Meditashon Huntu ku Orashon Ta Nesesario pa Sirbidónan Zeloso

 1. Kiko a yuda Hesus keda enfoká riba su trabou prinsipal?

¹ Hesus a pasa henter anochi kurando hende i sakando demoño. Ora su disipelnan a hañ’é e siguiente dia, nan a bis’é: “Tur hende ta buska bo,” i a urgié pa sigui ku su obranan poderoso. Sinembargo, Hesus no a laga nada desvi’é for di su trabou prinsipal di prediká e bon notisia. El a kontestá nan: “Laga nos bai otro kaminda, na e statnan serka aki banda, pa mi por prediká ayanan tambe; pasobra ta pa e motibu ei mi a bin.” Kiko a yuda Hesus keda enfoká riba su trabou? El a lanta trempan pa hasi orashon i meditá. (Mar. 1:​32-⁠39) Kon meditashon huntu ku orashon por yuda nos tambe pa ta predikadónan zeloso?

 2. Riba kiko nos por meditá pa yuda nos mantené zelo pa sirbishi?

² Meditá Riba Kiko? Hesus a tuma nota ku e hendenan “tabata kansá i plamá, manera karné sin wardadó.” (Mat. 9:⁠36) Di e mesun manera, nos por meditá riba e nesesidat ku hende tin pa tende e bon notisia. Ademas, nos por meditá riba kon urgente nos tempu ta. (1 Kor. 7:⁠29) Tambe nos por reflekshoná riba Yehova su obra- i kualidatnan, nos privilegio di por ta Testigunan di Yehova i e presioso tesoronan spiritual ku nos a haña den e Palabra di Dios i ku ta deskonosí pa e hendenan den nos teritorio.​—⁠Sal. 77:​11-⁠13; Isa. 43:​10-⁠12; Mat. 13:⁠52.

 3. Ki ora nos por meditá?

³ Meditá Ki Ora? Meskos ku Hesus, algun ruman ta lanta trempan ora ta ketu ainda. Otronan ta haña ku nan por meditá mihó parti anochi promé ku nan bai drumi. (Gén. 24:⁠63) Asta si nos tin un programa drùk, nos por traha tempu pa meditá. Algun ruman ta hasi esei miéntras nan ta hasi uso di transporte públiko. Otronan ta usa un parti di nan pousa di mèrdia pa por meditá sin strobansa. Hopi ruman ta haña ku meditashon promé ku sirbishi, ounke ta djis un par di minüt, ta yuda nan prediká ku mas zelo i kurashi.

 4. Dikon nos mester meditá?

⁴ Meditashon huntu ku orashon ta yuda nos mira nos adorashon komo e kos di mas importante den nos bida i ta fortalesé nos determinashon pa sigui prediká. Dios su Sirbidó Prinsipal, Hesus, a benefisiá di e echo ku el a meditá i esei lo ta meskos den nos kaso.