Tur Klase di Hende Lo Ser Salbá
1 Dios su bondat inmeresí a habri kaminda pa salbashon. Yehova su boluntat ta ‘pa tur klase di hende wòrdu salbá i yega na un konosementu di e bèrdat.’ (1 Tim. 2:3, 4) Nos posishon dilanti Dios no ta dependé di nos rasa, posishon sosial, abilidatnan ni di nos aparensia físiko, sino di e fe ku nos ta ehersé den e sakrifisio di reskate di Hesus. (Juan 3:16, 36) Komo kolaboradónan di Dios, nos tin ku deshasí di tur prehuisio ku lo por impulsá nos kurason pa rechasá hende ku Yehova ta dispuesto di aseptá.
2 Evitá di Husga: Sin malisia ni parsialidat, Yehova ta wak loke un persona ta di paden. (1 Sam. 16:7) E ta mira tambe loke nan por bira. Pues e ta mira hende ku ke agrad’é komo rikesa. (Hag. 2:7) Nos ta mira otro hende manera Dios ta mira nan?
3 Podisé aparensia di algun hende ku nos topa den sirbishi por shòk nos. Kisas nan pañanan ta gastá òf inmodesto, nan barba no ta drechá òf nan tin renchi den nanishi òf na lep. Algun di nan podisé no tin kaminda di biba. Otronan ta trata nos brutu. En bes di husga ku e personanan ei nunka lo bira adoradó di Yehova, nos mester tin un aktitut positivo, “pasobra nos mes tambe un tempu tabata ignorante, desobedesidu [i] gañá.” (Tito 3:3) Realisando esaki, nos lo ta ansioso pa prediká na tur hende, asta na personanan ku nan aparensia ta parse di indiká ku nan no ta digno.
4 Ehèmpelnan di Promé Siglo: Hesukristu a tuma su tempu pa yuda hende ku otronan a kore kuné komo kaso pèrdí. (Luk. 8:26-39) Ounke nunka el pasa por haltu di práktikanan robes, e tabata sa ku hende por a haña nan enbolbí den un estilo di bida robes. (Luk. 7:37, 38, 44-48) P’esei, el a mustra komprondementu, el “a sinti kompashon pa nan, pasobra nan tabata manera karné sin wardadó.” (Mar. 6:34) Nos por imitá su ehèmpel mas plenamente?
5 Apòstel Pablo a ser piedrá , batí i será den prizon. (Echo. 14:19; 16:22, 23) E eksperensianan desagradabel aki a pone Pablo bira un persona amargá i yega n’e konklushon ku e tabata pèrdiendo su tempu entre sierto nashonnan i gruponan étniko? Niun ora so. E tabata sa ku den tur grupo étniko por tabatin hende sinsero di kurason, i e tabata desididu pa haña nan. Esei ta e manera ku nos ta pensa di hende den nos teritorio ku ta bini di diferente background i kultura?
6 Risibiendo Otro Hende Awe: Hopi hende ku ta forma parti di e pueblo di Dios awe ta kontentu ku rumannan a risibí nan den e kongregashon apesar di nan aparensia. Un hòmber ku su barba deskuidá, ku kabei te na skouder i su paña tur sushi a yega un Salòn di Reino na Alemania. E tabatin un mal reputashon. Apesar di esei, el a haña un kaluroso bonbiní na e reunion. El a keda asina impreshoná ku el a bolbe e siguiente siman. Den un korto tempu, el a drecha su aparensia, stòp di huma i a kasa ku su mucha muhé. No a dura muchu ku nan i nan yunan tabata sirbi Yehova komo un famia uní.
7 Imitando nos Dios imparsial, laga nos invitá tur hende pa bin benefisiá di Dios su bondat inmeresí.
[Study Questions]
1. Di kiko nos posishon dilanti Dios ta dependé?
2, 3. Kiko por yuda nos pa no husga hende a base di nan aparensia?
4, 5. Kiko nos ta siña for di e ehèmpelnan di Hesus i Pablo?
6. Ki efekto nos aktitut por tin riba hende nobo ku bin e reunionnan di kongregashon?
7. Kon nos por imitá nos Dios imparsial?
[Blurb on page 3]
“Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echo. 10:34, 35.