Un Karta Ku Por Yuda Nos Keda Fiel te na Fin

1-2. (a) Ora Apòstel Pablo a skirbi e karta pa e kristiannan na Hudea, den ki situashon nan tabata? (b) Dikon e karta ei tabata nèt na tempu?

DURANTE e añanan despues ku Hesus a muri, e kristiannan na Herúsalèm i na Hudea a pasa den tempunan hopi difísil. Poko despues ku e kongregashon a ser formá, e kristiannan a haña nan ku hopi persekushon. (Echo. 8:1) Djei un 20 aña despues, nan a sufri debí na hamber i pobresa. (Echo. 11:​27-30) Sinembargo, rònt di aña 61, nan tabatin un periodo di pas kompará ku loke tabata spera nan. Durante e periodo ei, Yehova a inspirá Apòstel Pablo pa manda un karta pa nan. E karta ei a yega nèt na tempu.

² Dikon nos ta bisa esei? Pasobra e periodo di pas ku e kristiannan tabatin na e momento ei lo no a dura mashá. E karta di Pablo a duna nan konseho práktiko ku lo a yuda nan soportá e tribulashon ku tabata na kaminda, esta, e destrukshon di Herúsalèm i su tèmpel ku Hesus a papia di dje. (Luk. 21:20) Di mes, ni Pablo ni e kristiannan na Hudea no tabata sa presis ki dia esei lo a sosodé. Pero, e kristiannan ei por a usa e tempu ku nan tabatin pa traha riba kualidatnan kristian manera fe i perseveransia.—Heb. 10:25; 12:​1, 2.

 3. Dikon ta bon pa nos presta èkstra atenshon na e karta di Hebreonan?

³ Pronto nos lo pasa den un tribulashon muchu mas pió ku esun ku e kristiannan na Hudea a pasa aden. (Mat. 24:21; Rev. 16:​14, 16) E konsehonan ku Yehova a duna nan por yuda nos tambe. Laga nos analisá algun di nan.

“HASI ESFUERSO PA ALKANSÁ MADURES”

 4. Ki kambionan grandi e hudiunan ku a bira kristian mester a hasi? (Wak e plachi.)

⁴ E hudiunan ku a bira kristian tabatin ku hasi kambionan grandi ku no tabata fásil pa nan. Pa siglonan, e hudiunan tabata e pueblo skohí di Yehova. Durante añanan, Herúsalèm tabata un lugá masha importante. Ei ta kaminda e rei ku a representá Yehova tabata goberná i kaminda e tèmpel tabata. Tur hudiu fiel tabata obedesé Lei di Moises i e leinan ku e lidernan religioso tabata siña nan. Tabatin regla tokante kuminda, sirkunsishon i tokante kon pa atendé ku hende ku no tabata hudiu. Pero, despues ku Hesus a muri, Yehova no tabata aseptá sakrifisio ku e hudiunan tabata hasi na e tèmpel mas. Nos por imaginá ku e kambionan ei no tabata niun tiki fásil pa e hudiunan ku a bira kristian i ku a kustumbrá sigui Lei di Moises. (Heb. 10:​1, 4, 10) Asta kristiannan madurá, manera Apòstel Pedro, tabatin difikultat pa adaptá na e kambionan ei. (Echo. 10:​9-14; Gal. 2:​11-14) Ademas, debí na nan kreensianan nobo, nan a bira blanko di atake pa e lidernan religioso hudiu.

 5. Kiko kristiannan mester a tene kuidou kuné?

⁵ Tabatin dos grupo di hende ku tabata oponé e kristiannan na Hudea. Di un banda, tabatin e lidernan religioso hudiu ku a konsiderá e kristiannan komo apóstata. I di un otro banda, tabatin hende den e kongregashon ku tabata insistí ku un kristian mester sigui Lei di Moises. Kisas nan a hasi esei pa evitá persekushon. (Gal. 6:12) Kiko lo a yuda e kristiannan ei keda fiel na Yehova?

 6. Kiko Pablo a animá su rumannan pa hasi? (Hebreonan 5:14–6:1)

⁶ Den e karta ku Pablo a manda pa e kristiannan hebreo, el a animá nan pa studia i meditá riba Dios su Palabra. (Lesa Hebreonan 5:14–6:1.) El a sita for di Skritura Hebreo pa splika nan ku kristiannan su manera di adorá ta superior ku esun di e hudiunan.a E tabata sa ku si nan oumentá nan konosementu i komprondementu di Skritura, ta bira mas fásil pa nan rekonosé siñansa robes i evitá di desviá for di e bèrdat.

 7. Ki difikultat nos tin awe?

⁷ Awe tambe tin hende ku ta plama informashon òf idea ku ta kontrali na Yehova su normanan hustu. Algun hende ta bisa ku nos ta intolerante pasó nos ta sigui loke Beibel ta bisa tokante sèks. E manera ku hende ta pensa ta bayendo mas i mas kontrali na Yehova su manera di pensa. (Pro. 17:15) P’esei, nos mester fortalesé nos kapasidat di identifiká i rechasá idea- òf pensamentunan ku opositornan ta bini kuné pa purba di desanimá òf asta pone nos desviá for di e bèrdat.—Heb. 13:9.

 8. Kiko lo yuda nos sigui bira mihó kristian?

⁸ Pablo a bisa e kristiannan hebreo pa hasi esfuerso pa alkansá madures. Nos tambe tin ku hasi meskos. Pues, nos tin ku traha tempu pa studia Beibel pa nos siña konosé Yehova i su manera di pensa mihó. Esei ta algu ku nos tin ku sigui hasi asta despues ku nos batisá. No ta importá kuantu tempu nos tin den e bèrdat, nos tur tin ku lesa i studia Beibel tur dia. (Sal. 1:2) Un bon rutina di estudio personal lo yuda nos fortalesé un kualidat ku Pablo a resaltá den su karta na e kristiannan hebreo: fe.—Heb. 11:​1, 6.

“FE, LOKUAL TA KONSERBÁ NOS ALMA NA BIDA”

 9. Dikon e kristiannan tabatin mester di fe fuerte?

⁹ E kristiannan hebreo ei mester tabatin fe fuerte pa sobrebibí e tribulashon ku pronto lo a sosodé na Hudea. (Heb. 10:​37-39) Hesus a bisa su siguidónan pa hui bai den seru ora nan mira Herúsalèm rondoná pa ehérsito. Su konseho a konta pa tur kristian, sea ku nan tabata biba den Herúsalèm òf den kunuku na Hudea. (Luk. 21:​20-24) Generalmente den e tempu ei, ora un ehérsito bin pa ataká, hende ku tabata biba pafó di e murayanan di e stat tabata kore buska protekshon den e stat. P’esei, Hesus su konseho di hui bai den e serunan no a parse lógiko i a rekerí hopi fe.

10. Kiko e kristiannan ku fe fuerte lo a hasi? (Hebreonan 13:17)

¹⁰ E kristiannan na Hudea tambe mester a konfia e rumannan ku Hesus tabata usa pa dirigí e kongregashon. E rumannan ei probablemente a duna e kongregashon instrukshon spesífiko enkuanto na ki momento pa hui i kon pa hasi esei. (Lesa Hebreonan 13:17.) Apòstel Pablo a bisa su rumannan pa “obedesé esnan ku ta dirigí boso.” E no tabata ke men ku nan mester a obedesé e ansianonan djis pasó nan mester a hasi esei, sino pasó nan tabata konfia e ansianonan. Pues, e kristiannan ei mester a siña konfia e ansianonan i sigui nan guia promé ku e tribulashon yega. Si nan tabata obedesidu durante periodo di pas, lo tabata muchu mas fásil pa ta obedesidu durante periodo di krísis.

11. Dikon kristiannan awe mester tin fe fuerte?

¹¹ Nos mester tin fe meskos ku e kristiannan hebreo. Nos ta biba den un tempu kaminda mayoria di hende no ta kere ku fin di e mundu akí ta yegando. Nan asta ta chèrcha nos debí ku nos sí ta kere esei. (2 Ped. 3:​3, 4) Ademas, aunke Beibel ta duna algun detaye tokante loke lo pasa durante tribulashon grandi, tin hopi kos ku nos no sa. Nos mester tin fe fuerte ku fin di e mundu lo bini na Yehova su momento i ku lo e protehá nos.—Hab. 2:3.

12. Kiko lo yuda nos sobrebibí tribulashon grandi?

¹² Tambe nos tin ku fortalesé nos fe ku Yehova ta usa “e esklabo fiel i prudente” pa guia nos awe. (Mat. 24:45) Ora e tribulashon grandi kuminsá, nos tambe lo por haña instrukshon spesífiko ku lo salba nos bida, meskos ku e kristiannan hebreo probablemente a haña ora e ehérsito romanonan a bin sitia Herúsalèm. P’esei, awor ta tempu pa nos fortalesé nos fe den e kanal ku Yehova ta usa pa dirigí su organisashon. Si aworakí nos no ta konfia i obedesé instrukshon di e rumannan ei, lo ta hopi difísil pa obedesé nan instrukshon durante tribulashon grandi.

13. Dikon e konseho na Hebreonan 13:5 tabata na su lugá?

¹³ Miéntras ku e kristiannan na Hudea tabata warda e señal pa hui, nan mester a hiba un bida simpel i evitá “amor pa plaka.” (Lesa Hebreonan 13:5.) Algun di nan a yega di eksperensiá hamber i pobresa. (Heb. 10:​32-34) Aunke pa un tempu nan tabata dispuesto pa soportá situashonnan difísil pa e bon notisia, algun kisas awor kier a evitá di pasa den duru i a kuminsá mira plaka komo un protekshon i algu ku nan no por a biba sin dje. Pero, ni maske nan tabatin tur plaka na mundu, esei lo no a salba nan bida ora Herúsalèm lo a ser destruí. (Sant. 5:3) Es mas, si un hende tabata stima plaka, lo tabata hopi difísil p’e hui bai laga su kas i tur su pertenensianan atras.

14. Kon un fe fuerte lo yuda nos tuma desishonnan relashoná ku kosnan material?

¹⁴ Si nos ta konvensí ku pronto Yehova lo destruí e mundu malbado akí, e ora ei nos lo no pensa ku e kosnan di mas importante ta di tin mas plaka òf mas pertenensia. Durante tribulashon grandi, plaka lo no yuda ku nada. Beibel ta bisa ku hende lo “benta nan plata riba kaya” ora nan realisá ku “ni nan plata ni nan oro lo no por salba nan riba e dia di Yehova su furia.” (Eze. 7:19) Na lugá di focus riba akumulá mas i mas plaka, nos mester tuma desishonnan ku lo yuda nos tin un bida simpel i balansá. Esei ta inkluí resistí e tentashon pa hasi debe innesesario òf usa kasi tur nos tempu pa kuida nos pertenensianan. Tambe nos mester tene hopi kuidou pa no pega nos kurason na e kosnan ku ya nos tin. (Mat. 6:​19, 24) Segun ku e fin ta yega mas serka, nos lo tin ku skohe sea konfia den Yehova òf konfia den nos pertenensianan.

“BOSO TIN MESTER DI PERSEVERANSIA”

15. Dikon e kristiannan tabatin mester di foral perseveransia?

¹⁵ Segun ku e situashon na Hudea tabata bira mas i mas malu, e kristiannan einan tabatin mester di perseveransia. (Heb. 10:36) Aunke den pasado algun di nan a pasa den persekushon fuerte, hopi di nan a aseptá e bèrdat durante un periodo di pas. Pues, Pablo a spièrta nan ku persekushon lo bai bira mas intenso i ku nan mester tabata prepará pa keda fiel te na morto, meskos ku Hesus. (Heb. 12:4) Komo ku hopi hudiu tabata bira kristian, esei a pone hopi hudiu fanátiko bira mas rabiá i mas violento. Un par di aña promé ku Pablo a skirbi e buki Hebreonan, un multitut a atak’é ora ku e tabata prediká na Herúsalèm. Mas ku 40 hudiu “a hura ku nan lo no kome ni bebe nada tanten ku nan no mata Pablo.” (Echo. 22:22; 23:​12-14) Aunke e kristiannan tabata rondoná di hende ku tabata odia nan i persiguí nan, nan lo mester a sigui reuní, prediká e bon notisia i mantené nan fe fuerte.

16. Kon e karta na e kristiannan na Hudea por yuda nos mira persekushon fo’i e punto di bista korekto? (Hebreonan 12:7)

¹⁶ Kiko por a yuda e kristiannan na Hudea soportá persekushon? Pablo tabata sa ku nan mester a mira nan pruebanan fo’i e punto di bista korekto. P’esei, el a splika nan ku ora kristiannan pasa den prueba, Yehova por usa esei pa entrená nan. (Lesa Hebreonan 12:7.) Prueba por yuda nan siña òf mehorá kualidatnan ku ta nesesario pa bira mihó kristian. Pues, lo tabata mas fásil pa e kristiannan na Hudea soportá prueba si nan a focus riba e bon resultadonan.—Heb. 12:11.

17. Kiko Pablo a siña for di e persekushonnan ku el a pasa aden?

¹⁷ Pablo a animá e kristiannan na Hudea pa tene kurashi i no entregá ora nan haña nan ku persekushon. E tabata e mihó hende pa duna konseho tokante esei. Komo ku e mes a yega di persiguí e kristiannan, e tabata sa kiko nan lo a haña nan kuné. Ademas, despues ku el a bira kristian, e mes a soportá vários sorto di persekushon. (2 Kor. 11:​23-25) Pues, di eksperensia Pablo tabata sa kiko tabata nesesario pa perseverá. Ta p’esei el a kòrda nan ku nan no mester konfia den nan mes sino den Yehova. Ta esei a duna Pablo kurashi ku e por a bisa: “Yehova ta mi ayudante; lo mi no tin miedu.”—Heb. 13:6.

18. Kiko lo pasa ku nos tur den futuro, i kon nos por prepará?

¹⁸ Pa algun di nos rumannan, persekushon ta un realidat diario. Un manera ku nos por mustra ku nos stima nos rumannan ta di hasi orashon pa nan i, tin biaha, duna nan loke nan mester. (Heb. 10:33) Pero Beibel ta bisa bon kla ku “tur hende ku ta deseá di biba ku deboshon na Dios komo disipel di Kristu Hesus tambe lo ser persiguí.” (2 Tim. 3:12) Pues, nos tur mester prepará pa loke ta na kaminda. Kon? Nos mester sigui konfia kompletamente den Yehova i keda konvensí ku lo e yuda nos soportá kualke prueba ku nos haña nos kuné. Na e debido momento, lo e trese alivio pa tur su fiel sirbidónan.—2 Tes. 1:​7, 8.

19. Kiko nos por hasi pa prepará pa tribulashon grandi? (Wak e plachi.)

¹⁹ E karta ku Pablo a skirbi e kristiannan hebreo sigur a yuda nan prepará pa e tribulashon ku tabata na kaminda. Pablo a animá nan pa oumentá nan konosementu i komprondementu di Skritura. Esei lo a yuda nan rekonosé i rechasá siñansanan ku lo a suak nan fe. El a bisa nan pa fortalesé nan fe pa asina nan por sigui guia di Hesus i di esnan ku ta dirigí e kongregashon. El a yuda nan mira ku lo ta mas fásil pa nan soportá prueba si nan mira nan fo’i e punto di bista korekto, esta, si nan mira prueba komo oportunidat ku nan Tata ku stima nan mashá por usa pa entrená nan. Si nos tambe apliká e konsehonan di e karta akí, nos lo por perseverá fielmente te na final.—Heb. 3:14.