Bo Por Kambia Bo Manera di Pensa!

 1. Ki spièrtamentu apòstel Pablo a duna e kristiannan ungí?

“STÒP di laga e mundu akí forma boso.” Esei ta loke apòstel Pablo a bisa e kristiannan di promé siglo. (Rom. 12:2) Dikon el a duna un spièrtamentu asina fuerte na hende ku tabata dediká na Dios i ungí ku spiritu santu?—Rom. 1:7.

2-3. (a) Kiko Satanas ta hasi pa purba di alehá nos for di Yehova? (b) Kon nos por ranka e kosnan ku ta “fuertemente ankrá” for di nos mente?

² Pablo tabata preokupá pasobra a parse ku e filosofianan i e ideanan perhudisial di e mundu di Satanas a influensiá algun kristian. (Efe. 4:17-19) Esei por pasa ku kualke un di nos. Satanas, gobernante di e mundu akí, por usa diferente táktika pa influensiá nos. Por ehèmpel, si nos ke ta importante òf famoso, lo e usa e deseo ei pa purba di alehá nos for di Yehova. E por asta usa nos eksperensia di bida, kultura òf edukashon pa pone nos pensa manera e ke pa nos pensa.

³ Ta posibel pa nos ranka e kosnan ku ta “fuertemente ankrá” for di nos mente? (2 Kor. 10:4) Wak kiko Pablo a kontestá: “Nos ta tumba rasonamentu inkorekto i tur barera ku ta kontra e konosementu di Dios; i nos ta kontrolá tur pensamentu pa hasi esakinan obediente na Kristu.” (2 Kor. 10:5) Sí, ku yudansa di Yehova nos por kontrolá nos pensamentunan robes. Meskos ku remedi por neutralisá venenu, asina tambe Beibel por yuda nos neutralisá e efektonan tóksiko di Satanas su mundu.

 4. Ki kambio hopi di nos mester a hasi ora nos a aseptá e bèrdat?

⁴ Pensa bèk riba tur e kambionan ku bo mester a hasi ora bo a aseptá e bèrdat i a skohe pa sirbi Yehova. Hopi di nos mester a stòp di hasi loke ta malu. (1 Kor. 6:9-11) Nos ta masha gradisidu ku Yehova a yuda nos bandoná e práktikanan ei!

 5. Segun Romanonan 12:2, kiko ta dos kos ku nos mester hasi?

⁵ No opstante, nos no mester pensa nunka ku nos no tin ku hasi mas kambio. Aunke nos a stòp di kometé piká serio promé ku nos a batisá, ketu bai nos mester sigui hasi esfuerso pa evitá kualke kos ku por pone nos kometé e pikánan ei atrobe. Kon nos por logra esei? Pablo a bisa: “Stòp di laga e mundu akí forma boso, ma transformá boso mes dor di renobá boso mente.” (Rom. 12:2) Pues, nos mester hasi dos kos. Promé, stòp di laga e mundu akí “forma,” òf influensiá, nos. Di dos, nos tin ku “transformá” nos mes. Nos por hasi esei ora nos ta renobá nos mente.

 6. Kiko nos ta siña for di e ehèmpel ku Hesus a duna na Mateo 12:43-45?

⁶ E kambio ku Pablo a referí na dje ta mas ku djis un kambio superfisial di aparensia. E ta enserá henter e persona ku nos ta di paden. (Wak e kuadro “Bo A Transformá òf Disfrasá?”) Nos mester renobá nos mente, esta, nos aktitut, sintimentu i deseo. Pues, nos tur tin ku puntra nos mes: ‘E kambionan ku mi ta hasi pa imitá Kristu ta djis ariba ariba òf di bèrdat mi ta kambia e persona ku mi ta di paden?’ E kontesta riba e pregunta ei ta masha importante. Na Mateo 12:43-45, nos ta haña un ehèmpel ku Hesus a duna i ku ta mustra kiko nos tin ku hasi. (Les’é.) E ehèmpel ei ta resaltá un bèrdat importante: no ta sufisiente pa djis saka mal pensamentu for di nos mente, nos tin ku yena e bashí ku pensamentu di Dios.

 7. Kon nos por kambia loke realmente nos ta di paden?

⁷ Ta posibel pa kambia loke realmente nos ta di paden? Beibel ta bisa: “Boso mester sigui renobá boso aktitut mental dominante, i bisti e personalidat nobo ku a ser kreá segun e boluntat di Dios den berdadero hustisia i lealtat.” (Efe. 4:23, 24, nota.) Pues, ta posibel pa kambia, pero no ta fásil. Nos tin ku hasi mas ku djis resistí mal deseo i stòp di hasi kos malu. Nos mester kambia nos “aktitut mental dominante.” Esei ta nifiká kambia nos deseo, tendensia i motivashon. Pa logra esei, nos mester hasi esfuerso kontinuo.

8-9. Kon e eksperensia di un ruman ta resaltá e importansia di kambia loke realmente nos ta di paden?

⁸ Laga nos wak e ehèmpel di un ruman hòmber ku tabata masha violento, tabata bebe hopi i kana bringa. Ku tempu, el a hasi e kambionan nesesario i a kualifiká pa batisá. Esaki tabata un bon testimonio pa e pueblo chikitu kaminda e tabata biba. Pero un anochi, poko despues ku el a batisá, el a hañ’é ku un prueba inesperá. Un hòmber burachi a bini su kas i kier a bringa kuné. Na promé instante, nos ruman a dominá su mes i no a bringa. Pero, ora e hòmber a papia malu di Yehova, e ruman a rabia asina tantu ku e no por a dominá su mes mas. El a sali pafó i bati e hòmber. Dikon el a hasi esei? Pasobra, aunke su estudio di Beibel a yud’é dominá su tendensianan violento, ainda e no a logra kambia su aktitut mental dominante. Ku otro palabra, e no a kambia loke realmente e ta di paden.

⁹ Apesar di esei, nos ruman no a entregá. (Pro. 24:16) E ansianonan a yud’é sigui progresá i ku tempu el a bira ansiano. Pero, un anochi, djis pafó di Salòn di Reino, el a hañ’é ku un prueba paresido na esun ku el a hañ’é kuné un par di aña promé. Un hòmber burachi tabata a punto di bati un otro ansiano. Kiko nos ruman a hasi? El a keda kalmu i na un manera humilde el a rasoná ku e hòmber; el a trankilis’é i a asta yud’é yega kas. Kon bini nos ruman a reakshoná asina e biaha akí? Pasobra el a renobá su aktitut mental dominante. El a transformá loke e tabata di paden i a bira un persona pasífiko i humilde, un kambio ku a trese onor i gloria na Yehova!

10. Kiko nos tin ku hasi pa kambia loke realmente nos ta di paden?

¹⁰ E kambionan ei no ta tuma lugá di un dia pa otro ni outomátikamente. Kisas nos tin ku sigui “hasi tur [nos] esfuerso” pa vários aña. (2 Ped. 1:5) E echo ku nos ta “den e bèrdat” pa un sierto kantidat di aña no ta sufisiente. Nos mester hasi tur nos esfuerso pa kambia loke realmente nos ta di paden. Kiko por yuda nos? Laga nos wak algun kos importante ku nos tin ku hasi.

11. Kon orashon ta yuda nos kambia nos aktitut mental dominante?

¹¹ E promé kos importante ku nos tin ku hasi ta resa. Nos tin ku pidi meskos ku e salmista a pidi: “Krea den mi un kurason limpi, o Dios, i renobá un spiritu rekto den mi.” (Sal. 51:10) Nos tin ku rekonosé ku nos mester kambia nos aktitut mental dominante i pidi Yehova yuda nos. Kon nos por tin sigur ku Yehova lo yuda nos? Wak loke el a bisa e israelitanan kabesura den tempu di Ezekiel: “Lo mi duna nan ún kurason i pone un spiritu nobo den nan . . . i duna nan un kurason di karni,” esta, un kurason ku ta dispuesto pa sigui Yehova su guia. (Eze. 11:19) E palabranan ei ta animá nos. Yehova tabata dispuesto pa yuda e israelitanan ei kambia, i e ta dispuesto pa yuda nos tambe.

12-13. (a) Segun Salmo 119:59, riba kiko nos mester meditá? (b) Ki pregunta nos mester hasi nos mes?

¹² E di dos kos importante ku nos tin ku hasi ta meditá. Segun ku nos ta lesa e Palabra di Dios tur dia, nos mester traha tempu pa meditá, esta, pa pensa profundamente riba e kosnan ku nos mester kambia. (Lesa Salmo 119:59; Heb. 4:12; Sant. 1:25) Ademas, nos tin ku identifiká e pensamentunan influensiá pa filosofia humano. Nos mester rekonosé onestamente kiko ta nos debilidatnan i lucha duru kontra nan.

¹³ Por ehèmpel, puntra bo mes: ‘Tin rastro di envidia òf yalursheit den mi kurason?’ (1 Ped. 2:1) ‘Mi ta sinti ku mi ta mihó ku otro hende debí na mi rasa, edukashon òf situashon finansiero?’ (Pro. 16:5) ‘Mi ta menospresiá hende ku no tin e mesun kosnan ku mi tin òf ku ta bini di un otro lugá?’ (Sant. 2:2-4) ‘Mi gusta e kosnan ku Satanas su mundu ta ofresé?’ (1 Huan 2:15-17) ‘Mi ta gusta entretenimentu inmoral i violento?’ (Sal. 97:10; 101:3; Ámos 5:15) Bo kontesta pa e preguntanan ei lo mustra bo riba kiko bo tin ku traha. Ora nos ranka e rasonamentunan ei ku ta “fuertemente ankrá” for di nos kurason, nos lo alegrá kurason di nos Tata selestial.—Sal. 19:14.

14. Dikon ta masha importante pa nos skohe bon amistat?

¹⁴ E di tres kos importante ku nos tin ku hasi ta skohe bon amistat. Sea ku nos ta realisá esei òf nò, nos amistatnan tin hopi influensia riba nos. (Pro. 13:20) Na trabou òf na skol, nos ta rondoná di hende ku no ta yuda nos pensa manera Yehova ke. Pero, na nos reunionnan nos por haña amigu ku lo motivá, òf stimulá, nos pa “mustra amor i hasi bon obra.”—Heb. 10:24, 25.

15-16. Kon Satanas ta purba di kambia nos manera di pensa?

¹⁵ Kòrda ku Satanas ke kambia nos manera di pensa. E ta usa tur tipo di rasonamentu pa neutralisá e influensia di e bèrdat di e Palabra di Dios.

¹⁶ Satanas ta sigui usa e mesun tipo di pregunta ku el a hasi Eva den e hòfi di Edén: “Di bèrdat Dios a bisa . . . ?” (Gén. 3:1) Den e mundu di Satanas, hopi biaha hende ta hasi nos pregunta ku por krea duda den nos. Por ehèmpel: ‘Di bèrdat Dios no ta aprobá matrimonio di mesun sekso? Di bèrdat Dios no ke pa boso selebrá Pasku i hasimentu di aña? Di bèrdat Dios no ke pa boso tuma sanger? Di bèrdat un Dios amoroso no ke pa boso tin amistat ku boso famianan ekspulsá?’

17. Kiko nos mester hasi ora un hende hasi nos pregunta ku e meta di krea duda den nos mente, i kiko lo ta e resultado segun Kolosensenan 2:6 i 7?

¹⁷ Nos mester ta konvensí di nos kreensianan. Si nos no buska kontesta pa pregunta importante di nos kreensia, nos por kuminsá duda si loke nos ta kere aden ta bèrdat. Ku tempu, e dudanan ei por desbalansá nos manera di pensa i kaba ku nos fe. Kiko nos tin ku hasi? E Palabra di Dios ta bisa nos pa transformá nos mente pa nos por komprobá pa nos mes “kiko ta e boluntat di Dios, ku ta bon, agradabel i perfekto.” (Rom. 12:2) Si nos ta studia regularmente, nos por tin sigur ku loke nos a siña for di Beibel ta bèrdat. I nos lo ta konvensí ku Yehova su normanan ta korekto. E ora ei, nos lo ta meskos ku un palu ku rais fuertemente ankrá, “stabil den fe.”—Lesa Kolosensenan 2:6, 7.

18. Kiko lo yuda nos neutralisá e efekto tóksiko di Satanas su mundu?

¹⁸ Ta bo mes tin ku hasi bo fe fuerte; niun hende no por hasi esei pa bo. Pues, sigui renobá bo aktitut mental dominante. Resa konstantemente i roga Yehova pa yudansa di su spiritu santu. Traha tempu pa meditá i sigui analisá bo pensamentu- i motivashonnan. Buska bon amistat; rondoná bo mes ku hende ku lo yuda bo transformá bo manera di pensa. Si bo hasi esei, lo bo neutralisá e efektonan tóksiko di Satanas su mundu i lo bo tin éksito den “tumba rasonamentu inkorekto i tur barera ku ta kontra e konosementu di Dios.”—2 Kor. 10:5.