesialmente pa abo?

¹³ Un dje mihó armanan ku Satanas tin ta desanimashon, algu ku nos no ta imün p’e. E sa bon ku un sintimentu di desesperashon pa hopi tempu por kaba ku nos forsa i hasi nos vulnerabel. (Proverbionan 24:10) Dor ku Satanas ta purba probechá di nos sintimentunan negativo, nos tin mester di yudansa. E Toren di Vigilansia i Spièrta! a yega di publiká artíkulonan ku por yuda nos lucha kontra desanimashon. Un ruman muhé kristian a skirbi lo siguiente tokante un di e artíkulonan ei: “Mi ta lesa e artíkulo kasi tur dia, i mi wowo ta yena ku awa. Mi tin e revista banda di mi kama pa mi por tin e serka ora mi ta sinti mi desanimá. Artíkulonan manera esaki ta laga mi sinti manera ku ta Yehova tin mi brasá ku su brasanan protektor.”a Nos no ta kontentu ku Yehova ta duna nos kuminda spiritual na ora? Kòrda ku tur loke e ta duna nos pa nos bienestar spiritual ta duna prueba ku e ta serka di nos i ku el a pone nos bou di su protekshon.

Nos Por Papia ku e ‘Skuchadó di Orashon’

14, 15. (a) Ki bendishon personal Yehova ta duna hende ku ta hala serka di dje? (b) Dikon e echo ku nos por papia ku Yehova libremente den orashon ta un privilegio sumamente grandi?

¹⁴ Bo no a ripará nunka ku mas tantu poder i outoridat un hende haña, ménos disponibel e ta bira pa hende bou di su outoridat? Pero, kiko di Yehova Dios? E ta muchu haltu riba nos pa e tin interes den loke un simpel ser humano tin di bisa? Al kontrario! E regalo di orashon ta un otro bendishon ku Yehova ta duna hende ku ta hala serka dje. E echo ku nos por papia libremente ku e ‘skuchadó di orashon’ ta un privilegio sumamente grandi. (Salmo 65:2) Dikon nos ta bisa asina?

¹⁵ Konsiderá e ehèmpel aki: E direktor di un kompania grandi tin hopi responsabilidat. E ta disidí kiko e ta atendé personalmente, i kiko e ta laga otro hende atendé p’e. E Gobernante Supremo di universo tambe por disidí kiko e mes ta atendé i kiko e ta delegá na otronan. Kòrda kuantu kos Yehova a delegá na su Yu stimá, Hesus. E Yu a risibí “outoridat pa ehekutá huisio.” (Huan 5:27) Dios a ‘someté angelnan na dje.’ (1 Pedro 3:22) Yehova a pone su poderoso spiritu santu na disposishon di Hesus pa yud’é dirigí su disipelnan riba tera. (Huan 15:26; 16:7) P’esei Hesus por a bisa: “Tur outoridat a wòrdu duná na mi den shelu i riba tera.” (Mateo 28:18) Sin embargo, pa loke ta toka nos orashonnan, Yehova a skohe pa atendé nan personalmente. Ta p’esei Beibel ta manda nos dirigí nos orashonnan na Yehova so, den nòmber di Hesus.—Salmo 69:13; Huan 14:6, 13.

16. Dikon nos por konfia ku di bèrdat Yehova ta skucha nos orashonnan?

¹⁶ Di bèrdat Yehova ta skucha nos orashonnan? Si e no tabatin interes, lo e no a insistí nunka pa nos “dediká na [“perseverá den,” NW] orashon” ni tira nos karga- i preokupashonnan riba dje. (Romanonan 12:12; Salmo 55:22; 1 Pedro 5:7) Sirbidónan fiel den tempu di Beibel tabatin pleno konfiansa ku Yehova ta skucha orashon. (1 Huan 5:14) P’esei David e skirbidó di salmo a bisa: “[Yehova] lo tende mi bos.” (Salmo 55:17) Nos tambe tin tur motibu pa konfia ku Yehova ta serka di nos, kla pa skucha tur nos pensamentunan i preokupashonnan.

Yehova Ta Rekompensá Su Sirbidónan

17, 18. (a) Kon Yehova ta sinti tokante e sirbishi fiel di su kriaturanan inteligente? (b) Splika kon Proverbionan 19:17 ta mustra ku Yehova no ta keda sin wak nos obranan di miserikòrdia.

¹⁷ Nada ku simpel hende hasi òf nenga di hasi no ta afektá Yehova su posishon komo Soberano di Universo. Sin embargo, Yehova ta un Dios ku apresio. E ta apresiá i asta tin delisia den e sirbishi fiel di su kriaturanan inteligente. (Salmo 147:11) P’esei hende ku ta hala serka Yehova ta risibí un otro benefisio: E ta rekompensá su sirbidónan.—Hebreonan 11:6.

¹⁸ Beibel ta mustra bon kla ku Yehova ta apresiá loke su adoradónan ta hasi. Por ehèmpel nos ta lesa: “Esun ku tene miserikòrdia di un hende pober ta fia SEÑOR, i e lo pag’é bèk pa su bon obra.” (Proverbionan 19:17) E miserikòrdia i konsiderashon ku Yehova ta mustra na hende pober a bini dilanti den e Lei di Moises. (Levítiko 14:21; 19:15) Kon Yehova ta sinti ora nos imitá su miserikòrdia den e manera ku nos ta trata hende di kondishon humilde? Ora nos duna na hende asina, sin spera nada en buèlta, Yehova ta konsiderá ku ta fia nos a fia E. Yehova ta primintí di paga nos e debe ei, ku su fabor i bendishon. (Proverbionan 10:22; Mateo 6:3, 4; Lukas 14:12-14) Sí, ora nos mustra kompashon na un kompañero di adorashon ku ta den nesesidat, esei ta toka Yehova su kurason. Nos ta hopi kontentu di sa ku nos Tata den shelu no ta keda sin wak nos obranan di miserikòrdia!—Mateo 5:7.

19. (a) Dikon nos por ta sigur ku Yehova ta apresiá loke nos ta hasi den e trabou di prediká i hasi disipel? (b) Kon Yehova ta rekompensá nos sirbishi na fabor di su Reino?

¹⁹ Yehova ta apresiá prinsipalmente loke nos ta hasi na fabor di su Reino. Ora nos hala serka Yehova, di mes nos kier usa nos tempu, energia i rekursonan pa partisipá mas tantu posibel den e trabou di prediká e Reino i hasi disipel. (Mateo 28:19, 20) Tin bes nos por sinti ku loke nos ta logrando ta masha tiki. Nos kurason imperfekto por asta pone nos duda ku Yehova ta kontentu ku nos esfuerso. (1 Huan 3:19, 20) Pero Yehova ta balorá tur regalo ku bini di nos kurason, motivá dor di amor, sin importá kon chikitu e ta. (Marko 12:41-44) Beibel ta sigurá nos: “Dios no ta inhustu pa lubidá boso trabou i e amor ku boso a mustra pa su nòmber.” (Hebreonan 6:10) Sí, Yehova ta kòrda i rekompensá asta e akto di sirbishi di mas chikitu ku nos hasi pa apoyá su Reino. Ademas di risibí bendishon spiritual abundante awor, nos por spera di disfrutá di bida den e mundu nobo ku ta na kaminda, ora Yehova habri su man ku generosidat pa satisfasé bon deseo di tur hende ku a hala serka dje!—Salmo 145:16; 2 Pedro 3:13.

20. Kon nos por tene e palabranan di nos teksto di aña na mente durante aña 2003, i kiko lo ta e resultado?

²⁰ Durante henter aña 2003, laga nos puntra nos mes si nos ta hasiendo un esfuerso kontinuo pa hala serka nos Tata den shelu. Si ta asina, nos por ta sigur ku e lo rekompensá nos manera el a primintí. Al fin i al kabo, “Dios . . . no por gaña.” (Tito 1:2) Si bo hala serka dje, e lo hala serka bo. (Santiago 4:8) Anto kiko lo ta e resultado? Bendishon na abundansia for di awor, i e speransa di sigui hala mas i mas serka di Yehova te na eternidat!

[Nota]

Bo Ta Kòrda?

• Ki regalo Yehova ta duna esnan ku hala serka dje?

• Kiko ta algun kos ku Yehova a perkurá pa protekshon spiritual di su pueblo?

• Dikon e echo ku nos por papia ku Yehova libremente den orashon ta un privilegio sumamente grandi?

• Kon Beibel ta mustra ku Yehova ta apresiá e sirbishi fiel di su kriaturanan inteligente?

[Plachi na página 15]

Yehova a bendishoná nos ku komprondementu profundo di bèrdatnan spiritual

[Plachinan na página 16, 17]

Yehova ta duna protekshon spiritual

[Plachi na página 18]

Yehova ta serka di nos, kla pa skucha tur nos orashonnan