Mustra “Amor Un pa Otro”

“Na esaki tur hende lo sa ku boso ta mi disipel, si boso tin amor un pa otro.” —Huan 13:35.

 1. Kua kualidat Hesus a enfatisá djis promé ku su morto?

“MUCHA chikitunan.” (Huan 13:33) Ku e ekspreshon tierno ei Hesus a dirigí su mes na su apòstelnan e anochi promé ku su morto. Ningun otro kaminda den e relatonan di Evangelio nos no ta haña ku el a yega di usa e ekspreshon yen di kompashon aki ora e tabata papia ku nan. Sin embargo, riba e anochi spesial ei el a sintié konmoví pa usa e palabra di kariño aki pa transmití e amor profundo ku el a sinti pa su siguidónan. De echo e anochi ei, Hesus a papia un 30 biaha di amor. Dikon el a duna asina tantu énfasis na e kualidat aki?

 2. Dikon ta asina importante pa kristiannan mustra amor?

² Hesus a splika dikon amor ta asina importante. El a bisa: “Na esaki tur hende lo sa ku boso ta mi disipel, si boso tin amor un pa otro.” (Huan 13:35; 15:12, 17) Un siguidó di Kristu mester mustra amor di ruman. Kristiannan berdadero ta ser identifiká na e amor tierno i kaluroso ku nan ta mustra na otro, i no na un manera spesífiko di bisti ni na un òf otro kustumber straño. E artíkulo anterior a menshoná na prinsipio ku tin tres rekisito prinsipal pa por ta un disipel di Kristu. I e klase di amor ekstraordinario aki ta e di dos rekisito. Kiko lo yuda nos sigui kumpli ku e rekisito aki?

“Sobresalí Mas i Mas”

 3. Ki konseho tokante amor apòstel Pablo a duna?

³ Meskos ku tabata e kaso entre e siguidónan di Kristu den promé siglo, e amor ekstraordinario aki ta visibel awe entre e berdadero disipelnan di Kristu. Apòstel Pablo a skirbi e kristiannan di promé siglo: “Awor tokante di e amor di ruman no tin mester di skirbi boso, pasobra ta Dios ta siña boso stima otro; pasobra di bèrdat boso ta hasi esaki ku tur e rumannan.” Pero tòg Pablo a agregá: “Sobresalí mas i mas.” (1 Tesalonisensenan 3:12; 4:9, 10) Nos tambe tin ku tuma Pablo su konseho na pechu i hasi esfuerso pa “sobresalí mas i mas” den nos amor pa otro.

 4. Segun Pablo i Hesus, na ken nos mester mustra konsiderashon spesial?

⁴ Den e mesun karta inspirá ei Pablo a animá su rumannan den fe pa “enkurashá esnan ku ta falta ánimo” i “yuda e débilnan.” (1 Tesalonisensenan 5:14) Na un otro okashon el a rekordá e kristiannan ku esnan “ku ta fuerte mester soportá e debilidatnan di esnan ku ta sin forsa.” (Romanonan 15:1) Hesus tambe a duna instrukshon pa yuda esnan ku ta débil. Despues ku Hesus a predisí ku Pedro lo bandon’é riba e anochi di su aresto, el a bisa Pedro: “Unabes ku bo a kombertí, fortalesé bo rumannan.” Dikon? Pasobra nan tambe lo a bandoná Hesus i pues lo tabatin mester di yudansa. (Lukas 22:32; Huan 21:15-17) Kier men anto ku e Palabra di Dios ta manda nos mustra amor na esnan ku ta débil den sentido spiritual i ku kisas no ta asosiá mas ku e kongregashon kristian. (Hebreonan 12:12) Dikon nos mester hasi esei? Dos komparashon bibu ku Hesus a duna ta perkurá e kontesta.

Un Karné Pèrdí i un Moneda Pèrdí

5, 6. (a) Kua dos komparashon kòrtiku Hesus a konta? (b) Kiko e komparashonnan aki ta revelá di Yehova?

⁵ Pa siña su oyentenan kon Yehova ta mira esnan ku a dual, Hesus a duna dos komparashon kòrtiku. Unu tabata di un wardadó di karné. Hesus a bisa: “Kual di boso ku tin shen karné i a pèrdè un di nan no ta laga e nobentinuebenan den sabana, i ta bai buska esun pèrdí, te ora ku e hañ’é? I ora ku e hañ’é, yen di goso e ta pon’é riba su skouder. I ora ku e yega kas e ta yama su amigunan i su bisiñanan huntu, i ta bisa nan: ‘Regosihá huntu ku mi, pasobra mi a haña mi karné ku a pèrdè!’ Mi ta bisa boso ku asina tambe lo tin mas goso den shelu pa un pekadó ku repentí, ku pa nobentinuebe hende hustu ku no tin mester di repentimentu.”—Lukas 15:4-7.

⁶ E di dos komparashon tabata di un muhé. Hesus a bisa: “Kual muhé ku tin dies moneda di plata, si e pèrdè un di nan, no ta sende un lampi i ta bari kas buska kuidadosamente te ora ku e hañ’é? I ora ku e hañ’é e ta yama su amiganan i su bisiñanan huntu, bisando: ‘Regosihá huntu ku mi, pasobra mi a haña e moneda ku mi a pèrdè!’ Asina tambe mi ta bisa boso, tin goso den presensia di e angelnan di Dios pa un pekadó ku repentí.”—Lukas 15:8-10.

 7. Kua ta e dos lèsnan ku nos ta saka for di e komparashon di e karné pèrdí i esun di e moneda pèrdí?

⁷ Kiko nos por siña for di e komparashonnan kòrtiku aki? Nan ta mustra nos (1) ki sintimentu nos mester tin pa esnan ku a bira débil i (2) kiko nos tin ku hasi pa yuda nan. Laga nos analisá e puntonan aki.

Pèrdí Pero Balioso

 8. (a) Kon e wardadó i e muhé a reakshoná riba nan pèrdida? (b) Kiko nan reakshon ta bisa nos di nan opinion di e opheto pèrdí?

⁸ Den ámbos komparashon algu a pèrdè, pero ripará e reakshon di e doñonan. E wardadó no a bisa: ‘Kiko ta ún karné? At’ami a sobra 99? Esun karné ei no ta hasi falta.’ E muhé no a bisa: ‘Pakiko mi ta preokupá pa ún moneda? Mi ta kontentu ku ainda mi tin nuebe.’ Al kontrario, e wardadó a bai buska su karné pèrdí komo si fuera e tabata e úniko karné ku e tin. Anto e muhé a sinti e pèrdida di su moneda komo si fuera e no tabatin mas moneda. Den ámbos kaso e doño a keda konsiderá e opheto pèrdí komo algu balioso. Kiko esaki ta ilustrá?

 9. Kiko e preokupashon ku e wardadó i e muhé a demostrá ta ilustrá?

⁹ Tuma nota di Hesus su konklushon den ámbos kaso: “Asina tambe lo tin mas goso den shelu pa un pekadó ku repentí,” i “asina tambe mi ta bisa boso, tin goso den presensia di e angelnan di Dios pa un pekadó ku repentí.” Pues anto, e preokupashon di e wardadó i di e muhé ta reflehá na un eskala chikí loke Yehova i su kriaturanan selestial ta sinti. Meskos ku loke e wardadó i e muhé a pèrdè a keda balioso den nan bista, asina tambe esnan ku drif bai i stòp di asosiá ku e pueblo di Dios ta keda balioso den bista di Yehova. (Yeremías 31:3) E personanan ei kisas ta spiritualmente débil, ma no nesesariamente nan ta rebelde. Apesar di nan kondishon débil, podisé te na sierto grado ainda nan ta kumpli ku e rekisitonan di Yehova. (Salmo 119:176; Echonan 15:29) P’esei meskos ku den pasado, Yehova ta tarda pa “tira nan for di su presensia.”—2 Reinan 13:23.

10, 11. (a) Kon nos mester konsiderá esnan ku a drif bai for di e kongregashon? (b) Segun e dos komparashonnan di Hesus, kon nos por ekspresá nos interes i preokupashon pa nan?

¹⁰ Meskos ku Yehova i Hesus, nos tambe ta profundamente interesá den esnan ku ta débil i ku no ta asosiá ku e kongregashon kristian. (Ezekiel 34:16; Lukas 19:10) Nos ta konsiderá un persona ku ta débil den sentido spiritual komo un karné pèrdí, i no un kaso pèrdí. Nos no ta rasoná: ‘Pakiko wòri pa un hende débil? E no ta hasi falta den e kongregashon.’ Al kontrario, meskos ku Yehova, nos ta konsiderá esnan ku a drif bai pero ku kier bolbe bèk, komo balioso.

¹¹ Pero kon nos por ekspresá nos interes i preokupashon? E dos komparashonnan di Hesus ta indiká ku nos por hasi esei (1) dor di tuma inisiativa, (2) dor di aktua ku suavedat i (3) dor di ta determiná i práktiko. Laga nos analisá e aspektonan aki un pa un.

Tuma Inisiativa

12. Kiko e palabranan “bai buska esun pèrdí” ta konta nos di e aktitut di e wardadó?

¹² Den e promé komparashon, Hesus ta bisa ku e wardadó ta “bai buska esun pèrdí.” E wardadó ta tuma e inisiativa i ta hasi un esfuerso konsiente pa haña e karné pèrdí. Kontratempu, peliger i distansia no ta strob’é. Al kontrario, e wardadó ta persistí “te ora ku e hañ’é.”—Lukas 15:4.

13. Kon hòmbernan fiel di pasado a reakshoná riba e nesesidat di esnan débil, i kon nos por imitá e ehèmpelnan ei di Beibel?

¹³ Asina tambe, pa por yuda un persona ku tin mester di animashon hopi bes ta esun mas fuerte tin ku tuma e inisiativa. Hòmbernan fiel di pasado a komprondé esaki. Por ehèmpel, ora Yónatan yu di Rei Saul a ripará ku su amigu íntimo David tabatin mester di animashon, Yónatan “a lanta i a bai serka David na Hores, i a enkurash’é den Dios.” (1 Samuel 23:15, 16) Siglonan despues, ora Gobernador Nehemías a ripará ku algun di su rumannan hudiu a bira débil, e tambe a “lanta” mesora i a enkurashá nan pa ‘kòrda riba Yehova.’ (Nehemías 4:14) Nos awe tambe lo kier “lanta”—es desir tuma e inisiativa—pa fortalesé esnan ku ta débil. Pero ta ken den kongregashon mester hasi esei?

14. Ken den e kongregashon kristian mester ofresé pa yuda esnan ku ta débil?

¹⁴ Spesialmente ansianonan kristian tin e responsabilidat di “enkurashá esnan agotá, i fortalesé esnan debil” i “bisa esnan ku nan kurason ta yen di ansha: ‘Tene kurashi, no tene miedu.’” (Isaías 35:3, 4; 1 Pedro 5:1, 2) Pero ripará ku e konseho di Pablo pa “enkurashá esnan ku ta falta ánimo” i “yuda e debilnan,” no a ser duná na ansianonan so. Mas bien Pablo su palabranan tabata dirigí na henter e “iglesia di e tesalonisensenan.” (1 Tesalonisensenan 1:1; 5:14) Pues, tur kristian tin e tarea di ofresé yudansa na esnan ku ta débil. Meskos ku e wardadó den e komparashon, tur kristian mester sinti su mes impulsá pa “bai buska esun pèrdí.” Klaru ku e manera mas efikas pa hasi esaki ta den koperashon ku e ansianonan. Abo lo por hasi algu pa yuda un persona débil den bo kongregashon?

Sea Suave

15. Pakiko e wardadó lo a karga e karné hiba bèk?

¹⁵ Kiko e wardadó ta hasi ora ku finalmente e haña e karné pèrdí? “E ta pon’é riba su skouder.” (Lukas 15:5) Ki un detaye konmovedor i revelador! Kisas e karné a dual durante vários dia i anochi den teritorio deskonosí, podisé asta leon a kore su tras. (Jòb 38:39, 40) E karné indudablemente tabata suak debí na falta di kuminda. Simplemente e ta muchu suak pa riba su mes e superá e opstákulonan ku lo e topa riba kaminda pa kas. P’esei e wardadó ta sak abou, his’é suavemente, i karg’é hiba bèk na e tou pasando riba tur opstákulo. Kon nos por imitá e kuido ku e wardadó a demostrá?

16. Pakiko nos mester demostrá e ternura ku e wardadó a mustra pa e karné ku a dual?

¹⁶ Un persona ku a stòp di asosiá ku e kongregashon kisas ta agotá den sentido spiritual. Meskos ku e karné ku a dual for di e wardadó, un persona asina kisas a kana dual sin rumbo den e mundu hostil aki. Sin e protekshon di e tou—e kongregashon kristian—e ta hañ’é mas ku nunka ku e atakenan di Diabel, kende “ta kana rònt manera un leon ku ta gruña, buskando ken e por devorá.” (1 Pedro 5:8) Ademas, e ta suak debí na falta di alimento spiritual. P’esei riba su mes probablemente lo e ta muchu suak pa surpasá e opstákulonan ku lo e topa den su kaminda pa bini bèk na e kongregashon. Pa e motibu ei nos tin ku sak abou, na moda di papia, i suavemente hisa e persona débil ei i karg’é hiba bèk. (Galationan 6:2) Kon nos por hasi esei?

17. Kon nos por imitá apòstel Pablo ora nos bishitá un persona ku ta débil?

¹⁷ Apòstel Pablo a bisa: “Ken ta sinti su mes suak sin ku ami tambe ta sinti suak huntu kuné?” (2 Korintionan 11:29, BPK; 1 Korintionan 9:22) Pablo a sinti pa otro hende, inkluso pa esnan débil. Nos tambe kier pone nos mes den sapatu di esnan ku ta débil. Ora nos ta bishitá un kristian spiritualmente débil, sigur’é ku e ta balioso den bista di Yehova i ku su rumannan Testigu ta sinti su falta masha hopi. (1 Tesalonisensenan 2:17) Lag’é sa ku nan ta kla pa dun’é sosten i ku nan ta dispuesto pa ser p’e “un ruman [ku] ta nasí pa tempu di atversidat.” (Proverbionan 17:17; Salmo 34:18) Nos palabranan sinsero lo por anim’é pokopoko te ku e por bolbe bèk na e tou. Kiko nos tin ku hasi e ora ei? E komparashon di e muhé ku a pèrdè e moneda ta duna nos algun guia.

Sea Determiná i Práktiko

18. (a) Dikon e muhé den e komparashon no ta sinti su mes sin speransa? (b) Ki esfuersonan sinsero e muhé ta hasi, i ku ki resultado?

¹⁸ E muhé ku a pèrdè e moneda tabata sa ku e situashon ta difísil pero no sin speransa. Si e moneda lo a kai den un kunuku grandi yen di mata òf den un dam hundu yen di lodo, probablemente lo el a pensa ku ta imposibel pa hañ’é. Sin embargo, dor ku e tabata sa ku e moneda mester ta un kaminda den kas, un kaminda ku e por hañ’é, el a kuminsá un búskeda determiná i a fondo. (Lukas 15:8) Promé kos ku e ta hasi ta sende un lampi pa iluminá su kas. Despues e ta bari e flur ku basora, ku e speransa di tende e zonidu di e moneda. Por último e ta buska kuidadosamente den tur skina i nachi te ora ku e lus di e lampi kai riba e moneda di plata. E muhé su determinashon a ser rekompensá!

19. Ki lèsnan pa yuda esnan débil nos ta saka for di loke e muhé den e komparashon di e moneda pèrdí a hasi?

¹⁹ Manera e detaye aki di e komparashon ta rekordá nos, nos obligashon bíbliko pa yuda un kristian débil no ta fuera di nos alkanse. Na mesun tempu nos ta realisá ku e ta rekerí esfuerso. Asta apòstel Pablo a bisa e ansianonan di Efeso: “Dor di traha duru asina boso mester yuda e debilnan.” (Echonan 20:35a) Kòrda ku e muhé no ta haña e moneda dor di djis wak rònt den su kas aribariba, aki aya òf de bes en kuando. Nò. E ta logra pasobra e ta buska sistemátikamente “te ora ku e hañ’é.” Asina tambe, ora nos ta purba rekuperá un persona spiritualmente débil, nos método pa hasi esei mester ta determiná, práktiko i ku un propósito. Kiko nos por hasi?

20. Kiko nos por hasi pa yuda esnan débil?

²⁰ Kon nos por yuda un persona débil kultivá fe i apresio? Podisé un studio di Beibel den un publikashon kristian apropiá ta nèt loke e tin mester. Sí, un studio bíbliko ku un persona débil ta duna nos chèns pa yud’é den un manera konsistente i a fondo. Probablemente e superintendente di sirbishi ta e mihó persona pa determiná ken lo por duna e yudansa nesesario. Lo e por sugerí kua ta e temanan ku nos por studia i kua publikashon lo ta mas práktiko. Meskos ku e muhé den e komparashon ta usa hèrmèntnan útil pa kumpli ku su tarea, nos awe tambe tin hèrmèntnan pa yuda nos duna un man na esnan ku ta débil i asina kumpli ku e responsabilidat ku Dios a duna nos. Dos hèrmènt òf publikashon nobo ku nos tin lo ta spesialmente útil pa esaki. Ta e buki Adorá e Úniko Dios Berdadero i e buki Hala Serka Yehova.a

21. Kon tur persona enbolbí ta ser bendishoná ora yuda esnan ku ta débil?

²¹ E yudansa ku e débilnan ta haña ta trese bendishon pa tur persona enbolbí. Esun ku ta ser yudá tin e felisidat di bolbe asosiá ku amigunan berdadero. Nos ta eksperensiá e goso di kurason ku bo ta haña solamente dor di duna. (Lukas 15:6, 9; Echonan 20:35b) E kongregashon den su totalidat ta bira mas kariñoso segun ku kada miembro ta demostrá un interes amoroso den otro hende. I mas ku tur kos, nos Wardadónan amoroso, Yehova i Hesus, ta ser honrá dor ku nan sirbidónan riba tera ta reflehá Nan deseo pa yuda esnan débil. (Salmo 72:12-14; Mateo 11:28-30; 1 Korintionan 11:1; Efesionan 5:1) P’esei nos tin masha bon motibu pa sigui mustra “amor un pa otro”!

[Nota]

Bo Por Splika?

• Dikon ta importante pa kada un di nos demostrá amor?

• Dikon nos tin ku mustra amor na esnan ku ta débil?

• Ki lèsnan nos ta siña for di e komparashon di e karné pèrdí i for di esun di e moneda pèrdí?

• Ki pasonan práktiko nos por dal pa yuda un persona ku ta débil?

[Plachi na página 16]

Ora di yuda esnan ku ta débil, nos ta tuma e inisiativa i ta suave, i determiná

[Plachi na página 17]

Yuda esnan ku ta débil ta trese bendishon pa tur persona enbolbí