Ken Abraham Tabata?

MASHA poko hende tabatin un influensia asina grandi riba religion manera Abraham.a Tantu hudiu, mòslem, kristian komo hende di otro religion ta respet’é i ta konsider’é komo un personahe bíbliko importante i “un ehèmpel sobresaliente di fe.” Beibel ta yam’é “tata di tur hende ku Dios ta konsiderá hustu pa motibu di nan fe.”—Romanonan 4:11.

Dikon hende tin asina tantu rèspèt pa Abraham? Wèl, Abraham ta e úniko persona ku Beibel ta yama amigu di Dios, i no un biaha so, sino tres biaha.—2 Krónikanan 20:7; Isaías 41:8; Santiago 2:23.

Pero Abraham tabata un hende gewon, meskos ku nos tur. El a hañ’é ku hopi di e problemanan ku nos ta konfrontá awendia—ma el a surpasá nan ku éksito. Bo ke sa kon el a logra esei? Ban wak kiko Beibel ta konta nos di e hòmber ekstraordinario akí.

Su Orígen

Abraham a nase na aña 2018 promé ku nos era i a lanta den Ur. (Génesis 11:27-31) Ur tabata un stat grandi i próspero. Pero e tabata pèstá ku adorashon di ídolo. Kisas Taré, tata di Abraham, tambe a adorá vários ídolo. (Hosue 24:2) Ma Abraham a skohe pa adorá Yehovab so i no ídolonan sin bida.

Kiko a motivá Abraham pa tuma e desishon ei? Wèl, pa 150 aña largu Abraham tabata kontemporáneo di Sèm, e yu hòmber di Noe. Anto si Abraham a anda ku e hòmber di mas edat ei, siguramente lo el a konta Abraham kon nan a sobrebibí e Diluvio. Abraham lo por a haña sa tambe ku ta masha importante pa adorá Yehova, e Dios ku a protehá Sèm i su famia durante e Diluvio.

Sea ku tabata via Sèm òf di un otro manera Abraham a siña tokante e Dios berdadero, el a reakshoná faborablemente riba loke el a haña sa. P’esei, ora Yehova, esun ku ta “sonda kurason,” a opservá Abraham, el a mira algu bon den dje i a yud’é bira asta un mihó persona.—Proverbionan 17:3; 2 Krónikanan 16:9.

Su Bida

Abraham tabatin un bida interesante i yen di aktividat; maske el a pasa den basta difikultat, nunka el a sinti ku su bida no tabatin propósito. Laga nos ban wak algun di e kosnan ku el a pasa aden.

▪ Tempu ku Abraham tabata biba na Ur, Dios a mand’é bandoná su tera natal i bai na un tera ku Dios mes lo a mustr’é. Aunke Abraham ku Sara no tabata sa tur detaye—esta, unda pa bai ni pakiko Dios a manda nan muda—nan a obedesé. Finalmente, Abraham ku Sara a haña nan ta biba den tènt den e tera di Kanan i, pa restu di nan bida, nan a biba komo stranhero.—Echonan 7:2, 3; Hebreonan 11:8, 9, 13.

▪ Promé ku Abraham ku Sara tabatin yu, Yehova a primintí Abraham ku lo el a hasié un nashon grandi i ku tur famia di mundu lo ta bendishoná pa medio di dje. (Génesis 11:30; 12:1-3) I mas despues, Yehova a konfirmá ku lo e kumpli ku e promesa akí. El a bisa Abraham ku su desendientenan lo bira inkontabel manera e streanan di shelu.—Génesis 15:5, 6.

▪ Ora Abraham tabatin 99 aña di edat i Sara kasi 90, Yehova a bisa nan ku nan lo a haña un yu hòmber. For di e punto di bista humano, esei lo a parse algu imposibel. Pero no a tarda mashá ku Abraham ku Sara a haña sa ku nada no ta ‘difísil pa Yehova.’ (Génesis 18:14) Sí, ún aña despues, na edat di 100 aña, Abraham a bira tata di un yu hòmber, ku el a yama Isak. (Génesis 17:21; 21:1-5) Anto Dios a bisa spesífikamente ku ta pa medio di Isak humanidat lo risibí hopi bendishon.

▪ Pero algun aña despues, Yehova a pidi Abraham hasi algu masha straño. El a pidi Abraham pa sakrifiká su yu stimá, Isak, maske e yònkuman akí no tabata kasá ni tabatin yu. E pensamentu so ku lo el a pèrdè su yu lo mester a hasi Abraham masha tristu. Tòg, e tabata dispuesto pa obedesé Dios i ofresé Isak komo sakrifisio. Dikon? Pasobra Abraham tabatin fe ku Dios lo por a resusitá Isak si esei tabata nesesario pa kumpli ku Su promesanan. (Hebreonan 11:19) Pero na e momento krusial, ora Abraham tabata a punto di sakrifiká su yu, Dios a intervení i a spar e bida di Isak. Yehova a elogiá Abraham pa su obedensia ekstraordinario i a ripití e promesa ku el a hasi anteriormente na dje.—Génesis 22:1-18.

▪ Na edat di 175 aña, Abraham a fayesé. Beibel ta bisa ku el ‘a muri na un edat hopi avansá, bieu i satisfecho.’ (Génesis 25:7, 8) Sí, asina Abraham a mira kumplimentu di un otro promesa di Dios—esta, ku lo el a disfrutá di un bida largu promé ku el a muri na pas.—Génesis 15:15.

E Ehèmpel Ku El A Laga Atras

Abraham ta muchu mas ku djis un persona religioso òf importante ku a biba den pasado. Te awe, e ta un ekselente ehèmpel pa nos. (Hebreonan 11:8-10, 17-19) P’esei, laga nos analisá kuater ekselente kualidat ku Abraham a demostrá. Nos lo kuminsá ku esun ku kisas e ta mas konosí p’e, esta, fe.

[Nota]

[Kuadro na página 4]

Un Personahe Importante den Historia Bíbliko

Den e promé dies kapítulonan di Génesis, Beibel ta relatá bida di diferente hòmber di fe, manera Abel, Enok i Noe. Sinembargo, e 15 kapítulonan despues ta trata bida di ún solo hòmber—Abraham.

Es mas, ta en konekshon ku Abraham, Beibel ta menshoná algun konsepto masha importante. Por ehèmpel, ta den e relato di Abraham, Beibel ta . . .

▪ menshoná pa promé biaha ku Dios ta un Eskudo, òf Protektor, pa su sirbidónan.—Génesis 15:1; wak Deuteronomio 33:29; Salmo 115:9; Proverbionan 30:5.

▪ papia pa promé biaha di kere, òf pone fe, den Dios.—Génesis 15:6.

▪ menshoná e palabra profeta pa promé bes.—Génesis 20:7.

▪ referí pa promé biaha na e amor di mayor.—Génesis 22:2.