Someté Bo Humildemente Na Wardadónan Amoroso
“Sea obediente na esnan ku ta hiba delantera den boso i sea sumiso.”—HEBREONAN 13:17, NW.
1, 2. Kua tekstonan ta mustra ku Yehova i Hesus ta Wardadónan amoroso?
YEHOVA DIOS i su Yu, Hesukristu, ta Wardadónan amoroso. Isaias a profetisá: “Mira, Señor DIOS ta bin ku poder, i su brasa lo goberná p’e. . . . Manera un wardadó di karné e lo kuida [“pastoriá,” NW] su tou, e lo kohe e lamchinan den su brasa, i tene nan serka di su kurason; ku ternura e lo guia esnan ku tin yu chikitu.”—Isaias 40:10, 11.
2 E profesia ei di restorashon a kumpli pa promé biaha ora un restu hudiu a regresá Huda na aña 537 promé ku nos era. (2 Krónikanan 36:22, 23) El a bolbe kumpli ora e Siro Mayor, Hesukristu, a libra e restu ungí for di ‘Babilonia e Grandi’ na 1919. (Revelashon 18:2; Isaias 44:28) E ta e “brasa” di Yehova pa goberná, reuní e karnénan huntu i pastoriá nan ku ternura. Hesus mes a deklará: “Ami ta e bon wardadó; i mi konosé esnan ku ta di mi, i esnan ku ta di mi, konosé mi.”—Juan 10:14.
3. Kon Yehova a mustra interes amoroso den e trato ku su karnénan ta risibí?
3 E profesia di Isaias 40:10 i 11 ta enfatisá e ternura ku Yehova ta pastoriá su pueblo kuné. (Salmo 23:1-6) Durante Hesus su ministerio riba tera, e tambe a demostrá un interes tierno den su disipelnan i den hende en general. (Mateo 11:28-30; Marko 6:34) Tantu Yehova komo Hesus a kondená e manera sin heful ku e wardadónan, òf lidernan, di Israel a trata e pueblo. Sin ningun bèrgwensa nan a neglishá i manipulá nan tounan. (Ezekiel 34:2-10; Mateo 23:3, 4, 15) Yehova a primintí: “Ami lo libra mi tou i nan lo no ta proi mas; anto lo mi husga entre esun karné i e otro. E ora ei lo mi pone ún wardadó riba nan, mi sirbidó David, i e lo alimentá nan; e mes lo alimentá nan i lo ta nan wardadó.” (Ezekiel 34:22, 23) Den e tempu di fin aki, Hesukristu, e David Mayor, ta esun “wardadó” ku Yehova a nombra riba tur Su sirbidónan riba tera, tantu e kristiannan ungí ku spiritu komo e “otro karnénan.”—Juan 10:16.
Donnan di Dios na e Kongregashon
4, 5. (a) Ki don presioso Yehova a duna su pueblo riba tera? (b) Ki don Hesus a duna su kongregashon?
4 Dor di pone “ún wardadó”—Hesukristu—riba Su sirbidónan aki riba tera, Yehova a duna e kongregashon kristian un don òf regalo presioso. E profesia di Isaias 55:4 a papia di e don aki den forma di un Lider selestial: “Mira, mi a hasié un testigu pa e pueblonan, un lider i komandante pa e pueblonan.” Tantu kristiannan ungí komo miembronan di e “multitut grandi” ta ser rekohé for di tur grupo nashonal, tribu, pueblo i lenga. (Revelashon 5:9, 10; 7:9) Nan ta forma un kongregashon internashonal, “ún tou,” bou di e liderato di “ún wardadó,” Kristu Hesus.
5 Hesus, na su turno, a duna un don presioso na su kongregashon riba tera. El a perkurá pa supwardadónan fiel ku, imitando e ehèmpel di Yehova i Hesus, ta pastoriá e tou ku ternura. Apòstel Pablo a papia di e don amoroso aki den su karta dirigí n’e kristiannan na Efeso. El a skirbi: “‘Ora ku el a subi bai den haltura, el a hiba un ehérsito di katibunan komo katibu, i el a duna donnan [den] hende.’ . . . El a duna algun komo apòstel, i algun komo profeta, i algun komo evangelista, i algun komo pastor [òf wardadó] i siñadó, pa ekipá [“reahustá,” NW] e santunan pa e trabou di sirbishi, pa edifiká e kurpa di Kristu.”—Efesionan 4:8, 11, 12.
6. Kon Revelashon 1:16 i 20 ta deskribí e superintendentenan ungí ku a sirbi den kuerponan di ansiano, i kiko nos por bisa di ansianonan nombrá ku ta di e otro karnénan?
6 E “donnan den hende” aki ta superintendente, òf ansiano, ku Yehova i su Yu ta nombra pa medio di spiritu santu, pa pastoriá e tou ku ternura. (Echonan 20:28, 29) Den kuminsamentu, tur e superintendentenan aki tabata hòmbernan kristian ungí. Revelashon 1:16 i 20 ta usa “strea” òf ‘angel’ den Kristu su man drechi, esta bou di su kontròl, pa simbolisá esnan ku tabata sirbi den kuerpo di ansiano den e kongregashon ungí. Sin embargo, den e tempu di fin aki, ya ku e kantidat di superintendente ungí riba tera ta menguando ketu bai, e mayoria inmenso di ansiano kristian den e kongregashonnan ta di e otro karnénan. En bista di ku ta representantenan di e Kuerpo Gobernante ta nombra e rumannan aki bou di guia di spiritu santu, nos por bisa ku nan tambe ta den e man drechi (òf, bou di guia) di e Gran Wardadó, Hesukristu. (Isaias 61:5, 6) Siendo ku e ansianonan den nos kongregashonnan ta someté nan na Kristu, Kabes di e kongregashon, nan ta meresé nos pleno koperashon.—Kolosensenan 1:18.
Obedensia i Sumishon
7. Ki konseho apòstel Pablo a duna relashoná ku nos aktitut pa ku superintendentenan kristian?
7 Nos Wardadónan selestial, Yehova Dios i Hesukristu, ta ferwagt ku nos ta obediente i sumiso na e supwardadónan ku nan a pone den posishonnan di responsabilidat den e kongregashon. (1 Pedro 5:5) Apòstel Pablo a skirbi bou di inspirashon: “Kòrda esnan ku ta hibando delantera entre boso, ku a papia e palabra di Dios ku boso, i segun boso ta kontemplá e resultado di nan kondukta, imitá nan fe. Sea obediente na esnan ku ta hiba delantera den boso i sea sumiso, pasobra nan ta vigilá riba boso alma komo esnan ku lo duna kuenta, pa nan hasi esaki ku goso i no ku suspiro, pasobra esei lo ta perhudisial pa boso.”—Hebreonan 13:7, 17, NW.
8. Kiko Pablo ta invitá nos pa “kontemplá,” i kon nos mester ta “obediente”?
8 Tuma nota ku Pablo ta invitá nos pa “kontemplá,” òf konsiderá kuidadosamente, e resultado di e kondukta fiel di e ansianonan i pa sigui e ehèmpelnan di fe ei. Ademas, e ta konsehá nos pa ta obediente i pa someté nos na e guia di e hòmbernan nombrá aki. E erudito di Beibel R. T. France ta splika ku den e idioma griego original, e palabra tradusí aki komo “sea obediente” no ta “e término usual pa obedensia, sino literalmente pa ‘ser persuadí,’ lokual ta enserá aseptá nan guia di buena gana.” Pues, nos ta obedesé e ansianonan no solamente pasobra e Palabra di Dios ta manda nos hasi esei sino tambe pasobra nos ta konvensí ku nan tin e interesnan di Reino i nos mihó interesnan na pechu. Si nos aseptá nan guia di buena gana, sigur nos lo ta felis.
9. Ademas di ta obediente, pakiko nos mester ta “sumiso”?
9 Pero kiko nos mester hasi si den un sierto kaso nos no ta konvensí ku e guia di e ansianonan ta e mihó manera di hasi kosnan? Ei ta kaminda nos sumishon ta drenta den wega. Ta fásil pa obedesé ora tur kos ta bisto i nos ta di akuerdo, pero nos lo demostrá ku nos ta berdaderamente sumiso si nos sede asta ora nos mes no ta komprondé e motibu di sierto instrukshon. Pedro, kende despues a bira apòstel, a demostrá e klase di sumishon aki.—Lukas 5:4, 5.
Kuater Motibu pa Koperá di Buena Gana
10, 11. Den ki manera superintendentenan “a papia e palabra di Dios” ku nan rumannan kristian den e promé siglo i awe?
10 Na Hebreonan 13:7 i 17, sitá ariba, apòstel Pablo ta duna kuater motibu pakiko nos mester ta obediente i sumiso na superintendentenan kristian. E promé ta ku nan “a papia e palabra di Dios” ku nos. Kòrda ku e “donnan den hende” ku Hesus ta duna e kongregashon ta pa “reahustá e santunan.” (Efesionan 4:11, 12) El a reahustá e manera di pensa i kondukta di e kristiannan di promé siglo pa medio di supwardadónan fiel, di kua algun bou di inspirashon a skirbi kartanan n’e kongregashonnan. El a usa tal superintendentenan nombrá pa medio di spiritu santu pa guia i fortalesé e promé kristiannan.—1 Korintionan 16:15-18; 2 Timoteo 2:2; Tito 1:5.
11 Awe, Hesus ta dirigí nos pa medio di “e esklabo fiel i prudente,” representá pa su Kuerpo Gobernante i e ansianonan nombrá. (Mateo 24:45) Debí na nos rèspèt pa “e wardadó prinsipal,” Hesukristu, nos ta sigui e konseho di Pablo: “Apresiá esnan ku ta traha diligentemente meimei di boso, i ku ta guia boso den Señor i ta spièrta boso.”—1 Pedro 5:4; 1 Tesalonisensenan 5:12; 1 Timoteo 5:17.
12. Kon superintendentenan ta “vigilá riba [nos] alma”?
12 Un di dos motibu pakiko nos mester koperá ku superintendentenan kristian ta ku “nan ta vigilá riba [nos] alma.” Si nan detektá kualke kos den nos aktitut òf komportashon ku por pone nos relashon ku Dios na peliger, nan ta kla pa duna nos e konseho nesesario ku e meta pa reahustá nos. (Galationan 6:1) E palabra griego tradusí komo “vigilá” ta nifiká literalmente “keda sin drumi.” Segun un erudito di Beibel, e ta “enserá e vigilansia konstante di e wardadó.” Fuera di ku ansianonan ta mantené nan vigilansia spiritual, nan por asta pèrdè soño pa motibu ku nan ta preokupá ku nos bienestar spiritual. Nos mester koperá di buena gana ku e supwardadónan amoroso ei, kendenan ta hasi nan bèst pa imitá e manera amoroso ku Hesukristu, “e gran Wardadó di e karnénan,” ta kuida e tou, no ta bèrdat?—Hebreonan 13:20.
13. Na ken i den ki manera superintendentenan i tur kristian tin ku duna kuenta?
13 Un di tres motibu pakiko nos mester koperá di buena gana ku e superintendentenan ta ku nan ta vigilá riba nos “komo esnan ku lo duna kuenta.” Superintendentenan ta kòrda ku nan ta supwardadónan ku ta sirbi bou di e Wardadónan selestial, Yehova Dios i Hesukristu. (Ezekiel 34:22-24) Yehova ta Doño di e karnénan, ku “el a kumpra ku e sanger di su propio Yu,” i superintendentenan nombrá mester duna kuenta na dje pa e manera ku nan ta trata Su tou. E ke pa nan trata e tou “ku ternura.” (Echonan 20:28, 29, NW) P’esei, nos tur tin ku duna kuenta na Yehova pa e manera ku nos ta reakshoná riba su guia. (Romanonan 14:10-12) Nos obedensia na ansianonan nombrá ta duna evidensia tambe di nos sumishon na Kristu, kende ta kabes di e kongregashon.—Kolosensenan 2:19.
14. Kiko lo por pone superintendentenan kristian sirbi “ku suspiro,” i ku ki resultado?
14 Pablo a duna un di kuater motibu pakiko nos mester someté nos humildemente na superintendentenan kristian. El a skirbi: “Pa nan hasi esaki ku goso i no ku suspiro, pasobra esei lo ta perhudisial pa boso.” (Hebreonan 13:17, NW) Ku nan responsabilidatnan di peso pa instruí, pastoriá, hiba delantera den e trabou di prediká, kria nan famia i atendé problema den e kongregashon, ansianonan kristian tin un trabou pisá. (2 Korintionan 11:28, 29) Si nos keda sin koperá ku nan, ta mas difísil so nos ta hasi nan trabou. Esaki lo pone nan ‘suspirá.’ Ora nos no ta gusta koperá, esei ta desagradá Yehova, lokual por perhudiká nos. Di otro banda, ora nos ta mustra e debido rèspèt i koperashon, e ansianonan por kumpli ku nan debernan ku goso, i esaki ta kontribuí na union i partisipashon gososo den e obra di prediká e Reino.—Romanonan 15:5, 6.
Demostrá Nos Sumishon
15. Kon nos por demostrá nos obedensia i sumishon?
15 Tin hopi manera práktiko den kua nos por koperá ku superintendentenan nombrá. Ku e idea di adaptá nos na sirkunstansianan nobo den e teritorio, e ansianonan a hasi areglo pa tene reunionnan pa sirbishi di vèlt riba dianan i na oranan ku tin biaha ta rekerí kambionan den nos rutina? Laga nos hasi esfuerso pa apoyá e areglonan nobo aki. Nos lo por risibí bendishonnan sorprendente. E superintendente di sirbishi ta bishitando nos Estudio di Buki di Kongregashon? Laga nos partisipá mas tantu posibel den e trabou di prediká e siman ei. Nos a risibí un asignashon den e Skol di Ministerio Teokrátiko? Nos mester hasi esfuerso pa ta presente i pa kumpli ku nos asignashon. E superintendente di Estudio di Buki di Kongregashon a anunsiá ku nos grupo ta na bùrt pa limpia e Salòn di Reino? Wèl, te asina leu ku nos salú i forsa ta permití, laga nos dun’é nos pleno apoyo. Den e maneranan aki i den hopi otro manera, nos ta demostrá nos sumishon na e hòmbernan ku Yehova i su Yu a nombra pa kuida e tou.
16. Si un ansiano no ta hasi sierto kosnan segun instrukshon, pakiko esaki no ta motibu pa nos rebeldiá?
16 Por sosodé ku un ansiano no ta hasi sierto kosnan segun e instrukshon di e klase di e esklabo fiel i su Kuerpo Gobernante. Si e sigui aktua asina, lo e tin ku duna kuenta na Yehova, “e wardadó i kuidadó di [nos] alma.” (1 Pedro 2:25) Pero si un ansiano kometé un fayo òf ekibokashon, esei no ta motibu pa nos keda sin obedesé. Yehova no ta bendishoná desobedensia ni rebeldia.—Numbernan 12:1, 2, 9-11.
Yehova Ta Bendishoná Koperashon di Buena Gana
17. Kiko mester ta nos aktitut pa ku nos superintendentenan?
17 Yehova Dios sa ku e hòmbernan ku el a nombra komo superintendente ta imperfekto. Asina mes e ta usando nan, i pa medio di su spiritu, e ta pastoriá su pueblo riba tera. Loke ta konta pa ansiano—i pa nos tur—ta ku “e poder mas ayá di loke ta normal [ta] di Dios i no loke ta bini di nos mes.” (2 Korintionan 4:7, NW) P’esei nos mester gradisí Yehova pa loke e ta logrando pa medio di nos superintendentenan fiel, i nos mester koperá ku nan di buena gana.
18. Kiko nos ta hasiendo en realidat ora nos someté nos na nos superintendentenan?
18 Superintendentenan ta hasi nan bèst pa kumpli ku e deskripshon ku Yehova a duna di wardadónan nombrá riba su tou den e último dianan, manera Jeremias 3:15 ta trese dilanti: “Lo mi duna boso wardadónan di karné segun mi kurason, kendenan lo alimentá boso ku konosementu i komprondementu.” Siguramente e ansianonan den nos seno ta hasiendo un ekselente trabou di siña i protehá e karnénan di Yehova. Laga nos sigui demostrá nos apresio pa nan trabou duru dor di koperá ku nan di buena gana, obedesé nan i someté nos na nan. Ora nos hasi esei, nos lo demostrá nos apresio pa nos Wardadónan selestial, Yehova Dios i Hesukristu.
Komo Repaso
• Kon Yehova i Hesukristu a demostrá ku nan ta Wardadónan amoroso?
• Ademas di obedesé, pakiko sumishon ta nesesario?
• Den ki maneranan práktiko nos por demostrá nos sumishon?
[Plachi na página 27]
Ansianonan kristian ta someté nan na e liderato di Kristu
[Plachinan na página 29]
Tin hopi manera pa demostrá nos sumishon na e wardadónan nombrá di Yehova