“Mustra Hospitalidat”

FEBE, un kristian di promé siglo, tabatin un problema. E tabatin ku biaha di Senkrea (Gresia) pa Roma, pero e no tabata konosé e rumannan kristian den e stat ei. (Romanonan 16:1, 2) E traduktor di Beibel, Edgar Goodspeed, a bisa: “E mundu romano [di e tempu ei] tabata un mundu malbado i kruel, i e posadanan sigur no tabata lugánan di bon reputashon pa un hende muhé desente, i foral no pa un muhé kristian.” Pues unda Febe por a keda?

Den tempu di Beibel e hendenan tabata biaha hopi. Por ehèmpel, Hesukristu i su disipelnan mes a bai di un lugá pa otro pa prediká e bon nobo rònt Judea i Galilea. Poko despues di esei, misioneronan kristian manera Pablo a hiba e mensahe pa vários área rònt di Laman Mediteráneo. Pablo a bai te asta Roma, kapital di e Imperio Romano. Ora e promé kristiannan tabata di biahe, sea paden òf pafó di e teritorio hudiu, unda nan tabata keda? Ki klase di difikultat nan tabatin pa haña lugá di keda? Kiko nos por siña di e hospitalidat ku nan a praktiká?

“Awe Mi Mester Keda na Bo Kas”

Hospitalidat ta nifiká risibí huéspetnan na un manera generoso i kordial, i pa hopi tempu e tabata un karakterístika di Yehova su adoradónan berdadero. Por ehèmpel, Abraham, Lòt i Rebeka tur tabata hendenan hospitalario. (Génesis 18:1-8; 19:1-3; 24:17-20) Ora e patriarka Jòb a deskribí su aktitut pa ku stranhero, el a bisa: “E stranhero no a pasa nochi pafó, pasobra mi a habri mi portanan pa e biahero.”—Jòb 31:32.

Pa biaheronan a risibí un trato hospitalario di nan próhimo israelita, hopi bes nan mester a djis kai sinta riba e plenchi di un stat i warda un invitashon. (Huesnan 19:15-21) Por lo general, e anfitrion tabata laba pia di su huéspetnan i tabata ofresé nan kos di kome i bebe. Asta e bestianan di su bishitantenan tabata haña kuminda. (Génesis 18:4, 5; 19:2; 24:32, 33) Biaheronan ku no ke tabata un karga pa nan anfitrionnan tabata biaha ku nan mes provishon, manera pan ku biña, i yerba seku i kuminda pa nan burikunan. Tur loke nan tabatin mester ta un lugá pa pasa anochi.

Ounke masha poko bes Beibel ta duna detaye di unda Hesus a haña lugá di keda durante su giranan di predikashon, e ku su disipelnan mester a drumi un kaminda. (Lukas 9:58) Dia Hesus a bishitá Jeriko, el bisa Zakeo simplemente: “Awe mi mester keda na bo kas.” Zakeo a risibí su huéspet “ku alegria.” (Lukas 19:5, 6) Na Betania, hopi bes Hesus tabata huéspet di su amigunan Marta, Maria i Lázaro. (Lukas 10:38; Juan 11:1, 5, 18) I aparentemente na Kapernaum, Hesus tabata keda serka Simon Pedro.—Marko 1:21, 29-35.

E instrukshonnan ku Hesus a duna su 12 apòstelnan relashoná ku e predikashon ta duna nos un bon idea di ki klase di akohida nan por a spera den Israel. Hesus a bisa nan: “No buska oro, ni plata, ni koper pa hiba den boso faha; ni saku pa biaha kuné, ni dos túnika, ni sandalia, ni garoti; pasobra e trahadó ta digno di su mantenshon. I den kualke stat òf pueblito ku boso drenta, buska pa haña sa ta ken ta digno den dje, i keda einan te ora boso bai.” (Mateo 10:9-11) Hesus tabata sa ku hende di bon kurason lo a tuma su disipelnan den nan kas, i duna nan kuminda, lugá di drumi i otro kosnan nesesario.

Sin embargo, lo a yega tempu ku e disipelnan di Hesus ku tabata predikadónan biahero lo tabatin ku sòru pa nan mes i kubri nan gastunan. En bista di e hostilidat ku su siguidónan lo a bin haña nan kuné i e futuro ekspanshon di e trabou di prediká den teritorionan pafó di Israel, Hesus a bisa: “Esun ku tin un bolsa, lag’é bai kuné, i tambe un saku.” (Lukas 22:36) Pa nan por a plama e bon nobo, nan mester a biaha i haña lugá di keda.

‘Praktiká Hospitalidat’

E ambiente relativamente pasífiko ku a reina i e ret grandi di kareteranan bon mantené den tur parti di e Imperio Romano den promé siglo a yuda forma un sosiedat den kua e hendenan tabata biaha hopi.a E gran kantidat di biahero a krea un demanda grandi pa lugá di keda. Riba e kamindanan prinsipal tabatin posadanan na distansia di un dia di biahe for di otro, ku a kumpli ku e demanda aki. Sin embargo, The Book of Acts in Its Graeco-Roman Setting (E Buki di Echonan den Su Kuadro Griego-Romano) ta deklará: “Loke ta konosí di e fasilidatnan ei den literatura no ta muchu agradabel. E fuentenan literario i arkeológiko ku tin disponibel generalmente ta papia di fasilidatnan sushi i tur dekaí, bashí i sin muebel, kama yen di pieu, mal kalidat di kuminda i awa di bebe, doño i trahadó inkonfiabel, klientenan di mal reputashon, i un ambiente generalmente inmoral.” Ta di komprondé anto ku ki ora ku tabata posibel, un biahero desente lo a evitá di keda na un posada asina.

Nada straño anto ku bes tras bes e Skritura a animá kristiannan pa mustra hospitalidat na otro. Pablo a urgi e kristiannan na Roma: ‘Kontribuí na e nesesidatnan di e santunan, praktiká hospitalidat.’ (Romanonan 12:13) El a rekordá e kristiannan hudiu: “No laga di mustra hospitalidat na stranhero, pasobra dor di hasi esaki algun hende a entretené angelnan sin sa.” (Hebreonan 13:2) Pedro a animá su kompañeronan di adorashon pa “duna posada na otro sin murmurá.”—1 Pedro 4:9.

Sin embargo, a eksistí situashonnan den kua no tabata apropiá pa mustra hospitalidat. Relashoná ku un hende ‘ku a bai muchu leu i ku no ta permanesé den e siñansa di Kristu,’ apòstel Juan a bisa pa “no risibié den boso kas, i no yam’é bonbiní; pasobra esun ku ta yam’é bonbiní ta partisipá den su obranan malu.” (2 Juan 9-11) Relashoná ku pekadónan no-repentí, Pablo a skirbi: “No asosiá ku ningun hende ku ta ruman pa nòmber, si e ta un hende inmoral, òf golos pa plaka, òf un adoradó di dios falsu, òf un blasfemadó, òf un buraché, òf un estafadó—pa ni kome mes huntu ku un hende asina.”—1 Korintionan 5:11.

Gañadó i otro hende kasi sigur a purba probechá di e bondat di kristiannan berdadero. Un dokumento no-bíbliko tokante e fe kristian di siglo 2 di nos era konosí komo E Didache, òf Siñansa di e Diesdos Apòstelnan, ta rekomendá pa risibí un predikadó biahero pa “un dia, òf si ta nesesario, un di dos dia tambe.” Despues di esei, ora e ta bai, no dun’é “nada otro ku no ta pan . . . Si e pidi plaka, e ta un profeta falsu.” E dokumento a bisa mas aleu: “Si e ta deseá di keda serka bo i e tin un fishi, lag’é traha pa su pan. Pero si e no tin un fishi, sòru pa su nesesidatnan manera abo ta haña ta bon, pa ningun hende no keda biba serka bo sin ta hasi nada pasobra e ta un kristian. Pero si e no ke asina, e ta probechando di Kristu; kuidou ku e hendenan ei.”

Apòstel Pablo a sòru pa e no a pone un karga pisá riba su anfitrionnan durante su estadianan largu den sierto stat. E tabata traha tènt pa sostené su mes. (Echonan 18:1-3; 2 Tesalonisensenan 3:7-12) Pa yuda e biaheronan meresedor entre nan, aparentemente e kristiannan di promé ayá tabata usa karta di rekomendashon. Un ehèmpel di esei ta e manera ku Pablo a introdusí Febe. El a skirbi: “Mi ta rekomendá na boso nos ruman muhé Febe . . . pa boso risibié den Señor . . . i pa boso yud’é den kualke asuntu ku e por tin mester di boso.”—Romanonan 16:1, 2.

Mustra Hospitalidat Ta Trese Bendishon

E misioneronan kristian di promé siglo a konfia ku Yehova lo perkurá pa tur nan nesesidatnan. Pero nan por a ferwagt ku nan rumannan den fe lo mustra hospitalidat na nan? Sí. Por ehèmpel, Lidia a habri su kas pa Pablo i e otro rumannan. E apòstel a keda serka Akila i Prisila na Korinto. Un wardadó di prezu na Filipos a pone mesa pa Pablo ku Silas. Tambe Pablo a haña un resepshon hospitalario serka Jason na Tesalónika, serka Felipe na Cesarea i serka Mnason riba kaminda di Cesarea pa Yerusalèm. Na kaminda pa Roma, e rumannan na Puteoli a risibí Pablo. E okashonnan aki lo mester tabata spiritualmente hopi edifikante pa e hendenan ku a risibié den nan kas!—Echonan 16:33, 34; 17:7; 18:1-3; 21:8, 16; 28:13, 14.

E komentarista bíbliko, Frederick F. Bruce, a remarká: “E úniko motivashon tras di e bon yudansa ku e amigu- i kolaboradónan—anfitrion- i anfitrionanan—aki a duna Pablo, ta e amor ku nan tabatin p’e i p’e Doño ku el a sirbi. Nan tabata sa ku dor di sirbi esun nan a sirbi e otro tambe.” Esaki ta un ekselente motivashon pa ser hospitalario.

Ainda tin nesesidat pa mustra hospitalidat. Míles di representante biahero di Testigunan di Yehova ta risibí hospitalidat di nan rumannan den fe. Algun proklamadó di Reino ta biaha riba nan mes gastu pa bai prediká den lugánan kaminda masha poko biaha sa hiba e bon nobo. E benefisionan ku nos ta haña dor di habri nos kas—pa simpel ku e ta—pa e rumannan ei, ta grandi. E hospitalidat kaluroso ku kisas ta enserá un simpel kuminda por duna nos un tremendo oportunidat pa ‘kurashá otro’ i mustra amor pa nos rumannan i pa nos Dios. (Romanonan 1:11, 12) E okashonnan ei ta spesialmente benefisioso pa e anfitrionnan, pasobra “ta mas bendishoná pa duna ku pa risibí.”—Echonan 20:35.

[Nota]

[Plachi na página 23]

Kristiannan ‘ta praktiká hospitalidat’