Sigui Progresá Spiritualmente!

1, 2. Kiko Robert a ripará, i kiko el a hasi tokante e problema ei?

ROBERT a batisá tempu ku e tabata tiner, pero e no a tuma e bèrdat na serio. El a bisa: “Nunka mi no a hasi nada malu, ma mi a djis sigui un rutina. Mi tabata parse spiritualmente fuerte: Mi tabata bai tur reunion i tabata traha pionero ousiliar algun biaha pa aña. Pero mi a sinti ku tabata falta algu.”

² Ta te despues ku Robert a kasa, el a komprondé kiko e problema tabata. Tin biaha, e ku su kasá tabata hasi otro pregunta tokante tópikonan di Beibel. Su kasá, kende sí ta spiritual, no tabatin problema pa kontestá e preguntanan. Pero hopi biaha Robert no por a kontestá, i e tabata pasa bèrgwensa. El a bisa: “Tabata parse ku mi no sa nada. Mi a pensa: ‘Si mi ke ta kabes di mi kasá den un sentido spiritual, mi tin ku hasi algu.’” Anto el a hasi algu tokante e asuntu. El a bisa: “Mi a studia Beibel i a sigui studia i studia te ora mi a kuminsá haña mas komprondementu. I mas importante ainda, mi a kultivá un bon relashon ku Yehova.”

 3. (a) Kiko nos por siña for di e eksperensia di Robert? (b) Ki preguntanan importante nos lo trata den e artíkulo akí?

³ Nos por siña algun lès importante for di e eksperensia di Robert. Podisé nos tin algun konosementu di Beibel i ta asosiá regularmente ku e kongregashon kristian, pero e kosnan akí riba nan mes no nesesariamente ta hasi nos un hende spiritual. Òf kisas nos a hasi sierto progreso kaba, pero ora nos a saminá nos mes mas aleu, nos ta ripará ku ainda nos por mehorá. (Flp. 3:16) Pa yuda nos sigui progresá, e artíkulo akí lo kontestá tres pregunta importante: (1) Kon nos por sa si nos ta un persona spiritual? (2) Kiko nos mester hasi pa nos bira un persona spiritual i sigui progresá? (3) Si nos ta un persona spiritual, ki efekto esaki tin riba nos bida diario?

 4. Ken tin ku sigui e konseho ku nos ta haña na Efesionan 4:23, 24?

⁴ Nos tur a hasi kambio den tur aspekto di nos bida ora nos a kuminsá sirbi Dios. I nos no a stòp di hasi esei ora nos a batisá. Beibel ta animá nos pa “sigui renobá e forsa ku ta motivá [nos] mente.” (Efe. 4:23, 24) Komo ku nos no ta perfekto, nos tur mester sigui hasi kambio. Asta si nos tin hopi tempu ta sirbi Yehova, nos tin ku sigui traha pa keda spiritualmente fuerte.—Flp. 3:12, 13.

 5. Ki preguntanan lo yuda nos saminá nos mes?

⁵ Pa nos por bira un hende spiritual i keda un hende spiritual, nos mester saminá nos mes onestamente. Sea ku nos ta yòn òf di edat, nos por hasi nos mes e siguiente preguntanan: ‘Mi ta ripará ku mi ta birando un hende mas spiritual? Mi personalidat ta birando manera esun di Kristu? Kiko mi aktitut i kondukta na reunionnan kristian ta bisa tokante mi spiritualidat? Kiko mi kòmbersashonnan ta bisa tokante mi deseonan? Kiko mi kustumbernan di estudio, mi manera di bisti i di areglá mi mes òf e manera ku mi ta reakshoná riba konseho ta bisa tokante mi? Kon mi ta reakshoná ora mi haña mi ku tentashon? Mi a progresá i bira un kristian maduro?’ (Efe. 4:13) Nos kontestanan riba e preguntanan akí por yuda nos haña sa kon leu nos a progresá spiritualmente.

 6. Ki yudansa mas nos mester pa por sa kon leu nos a progresá spiritualmente?

⁶ Tin biaha nos tin mester di yudansa di otro hende tambe pa nos por sa kon leu nos a progresá spiritualmente. Apòstel Pablo a splika ku un hende físiko no por komprondé ku su manera di biba no ta agradá Dios. (1 Kor. 2:14-16; 3:1-3) Un ansiano ku tin e mente di Kristu hopi bes ta mira for di prinsipio ora un ruman kuminsá pensa manera un hende físiko. Si un ansiano hala nos atenshon riba e asuntu akí, nos lo aseptá i sigui su konseho? Si nos hasi asina, nos ta demostrá ku nos ke bira spiritualmente fuerte.—Ekl. 7:5, 9.

 7. Dikon konosementu bíbliko so no ta sufisiente pa bira un hende spiritual?

⁷ Nos tin ku kòrda ku konosementu di Beibel so no ta sufisiente pa bira un hende spiritual. Rei Sálomon di antigwedat tabatin hopi konosementu di Yehova. Despues, hopi kos ku el a skirbi a bira parti di Beibel. Pero e no a keda un hòmber spiritual te na morto. El a desobedesé Yehova. (1 Rei. 4:29, 30; 11:4-6) Pues, ademas di konosementu bíbliko, kiko mas nos tin mester? Nos tin ku sigui progresá spiritualmente. (Kol. 2:6, 7) Pero kon nos por hasi esei?

8, 9. (a) Kiko lo yuda nos bira un hende spiritual? (b) Ku ki meta nos mester studia i meditá? (Wak e promé plachi.)

⁸ Pablo a urgi e kristiannan di promé siglo pa “hasi esfuerso pa alkansá madures.” (Heb. 6:1) Awor, ki pasonan nos mester dal pa nos por sigui e konseho di Pablo? Ta importante pa nos studia e buki “Keda den Amor di Dios.” E buki akí lo yuda nos mira kon pa apliká prinsipio di Beibel den nos bida. Si bo a studi’é kaba, bo por studia otro publikashon ku por hasi bo fe mas fuerte. (Kol. 1:23) Ademas, bo tin ku meditá riba loke bo ta siña i pidi Yehova yuda bo mira kon bo tin ku apliká loke bo ta siña.

⁹ Tene na mente ku ora nos ta studia i meditá, nos meta mester ta pa kultivá un deseo sinsero pa agradá Yehova i obedesé su leinan. (Sal. 40:8; 119:97) Na mes momento, nos mester hasi esfuerso pa rechasá tur kos ku por stroba nos di progresá spiritualmente.—Tito 2:11, 12.

10. Kiko hóbennan por hasi pa nan por bira spiritualmente mas fuerte?

¹⁰ Si bo ta un hóben, bo tin metanan spiritual? Un ruman hòmber ku ta traha na Bètel tin e kustumber di papia ku kandidatonan pa boutismo na asamblea di sirkuito promé ku e programa kuminsá. Hopi di e kandidatonan ta hóben. E ruman hòmber ta puntra nan ki meta spiritual nan tin. Hopi di nan ta duna kontesta ku ta demostrá ku nan tin un bista kla di loke nan ke hasi pa sirbi Yehova. Algun di nan kisas ke sirbi den un òf otro forma di sirbishi di tempu kompleto òf nan ke bai sirbi kaminda tin mester di mas predikadó di Reino. Sinembargo, tin biaha tin algun hóben ku no sa kiko pa kontestá. Kisas esei ta un indikashon ku nan no ta mira e importansia di tin metanan spiritual? Si bo ta un hóben, puntra bo mes: ‘Mi ta partisipá den aktividatnan spiritual djis pa komplasé mi mayornan? Mi ta kultivando un relashon ku Yehova i asina hala mas serka dje?’ Klaru ku ta nos tur mester tin metanan spiritual, sea nos ta hóben òf di edat. Ora nos ta pone meta spiritual, esei lo yuda nos bira spiritualmente mas fuerte.—Ekl. 12:1, 13.

11. (a) Pa nos por hasi berdadero progreso, kiko nos mester hasi? (b) Ki ehèmpel di Beibel nos por imitá?

¹¹ Unabes ku nos mira unda nos por mehorá, nos tin ku dal paso pa hasi kambio. Ta masha importante pa nos bira hende spiritual. De echo, e ta un asuntu di bida òf morto. (Rom. 8:6-8) Sinembargo, Yehova no ta ferwagt pa nos ta perfekto, i e ta duna nos su spiritu santu pa yuda nos. Pero, nos tambe tin ku hasi esfuerso. Algun aña pasá, ora ruman John Barr, kende tabata sirbi komo miembro di Kuerpo Gobernante, tabata papia tokante Lukas 13:24, el a bisa: “Hopi ruman no ta progresá spiritualmente pasobra nan no ta hasi e esfuerso nesesario.” Nos mester ta manera Yakòb, kende a lucha sin stòp ku e angel te ora ku el a haña un bendishon. (Gén. 32:26-28) Estudio di Beibel por ta agradabel. Pero nos no mester lesa Beibel komo si fuera e ta un novela pa entretené hende. Nos tin ku hasi esfuerso pa buska hoyanan spiritual ku lo yuda nos progresá.

12, 13. (a) Kiko por yuda nos apliká Romanonan 15:5? (b) Kon apòstel Pedro su ehèmpel i konseho por yuda nos? (c) Kiko bo por hasi pa progresá spiritualmente? (Wak e kuadro “Loke Bo Por Hasi pa Progresá Spiritualmente.”)

¹² Ora nos ta hasi esfuerso pa progresá spiritualmente, spiritu santu ta yuda nos kambia nos manera di pensa. Ku yudansa di spiritu santu, tiki tiki nos lo siña pensa manera Kristu. (Rom. 15:5) Ademas, spiritu santu lo yuda nos deshasí di deseonan di karni i kultivá kualidatnan ku ta agradá Dios. (Gal. 5:16, 22, 23) Si nos ripará ku nos ta keda pensa riba kosnan material òf deseonan di karni, nos no mester desanimá. Sigui pidi Yehova pa su spiritu, i e lo yuda bo kuminsá pensa riba loke ta korekto. (Luk. 11:13) Kòrda riba apòstel Pedro. Vários biaha e no a komportá su mes manera un hòmber spiritual. (Mat. 16:22, 23; Luk. 22:34, 54-62; Gal. 2:11-14) Pero e no a entregá. Tiki tiki ku yudansa di Yehova, Pedro a kuminsá pensa manera Kristu. Nos tambe por hasi meskos.

¹³ De echo, mas despues Pedro a menshoná algun kualidat spesífiko ku nos por traha riba dje. (Lesa 2 Pedro 1:5-8.) Ora nos ta ‘hasi tur nos esfuerso’ pa kultivá kualidatnan manera dominio propio, perseveransia i kariño pa ruman, esei lo yuda nos sigui progresá spiritualmente. Ta bon pa tur dia nos puntra nos mes: ‘Ki kualidat mi por traha riba dje awe pa mi sigui progresá spiritualmente?’

14. Si nos ta un hende spiritual, ki efekto esei lo tin riba nos bida?

¹⁴ Si nos ta pensa manera Kristu, esei lo influensiá nos manera di papia, nos kondukta na trabou òf na skol i nos desishonnan ku nos ta tuma tur dia. E desishonnan ei lo demostrá ku nos ta hasi esfuerso pa ta siguidó di Kristu. Si nos ta hende spiritual, nos lo no laga nada daña nos relashon ku nos Tata selestial. Ora nos haña nos ku tentashon, nos lo resistí nan. Promé ku nos tuma un desishon, nos ta puntra nos mes: ‘Ki prinsipio di Beibel lo yuda mi tuma un desishon? Kiko Kristu lo hasi den e situashon akí? Ki desishon lo agradá Yehova?’ Pa nos por siña kon pa pensa di e manera akí, laga nos wak algun ehèmpel práktiko. Den kada ehèmpel nos lo wak un prinsipio bíbliko ku por yuda nos tuma un desishon sabí.

15, 16. Kon e mente di Kristu por yuda nos tuma desishon ora di (a) skohe kasá? (b) skohe amigu?

¹⁵ Ora di skohe kasá. Nos ta haña e prinsipio bíbliko na 2 Korintionan 6:14, 15. (Les’é.) Pablo su palabranan ta mustra bon kla ku un persona spiritual no por disfrutá di pleno armonia ku un persona físiko. Kon nos por apliká e prinsipio akí ora di skohe kasá?

¹⁶ Ora di skohe amigu. Tuma nota di e prinsipio bíbliko na 1 Korintionan 15:33. (Les’é.) Un persona spiritual no ta sera amistat ku un hende ku por daña su relashon ku Yehova. Ki preguntanan por yuda nos apliká e prinsipio akí? Por ehèmpel, kon e prinsipio akí ta apliká ora di usa retnan sosial? Òf kiko nos mester hasi si nos haña un invitashon pa hunga wega online ku hende deskonosí?

17-19. Kon un punto di bista spiritual por yuda nos (a) evitá obranan inútil? (b) pone meta? (c) trata ku desakuerdo?

¹⁷ Aktividatnan ku ta stroba progreso spiritual. Pablo a duna nos un spièrtamentu importante na Hebreonan 6:1. (Les’é). Kiko ta e “obranan inútil” ku nos mester evitá? Esakinan ta kualke aktividat ku ta stroba nos di progresá spiritualmente. E prinsipio akí por yuda nos kontestá preguntanan manera: ‘E aktividat akí ta benefisiá mi òf e ta inútil? Mi mester aseptá e oferta di trabou akí pa gana mas plaka? Dikon mi no mester djòin un grupo ku ta purba di drecha mundu?’

¹⁸ Metanan spiritual. Den e Sermon Riba Seru, Hesus a mustra bon kla ki meta nos tin ku pone. (Mat. 6:33) Un hende spiritual ta pone e Reino na promé lugá den su bida. E prinsipio akí por yuda nos kontestá preguntanan manera: ‘Mi mester sigui enseñansa superior? Mi mester aseptá un sierto trabou?’

¹⁹ Desakuerdo. Kon e konseho ku Pablo a duna e kongregashon na Roma ta yuda nos trata ku desakuerdo? (Rom. 12:18) Komo siguidónan di Kristu, nos ta hasi esfuerso pa “keda na pas ku tur hende.” Kon nos ta reakshoná ora nos haña nos ku desakuerdo? Ta difísil pa nos aseptá opinion di otro hende, òf nos ta konosí komo un “hende ku ta hasi pas”?—Sant. 3:18.

20. Dikon bo ke sigui progresá spiritualmente?

²⁰ Esakinan ta djis algun ehèmpel ku ta mustra kon meditashon riba e prinsipionan di Beibel por yuda nos tuma desishon ku ta demostrá ku nos ta hende spiritual. Si nos ta hende spiritual, nos por ta mas felis i mas satisfecho. Robert, kende su eksperensia nos a menshoná na komienso di e artíkulo akí, a bisa: “Despues ku mi a kultivá un bon relashon ku Yehova, mi a bira un mihó esposo i tata. Mi a bira felis i kontentu.” Nos tambe por tin e mesun bendishonnan ei si nos sigui progresá spiritualmente. Komo hende spiritual, nos lo disfrutá di un bida mas satisfaktorio awor, i den futuro, nos lo disfrutá di “loke realmente ta bida.”—1 Tim. 6:19.