Imitá e Kompashon di Yehova

 1. Kon Yehova a revelá su mes na Moises, i dikon esaki ta importante?

NA UN okashon, Dios a revelá su mes na Moises ora el a menshoná Su nòmber i Su kualidatnan. E promé kualidatnan ku el a menshoná tabata kompashon i grasia [òf, “miserikòrdia,” NW]. (Lesa Éksodo 34:5-7.) Yehova por a enfatisá kuantu poder òf sabiduria e tin, pero komo ku Moises tabata ke un siguransa ku Dios lo a yud’é, Yehova a enfatisá kualidatnan ku ta resaltá e echo ku e ta dispuesto pa yuda su sirbidónan. (Éks. 33:13) E echo ku el a menshoná e bunita kualidatnan akí sigur ta konmové bo, no ta bèrdat? E artíkulo akí lo enfoká riba e kualidat di kompashon, esta, un sintimentu di duele di hende ku ta sufri òf ku ta pasa difikultat, huntu ku e deseo pa yuda nan.

2, 3. (a) Kiko ta mustra ku kompashon ta parti di naturalesa di hende? (b) Dikon bo mester ta interesá den loke Beibel ta bisa tokante kompashon?

² Dios a krea hende den su imágen. P’esei, komo ku Yehova ta un Dios kompasivo, di naturalesa hende ta interesá den e bienestar di otro. Asta hende ku no konosé e Dios berdadero hopi biaha ta mustra kompashon. (Gén. 1:27) Den Beibel, tin hopi relato di hende ku a mustra kompashon. Por ehèmpel, pensa riba e relato di e dos prostitutanan ku a diskutí dilanti di Sálomon tokante kua di nan tabata e berdadero mama di un bebi. Ora Sálomon a pone nan na prueba dunando òrdu pa kòrta e bebi na dos, e kompashon di e mama a motiv’é pa supliká e rei pa duna e otro muhé e bebi. (1 Rei. 3:23-27) Òf kòrda riba e yu muhé di Fárao, kende a salba bida di e bebi Moises. Maske el a realisá ku e bebi ku el a haña tabata yu di e hebreonan i ku e bebi no mester a keda na bida, el a sinti kompashon p’e i a disidí di kria e mucha manera su propio yu.—Éks. 2:5, 6.

³ Dikon nos mester ta interesá pa siña mas tokante kompashon? Pasobra Beibel ta urgi nos pa imitá Yehova. (Efe. 5:1) Pero aunke Dios a krea nos ku e kualidat di kompashon, komo ku nos a heredá imperfekshon di Adam, nos tin e tendensia pa ta egoista. Tin biaha, no ta fásil pa disidí si nos lo yuda otro hende òf preferá di hasi algu pa nos mes. Pa algun hende, esei ta un lucha interno ku nan tin konstantemente. Kiko por yuda bo kultivá interes den otro hende i mantené e interes ei? Di promé, tuma tempu pa analisá kon Yehova i otro hende a mustra kompashon. Di dos, pensa riba kon bo por imitá e ehèmpel di Dios i kon esei ta benefisiá bo ora bo hasi esei.

 4. (a) Dikon Yehova a manda angel na Sódoma? (b) Kiko e relato tokante Lòt ku su yu muhénan ta siña nos?

⁴ Beibel tin hopi ehèmpel di e kompashon di Yehova. Pensa riba kiko Dios a hasi pa Lòt. E hòmber hustu ei tabata “sumamente afligí” pa motibu di e kondukta sinbèrgwensa di e habitantenan di Sódoma i Gomora. Anto Dios a disidí ku e hendenan inmoral ei mester a muri. (2 Ped. 2:7, 8) Dios a manda angel pa salba Lòt, anto nan a urgié i su famia pa hui for di e statnan ei ku Dios a kondená na destrukshon. Beibel ta bisa: “Ma Lòt a tarda. P’esei e [angelnan] a gara su man i man di su esposa i man di su dos yu muhénan, pasobra e kompashon di SEÑOR tabata riba dje; i nan a hib’é pafó i a pon’é pafó di e stat.” (Gén. 19:16) E ehèmpel ei ta mustra ku Yehova sa di situashonnan difísil ku su fiel sirbidónan ta pasa aden.—Isa. 63:7-9; Sant. 5:11; 2 Ped. 2:9.

 5. Na 1 Huan 3:17, kon e Palabra di Dios ta siña nos kon pa mustra kompashon?

⁵ Yehova no solamente a mustra kompashon na su pueblo sino tambe el a siña nan ku nan mester mustra kompashon. Tuma por ehèmpel e lei ku Yehova a duna Israel relashoná ku tumamentu di mantel di un persona komo bòrg pa un fiansa. (Lesa Éksodo 22:26, 27.) Un hende di kurason duru ku a fia un otro hende plaka por a haña gana di kue mantel di e persona ku a deb’é i lag’é sin paña pa drumi aden. Pero Yehova a siña su pueblo pa mustra kompashon i pa duna e paña bèk “promé ku solo baha.” E prinsipio tras di e lei ei no ta motivá nos pa mustra kompashon? Klaru, nos lo no keda sin yuda nos ruman si ta den nos poder pa yud’é.—Kol. 3:12; Sant. 2:15, 16; lesa 1 Huan 3:17.

 6. Kiko nos por siña for di e kompashon ku Yehova a mustra na e israelitanan pekadó?

⁶ Asta ora e pueblo di Israel a peka, Yehova a mustra kompashon na nan. Beibel ta bisa: “SEÑOR, e Dios di nan tatanan, a manda palabra pa nan bes tras bes pa medio di su mensaheronan, pasobra e tabatin kompashon di su pueblo i di su lugá di biba.” (2 Kró. 36:15) Nos tambe no mester sinti kompashon pa hende ku por arepentí i kambia nan estilo di bida pekaminoso i haña e fabor di Dios? Yehova no ke pa niun hende ser destruí den e binidero dia di huisio. (2 Ped. 3:9) Pues, miéntras ku tin tempu ainda, laga nos sigui prediká tokante Yehova su mensahe di spièrtamentu i yuda mas tantu hende posibel benefisiá di su kompashon.

7, 8. Dikon un famia ta konvensí ku Yehova a mustra kompashon na nan?

⁷ Awe, hopi sirbidó di Dios a sinti su kompashon. Wak kiko a pasa ku famia di un mucha hòmber di 12 aña kende nos lo yama Milan. Durante un tempu di konflikto étniko na komienso di dékada 1990, Milan, su ruman hòmber i su mayornan huntu ku otro Testigunan tabata kore den un bùs di Bosnia pa Servia. Nan tabata riba kaminda pa bai un kongreso kaminda e mayornan di Milan tabata bai batisá. Pero na frontera, sòldánan a saka e famia for di e bùs pa motibu di nan nashonalidat, pero nan a laga e otro rumannan sí pasa. Despues ku nan a tene e famia pa dos dia, e ofisial enkargá a tuma kontakto ku su hefe pa puntr’é kiko mester a hasi ku e rumannan. E ofisial tabata pará nèt dilanti di e rumannan, pues nan tur a tende su kontesta: “Hiba nan pafó i tira nan mata.”

⁸ Miéntras ku e ofisial tabata papia ku e sòldánan, dos hende deskonosí a bini serka e famia i ketu ketu nan a identifiká nan mes komo Testigunan di Yehova. E otro rumannan den e bùs a konta nan kiko a sosodé. Komo ku e sòldánan no tabata kontrolá e papelnan di e muchanan, e dos rumannan a bisa Milan ku su ruman hòmber pa drenta den nan outo pa nan krusa frontera. Despues e dos rumannan a bisa Milan su mayornan pa nan kana pasa patras di e puesto di kontrol di frontera i topa nan na e otro banda. Milan tabata asina spantá ku e no tabata sa si e mester a hari òf yora. Su mayornan a puntr’é: “Bo ta ègt kere ku nan lo laga nos kana bai gewon asina?” Pero ora nan a kana bai, maske e sòldánan tabata wak den nan direkshon, tabata manera kos ku e sòldánan no a mira nan mes. E mayornan i e yunan a topa na e otro banda di e frontera i a sigui riba kaminda pa e kongreso. Nan tabata konvensí ku Yehova a kontestá nan súplikanan. Nos sa ku Beibel ta indiká ku tabatin biaha ku Yehova no a intervení direktamente pa protehá su sirbidónan. (Echo. 7:58-60) Pero Milan ta konta kiko el a sinti i a bisa: “Tabata manera e angelnan a siega e sòldánan i Yehova a salba nos.”—Sal. 97:10.

 9. Kon Hesus a reakshoná ora el a mira den ki situashon e hendenan ku tabata siguié tabata? (Wak e promé plachi.)

⁹ Hesus tambe tabata un bon ehèmpel den mustra kompashon. El a sinti kompashon pa e hendenan “pasobra nan tabata soyá i deskuidá, manera karné sin wardadó.” Kiko el a hasi? “El a kuminsá siña nan hopi kos.” (Mat. 9:36; lesa Marko 6:34.) Su aktitut tabata kompletamente diferente for di esun di e fariseonan, kendenan no tabatin niun tiki gana di yuda hende komun. (Mat. 12:9-14; 23:4; Huan 7:49) Meskos ku Hesus, bo tambe tin un gran deseo pa yuda hende ku tin hamber spiritual?

10, 11. Semper kompashon ta na su lugá? Splika esei.

¹⁰ Esaki no ke men ku tur ora nos mester mustra kompashon. Den e ehèmpelnan ku nos a menshoná, e kompashon di Yehova tabata na su lugá. Sinembargo, Rei Saul tabata desobediente ora el a mustra loke é a kere tabata kompashon. Saul a spar bida di Agag, un enemigu di e pueblo di Dios, i tambe el a keda ku e mihó bestianan di e tou. Komo resultado, Yehova a rechasá Saul komo rei di Israel. (1 Sam. 15:3, 9, 15) Klaru ku Yehova ta e Hues hustu ku por lesa kurason di hende, i e sa ki ora e no mester mustra kompashon. (Lam. 2:17; Eze. 5:11) E tempu lo yega pa e ehekutá huisio riba tur hende ku ta nenga di obedes’é. (2 Tes. 1:6-10) Lo e no mustra kompashon na hende ku el a husga komo malbado. Mas bien, nan ehekushon lo ta un ekspreshon apropiá di Dios su kompashon na hende hustu, kende lo e preservá.

¹¹ Klaramente anto, no ta keda na nos pa husga si un hende lo ser ehekutá òf preservá. En bes di esei, nos mester hasi tur loke nos por aworakí pa yuda hende. Pues kon nos por mustra kompashon apropiá na nos próhimo den maneranan práktiko? Ban wak algun sugerensia.

12. Kon bo por mustra kompashon den bo trato ku otro hende?

¹² Yuda otro hende den nan bida di tur dia. Yehova ke pa nos mustra kompashon na nos próhimo i na nos rumannan kristian. (Huan 13:34, 35; 1 Ped. 3:8) Un nifikashon di e palabra kompashon ta “sufri huntu.” Un hende ku ta mustra kompashon ta sintié motivá pa aliviá e sufrimentu di otro hende, kisas yudando nan ku un difikultat. Buska oportunidat pa hasi esei! Por ehèmpel, bo por yuda un hende ku un trabou na su kas, òf kisas bo por hasi un fabor òf rospondi p’e?—Mat. 7:12.

13. Kon sirbidónan di Dios ta mustra kompashon despues di desasternan natural?

¹³ Yuda víktimanan di desaster natural. Hopi ruman ta sinti nan motivá pa mustra kompashon na hende ku ta sufri pa motibu di desaster natural. E sirbidónan di Yehova ta konosí pa yuda den tempu difísil asina. (1 Ped. 2:17) Un ruman muhé hapones tabata biba den un área kaminda un temblor i tsunami a kousa daño serio na 2011. El a bisa ku el a sintié masha “animá i konsolá” ora el a mira e esfuersonan ku e tantísimo boluntarionan di otro partinan di Hapon i di otro paisnan a hasi pa drecha nan kasnan i Salònnan di Reino. El a skirbi: “E eksperensia akí a yuda mi mira ku tantu Yehova komo mi rumannan ta interesá den kada un di nos i ku hopi ruman rònt mundu ta hasi orashon pa nos.”

14. Kon bo por yuda hende malu i hende di edat avansá?

¹⁴ Yuda hende malu i hende di edat avansá. Ora nos mira hende sufri debí na e efektonan di e piká di Adam, nos ta sinti nos motivá pa mustra kompashon. Nos ta anhelá pa mira Dios kaba ku malesa i behes. P’esei nos ta hasi orashon pa e Reino di Dios bini. Mientrastantu, nos ta hasi loke nos por pa yuda hende den nesesidat. Wak kiko un outor a skirbi tokante su mama di edat avansá ku tabata sufri di Alzheimer. Un dia, el a bai af den su paña i a susha tur su kurpa. Miéntras ku e tabata purba di limpia su kurpa, e bèl di kas a zona. Tabata dos Testigu ku tabata bishitá e señora regularmente. E ruman muhénan a puntra si tabatin algu ku nan por a yuda kuné. Ku yen di bèrgwensa, e señora a kontestá: “Sí.” E rumannan a yud’é, i despues nan a traha te i a sinta kòmbersá un ratu kuné. E yu hòmber a keda masha gradisidu. El a skirbi: “Petje af pa e Testigunan akí. Nan ta praktiká loke nan ta prediká.” Bo kompashon pa hende malu i hende di edat avansá ta motivá bo pa hasi tur loke bo por pa yuda nan?—Flp. 2:3, 4.

15. Kon nos trabou di prediká ta yuda otro hende?

¹⁵ Yuda hende den sentido spiritual. E problema- i preokupashonnan di hende ta motivá nos pa yuda nan spiritualmente. E mihó manera ku nos por hasi esei ta ora nos siña nan tokante Dios i loke e Reino di Dios lo hasi pa humanidat. Un otro manera ta ora nos mustra nan ku ta sabí pa biba segun e normanan di Dios. (Isa. 48:17, 18) Lo bo por hasi mas den sirbishi, un trabou ku di bèrdat ta onra Yehova i ku ta mustra bo kompashon pa otro hende?—1 Tim. 2:3, 4.

16. Kon un hende ku ta mustra kompashon ta benefisiá su mes?

¹⁶ Ekspertonan riba tereno di salú mental ta bisa ku ora nos mustra kompashon, esei por mehorá nos salú i nos amistat ku otro hende. Ora bo yuda aliviá e sufrimentu di otro hende, bo ta sinti bo mas kontentu, mas optimista, ménos bo so i ménos inkliná na pensa negativo. Sí, ora bo mustra kompashon, lo bo benefisiá bo mes. (Efe. 4:31, 32) Kristiannan ku ta buska pa yuda otro hende lo tin un bon konsenshi pasobra nan sa ku nan ta biba segun e normanan di Dios. Di e manera ei, nos por ta mihó mayor, kasá i amigu. Ademas, hende ku ta lihé pa mustra kompashon tin mas chèns di haña yudansa i apoyo ora nan tin mester di esei.—Lesa Mateo 5:7; Lukas 6:38.

17. Dikon bo ke kultivá i mustra kompashon?

¹⁷ E echo ku bo sa ku kompashon ta bon pa bo no mester ta e motibu prinsipal pakiko bo ta kultivá e kualidat akí. Bo motibu prinsipal mester ta bo deseo pa imitá i glorifiká Yehova Dios, e Fuente di amor i kompashon. (Pro. 14:31) E ta pone e ehèmpel perfekto pa nos. Laga nos hasi tur loke nos por pa imit’é i mustra kompashon. Asina nos ta promové un ambiente kaluroso entre nos rumannan i un bon amistat ku nos próhimo.—Gal. 6:10; 1 Huan 4:16.