Bo Konosé e Felisidat Ku Ta Bin di Duna?

UN RUMAN muhé kristian tabatin kasi 50 aña aktivo den sirbishi kristian. Ounke e efektonan di behes a hasié físikamente débil, e tabata desididu pa bishitá e Salòn di Reino resien konstruí. Di lèn riba brasa di un ruman hòmber kristian servisial, el a drenta e salòn i a kana bai pokopoko pero derechitu riba su meta: e kaha di kontribushon. Eiden el a depositá e suma modesto ku el a spar pa e propósito aki. Ounke e no por a duna un man den konstrukshon di e salòn, e kier a yuda.

E señora kristian aki kisas ta laga bo kòrda riba un otro señora fiel: e “biuda pober” ku Hesus a mira tira dos sèn den e kaha di ofrenda di e tèmpel. Beibel no ta konta nos di su sirkunstansia, pero den e tempu ei un muhé sin kasá su situashon finansiero lo no tabata masha di gaba. Hesus sigur a sinti p’e, pasobra e tabata hopi konsiente kon penoso e biuda su situashon tabata. Ora el a hala atenshon na e biuda komo un ehèmpel pa su disipelnan, el a remarká ku e biuda su donashon chikí a representá “tur loke ku e tabatin pa biba di dje.”—Marko 12:41-44.

Dikon un muhé den nesesidat, manera e biuda pober aki, lo a hasi tal sakrifisio? Klaramente, pasobra e tabata profundamente deboto na Yehova Dios, kende su sentro di adorashon tabata na e tèmpel na Yerusalèm. Ounke e biuda tabata limitá den loke e por a hasi, e kier a promové sirbishi sagrado. I lo e mester a sinti un berdadero goso den kontribuí ku loke e tabata por.

Duna pa Sostené e Obra di Yehova

Kontribushon material i finansiero tabata semper un parti nesesario di adorashon puru, i tambe semper un fuente di gran goso. (1 Krónikanan 29:9) Den antiguo Israel, nan a usa e kontribushon no solamente pa hasi e tèmpel bunita, sino tambe pa sòru ku tur aspekto di Yehova su adorashon den e tèmpel por a funshoná diariamente. E Lei a bisa spesífikamente pa e yunan di Israel kontribuí un désimo parti (un diesmo) di nan produktonan pa mantené e levitanan, kendenan a efektuá e servisionan di tèmpel. Pero e levitanan tambe mester a duna Yehova un diesmo di e produktonan ku nan a risibí.—Numbernan 18:21-29.

Ounke kristiannan no ta bou di e rekisitonan di e pakto di Lei, e prinsipio a keda meskos: sirbidónan di Dios mester kontribuí materialmente pa sostené adorashon berdadero. (Galationan 5:1) Ademas, e kristiannan di promé siglo a haña ku tabata un goso pa nan por a kontribuí pa yuda aliviá nan rumannan den nesesidat. (Echonan 2:45, 46) Apòstel Pablo a rekordá kristiannan ku meskos ku Dios generosamente a duna nan kos bon, asina nan tambe mester a mustra generosidat na otro hende. Pablo a skirbi: “Instruí esnan ku ta riku den e mundu aktual pa nan no ta sobèrbè i pa nan no fiha nan speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan. Instruí nan pa hasi bon, pa nan ta riku den bon obra, pa nan ta generoso i dispuesto pa kompartí, pa nan montoná pa nan mes e tesoro di un bon fundeshi pa futuro, pa nan gara loke ta bida berdadero.” (1 Timoteo 6:17-19; 2 Korintionan 9:11) Sí, di eksperensia personal Pablo por a konfirmá e palabranan di Hesus: “Tin mas felisidat den duna ku tin den risibí.”—Echonan 20:35, NW.

Dunamentu Kristian Awe

Awe, sirbidónan di Yehova ta sigui usa nan poseshonnan material pa yuda otro i pa sostené e obra di Dios. Asta esnan di poko rekurso ta kontribuí ku loke nan por. “E esklabo fiel i prudente” ta sinti ku e ta responsabel dilanti di Yehova pa hasi e mihó uso posibel di tur e fondonan aki ku nan ta haña di kontribushon. (Mateo 24:45) Ta usa algun fondo pa sukursalnan funshoná, pa tradusí i produsí Beibel i literatura bíbliko, pa organisá reunionnan kristian grandi, pa entrená i manda superintendentenan biahero i misioneronan, pa perkurá yudansa ora di desaster i tambe pa hopi otro propósito esensial. Laga nos enfoká riba un di e propósitonan ei: pa yuda traha lugánan di adorashon.

Testigunan di Yehova ta reuní vários biaha pa siman den nan Salònnan di Reino pa benefisiá di edukashon spiritual i asosiashon sano. Sin embargo, den hopi pais e situashon ekonómiko no ta permití Testigunan lokal finansiá konstrukshon di Salònnan di Reino sin ku nan haña un yudansa finansiero promé. P’esei na 1999, Testigunan di Yehova a kuminsá ku un programa pa usa fondo di paisnan mas riku pa yuda traha Salòn di Reino den paisnan mas pober. Ademas, míles di boluntario a duna di nan tempu i talento, trahando hopi bes den áreanan remoto di e paisnan aki. Durante konstrukshon, Testigunan lokal ta haña eksperensia den trabounan di konstrukshon i mantenshon, i e Fondo di Salòn di Reino ta hasi posibel ku por kumpra ekipo i materialnan nesesario. E Testigunan ku awor ta usa e salònnan nobo aki ta sumamente gradisidu ku nan rumannan den fe a duna di nan tempu i plaka. Tambe e Testigunan lokal aki ta kontribuí tur luna pa por mantené e Salòn di Reino nobo i kubri e gastunan di konstrukshon, i asina nan ta yuda ku por konstruí mas Salòn di Reino.

Ta traha e Salònnan di Reino usando métodonan i materialnan lokal. Ounke e salònnan aki ta bastante simpel, nan ta nèchi, práktiko i kómodo. Tempu ku a kuminsá ku e programa di konstrukshon na 1999, e tabata konta pa un 40 pais di poko rekurso. Entre tantu, a ekspandé e programa di konstrukshon i awor e ta abarká 116 pais di poko rekurso, lokual ta enserá mas ku mitar di e kongregashonnan di Testigunan di Yehova rònt mundu. Den e último sinku añanan, a konstruí mas ku 9.000 Salòn di Reino bou di e areglo aki, un promedio di mas ku 5 salòn nobo pa dia! Pero ainda tin mester di 14.500 Salòn di Reino nobo den e 116 paisnan aki. Ku Yehova su bendishon i grásias na e disponibilidat i generosidat di Testigunan rònt mundu, nos ta spera ku lo tin sufisiente fondo pa satisfasé e nesesidat aki.—Salmo 127:1.

Salònnan di Reino Ta Stimulá Oumento

Ki impakto e tremendo esfuerso aki tabatin riba e Testigunan lokal i riba e obra di prediká e Reino? Na hopi lugá, tin un oumento drástiko den asistensia na reunion despues ku traha un Salòn di Reino nobo. Nos ta haña un ehèmpel típiko den e siguiente informe for di Burundi: “Asina ku kaba ku un Salòn di Reino, e ta yen-yen. Por ehèmpel, nan a traha un Salòn di Reino pa un kongregashon ku tabatin un promedio di 100 persona na nan reunionnan. Nan Salòn di Reino nobo ta karga 150 hende kómodamente. Pa ora a kaba e salòn, 250 hende tabata asistí na reunion.”

Dikon tal oumento ta tuma lugá? Un motibu ta ku hende tin biaha ta deskonfiá gruponan di publikadó di Reino ku no tin un lugá di reunion na drechi pero ku ta reuní bou di palu òf riba un tereno habrí. Den un sierto pais, hende a kuminsá relashoná violensia étniko ku e tipo di gruponan religioso chikí ei, i awor lei ta eksigí pa tur reunion religioso tuma lugá den un kas di adorashon.

Un otro bentaha di tin nan propio salòn ta ku esei ta yuda Testigunan di Yehova mustra e komunidat ku nan no ta disipel di un sierto pastor. E sukursal di Testigunan di Yehova na Zimbabwe a skirbi: “Den pasado, rumannan den e área aki tabatin kustumber di reuní den kasnan privá, i e hendenan lokal tabata identifiká e kongregashon ku e doño di e kas kaminda nan tabata reuní. Nan tabata bisa ku e rumannan ta pertenesé na e misa di fulano di tal. Tur esaki ta kambiando awor ku hende ta mira kada salòn ku un bòrchi ku ta identifiká nan bon kla komo ‘Salòn di Reino di Testigunan di Yehova.’”

Dunadónan Kontentu

Apòstel Pablo a skirbi: “Dios ta stima esun ku ta duna ku alegria.” (2 Korintionan 9:7) Klaru ku donashonnan grandi ta yuda bon. Pero e porshon mas grandi di fondo ku ta ser kontribuí na e obra di Testigunan di Yehova ta bin di kahanan di kontribushon ku tin den Salòn di Reino. Tur kontribushon, sea grandi òf chikí, ta importante i no ta ser menospresiá. No lubidá ku Hesus a kai sinta kaminda e por a mira e biuda pober tira su dos sènnan. E angelnan i Yehova tambe a mir’é. Nos no sa ni sikiera nòmber di e biuda, pero Yehova a sòru pa su akto noble keda registrá den Beibel pa semper.

Fuera di yuda ku konstrukshon di Salòn di Reino, nos kontribushonnan ta sostené tur otro faseta di e obra sumamente importante di Reino. Nos koperashon den e aspekto aki ta duna nos motibu pa alegrá i pa “abundá tambe dor di hopi gradisimentu na Dios.” (2 Korintionan 9:12) Nos rumannan kristian na Benin a informá: “Tur dia Yehova ta haña hopi orashon di gradisimentu pa e yudansa finansiero ku nos a risibí di e hermandat internashonal.” Na mesun tempu, nos tur ku ta yuda sostené e obra di Reino finansieramente ta eksperensiá e felisidat ku ta bin di dunamentu kristian.

[Kuadro na página 22, 23]

Maneranan Ku Algun Hende Ta Skohe pa Duna

KONTRIBUSHON PA E OBRA MUNDIAL

Hopi hende ta apartá, òf hinka den nan presupuesto, un montante pa nan pone den e kahanan di kontribushon marká: “Kontribushon pa e Obra Mundial—Mateo 24:14.”

Tur luna kongregashonnan ta manda e montantenan aki pa e sukursal di Testigunan di Yehova ku ta sirbi nan respektivo pais. Tambe por manda donashon boluntario di plaka direktamente na Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, òf n’e ofisina di sukursal ku ta sirbi bo pais. Si manda chèk, e mester ta na nòmber di “Watch Tower.” Tambe por hasi donashon di prenda òf otro kos di balor. Un karta breve ku ta deklará ku esakinan ta un regalo inkondishonal mester kompañá e kontribushonnan aki.

AREGLO DI DONASHON KONDISHONAL

Por hasi donashon di plaka via un areglo spesial den kua, riba petishon di e dunadó, lo por debolbé e donashon na dje. Pa mas informashon, por fabor, tuma kontakto ku e Office of the Secretary and Treasurer na e adrès menshoná ariba.

DONASHON PLANIÁ

Ademas di regalo inkondishonal di plaka, tin otro métodonan di duna na benefisio di e sirbishi di Reino mundial. Esakinan ta inkluí:

Seguro: Por nombra Watch Tower komo benefisiario di un pólisa di seguro di bida òf di un areglo di penshon.

Kuenta di Banko: Por duna Watch Tower derecho di usa kuenta di banko, ‘time deposit’ òf kuenta di penshon personal, òf derecho di kobra nan despues di morto di nan doño, na armonia ku rekisitonan bankario lokal.

Akshon i Bono: Por hasi donashon di akshon i bono na Watch Tower komo un regalo inkondishonal.

Propiedat: Por hasi donashon di propiedat ku por ser bendé, sea komo regalo inkondishonal òf bou di e kondishon ku e dunadó por sigui biba den dje te na su morto. Tuma kontakto ku e ofisina di sukursal di bo pais promé ku traha e akta pa traspasá kualke propiedat.

Tèstamènt i ‘Trust’: Por nombra Watch Tower komo heredero di propiedat òf plaka via un tèstamènt legal, òf por nombra Watch Tower komo benefisiario di un areglo di trust. Un trust ku ta benefisiá un organisashon religioso por duna sierto benefisionan fiskal.

Pa mas informashon, bo por tuma kontakto ku Sosiedat Watch Tower, via karta òf telefon, na e adrès indiká aki bou, òf na e ofisina di Testigunan di Yehova ku ta sirbi bo pais.

Sosiedat Watch Tower P.O. Box 4708

Seroe Loraweg 142A

Curaçao, N.A.

Telefon: (599-9) 461-7528

[Plachinan na página 20]

Lugánan di reunion bieu i nobo di Testigunan di Yehova

Zambia

Repúblika Sentroafrikano