El A “Kana ku Dios”

NOE a stret su lomba i rèk su múskulonan ku tabata hasi due. Imaginá Noe sintá riba un balki hanchu ta sosegá un ratu di su trabou, miéntras e ta wak e struktura inmenso di e arka. Den aire tabatin un holó fuerte di breu, i bo por a tende e zonido di hèrmèntnan di karpinté resoná. For di kaminda Noe tabata sintá, e por a mira su yu hòmbernan, trahando duru riba vários parti di e erante grandi di palu. Su yunan, nan kasánan i su mes kasá stimá ya tabatin vários dékada ta traha riba e proyekto akí. Nan a yega basta leu ku e arka, pero ainda tabatin hopi kos mas di hasi!

E hendenan di e region a pensa ku nan kabes no tabata bon. Mas e arka a haña forma, mas nan tabata hasi bofon di e spièrtamentu ku Noe tabata duna nan ku lo a bini un diluvio ku lo a tapa henter mundu. Un desaster asina tabata parse inkreibel i apsurdo! Nan no por a komprondé kon e hòmber ei por a pèrdè tur su tempu—i di su famia—riba un proyekto ridíkulo asina. Ma Yehova, e Dios di Noe, tabata pensa kompletamente otro.

E Palabra di Dios ta bisa: “Noe tabata kana ku Dios.” (Génesis 6:9) Kiko esei a nifiká? E no a nifiká ku Dios a baha na tera ni tampoko ku Noe a bai shelu. Mas bien, esei ke men ku Noe a obedesé Yehova ‘a pie de la letra’ i a stim’é asina tantu ku, na moda di papia, e ku Yehova a kana huntu manera amigu íntimo. Míles di aña despues, Beibel a bisa di Noe ku ‘pa medio su fe, el a kondená mundu.’ (Hebreonan 11:7) Den ki sentido el a hasi esei? Kiko nos awe por siña for di e fe ku Noe a demostrá?

Noe a lanta den un mundu ku dia pa dia tabata bai di malu pa pió. E situashon tabata malu kaba for di tempu di su bisawelo Enok, un otro hòmber hustu ku a kana ku Dios. Enok a profetisá ku un dia di huisio lo a bini riba e hendenan malbado di e tempu ei. Awor, den tempu di Noe, maldat a yega na un nivel nunka bisto. De echo, for di e punto di bista di Yehova, e mundu di e tempu ei a daña, ya ku e tabata yen di violensia. (Génesis 5:22; 6:11; Hudas 14, 15) Kiko a pasa ku e situashon a bira asina malu?

Algu masha lamentabel a tuma lugá entre e yunan spiritual di Dios, esta, e angelnan. Basta tempu promé, un di nan a rebeldiá kontra Yehova. El a bira Satanas e Diabel ora el a kalumniá Dios i hinka Adam ku Eva den tentashon pa kometé piká. Den tempu di Noe, otro angelnan tambe a kuminsá rebeldiá kontra Yehova su gobernashon hustu i a bandoná e trabou ku Dios a duna nan den shelu. Nan a bini na tera, kambia na kurpa di hende i kasa ku muhé bunita. E angelnan rebelde akí tabata orguyoso i egoista, i nan tabatin masha mal influensia riba hende.—Génesis 3:1-5; 6:1, 2; Hudas 6, 7.

Es mas, e unionnan innatural akí—entre hende muhé i angel den kurpa humano—a produsí yunan bastá di tamaño gigante, kendenan tabatin forsa ekstraordinario. E gigantenan akí tabata tiranonan salbahe ku a pone e aktitut kruel i malbado di mundu bira mas pèrvèrso ainda. Ta p’esei den bista di e Kreador, ‘maldat di hende tabata grandi riba tera, i tur intenshon di e pensamentunan di hende su kurason tabata kontinuamente maldat so.’ Yehova a disidí e ora ei ku lo e kaba ku e sosiedat malbado ei denter di 120 aña.—Génesis 6:3-5.

Noe a haña un bon kasá, i ora e tabatin mas ku 500 aña kaba, el a bira tata di tres yu hòmber: Sèm, Kam i Jafet.a Manera bo por imaginá, lo tabata difísil pa lanta un famia den un ambiente asina! Ma Noe a logra hasi esei. E ku su kasá mester a protehá nan yunan kontra e mal influensia ku tabata rondoná nan. Mucha hòmber chikitu sa keda masha impreshoná ku “hòmbernan poderoso” i “hòmbernan di fama.” Pues, e yunan di Noe lo a atmirá e gigantenan. Noe i su kasá no por a evitá ku nan chikitinnan lo a tende di algun di e barbaridatnan ku e gigantenan ei tabata kometé. Pero loke sí nan por a hasi ta di siña nan e bèrdat atraktivo tokante Yehova Dios, Esun ku ta odia tur tipo di maldat. Nan mester a yuda nan yunan mira ku e violensia i rebelion ku tabata reina riba tera a hasi Yehova masha tristu.—Génesis 6:6.

Mayornan djawe lo por komprondé bon den ki situashon Noe i su kasá tabata. Nos mundu tambe ta pèstá ku violensia i rebelion. Asta mayoria di programa pa mucha ta drei rònt di e temanan ei. Mayornan sabí ta hasi nan máksimo esfuerso pa kontrarestá e tipo di influensianan ei i ta siña nan yunan tokante Yehova, e Dios di pas, kende un dia lo kaba ku tur violensia. (Salmo 11:5; 37:10, 11) Mientrastantu, no desanimá! Boso por siña boso yunan loke ta korekto den un mundu malbado. Noe ku su kasá a logra esei. Nan yunan a resultá bon hende, i nan a kasa ku hende muhé ku tambe tabata dispuesto pa pone Yehova, e Dios berdadero, na promé lugá den nan bida.

Un dia, Noe su bida a kambia pa semper. Yehova a papia kuné i bis’é ku el a disidí ku e ta bai pone un fin na e mundu di e tempu ei. Dios a duna su sirbidó stimá e siguiente mandamentu: “Traha pa bo mes un arka di palu.”—Génesis 6:14.

E arka akí no tabata un barku, manera algun hende ta kere. E no tabatin kil ni timon. Básikamente, e tabata un kaha masha grandi mes. Yehova a duna Noe e midínan presis di e arka i tambe algun detaye tokante su diseño i e instrukshon pa fur’é di paden i di pafó ku breu. I el a bisa Noe pakiko: ‘Mi ta bai trese un diluvio di awa riba tera, i tur loke tin riba tera lo peresé.’ Pero Yehova a duna Noe e instrukshon akí tambe: “Bai den e arka—abo ku bo yu hòmbernan i bo esposa, i esposanan di bo yu hòmbernan huntu ku bo.” Ademas, Noe mester a hinka representante di tur sorto di bestia den e arka. Ta esnan ku tabata den e arka so lo a sobrebibí e Diluvio ku tabata bini!—Génesis 6:17-20.

Noe tabatin un tarea enorme su dilanti. E arka lo tabata masha grandi mes: mas o ménos 130 meter largu, 20 meter hanchu i 10 meter haltu. Su tamaño tabata hopi mas grandi ku e barkunan di palu di mas grandi ku nan a yega di traha den nos tempu pa nabegá riba laman. Akaso Noe a bula pipa pa e asignashon akí? El a keha ku e tarea tabata muchu difísil, òf el a kambia algun detaye pa hasi e trabou mas fásil p’e? Nò. Segun Beibel, ‘Noe a hasi konforme tur loke Dios a orden’é.’—Génesis 6:22.

Konstrukshon di e arka a tuma vários dékada, kisas un 40 pa 50 aña. Nan mester a kap palu i hiba nan na e lugá di konstrukshon. Tambe nan mester a kòrta e palunan, skaf nan i traha biga, tabla i otro kosnan. Despues mester a pega nan tur na otro. E arka mester tabatin tres piso, vários kamber òf kompartimentu i un porta na banda. Evidentemente, e tabatin tambe bentana a lo largu di e rant ariba i un dak ku probablemente tabata un poko skùin pa asina awa por a basha for di e dak.—Génesis 6:14-16.

Segun ku añanan a pasa i e arka pokopoko tabata haña forma, Noe lo mester tabata masha kontentu di por tabatin e apoyo di su famia! Pero tabatin un otro aspekto di e trabou ku lo mester tabata asta mas difísil ku konstrukshon di e arka. Beibel ta bisa nos ku Noe tabata “un predikadó di hustisia.” (2 Pedro 2:5) Esaki ta nifiká ku Noe tabatin e kurashi pa spièrta e hendenan di e mundu malbado i sin Dios ei tokante e destrukshon ku tabata na kaminda. Kon nan a reakshoná? Wèl, Hesukristu a bisa ku e hendenan di e tempu ei “no a hasi kaso.” El a splika ku nan tabata asina okupá ku asuntunan di bida diario—kome, bebe i kasa—ku nan no a presta atenshon na Noe. (Mateo 24:37-39) Sin duda, hopi hende a hasi bofon di Noe i su famia, i podisé algun di nan asta a menas’é i atak’é violentamente.

Ma Noe ku su famia no a entregá. Nan a sigui traha riba e arka, aunke e hendenan konstantemente tabata laga nan sinti ku loke nan tabata hasi no ta kos di hende kabes bon, ku esei tabata pèrdèmentu di tempu. Famianan kristian djawe por siña un bon lès for di e fe ku Noe i su famia a demostrá. Al fin i al kabo, nos ta bibando den loke Beibel ta yama “e último dianan” di e mundu akí. (2 Timoteo 3:1) I Hesus a bisa ku nos era lo ta meskos ku e era den kua Noe a traha e arka. Ta bon pa kristiannan kòrda riba Noe ora e mundu ta reakshoná riba e mensahe di e Reino di Dios ku un aktitut indiferente, ku bofon òf asta ku persekushon. Noe tambe a konfrontá e tipo di difikultatnan ei.

Despues di vários dékada, e arka pokopoko pero sigur a yega na su etapa final. Ora Noe tabatin kasi 600 aña, su tata, Lamèk, a muri.b Sinku aña despues, su tawela, Metusalèm, a muri na edat di 969 aña. Segun Beibel, e ta e hòmber ku a biba mas largu! (Génesis 5:27) Tantu Metusalèm komo Lamèk tabata na bida pareu ku e promé hòmber, Adam.

E mesun aña ku Metusalèm a muri, e patriarka Noe a risibí un mensahe nobo for di Yehova Dios: “Bai den e arka, abo i tur hende di bo kas.” Tambe el a bisa Noe pa hiba tur sorto di bestia den e arka: di esnan konsiderá limpi, esta, bestia adekuá pa ofresé komo sakrifisio, e mester a hiba shete di kada i di tur otro bestia dos di kada.—Génesis 7:1-3.

Lo mester tabata un bista impreshonante pa mira sientos di bestia di tur tamaño, forma i temperamento basha bini for di tur skina: kanando, bulando, lastrando. Nos no tin nodi di imaginá pober Noe ta kore tras di e bestianan salbahe ei òf ta lastra nan pa obligá nan drenta den e arka. E relato ta bisa ku nan “a bai . . . serka Noe den e arka.”—Génesis 7:9.

Tin hende tin problema pa aseptá ku esaki a tuma lugá. Nan no por imaginá nan ku tur e bestianan ei por a biba na pas ku otro den un lugá será. Wèl, pensa un ratu: E Kreador di universo no tin e poder pa kontrolá e bestianan ku el a krea? E no por hasi nan mansu si ta nesesario? No lubidá ku Yehova ta e Dios ku a parti Laman Kòrá na dos i a pone solo para ketu. Lo e no por a kumpli ku tur e susesonan deskribí den e relato di Noe? Klaru ku sí, i esei ta loke el a hasi tambe!

Ta bèrdat ku Dios lo por a salba e bestianan di un otro manera si e tabata ke. Pero komo muestra di su sabiduria, el a opta pa usa un manera ku ta laga nos kòrda riba e konfiansa ku e tabatin den hende ora el a duna nan e tarea di kuida tur loke ta biba riba e tera akí. (Génesis 1:28) P’esei hopi mayor awe ta usa e relato di Noe pa siña nan yunan ku tantu hende komo bestia tin balor pa Yehova, pasobra ta é kreá nan.

Yehova a bisa Noe ku den shete dia e Diluvio lo a bini. E siman ei lo mester tabata hopi drùk pa e famia. Nos por imaginá kuantu trabou nan tabatin pa hinka tur e bestianan i nan kuminda den un forma ordená den e arka i tambe tur nan mes pertenensianan. E esposa di Noe i e esposanan di Sèm, Kam i Jafet siguramente a hasi esfuerso pa prepará paden di e arka di tal manera ku nan por a biba un tiki kómodo.

Kon e hendenan a reakshoná ora nan a mira tur esei? “Nan no a hasi kaso,” apesar di tur e evidensia ku Yehova tabata bendishoná Noe i loke e tabata hasi. Nan mester a ripará kon tur e bestianan tabata basha bini pa drenta e arka. Pero nan aktitut indiferente no mester sorprendé nos. Awe ta meskos. Hende no ta hasi kaso di e evidensia innegabel ku nos ta bibando den e último dianan di e mundu akí. I manera apòstel Pedro a profetisá, hopi hende ta hasi chèrchi di esnan ku sí ta hasi kaso di e spièrtamentu di Dios. (2 Pedro 3:3-6) Asina tambe e hendenan sigur a hasi bofon di Noe i su famia.

Ki ora nan a stòp di hasi chèrchi? E relato ta bisa nos ku unabes Noe a hinka su famia i e bestianan den e arka, Yehova “a sera e porta su tras.” E akshon divino ei sin duda a tapa boka di kualke hasidó di bofon ku tabata ei banda. I si esei no a silensiá nan, e áwaseru sigur a hasié! Unabes awa a kuminsá kai, el a sigui kai nònstòp te ora el a tapa e tera, presis manera Yehova a bisa ku lo a pasa.—Génesis 7:16-21.

Akaso Yehova a keda kontentu ku tur e hendenan malbado ei a muri? Nò! (Ezekiel 33:11) Al kontrario, el a duna nan tur chèns di kambia nan bida. Nan lo por a obedesé Dios i sobrebibí e Diluvio? Sí, pasobra e manera ku Noe a hiba su bida a demostrá ku esei tabata posibel. Noe a kana ku Yehova, es desir, el a obedesé Dios den tur kos; asina el a mustra ku hende por hiba un bida ku ta agradá Dios. Su fe a kondená e mundu di su tempu, ya ku su fe a saka na kla e gran maldat ku tabata karakterisá e hendenan di su tempu. I no esei so, su fe a resultá den su salbashon i di su famia. Si bo imitá e fe di Noe, bo tambe lo por salba bo mes i bo sernan kerí. Meskos ku Noe, bo por kana ku Yehova Dios komo bo amigu. I e amistat ei por dura pa semper!