Demostrá Bo Fe na Bo Manera di Biba

“Fe . . . , si e no wòrdu kompañá ku obranan, ta morto riba su mes.”—SANTIAGO 2:17.

1. Pakiko tantu fe komo obra tabata importante pa e promé kristiannan?

POR lo general, e promé kristiannan a demostrá nan fe na e manera ku nan a biba. Disipel Santiago a urgi tur kristian: “Sea kumplidónan di e palabra i no solamente tendedónan.” El a agregá: “Meskos ku e kurpa sin spiritu ta morto, asina tambe fe sin obranan ta morto.” (Santiago 1:22; 2:26) Rònt di 35 aña despues ku el a skirbi e palabranan ei, ainda hopi kristian tabata demostrá nan fe ku obranan apropiá. Pero lamentablemente, algun no tabata hasi esei. Hesus a elogiá e kongregashon na Smirna; pero, dirigiendo su mes na hopi di e miembronan di e kongregashon di Sardis, el a bisa: “Mi konosé bo obranan, ku bo tin e nòmber di ta bibu, ma bo ta morto.”—Revelashon 2:8-11; 3:1.

2. Kiko kristiannan mester puntra nan mes relashoná ku nan fe?

² P’esei Hesus a enkurashá e kristiannan di Sardis—i den un konteksto mas amplio, tur ku despues lo a lesa su palabranan—pa demostrá nan promé amor pa e bèrdat kristian i pa keda lantá den sentido spiritual. (Revelashon 3:2, 3) Kada un di nos por puntra nos mes: ‘Kiko di mi obranan? Mi akshonnan ta mustra klaramente ku mi ta hasiendo mi bèst pa demostrá mi fe den tur loke mi ta hasi, asta den e áreanan ku no ta direktamente relashoná ku e trabou di prediká òf reunionnan di kongregashon?’ (Lukas 16:10) Nos lo por papia riba hopi aspekto di bida, pero laga nos trata un di nan spesífikamente: reunionnan sosial, inkluso esnan ku hopi bes ta sigui despues di un kasamentu kristian.

Reunionnan Sosial Chikitu

3. Kiko ta e punto di bista bíbliko tokante baimentu di reunionnan sosial?

³ Mayoria di nos ta keda kontentu ora nos haña un invitashon pa un reunion sosial di kristiannan felis. Yehova ta “e Dios felis,” ku ke pa su sirbidónan ta felis. (1 Timoteo 1:11, NW) El a laga Salomon inkluí e realidat aki den Beibel: “Mi a rekomendá plaser, pasobra no tin nada [“mas mihó,” NW] pa hende bou di solo ku . . . kome, bebe i ta alegre; i esaki lo kompañ’é den su trabou duru durante di tur e dianan di su bida.” (Eklesiastés 3:1, 4, 13; 8:15) Nos por eksperensiá e alegria ei na un komementu den famia òf na otro reunionnan sosial chikitu di adoradónan berdadero.—Jòb 1:4, 5, 18; Lukas 10:38-42; 14:12-14.

4. Den kiko un persona ku ta organisá un reunion sosial mester ta interesá?

⁴ Si ta abo ta organisando un reunion sosial asina i ta responsabel p’e, bo mester pensa kuidadosamente riba loke bo ta plania, asta si ta djis un par di kreyente bo ta invitando pa un komementu i kòmbersashon ameno. (Romanonan 12:13) Lo bo ke perkurá pa “tur kos sosodé korektamente,” siguiendo “e sabiduria di ariba.” (1 Korintionan 14:40; Santiago 3:17) Apòstel Pablo a skirbi: “Sea ku boso ta kome òf bebe òf kiko ku boso ta hasi, hasi tur pa e gloria di Dios. No duna ofensa.” (1 Korintionan 10:31, 32) Kiko ta algun aspekto ku meresé atenshon spesial? Si bo pensa for di antemano riba esakinan, lo bo por ta basta sigur ku loke abo i bo invitadonan hasi lo demostrá bo fe ku akshon.—Romanonan 12:2.

Ki Tipo di Reunion Sosial Lo E Ta?

5. Pakiko e anfitrion mester konsiderá kuidadosamente si lo e sirbi bebida alkohóliko i pone músika?

⁵ Hopi anfitrion a puntra nan mes si mester sirbi bebida alkohóliko. Esei no ta nesesario pa un reunion sosial ta edifikante. Kòrda ku Hesus a perkurá kuminda pa un grupo basta grandi di hende ku a bini serka dje; el a multipliká pan ku piská. E relato no ta bisa ku el a perkurá biña milagrosamente, ounke nos sa ku e tabatin e poder pa hasi esei. (Mateo 14:14-21) Si bo disidí di sirbi bebida alkohóliko na un reunion sosial, wak pa esaki ta na un kantidat moderá, i hasi sigur ku lo tin bebida no-alkohóliko di bon smak pa esnan ku ta preferá esakinan. (1 Timoteo 3:2, 3, 8; 5:23; 1 Pedro 4:3) Nunka laga niun hende sinti nan obligá pa bebe algu ku por morde “manera kolebra.” (Proverbionan 23:29-32) Kiko di músika òf kantamentu? Si na bo reunion sosial lo tin músika, sin duda lo bo selektá e kantikanan kuidadosamente, tumando tantu e ritmo komo e letranan na konsiderashon. (Kolosensenan 3:8; Santiago 1:21) Hopi kristian a ripará ku tokamentu di Melodianan di Reino òf asta kantamentu di e kantikanan ei ta kontribuí na un bon ambiente. (Efesionan 5:19, 20) I, mas ku klaru, kontrolá e volúmen regularmente pa e músika no stroba kòmbersashon agradabel ni molestiá bisiña.—Mateo 7:12.

6. Kon un anfitrion por mustra ku e tin un fe bibu ora ta trata di kòmbersashon òf otro aktividatnan?

⁶ Na un reunion sosial, kisas kristiannan ta papia tokante vários tópiko, lesa algun informashon na bos haltu òf konta eksperensia interesante. Si e kòmbersashon desviá for di normanan kristian, e anfitrion ku takto por hib’é bèk den e direkshon korekto. Ademas, e mester paga tinu pa niun hende no dominá e kòmbersashon. Si e mira esei kuminsá tuma lugá, e por ekspresá su mes diskretamente i inkluí otro personanan den e kòmbersashon, tal bes hasiendo pregunta na hóbennan pa saka afó kiko nan ta pensa òf introdusiendo un tópiko ku ta stimulá mas di e personanan presente pa bisa algu. Grandi i chikitu lo keda enkantá ku e aspekto aki di e reunion sosial. Si abo komo anfitrion guia asuntunan na un manera sabí i ku takto, e presentenan lo ripará ku bo ta un ‘hende rasonabel.’ (Filipensenan 4:5, NW) Nan lo mira ku bo tin un fe bibu, un fe ku ta influensiá tur aspekto di bo bida.

Kasamentu i Resèpsi di Kasamentu

7. Pakiko kasamentu i e resèpsi konektá kuné ta meresé konsiderashon?

⁷ Un okashon spesial di alegria ta un kasamentu kristian. Dios su sirbidónan di pasado, entre nan Hesus i su disipelnan, gustosamente a partisipá den e okashonnan gososo ei, inkluso e bankete ku sa kompañá esakinan. (Génesis 29:21, 22; Juan 2:1, 2) Sin embargo, último tempu eksperensia a mustra klaramente ku pa e aktividatnan sosial relashoná ku kasamentu reflehá bon huisio i balansa kristian, mester hasi un esfuerso spesial pa plania esakinan bon. Kòrda ku e aktividatnan aki ta aspektonan normal di bida ku ta duna un kristian oportunidat pa demostrá su fe.

8, 9. Kon e loke ta tuma lugá na hopi kasamentu ta konfirmá loke nos ta lesa na 1 Juan 2:16 i 17?

⁸ Hopi hende ku no sa ni no ta tene kuenta ku prinsipionan ku ta agradá Dios ta mira un kasamentu komo un okashon pa hasi kosnan ekstremo, òf podisé kaminda kosnan ekstremo ta permití. Den un revista europeo, un señora ku a kaba di kasa a bisa lo siguiente tokante su kasamentu estilo “kas real”: ‘Nos a kore den un karosa halá pa kuater kabai siguí pa 12 kitoki, kada un ku su kabai, i un karosa riba kua tabatin un banda ta toka. Despues nos tabatin un bankete ekskisito i músika ekselente; tabata un kos magnífiko. Nèt manera mi a deseá, mi tabata lareina riba e dia ei.’

⁹ Ounke kustumbernan ta varia di un pais pa otro, e sintimentunan ku e señora ei a ekspresá simplemente ta konfirmá loke apòstel Juan a skirbi: “Tur loke ku tin den mundu, e deseo di karni i e deseo di wowo i e orguyo di bida [“kana prònk ku loke bo tin,” BPK], no ta bin di e Tata, sino di e mundu.” Bo por imaginá bo un pareha kristian maduro ku gana di tin un kasamentu luhoso estilo “kas real” ku un resèpsi fabuloso manera den kuenta di ada? Mas bien, nan plannan di kasamentu mester demostrá ku nan a tuma na pechu e konseho ku “esun ku hasi e boluntat di Dios ta permanesé pa semper.”—1 Juan 2:16, 17.

10. (a) Pa un kasamentu rasonabel, pakiko planiamentu ta esensial? (b) Ki desishon e pareha lo mester tuma relashoná ku e invitadonan?

¹⁰ Parehanan kristian ke ta realístiko pero tambe rasonabel, i Beibel por yuda nan. Ounke e dia di kasamentu ta un dia importante, nan sa ku esei ta apénas e kuminsamentu di e bida kasá di dos kristian ku tin bida eterno nan dilanti. Nan no ta obligá pa pone un fiesta di kasamentu grandi. Si nan disidí di tene un resèpsi, nan lo ke kalkulá e gastunan enbolbí i pensa riba ki tipo di fiesta e mester bira. (Lukas 14:28) Den nan bida kristian huntu, segun Beibel, e esposo lo ta kabes di famia. (1 Korintionan 11:3; Efesionan 5:22, 23) Pues e brùidehòm ta karga e responsabilidat prinsipal pa e resèpsi. Di mes, lo e konsultá amorosamente ku su futuro esposa riba asuntunan manera ken nan ke òf por invitá na e fiesta di kasamentu. Kisas no ta posibel ni práktiko pa invitá tur nan amigu- i famianan; p’esei, nan lo mester tuma algun desishon ku modestia. E pareha mester por tin e konfiansa ku si nan no por invitá algun ruman kristian, esakinan lo komprondé i lo no sinti nan ofendí.—Eklesiastés 7:9.

“Direktor dje Fiesta”

11. Kiko por ta e funshon di un ‘direktor di fiesta’ na un kasamentu?

¹¹ Si un pareha disidí di pone un resèpsi pa selebrá e kasamentu, kon nan por hasi sigur ku e okashon ta reflehá dignidat? Pa hopi aña kaba, Testigunan di Yehova a mira ku ta sabí pa inkluí un aspekto menshoná en konekshon ku e fiesta na kua Hesus a asistí na Kana. Ei tabatin un ‘direktor di fiesta,’ siguramente un kompañero di kreensia responsabel. (Juan 2:9, 10, NW) Meskos tambe un brùidehòm sabí lo skohe un ruman hòmber kristian spiritualmente maduro pa e funshon importante aki. A base di e brùidehòm su deseo- i preferensianan, e direktor di fiesta por perkurá pa e detayenan tantu promé komo durante e resèpsi.

12. Kiko e brùidehòm mester tuma na konsiderashon relashoná ku uso di bebida alkohóliko?

¹² Na armonia ku loke nos a konsiderá den paragraf 5, algun pareha ta disidí di ekskluí bebida alkohóliko for di e fiesta di kasamentu pa evitá ku bebementu di mas por daña e ambiente di alegria i stroba e éksito di e okashon. (Romanonan 13:13; 1 Korintionan 5:11) Ma si nan inkluí bebida alkohóliko, e brùidehòm mester hasi sigur ku ta sirbi òf pone esaki disponibel ku moderashon. Na e kasamentu kaminda Hesus a asistí na Kana tabatin biña, i el a suministrá biña di ekselente kalidat. Ta interesante pa nota ku e direktor di e fiesta ei a remarká: “Tur hende ta sirbi e bon biña promé, i despues ku e hendenan a bebe basta, esun di kalidat inferior; ma abo a warda e bon biña te awor.” (Juan 2:10) Hesus sigur no a kontribuí na ningun buracheria pasobra el a konsiderá esei algu malu. (Lukas 12:45, 46) Ora e direktor a ekspresá su asombro pa e kalidat di e biña, el a duna di komprondé ku na otro okashonnan el a yega di tuma nota ku algun invitado na kasamentu a bebe i bira burachi. (Echonan 2:15; 1 Tesalonisensenan 5:7) P’esei, tantu e brùidehòm komo e kristian konfiabel ku e ta apuntá komo direktor di fiesta mester hasi sigur ku tur persona presente ta sigui e siguiente instrukshon kla: “No bebe biña bira burachi, pasobra esei ta libertinahe.”—Efesionan 5:18; Proverbionan 20:1; Oseas 4:11.

13. Kiko un pareha mester tene kuenta kuné si nan inkluí músika na nan fiesta di kasamentu, i pakiko?

¹³ Meskos ku den otro reunionnan sosial, si ta bai tin músika, mester duna debido atenshon na e volúmen pa no stroba e invitadonan di kòmbersá ku otro. Un ansiano kristian a remarká: “Segun ku e anochi ta transkurí, ora kòmbersashon bira mas animá òf bailamentu kuminsá, tin biaha e volúmen di e músika ta subi. Loke ta kuminsá komo músika den background por bira duru i stroba kòmbersashon. Un resèpsi di kasamentu ta duna e invitadonan chèns di papia ku otro den un forma ameno. Lo ta masha lamentabel pa laga músika duru pone e oportunidat aki bai pèrdí!” Aki tambe e brùidehòm i direktor di fiesta tin ku aktua na un manera responsabel i no laga e kontròl riba e tipo di músika i volúmen den man di e músikonan, sea ku esakinan ta kontratá òf nò. Pablo a skirbi: “Tur loke boso hasi ku palabra òf ku echo, hasi tur den e nòmber di Señor Hesus.” (Kolosensenan 3:17) Ora e invitadonan bai kas despues di un fiesta òf resèpsi di kasamentu, nan lo kòrda ku e músika tambe a demostrá ku e pareha a hasi tur kos den nòmber di Hesus? Esei lo mester ta e kaso.

14. Ki grato rekuerdo kristiannan mester tin di un kasamentu?

¹⁴ Sí, un kasamentu bon organisá por trese grato rekuerdo. Adam ku Edyta, kendenan tin 30 aña kasá, a remarká tokante un kasamentu: “Bo por a ègt sinti e ambiente kristian. Tabatin algun kantika di alabansa na Yehova pero tambe algun otro bon entretenimentu. Bailamentu i músika no tabata dje importante ei. E fiesta tabata dushi i edifikante, i tur kos a kana na armonia ku prinsipionan bíbliko.” Ta bon kla anto ku tin hopi kos ku tantu e brùit komo e brùidehòm por hasi pa demostrá nan fe na nan manera di aktua.

Regalo di Kasamentu

15. Ki konseho di Beibel nos por apliká en konekshon ku regalo di kasamentu?

¹⁵ Den hopi pais tin e kustumber ku amigu i famia ta trese regalo pa esnan ku ta kasa. Si abo skohe pa hasi esei, kiko bo mester tene kuenta kuné? Wèl, kòrda e komentario di apòstel Juan tokante “kana prònk ku loke bo tin.” El a konektá e bromamentu ei, no ku kristiannan ku ta manifestá nan fe ku akshon, sino ku ‘e mundu ku ta pasa bai.’ (1 Juan 2:16, 17; BPK) En bista di e opservashon inspirá aki di Juan, personanan resien kasá mester anunsiá públikamente nòmber di e invitadonan ku a trese regalo? Kristiannan di Masedonia i Akaya a duna kontribushon pa e rumannan na Yerusalèm, pero no tin ningun indikashon ku nan nòmber a ser publiká. (Romanonan 15:26) Hopi kristian ku ta duna regalo di kasamentu lo ke keda anónimo en bes di atraé indebido atenshon na nan mes. En konekshon ku esaki, repasá Hesus su konseho na Mateo 6:1-4.

16. Kon personanan resien kasá por evitá di ofendé otro hende en konekshon ku regalo di kasamentu?

¹⁶ Identifikashon di esnan ku a trese regalo por ‘instigá kompetensia’ enkuanto ken a trese e mihó regalo òf esun di mas kostoso. Pues, kristiannan sabí ku kaba di kasa lo no anunsiá públikamente nòmber di esnan ku a trese regalo. Esei lo por pone otronan ku podisé no por a trese regalo sinti bèrgwensa. (Galationan 5:26, NW; 6:10) Klaru ku no tin nada malu pa e brùit i brùidehòm sa ken a trese sierto regalo. Kisas nan por haña sa esei a base di un tarheta ku ta bini huntu ku e regalo pero ku no ta ser lesá públikamente. Ora di kumpra, duna i risibí regalo di kasamentu, nos tur ta haña chèns di demostrá ku asta den un asuntu privá asina, nos fe ta determiná kon nos ta aktua.a

17. Ki meta kristiannan mester tin relashoná ku nan fe i obranan?

¹⁷ Sin duda, e asuntu di demostrá nos fe ta enserá mas ku hiba un bida moralmente limpi, asistí na reunionnan kristian i partisipá den e trabou di prediká. Laga kada un di nos tin un fe bibu ku ta influensiá tur loke nos ta hasi. Sí, nos por demostrá nos fe pa medio di akshonnan “plenamente ehekutá,” inkluso esnan den e áreanan di bida konsiderá den e artíkulo aki.—Revelashon 3:2, NW.

18. Kon e palabranan na Juan 13:17 por resultá sierto en konekshon ku kasamentu- i reunionnan sosial di kristiannan?

¹⁸ Despues ku Hesus a pone un ehèmpel ekselente pa su fiel apòstelnan pa medio di e akto humilde di laba nan pia, el a bisa nan: “Si boso sa e kosnan aki, boso ta bendishoná [“felis,” NW] si boso hasi nan.” (Juan 13:4-17) Kaminda nos ta biba awe kisas no ta nesesario ni normal pa laba pia di otro hende, por ehèmpel di un huéspet ku ta bini nos kas. Pero manera nos a konsiderá den e artíkulo aki, tin otro aspektonan di bida den kua nos por manifestá nos fe pa medio di akshonnan amoroso i bondadoso, inkluso esnan relashoná ku reunionnan sosial i kasamentu kristian. Nos por manifestá esei, sea nos ta bai kasa òf ta huéspet na un kasamentu òf un resèpsi gososo di kasamentu entre kristiannan ku ke demostrá nan fe pa medio di nan akshonnan.

[Nota]

Kon Lo Bo Kontestá?

Kon bo por demostrá bo fe

• ora di organisá un reunion sosial?

• ora di organisá un kasamentu òf resèpsi?

• ora di duna òf risibí regalo di kasamentu?

[Plachi na página 24]

Asta ora bo ta invitá djis un par di hende, laga “e sabiduria di ariba” guia bo