Bo Futuro Ta den Bo Man

DI BÈRDAT BO MES POR DISIDÍ BO FUTURO? Tin hende ta pensa ku nan no tin muchu kontrol riba nan bida pasobra nan futuro ta predestiná. P’esei, ora nan no logra un meta ku nan tin, nan ta djis bisa: “E kos ei no tabata destiná pa mi.”

Tin otro hende ku ta keda desepshoná ora nan mira ku no tin solushon pa e opreshon i inhustisia den e mundu akí. Kisas nan a purba di mehorá nan bida, pero bes tras bes, kosnan manera, guera, krímen, desaster natural i malesa ta daña nan plannan. P’esei nan ta pensa ku no ta bale la pena pa sigui lucha.

Ta bèrdat ku suseso imprevisto por stroba sierto plan ku nos tin. (Eklesiástes 9:11) Pero nos tur por disidí nos futuro eterno. De echo, Beibel ta siña ku nos futuro ta dependé di nos mes. Ban wak dikon.

Nèt promé ku e nashon di Israel a drenta e tera ku Dios a primintí nan, Moises a bisa: “Mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje.”​—Deuteronomio 30:15, 19, 20.

“Mi a pone bida i morto boso dilanti, e bendishon i e maldishon. P’esei, skohe bida.”​—Deuteronomio 30:19

Sí, Dios a libra e israelitanan for di sklabitut na Egipto i a ofresé nan libertat i felisidat den e Tera Primintí. Pero nan lo no a haña e bendishonnan ei outomátikamente. Nan tabatin ku hasi algu: “skohe bida.” Kon nan mester a hasi esei? Nan mester a stima Dios, obedesé su bos i tene duru na dje.

Awe, Dios ta ofresé nos algu similar, i nos eskoho lo determiná nos futuro. Si nos skohe pa stima Dios, obedes’é i tene duru na dje, en realidat nos ta skohe bida, sí, bida eterno den un paradeis riba tera. Pero kiko e tres pasonan ei ta enserá?

Apòstel Huan a skirbi bou di inspirashon ku “Dios ta amor,” pues esei ta Dios su kualidat prinsipal. (1 Huan 4:8) P’esei, ora nan a puntra Hesus kua ta e mandamentu di mas grandi, el a kontestá: “Stima Yehova bo Dios ku henter bo kurason, ku henter bo alma i ku henter bo mente.” (Mateo 22:37) Ora un hende tin un bon relashon ku Yehova Dios, esei ta pasobra e ta stima Dios i no pasobra e tin miedu di dje òf ta obedes’é siegamente. Pero dikon nos tin ku stim’é?

Nos por kompará Yehova su amor pa hende ku e amor ku un mayor tin pa su yunan. Aunke tur mayor ta imperfekto, nan ta hasi esfuerso pa siña nan yunan, stima nan, animá nan i disipliná nan pasobra nan ke pa nan yunan ta felis i pa bai bon ku nan. Pero kiko e mayornan ta deseá di haña a kambio? Nan ke pa nan yunan stima nan i tuma na serio loke nan, komo mayornan, ta siña nan pa nan mes bon. Pues, no ta rasonabel ku nos Tata selestial, kende ta perfekto, ta spera ku nos lo mustra amor i gratitut pa tur loke el a hasi pa nos?

Pa nos obedesé Dios nos mester komprondé kiko e ta bisa. I komo ku nos no por tende Dios su stèm literalmente, nos ta skucha di dje ora nos ta lesa i apliká loke su Palabra ta bisa.—1 Huan 5:3.

Pa mustra nos kon importante ta pa obedesé Dios su bos, dado momento Hesus a bisa: “Hende no mester biba di pan so, sino tambe di tur palabra ku ta sali for di boka di Yehova.” (Mateo 4:4) Kuminda físiko ta importante pa nos, pero alimentá nos mente ku konosementu di Dios ta muchu mas importante ainda. Dikon? Rei Sálomon, kende tabata masha sabí, a splika: “Sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiástes 7:12) Konosementu i sabiduria di Dios por protehá nos i yuda nos skohe e bon kaminda: e kaminda ku ta hiba na bida eterno.

Den e artíkulo anterior, nos a menshoná un ilustrashon di Hesus ku en parte ta bisa: “E porta ku ta hiba na bida ta smal i e kaminda ta pèrtá, i poko ta esnan ku ta hañ’é.” (Mateo 7:13, 14) Sigur nos lo ta masha kontentu si nos tin un bon guia ku por yuda nos yega nos destinashon, esta, bida eterno. Pues, nos tin bon motibu pa keda serka di Dios. (Salmo 16:8) Pero kon nos por logra esei?

Tur dia tin hopi kos ku nos tin ku hasi i hopi kos ku nos lo ke hasi. Nos ta asina okupá i distraí ku kasi nos no tin tempu pa pensa riba loke Dios ke pa nos hasi. Nada straño ku Beibel ta kòrda nos pa “paga bon tinu pa e manera ku [nos] ta kana no ta manera hende imprudente sino manera hende sabí, usando [nos] tempu di e mihó manera, pasobra nos ta biba den tempunan malu.” (Efesionan 5:15, 16) Nos por keda serka di Dios ora nos pone nos relashon kuné na promé lugá den nos bida.—Mateo 6:33.

Aunke bo no por hasi nada pa kambia bo pasado, tin algu ku abo i bo famia por hasi pa boso por tin un futuro felis. Beibel ta bisa ku nos Tata selestial, Yehova Dios, ta stima nos masha hopi mes i ku e ta bisa nos kiko e ta deseá pa nos hasi. Wak kiko profeta Mikéas a bisa:

“El a bisa bo, o hende, loke ta bon; i kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?”​—Mikéas 6:8.

Abo lo aseptá Yehova su invitashon? Si bo hasi esei, lo bo risibí e bendishonnan eterno ku e tin prepará pa su amigunan. E desishon ta den bo man.