Yehova Ta Garantisá Ku Lo Tin un Paradeis

 1. Kiko Profeta Isaías kier a laga e israelitanan komprondé?

PROFETA Isaías a yama Yehova “e Dios di bèrdat.” E palabra tradusí “bèrdat” literalmente ta nifiká “amèn.” (Isa. 65:​16, nota) Anto “amèn” ta nifiká “sea asina” òf “bèrdat.” Beibel hopi biaha ta usa e palabra “amèn” pa konfirmá ku loke ku Yehova i Hesus ta bisa òf ta hasi ta bèrdat. Pues, loke Isaías kier a laga e israelitanan komprondé ta esaki: Loke Yehova primintí lo bira realidat sin falta. Yehova a proba esei kumpliendo ku delaster un di su promesanan.

 2. Dikon nos por konfia loke Yehova a primintí nos, anto ki preguntanan nos ta bai kontestá den e artíkulo akí?

² Pero awor kiko di nos? Nos tambe por konfia ku Yehova lo kumpli ku loke el a primintí nos? Kasi 800 aña despues ku Isaías a skirbi su buki, Apòstel Pablo a splika dikon nos por ta konvensí ku Yehova su promesanan lo bira realidat. El a bisa: “Ta imposibel pa Dios gaña.” (Heb. 6:18) Meskos ku un pos no por tin tantu awa dushi komo awa brak, asina tambe Yehova, e Fuente di bèrdat, no por papia mentira. Pues, nos por konfia plenamente den tur loke Yehova ta bisa, inkluso e kosnan ku el a primintí nos. Den e artíkulo akí nos ta bai kontestá dos pregunta: Kiko Yehova a primintí nos? Anto ki garantia el a duna pa esei?

 3. (a) Kua promesa hopi di nos gusta? (Revelashon 21:​3, 4) (b) Kiko algun hende ta bisa ora nos lesa e promesa ei pa nan?

³ Hopi Testigu di Yehova rònt mundu gusta e promesa na Revelashon 21:3 i 4, i ta tokante e promesa ei nos lo papia. (Les’é.) Yehova ta primintí ku lo yega un dia ku “lo no tin morto mas; ni tristesa ni sklamashon ni doló.” Ora nos ta prediká, hopi biaha nos ta usa e teksto ei pa konsolá otro hende i splika nan kon bida den Paradeis lo ta. Bo a yega di ripará loke algun hende ta bisa ora nos lesa e promesa ei pa nan? Kisas nan ta bisa: “Ya, e ta den Beibel, pero e kos ei ta bai pasa di bèrdat?”

 4. (a) Kiko Yehova tabata sa? (b) Fuera di hasi un promesa, kiko mas Yehova a hasi?

⁴ Ora ku Yehova a inspirá Apòstel Huan pa skirbi e promesa akí tokante Paradeis, E tabata sa ku nos lo us’é ora di prediká. Yehova tabata sa tambe ku hopi hende lo duda ku e kosnan ei lo pasa den futuro. (Isa. 42:9; 60:2; 2 Kor. 4:​3, 4) Pues, kon nos por konvensé otro hende ku e bendishonnan menshoná na Revelashon 21:3 i 4 lo kumpli sigur? I kon nos por haña mas konfiansa den Yehova i su promesanan? Yehova a duna nos bon motibu pakiko nos por tin sigur ku e ta bai kumpli ku su promesa. Ban wak.

 5. Den kua teksto nos ta haña algun motibu pa konfia den Yehova su promesa, i kiko e ta bisa?

⁵ Na Revelashon 21:5 i e promé parti di versíkulo 6 nos ta haña algun motibu pa konfia den Yehova su promesa tokante Paradeis. Ei nos ta lesa: “Esun sintá riba e trono a bisa: ‘Tende! Mi ta traha tur kos nobo.’ Tambe e di: ‘Skirbi, pasobra e palabranan akí ta digno di konfiansa i bèrdat.’ I el a bisa mi: ‘E palabranan akí a bira realidat. Ami ta e Alfa i e Omega, e prinsipio i e fin.’”

 6. Dikon e palabranan na Revelashon 21:5 i 6 ta yuda nos haña mas konfiansa den Yehova su promesa?

⁶ Dikon e palabranan ei ta yuda nos haña mas konfiansa den Yehova Dios su promesa? E buki Revelacion—su gran culminacion ta cerca! ta bisa tokante e versíkulonan ei: “Ta komo si Yehova mes ta firma un garantia òf akto di tereno pa fiel humanidat, pa tal bendishon di futuro.”b Na Revelashon 21:3 i 4, nos ta haña Yehova su promesa. Anto den versíkulonan 5 i 6, Yehova ta pone su firma bou di e promesa ei pa garantisá nos ku lo e kumpli kuné sigur. Awor, ban para ketu na e palabranan ku Yehova a usa pa formulá su garantia.

 7. Ken ta kuminsá papia na versíkulo 5, i dikon esei ta spesial?

⁷ Dios su garantia ta kuminsá asin’akí: “Esun sintá riba e trono a bisa.” (Rev. 21:5a) Loke nos a lesa ei ta spesial pasó loke ta sigui ta un di e úniko tres biahanan ku Yehova mes ta papia den e buki Revelashon. Pues, no ta un angel ni Hesus ta esun ku a duna e garantia akí, ma Yehova mes! Esei mes kaba ta duna nos pleno konfiansa den e palabranan ku ta sigui. Dikon? Pasobra Yehova “no por gaña.” (Tito 1:2) Pues, loke nos ta lesa na Revelashon 21:5 i 6 lo kumpli sigur.

 8. Kiko Yehova ta bisa pa garantisá ku su promesa lo kumpli? (Isaías 46:10)

⁸ Laga nos para ketu un ratu na e palabra “Tende!” (Rev. 21:5) E palabra griego tradusí komo “tende!” ta aparesé hopi biaha den e buki di Revelashon. Un buki a bisa ku a usa e signo di sklamashon “pa hala atenshon di e lesadó na loke ta sigui.” Pero kiko ta sigui? Dios a bisa: “Mi ta traha tur kos nobo.” Yehova ta papia di kosnan ku lo e hasi den futuro. E tin asina sigur ku e promesa ei lo bira realidat, ku el a usa un palabra griego ku ta duna e idea ku ya kaba e ta bezig ta hasiendo e kambionan.—Lesa Isaías 46:10.

 9. (a) Na ki dos kos e frase “traha tur kos nobo” ta referí na dje? (b) Kiko ta bai pasa ku “e shelu” i “e tera” ku ta eksistí awor?

⁹ Kiko nos tin ku komprondé for di e siguiente frase na Revelashon 21:5 tokante “traha tur kos nobo”? Wèl, e frase ei ta referí na dos kos ku Yehova ta bai hasi. E ta bai kambia algu i drecha algu. Na Revelashon 21:1 nos ta lesa ku “e shelu anterior i e tera anterior a kaba na nada.” “E shelu anterior” ta referí na gobièrnunan den man di Satanas i su demoñonan. (Mat. 4:​8, 9; 1 Huan 5:19) Awor kiko di “e tera anterior”? Wèl, hopi biaha Beibel ta usa e palabra “tera” pa referí na hende riba tera. (Gén. 11:1; Sal. 96:1) Pues, “e tera anterior” ta referí na hende malbado. Yehova lo no djis drecha òf mehorá e “shelu” i “tera” ku tin awor. Na lugá di esei, e ta bai kambia nan kompletamente ku “un shelu nobo i un tera nobo.” Ku otro palabra, e ta bai trese un gobièrnu nobo ku ta bai goberná riba hende hustu.

10. Kiko Yehova lo traha nobo?

¹⁰ Den ki otro sentido Yehova lo “traha tur kos nobo”? (Revelashon 21:5) Yehova ta bai drecha e tera i yuda hende bira perfekto. Manera Isaías a profetisá, Yehova ta bai hasi henter e tera un lugá bunita. Lo e ta bunita manera e hòfi na Éden. Ademas, Yehova lo kura nos den tur sentido. Yehova lo kura hende ku tin desabilidat, hende siegu, hende surdu i lo asta resusitá hende ku a muri.—Isa. 25:8; 35:​1-7.

11. Kiko Yehova a bisa Huan i pa ki motibu?

¹¹ Kiko ta e siguiente parti di Yehova su garantia? Yehova a bisa Huan: “Skirbi, pasobra e palabranan akí ta digno di konfiansa i bèrdat.” (Rev. 21:5) Aparte di bisa Huan pa skirbi, Yehova a dun’é e motibu pa hasi esei. El a bisa: “Pasobra e palabranan akí ta digno di konfiansa i bèrdat.” Nos ta hopi kontentu ku Huan a obedesé Yehova su instrukshon. Danki na esei, nos por lesa tokante Dios su promesa di Paradeis i pensa riba e bunita bendishonnan ku ta warda nos den futuro.

12. Dikon Yehova por bisa: “E palabranan akí a bira realidat!”?

¹² Yehova ta sigui bisa: “E palabranan akí a bira realidat!” (Rev. 21:6) Dikon Yehova a bisa ku e promesa tokante Paradeis a bira realidat? Pasó nada no por strob’é di kumpli ku loke el a disidí. Pero Yehova su siguiente palabranan ta duna nos mas konfiansa den su garantia. Ban wak.

13. Dikon Yehova a bisa: “Ami ta e Alfa i e Omega”?

¹³ Manera nos a bisa na paragraf 7, tres biaha Yehova mes a papia den e vishonnan ku Huan a haña. (Rev. 1:8; 21:​5, 6; 22:13) Den tur tres el a bisa: “Ami ta e Alfa i e Omega.” Alfa ta e promé lèter di e álfabèt griego i omega ta e último lèter. Deskribiendo su mes komo “e Alfa i e Omega,” Yehova kier a laga komprondé ku ora e kuminsá algu lo e komplet’é òf kab’é.

14. (a) Ki ora Yehova den un sentido a bisa “Alfa,” i ki ora lo e bisa den un sentido “Omega”? (b) Ki garantia nos ta haña na Génesis 2:​1-3?

¹⁴ Despues ku Yehova a krea Ádam ku Eva el a “bendishoná nan” i “a bisa nan: ‘Haña yu i bira hopi; yena tera i domin’é.’” (Gén. 1:28) Asina ei el a bisa nan ku ki meta el a traha humanidat i tera. Na e momento ei, den un sentido, Yehova a bisa “Alfa.” Anto e dia ku Yehova lo bisa den un sentido “Omega,” ta ora desendientenan obedesidu di Ádam ku Eva yena e tera i hasié un paradeis. Ora ku Yehova a kaba di krea “shelu i tera i tur loke nan ta kontené” el a hasi algu ku ta garantisá ku su propósito lo kumpli. Nos ta lesa esei na Génesis 2:​1-3. (Les’é.) Yehova a deklará e di shete dia, un dia sagrado. Kiko nos tin ku komprondé ku esei? Wèl, ku na fin di e di shete dia, Yehova sin falta lo kumpli ku su propósito pa humanidat i pa tera.

15. Dikon kisas Satanas a kere ku el a logra stroba Yehova di kumpli ku su propósito?

¹⁵ Despues ku Ádam ku Eva a rebeldiá, nan a bira pekadó i nan a pasa piká i morto pa nan desendientenan. (Rom. 5:12) Por a parse ku Satanas a logra stroba Dios di kumpli ku su propósito pa yena e tera ku hende obediente i perfekto i ku hamas Yehova lo por a bisa “Omega.” Kisas Satanas a kere ku el a hinka Yehova den un huki. Por ta Satanas a pensa ku un di e poko opshonnan ku Yehova tabatin, ta di mata Ádam ku Eva i traha un otro pareha perfekto i laga nan kumpli ku Su propósito pa humanidat. Pero si Dios lo a hasi esei, e ora ei Diabel lo por a mustra dede riba Yehova i bisa: “Wak! E ta un gañadó.” Dikon? Pasobra na Génesis 1:28 Yehova a bisa Ádam ku Eva ku ta nan desendientenan lo a yena e tera.

16. Dikon kisas Satanas a pensa ku e por a akusá Yehova di ta un frakaso?

¹⁶ Un otro opshon ku kisas Satanas a pensa ku Yehova por tuma ta di laga Ádam ku Eva haña yu, pero e yunan ei nunka lo no bira perfekto. (Ekl. 7:20; Rom. 3:23) Den e kaso ei, Satanas sin duda por a haña e chèns di bisa ku Yehova ta un frakaso. Dikon? Pasobra Yehova lo no por a yena e tera ku desendientenan perfekto di Ádam ku Eva manera tabata Su propósito.

17. Kon Yehova a solushoná e rebelion di Satanas i Ádam ku Eva, anto kiko lo ta e resultado final? (Wak e plachi.)

¹⁷ Pero e manera ku Yehova a solushoná e rebelion di Satanas i Ádam ku Eva lo a laga Satanas babuká. (Sal. 92:5) Yehova a permití Ádam ku Eva haña yu. Asina ei, el a mustra ku e no ta un gañadó. Awor kon Yehova a mustra ku e no tabata un frakaso? Wèl, el a pèrkurá e areglo ku lo tin un “desendiente” ku lo salba e yunan obediente di Ádam ku Eva. Asina ei, Yehova su propósito lo a bira realidat. (Gén. 3:15; 22:18) Bo por imaginá kon Satanas a keda ora ku Yehova a bini ku e areglo di e reskate? Boka habrí! Dikon? Pasobra e reskate ta basá riba e inmenso amor ku Yehova tin. (Mat. 20:28; Huan 3:16) Satanas no tin niun klase di amor; e ta egoista. Pero kiko e reskate lo logra? Wèl pa fin di e reinado di mil aña di Kristu, desendientenan obediente i perfekto di Ádam ku Eva lo biba den Paradeis aki riba tera; presis manera tabata Yehova su propósito for di prinsipio. Na moda di papia, na e momento ei Yehova lo bisa “Omega.”

18. Ki tres motibu Yehova ta duna nos pa konfia den su promesa? (Wak e kuadro “Tres Motibu pa Konfia den Yehova Su Promesa.”)

¹⁸ Den e artíkulo akí nos a trata algun motibu ku ta komprobá ku e tera aki lo bira un paradeis. Pero kon nos por yuda otro hende bira konvensí di esaki? Pa di promé nos por bisa nan: Yehova mes ta esun ku ta hasi e promesa. E buki di Revelashon ta bisa: “Esun sintá riba e trono a bisa: ‘Tende! Mi ta traha tur kos nobo.’” E tin e sabiduria, e poder i e deseo pa kumpli ku su promesa. Di dos, Yehova sa ku loke el a disidí lo sosodé sigur. Ta p’esei el a bisa: “E palabranan akí ta digno di konfiansa i bèrdat. . . . E palabranan akí a bira realidat!” I di tres, nada no por stòp ni stroba Yehova di kaba ku loke el a kuminsá kuné. P’esei el a bisa: “Ami ta e Alfa i e Omega.” Yehova lo proba ku ta Satanas ta un gañadó i un frakaso.

19. Kiko abo por hasi ora un hende duda ku tera lo bira un paradeis?

¹⁹ Kòrda, kada bes ku bo papia ku un hende tokante Dios su garantia, bo ta haña mas konfiansa den Yehova su promesanan. Pues, e siguiente biaha ku bo lesa e bunita promesa ku tin na Revelashon 21:4 i un hende bisa: “Ya, e ta den Beibel, pero e kos ei ta bai pasa di bèrdat?” Kiko lo bo hasi? Bo por lesa i splika nan versíkulo 5 i 6. Mustra nan ku Yehova a garantisá su promesa, poniendo komo si fuera su mes firma bou di dje.—Isa. 65:16.