Un Gobernante Riku No A Tuma un Bon Desishon

E GOBERNANTE riku i hóben tabata un hende rekto, obediente na lei i religioso. El a bai serka Hesus, a kai na rudia su dilanti i a puntra: “Bon Maestro, kiko mi mester hasi pa heredá bida eterno?”

E kontesta ku Hesus a duna a indiká ku pa e hòmber haña bida e mester a warda Dios su mandamentu. Ora e gobernante a pidié pa ta mas spesífiko, Hesus a kontestá: “‘No mata; no kometé adulterio; no hòrta; no duna testimonio falsu; onra bo tata i bo mama,’ i ‘stima bo próhimo manera bo mes.’” E mandamentunan fundamental aki ta parti di e Lei ku Dios a duna Moisés. Despues, e hòmber a bisa: “Tur e kosnan aki mi a warda. Kiko mas mi falta?”—Mateo 19:16-20.

Hesus “a stim’é” i a bis’é: “Un kos bo falta: bai i bende tur loke bo tin, i duna na hende pober, i lo bo tin tesoro den shelu; i bin, sigui mi.”—Marko 10:17-21.

E gobernante hóben a hañ’é konfrontá ku un desishon serio ku e mester a tuma. Kiko lo el a hasi? Lo e tabata dispuesto pa bende su kosnan material i bira un siguidó di Hesus òf lo el a keda ku nan? Lo el a buska tesoro riba tera òf den shelu? Esei mester tabata un desishon difísil pa tuma. Ta bisto ku e tabata interesá den kosnan spiritual, ya ku e tabata warda e Lei i tabata ke sa kiko mas e por a hasi pa gana e fabor di Dios. Kiko el a disidí di hasi? El “a bai tur tristu, pasobra e tabata doño di hopi propiedat.”—Marko 10:22.

E gobernante hóben no a tuma un bon desishon. Si el a bira un sirbidó fiel di Hesus, lo e por a haña loke e tabata buska, esta bida eterno. Nos no sa kiko a pasa despues ku e hòmber hóben ei. Pero loke sí nos sa ta ku mas o ménos kuater dekadá despues, e ehérsito romano a destruí Yerusalèm i un gran parti di Hudea. Hopi hudiu a pèrdè tantu nan rikesa komo nan bida.

Na kontraste ku e gobernante hóben, apòstel Pedro i otro disipelnan sí a skohe bon. Nan “a bandoná tur kos” i a sigui Hesus. E desishon ku nan a tuma sí tabata benefisioso pa nan! Hesus a bisa nan ku nan lo haña mas tantu di loke nan a laga atras. Ademas, nan lo heredá bida eterno. P’esei nan no tabatin ningun motibu pa lamentá despues.—Mateo 19:27-29.

Nos tur tin ku tuma desishonnan den bida; tin ta chikí i tin ta grandi. Ki konseho Hesus a duna enkuanto desishonnan asina? Abo lo aseptá su konseho? Si bo hasi esei, lo bo ser rekompensá rikamente. Laga nos ban wak awor kon nos por sigui Hesus i benefisiá for di loke el a bisa.