Abo A Drenta e Sosiegu di Dios?

“E palabra di Dios ta bibu i aktivo.”​—HEB. 4:12.

 1. Kon nos por drenta e sosiegu di Dios awe, i dikon tin biaha ta difísil pa obedesé Dios?

DEN e artíkulo anterior, nos a mira ku nos por drenta e sosiegu di Dios solamente si nos ta obedes’é i ta sigui e guia di su organisashon. Ta mediante nos obedensia nos ta demostrá ku nos ke pa Dios su propósito kumpli. Pero no tur ora ta fásil pa obedesé Dios. Por ehèmpel, kon nos lo reakshoná si nos haña sa ku nos tin ku stòp di hasi algu ku nos gusta pero ku ta desagradá Yehova? Si nos reakshoná malu, esei ta indiká ku nos no ta “kla pa obedesé.” (Sant. 3:17, NW) E artíkulo akí ta trata vários situashon den kua nos tin e oportunidat di demostrá ku nos ta kla pa obedesé Dios na tur momento.

2, 3. Kiko nos mester sigui hasi pa agradá Yehova?

² Kiko di abo? Bo ta kla pa obedesé konseho basá riba Beibel? Pensa riba esaki: Beibel ta bisa ku Yehova ta yama hende ku e ta trese den su organisashon su “tesoronan.” (Hag. 2:7, BPK) Pues hende ku ta stima loke ta bon ta presioso den bista di Dios. Ta sierto ku mayoria di nos tabata hasi kosnan malu promé ku nos a konosé e bèrdat. Pero amor pa Dios i pa su Yu i un deseo fuerte pa agradá Dios ta loke a motivá nos pa hasi kambionan signifikativo den nos bida. I ku yudansa di Yehova i hopi orashon i esfuerso, nos a logra hasi e kambionan nesesario. Finalmente, nos por a batisá.​—Lesa 1 Tesalonisensenan 4:1.

³ Pero nos lucha no a terminá na nos boutismo. Tanten ku nos ta imperfekto, nos tin ku sigui hasi kambio den nos bida i traha duru pa hasi loke ta bon. Pero nos por ta sigur ku Yehova lo yuda nos si nos ta sigui hasi esfuerso pa agrad’é.

Ora Nos Tin ku Hasi Kambio

 4. Menshoná tres medio ku Yehova ta usa pa duna nos konseho bíbliko.

⁴ Pa nos por hasi kambio den nos bida, nos mester sa kiko ta e kosnan ku nos ta hasi ku ta malu den bista di Dios. I Yehova ta kla pa yuda nos den diferente manera. Kisas e ta yuda nos via un diskurso na Salòn di Reino òf via un artíkulo den nos revistanan. Tin biaha asta despues di a skucha un diskurso òf lesa un publikashon ainda nos no ta komprondé ku nos mester hasi kambio. Den e kaso ei, Yehova por usa sea un ruman muhé òf un ruman hòmber den kongregashon pa korigí nos bondadosamente.​—Lesa Galationan 6:1.

 5. Kon nos ta reakshoná tin bes ora nos haña konseho, i dikon ansianonan mester sigui hasi esfuerso pa yuda e rumannan?

⁵ Nos tin ku bisa sí ku no ta fásil pa aseptá korekshon di un otro hende imperfekto ni maske e duna nos e konseho na un manera bondadoso i ku takto. Pero nos tin ku kòrda ku ta Yehova Dios a manda ansianonan pa trata di “restorá” nos “den un spiritu di mansedumbre,” esta pa korigí nos ku suavedat. (Gal. 6:1) Si nos aseptá nan yudansa, nos lo bira asta mas presioso den Yehova su bista. Awor pensa un ratu riba esaki: Vários biaha nos ta ekspresá den orashon ku nos ta imperfekto i ku nos ta kometé hopi eror. Pero kisas ora un ansiano hala nos atenshon riba sierto fayo ku nos a kometé, nos ta kla pa defendé nos mes. Kisas nos ta purba hustifiká nos mes òf hasi komo si fuera e eror no ta dje grave ei. Òf, podisé nos ta kuestioná e motibunan di e ansiano ku ta duna nos e konseho, pensando ku e ta korigí nos djis pasobra e no gusta nos. Òf kisas nos ta sinti ku e no a papia na un manera bondadoso ku nos. (2 Rei. 5:11) Tin di nos por asta rabia si e ansiano konsehá nos riba asuntunan delikado, manera por ehèmpel, e kondukta di un miembro di nos famia, nos manera di bisti i areglá nos mes, nos higiena personal òf tokante e tipo di rekreo ku nos ta skohe pero ku Yehova ta odia. I debí ku nos ta sinti nos ofendí, nos por reakshoná na un manera ku por laga e ruman ku ta hasi esfuerso pa yuda nos sintié malu. Pero despues, ora nos rabia baha, probablemente nos ta bin aseptá ku loke e ruman a bisa nos ta pa nos mes bon.

 6. Kon e palabra di Dios ta saka “pensamentunan i intenshonnan di kurason” na kla?

⁶ Hebreonan 4:12, e teksto sentral di e artíkulo akí, ta bisa ku e palabra di Dios ta “aktivo.” Esaki ta nifiká ku e palabra di Dios tin poder pa kambia hende. Dios su palabra a yuda nos hasi kambio den nos bida pa nos por a batisá i su palabra ta sigui yuda nos despues di boutismo. Pablo a skirbi den su karta na e hebreonan ku e palabra di Dios ta “penetrá te na e divishon di alma i spiritu” i ku esaki por “husga e pensamentunan i intenshonnan di kurason.” (Heb. 4:12) Aki, “alma” ta referí na e hende ku nos ta di pafó, esta, loke otro hende por mira. E “spiritu” ta referí na e hende ku nos ta di paden, loke otro hende no por mira. Pues, loke Pablo tabata ke men ta ku si nos a komprondé bon loke Dios ta spera di nos, nos echonan lo revelá e persona ku nos realmente ta di paden. Pero nos echonan semper ta na armonia ku e hende ku nos ta di paden? (Lesa Mateo 23:​27 i 28.) Pensa kon abo lo reakshoná den e siguiente situashonnan.

Ora e Organisashon di Yehova Introdusí Kambio

7, 8. (a) Dikon algun kristian hudiu kier a sigui kumpli ku algun aspekto di e Lei di Moisés? (b) Dikon nos por bisa ku nan tabata bai kontra e propósito di Yehova?

⁷ Hopi di nos sa e teksto di Proverbionan 4:18 for di kabes: “E berea di e hustu ta manera lus di ourora, ku ta bria mas i mas te ora ku bira di dia kla.” Esaki ta nifiká ku segun ku tempu ta pasa, nos ta komprondé mihó loke Yehova ta spera di nos i ku nos lo mehorá nos kondukta.

⁸ Manera nos a siña kaba den e artíkulo anterior, hopi kristian di orígen hudiu a sigui kumpli ku e Lei di Moisés despues ku Hesus a muri. (Echo. 21:20) Pablo a splika bon kla ku kristiannan no mester a kumpli ku e Lei di Moisés mas, pero algun di nan no kier a aseptá esei. (Kol. 2:​13-15) Dikon nò? Kisas nan a pensa ku si nan a sigui kumpli ku algun aspekto di e Lei, e hudiunan lo no a persiguí nan. Pero Pablo a mustra bon kla den su karta na e hebreonan ku esnan ku ta sigui bai kontra e propósito di Dios lo no drenta Su sosiegu.a (Heb. 4:​1, 2,  6; lesa Hebreonan 4:11.) Pues nan mester a aseptá ku awor Yehova tabata ke pa su pueblo ador’é di un otro manera pa nan por a risibí su aprobashon.

 9. Ki aktitut nos mester tin ora e esklabo fiel i prudente ahustá un splikashon bíbliko?

⁹ Den nos tempu tambe nos a mira ku e organisashon di Yehova ta ahustá algun siñansa bíbliko. Nos mester keda kontentu ku e kambionan akí, pasobra esei ta un indikashon ku Yehova ta usando e esklabo fiel i prudente pa siña nos e bèrdat. Ora e Kuerpo Gobernante, ku ta representá e esklabo fiel i prudente, diserní ku mester korigí òf klarifiká un splikashon ku nan a duna den pasado di algun bèrdat bíbliko, nan no ta duda pa hasi esei. Nan sa ku algun hende lo papia malu di e esklabo fiel i prudente debí na e kambionan akí, pero loke ta mas importante pa nan ta traha na armonia ku e propósito di Dios. Kon abo ta reakshoná ora e esklabo fiel i prudente ahustá un splikashon bíbliko? Nos no ke ta manera e fariseonan ku a preferá biña bieu en bes di e siñansanan refreskante di Hesus, loke el a kompará ku biña nobo.​—Lesa Lukas 5:39.

10, 11. Kon algun Studiante di Beibel a reakshoná ora a introdusí métodonan nobo di prediká e bon notisia i ki lès nos por siña for di nan ehèmpel?

¹⁰ Laga nos ban papia awor di un otro situashon. Un shen aña pasá, algun Studiante di Beibel ku tabata duna bon diskurso a kere ku esei tabata e mihó manera pa prediká. Nan tabata gusta papia den públiko, i algun di nan tabata gusta mashá pa e rumannan elogiá nan. Sinembargo, e pueblo di Yehova a bin komprondé despues ku Yehova tabata ke pa nan hasi mas ku djis duna diskurso públiko. Nan tabatin ku prediká di kas pa kas i den otro maneranan tambe. Algun di e oradónan ekselente akí a nenga redondamente di hasi esei. Ku nan diskursonan, nan tabata duna e impreshon ku nan tabata hòmbernan masha spiritual i dediká na e sirbishi di Yehova; no opstante, e manera ku nan a reakshoná ora nan a haña instrukshon nobo relashoná ku e trabou di prediká a mustra nèt lo kontrario. Nan a pèrdè e aprobashon di Yehova i a bandoná su organisashon.​—Mat. 10:​1-6; Echo. 5:42; 20:20.

¹¹ No tabata fásil tampoko pa e otro Studiantenan di Beibel prediká di kas pa kas, foral na komienso. Pero nan a obedesé Yehova i a keda leal na su organisashon. Ku tempu a bira mas fásil pa nan prediká di kas pa kas, i Yehova a bendishoná nan rikamente. Kiko di abo? Kon lo bo reakshoná ora e esklabo fiel i prudente animá bo pa purba un método di prediká ku ta nobo pa bo? Bo ta kla pa obedesé asta si esei ta difísil pa bo?

Ora un Ser Kerí Bandoná Yehova

12, 13. (a) Dikon Yehova ta bisa pa “saka e hòmber malbado” for di kongregashon? (b) Kiko por ta un situashon difísil pa mayornan kristian?

¹² Nos tur sa ku nos mester ta puru, òf limpi, den tur sentido—físikamente, moralmente i spiritualmente—pa nos por agradá Yehova. (Lesa Tito 2:14.) Pero tin biaha nos sa haña nos den situashonnan ku ta difísil pa mantené nos mes na e prinsipio ei. Tuma por ehèmpel e situashon akí: Un pareha kristian ehemplar ta mira kon nan úniko yu hòmber ta bandoná e bèrdat. E yu a preferá “e plasernan pasahero di piká” en bes di su relashon ku Yehova i ku su mayornan. I debí na su mal kondukta, el a ser ekspulsá for di e kongregashon.​—Heb. 11:25.

¹³ Su mayornan ta sufri mashá pa motibu di e situashon. Nan sa ku Beibel ta bisa “pa no asosiá ku ningun hende ku ta ruman pa nòmber, si e ta un hende inmoral, òf golos pa plaka, òf un adoradó di dios falsu, òf un blasfemadó, òf un buraché, òf un estafadó—pa ni kome mes huntu ku un hende asina.” Beibel ta bisa tambe: “Saka e hòmber malbado for di meimei di boso.” (1 Kor. 5:​11, 13) Nan sa ku e ekspreshon “ningun hende” ta referí tambe na miembronan di famia ku no ta biba mas na kas. Pero debí ku nan ta stima nan yu masha hopi mes, nan por pensa: ‘Nos mester papia ku nos yu mas tantu posibel, pasobra ta asina so nos por yud’é bini bèk serka Yehova.’b

14, 15. Kiko mayornan kristian mester tene na mente ora nan tin yu ekspulsá?

¹⁴ Nos ta sinti duele pa e mayornan ei. Al fin i al kabo, e yu por a skohe pa bira di su mal kaminda, ma el a preferá di sigui hasi loke ta malu aunke e tabata sa ku esei lo a afektá su relashon ku su mayornan i ku e kongregashon. I maske e mayornan tabata ke yuda nan yu, tòg nan no por a disidí p’e. Nos ta komprondé pakiko nan ta sufri asina tantu.

¹⁵ Awor kiko e rumannan stimá akí lo hasi? Nan lo obedesé e instrukshonnan di Yehova? Òf nan lo sigui asosiá regularmente ku nan yu i hasi komo si fuera ta asuntu familiar importante? Promé ku nan disidí kiko nan ke hasi, nan mester kòrda ku Yehova ke pa su pueblo ta limpi. Ta p’esei mes el a ordená pa “saka e hòmber malbado” for di kongregashon. Ademas, Yehova ke yuda e persona ku a hasi malu pa e kambia su kondukta i bini bèk na e kongregashon. Kon mayornan kristian por demostrá ku nan ta pensa meskos ku Yehova?

16, 17. Ki lès nos por siña for di e eksperensia di Aaron?

¹⁶ Aaron, e ruman hòmber di Moisés, a hañ’é den un situashon difísil pa motibu di dos di su yu hòmbernan, Nadab i Abiú. Nan a ofresé sakrifisio na un manera ku a desagradá Yehova. P’esei Yehova a laga kandela baha for di shelu pa mata nan. Imaginá bo kuantu Aaron lo a sufri pa motibu di e pèrdida akí. E ku su kasá no por a papia mas ku nan yunan pasobra nan tabata morto. Pero tabatin algu mas ku a hasi e situashon asta mas difísil pa Aaron i su famia. Aaron i su otro yunan a haña e mandato pa no tene rou. Pa medio di Moisés, Yehova a bisa nan: “No kita kabes sunú ni sker boso pañanan, pa boso no muri, i pa Dios no bira furioso riba henter e kongregashon.” (Lev. 10:​1-6) E lès ta bon kla: Nos amor pa Yehova mester ta mas fuerte ku nos amor pa famia, i pió ainda si nan no ta leal na Yehova.

¹⁷ Awendia, Yehova no ta eliminá inmediatamente esnan ku desobedesé su mandamentunan. Mas bien, e ta mustra amor na nan i ta duna nan e oportunidat pa arepentí. Pero kon Yehova ta sintié ora mayornan ta desobedes’é i ta asosiá innesesariamente ku nan yu ekspulsá?

18, 19. Ki bendishon miembronan di famia por risibí ora nan keda leal na Yehova?

¹⁸ Hopi ruman ku un tempu tabata ekspulsá a bisa ku loke a yuda nan bini bèk den e kongregashon kristian ta e echo ku nan amigu- i famianan a keda leal na Yehova i no tabata asosiá ku nan. Un ruman muhé hóben a bisa e ansianonan ku un kos ku a pon’é kambia su bida tabata e echo ku su ruman hòmber mayor a keda leal na Yehova i no a asosiá kuné tempu ku e tabata ekspulsá. Esei a animá e ruman muhé pa bini bèk den kongregashon.

¹⁹ Pues kiko nos mester hasi? Obedesé Yehova na tur momento. Debí ku nos ta imperfekto, tin biaha esei por ta difísil. Pero nos mester tin pleno konfiansa ku loke Yehova ta bisa nos ta pa nos mes bon.

“E Palabra di Dios Ta Bibu”

20. Den ki dos manera nos por komprondé Hebreonan 4:12? (Wak nota na pia di página.)

²⁰ Ora Pablo a bisa na Hebreonan 4:12 ku “e palabra di Dios ta bibu,” e no tabata referí spesífikamente na Beibel.c E konteksto ta mustra ku e tabata papia tokante e promesanan di Dios. Loke Pablo tabata ke men ta ku Yehova semper ta kumpli ku su promesanan. Yehova a bisa: “[Mi palabra] lo no bolbe bashí serka mi, . . . sin alkansá e propósito ku kual mi a mand’é.” (Isa. 55:11) P’esei nos no mester pèrdè pasenshi ora ku Yehova no ta kumpli ku su promesanan na e momento ku nos ta deseá. Nos por tin sigur ku Yehova ‘ta trahando’ pa kaba di kumpli ku su propósito.​—Juan 5:17.

21. Kon Hebreonan 4:12 ta animá esnan di edat avansá pa sigui sirbi Yehova?

²¹ Hopi ruman ku ta forma parti di e “multitut grandi” ta sirbiendo Yehova fielmente pa hopi aña kaba. (Rev. 7:9) Nan no a spera ku nan lo a bira bieu den e mundu malu akí. Pero tòg nan ta hasi nan bèst pa sigui sirbi Yehova. (Sal. 92:14) Nan sa ku e palabra di Dios ta bibu i ku Yehova lo kumpli ku tur su promesanan. (Heb. 4:12) Nan sa ku Yehova ta trahando pa kumpli ku su propósito pa planeta Tera i pa humanidat. E propósito di Dios ta sumamente importante pa Dios, i p’esei e ta bira kontentu ora nos ta demostrá ku su propósito ta importante pa nos tambe. Durante e di shete dia di sosiegu akí, no tin nada ku por stroba Yehova di kumpli ku su propósito. Yehova tin sigur ku, komo grupo, su pueblo lo sigui traha na armonia ku su propósito. Pues manera nos a mira, nos tur por drenta e sosiegu di Dios. Abo a drenta su sosiegu kaba?

[Nota]

Bo Ta Kòrda?

• Kiko nos mester hasi pa drenta e sosiegu di Dios?

• Ora nos komprondé loke Dios ke pa nos hasi, kon nos por demostrá ku nos ta kla pa obedes’é?

• Den ki situashon por ta difísil pa obedesé Yehova, pero dikon ta importante pa hasi esei?

• Den ki dos manera nos por komprondé Hebreonan 4:12?

[Plachi na página 31]

E mayornan ta sufri mashá