“Mi A Yama Boso Amigu”

 1. Kon bo por bira bon amigu ku un hende?

E PROMÉ kos ku bo mester hasi pa por bira bon amigu di un hende, ta di pasa tempu kuné. Ora boso ta papia tokante loke boso ta pensa i sinti, boso ta bira bon amigu di otro. Pero, pa nos bira bon amigu di Hesus, nos tin algun reto. Kiko nan ta?

 2. Kiko ta e promé reto?

² E promé reto ta ku nos no a topa Hesus personalmente. Hopi kristian den promé siglo tabatin e mesun reto ei. Pero, Apòstel Pedro a bisa: “Aunke boso no a mir’é nunka, boso ta stim’é. Aunke boso no ta mir’é aworakí, tòg boso tin fe den dje.” (1 Ped. 1:8) Pues, nos por bira bon amigu di Hesus sin ku nos a top’é personalmente.

 3. Kiko ta e di dos reto?

³ E di dos reto ta ku nos no por papia ku Hesus. Ora nos ta hasi orashon, nos ta papia ku Yehova. Ta bèrdat ku nos ta resa den nòmber di Hesus, pero no ta kuné nos ta papia. De echo, Hesus no ke pa nos resa na dje. Dikon nò? Pasobra orashon ta un forma di adorashon, i ta Yehova so nos mester adorá. (Mat. 4:10) Apesar di esei, nos por demostrá ku nos ta stima Hesus.

 4. Kiko ta e di tres reto, i kiko nos lo analisá den artíkulo akí?

⁴ E di tres reto ta ku nos no por pasa tempu ku Hesus pasobra Hesus ta den shelu. Pero, nos por haña sa hopi tokante Hesus sin ku nos ta huntu kuné. Laga nos analisá kuater kos ku por yuda nos fortalesé nos amistat kuné. Pero promé, nos lo wak dikon ta importante pa nos bira bon amigu di Kristu.

 5. Dikon nos mester ta amigu di Hesus? (Wak tambe e kuadronan “Amistat ku Hesus Ta Hiba na Amistat ku Yehova” i “Mira Hesus na e Manera Korekto.”)

⁵ Nos mester ta amigu di Hesus si nos ke tin un bon amistat ku Yehova. Dikon? Promé, Hesus a bisa su disipelnan: “E Tata mes tin kariño pa boso, ya ku boso tin kariño pa mi.” (Huan 16:27) El a bisa tambe: “Ningun hende no ta yega serka e Tata si no ta pa medio di mi.” (Huan 14:6) Purba di ta amigu di Yehova sin ta un bon amigu di Hesus, ta meskos ku purba di drenta un edifisio sin usa e porta. Hesus a usa un ilustrashon paresido ora el a bisa ku e ta “e porta pa e karnénan pasa dor di dje.” (Huan 10:7) Di dos, Hesus a reflehá e kualidatnan di su Tata perfektamente. El a bisa su disipelnan: “Esun ku a mira mi, a mira e Tata tambe.” (Huan 14:9) Pues, un manera importante pa nos konosé Yehova ta di siña konosé Hesus. Mas nos siña tokante Hesus, mas nos lo stim’é. Anto mas nos ta stim’é, mas aun nos lo stima e Tata.

 6. Kiko ta un otro motibu dikon nos mester tin un amistat ku Hesus? Splika.

⁶ Nos mester tin amistat ku Hesus pa nos por haña kontesta pa nos orashonnan. Esei ke men ku nos mester hasi mas ku djis bisa “den nòmber di Hesus” na final di nos orashonnan. Nos mester komprondé den ki manera Yehova ta usa Hesus pa kontestá nos orashonnan. Hesus a bisa e apòstelnan: “Kiko ku boso pidi den mi nòmber, lo mi hasi.” (Huan 14:13) Ta bèrdat ku ta Yehova ta esun ku ta skucha i kontestá nos orashonnan. Pero, ora e disidí di kontestá nos orashon, e ta outorisá Hesus pa atendé esei p’e. (Mat. 28:18) Ademas, promé ku Dios kontestá nos orashonnan, e ta wak si nos a apliká e konseho ku Hesus a duna. Por ehèmpel, Hesus a bisa: “Si boso ta pordoná hende nan faltanan, boso Tata selestial tambe lo pordoná boso; ma si boso no ta pordoná hende nan faltanan, boso Tata tampoko lo no pordoná boso faltanan.” (Mat. 6:14, 15) P’esei, ta masha importante pa nos trata nos rumannan mesun amabel ku Yehova i Hesus ta trata nos!

 7. Ken lo benefisiá di e sakrifisio di reskate di Hesus?

⁷ Solamente hende ku tin amistat será ku Hesus lo benefisiá di su sakrifisio di reskate. Kon nos por sa esei? Hesus a bisa ku lo e “entregá su alma pa su amigunan.” (Huan 15:13) Sirbidó fiel di Yehova ku a biba promé ku Hesus a bini na tera lo tin ku siña tokante dje i siña stim’é. Hende manera Abraham, Sara, Moises i Rahab lo resusitá, pero asta nan lo mester sera un amistat ku Hesus pa nan por gana bida eterno.—Huan 17:3; Echo. 24:15; Heb. 11:8-12, 24-26, 31.

8-9. Segun Huan 15:4 i 5, kiko nos por hasi si nos ta amigu di Hesus, i dikon ta importante pa nos keda den union ku Hesus?

⁸ Nos tin e goso di traha huntu ku Hesus den e trabou di prediká i siña hende e bon notisia di e Reino. Tempu Hesus tabata riba tera, e tabata un maestro. Pero ora el a bolbe na shelu, el a bira kabes di e kongregashon. Desde e tempu ei, el a sigui guia e trabou di prediká i di siña hende. E ta mira i ta balorá bo esfuerso pa yuda mas tantu hende posibel konosé e i su Tata. De echo, e úniko manera ku nos por kumpli ku e trabou ei ta ku yudansa di Yehova i Hesus.—Lesa Huan 15:4, 5.

⁹ Beibel ta bisa klaramente ku, pa nos agradá Yehova, nos mester stima Hesus i hasi esfuerso pa e amor ei no fria nunka. P’esei, laga nos analisá kuater kos ku nos por hasi pa bira amigu di Hesus.

10. Kiko ta e promé kos ku nos mester hasi pa nos bira amigu di Hesus?

¹⁰ (1) Siña konosé Hesus. Nos por hasi esei si nos lesa e bukinan bíbliko di Mateo, Marko, Lukas i Huan. Segun ku nos ta meditá riba e relatonan bíbliko tokante e bida di Hesus, nos ta siña stim’é i respet’é debí na e manera amabel ku el a trata hende. Por ehèmpel, aunke e tabata Doño di su disipelnan, e no a trata nan manera esklabo. Mas bien, el a trata nan komo amigu i a laga nan sa loke e ta pensa i sinti. (Huan 15:15) El a sinti nan doló i a yora ku nan. (Huan 11:32-36) Asta su enemigunan por a mira ku hende ku a aseptá su mensahe a bira su amigu. (Mat. 11:19) Si nos imitá Hesus den e manera ku el a trata su disipelnan, nos amistat ku otro hende lo mehorá, nos lo ta mas kontentu i nos amor i rèspèt pa Kristu lo oumentá.

11. Kiko ta e di dos kos ku nos mester hasi pa nos bira amigu di Hesus, i dikon esei ta importante?

¹¹ (2) Pensa i hasi meskos ku Hesus. Mas mihó nos konosé i imitá su manera di pensa, mas será nos amistat kuné lo ta. (1 Kor. 2:16) Kon nos por imit’é? Wak un ehèmpel aki. Hesus no a buska su mes interes; p’e tabata mas importante yuda otro hende. (Mat. 20:28; Rom. 15:1-3) Debí ku el a pensa asina, el a sakrifiká su mes pa otro hende i a pordoná nan. E no a sintié ofendí lihé pa loke hende a bisa di dje. (Huan 1:46, 47) I e no a permití un eror ku un hende a hasi den pasado influensiá su manera di trat’é. (1 Tim. 1:12-14) Ta importante pa nos tin Hesus su punto di bista di otro hende pasobra el a bisa: “Tur hende lo sa ku boso ta mi disipelnan, esta, si boso ta stima otro.” (Huan 13:35) P’esei, puntra bo mes: “Meskos ku Hesus, mi ta hasi tur mi posibel pa mi ta na pas ku mi rumannan?”

12. Kiko ta e di tres kos ku nos mester hasi pa nos bira amigu di Hesus, i kon nos por hasi esei?

¹² (3) Apoyá e rumannan di Kristu. Hesus ta mira loke nos ta hasi pa su rumannan ungí komo si fuera ta p’e nos ta hasi nan. (Mat. 25:34-40) E manera di mas importante pa apoyá nan ta di partisipá plenamente den e trabou ku Hesus a duna nos: prediká e Reino i hasi hende disipel. (Mat. 28:19, 20; Echo. 10:42) Solamente ku yudansa di e ‘otro karnénan’ e rumannan di Kristu por kumpli ku e kampaña mundial di prediká ku awor ta tumando lugá. (Huan 10:16) Si bo ta un di e otro karnénan, kada biaha ku bo partisipá den e trabou ei, bo ta demostrá bo amor pa e rumannan di Kristu i pa Hesus mes.

13. Kon nos por apliká e konseho di Hesus ku tin na Lukas 16:9?

¹³ Nos por bira amigu di Yehova i Hesus tambe ora nos ta usa nos plaka pa apoyá e trabou ku nan ta guia. (Lesa Lukas 16:9.) Por ehèmpel, nos por hasi donashon na e obra mundial pa yuda ku e predikashon den área isolá, pa traha i kuida edifisio manera Salòn di Reino òf otro edifisio similar i pa yuda ruman despues di desaster natural òf kualke otro suseso desastroso. Nos por hasi donashon tambe pa e gastunan di nos mes kongregashon i yuda ruman ku nos sa ku mester di yudansa. (Pro. 19:17) Di e maneranan ei nos ta apoyá e rumannan di Kristu.

14. Segun Efesionan 4:15 i 16, kiko ta e di kuater kos ku nos mester hasi pa nos bira amigu di Hesus?

¹⁴ (4) Apoyá desishon di e kongregashon kristian. Nos ta bira mihó amigu di Hesus, kende ta kabes di e kongregashon, ora nos ta kooperá ku e rumannan ku el a apuntá pa kuida nos. (Lesa Efesionan 4:15, 16.) Por ehèmpel, e organisashon ta hasi sigur di hasi bon uso di tur Salòn di Reino. Pa logra esei, algun kongregashon mester a djòin ku otro i mester a ahustá e teritorionan. Komo resultado, e organisashon a spar hopi plaka ku e publikadónan a kontribuí. Pero, na mes momento, algun publikadó mester a adaptá na e sirkunstansianan nobo. Kisas pa hopi aña nan a pertenesé na un kongregashon i a bira masha será ku e rumannan den e kongregashon ei. Pero, awor nan ta ser pidí pa sirbi na un otro kongregashon. Hesus ta masha kontentu ora e mira e disipelnan fiel ei apoyá tal desishon!

15. Kon nos amistat ku Hesus lo mehorá den futuro?

¹⁵ E rumannan ungí ku spiritu santu lo goberná ku Hesus den e Reino di Dios. Nan tin e speransa di ta huntu ku Kristu—nan lo mir’é, papia kuné i pasa tempu kuné pa semper. (Huan 14:2, 3) Esnan ku tin e speransa terenal tambe lo haña amor i atenshon di Hesus. Aunke nan lo no mira Hesus, nan lo bira mihó amigu di dje segun ku nan ta disfrutá di e bida ku Yehova i Hesus a hasi posibel pa nan.—Isa. 9:6, 7.

16. Kon nos amistat ku Hesus ta yuda nos?

¹⁶ Ora nos aseptá Hesus su invitashon pa bira su amigu, nos ta haña hopi bendishon. Por ehèmpel, for di aworakí nos tin su amor i apoyo. Ademas, nos tin e oportunidat di biba pa semper. I mas importante ainda, nos amistat ku Hesus lo duna nos e amistat di mas balioso ku tur otro: amistat será ku su Tata, Yehova. Ki un privilegio nos tin di ta amigu di Hesus!