Religion Mester Mete ku Polítika?

Rònt mundu, hopi hende ku ta bisa ku nan ta siguidó di Kristu ta hopi enbolbí den polítika. Algun hende ke promové nan mes balornan moral i kreensianan religioso, i p’esei nan ta sostené sierto kandidato di partido òf sierto partido polítiko. Anto e polítikonan, hopi biaha ta usa un kuestion moral òf sosial pa haña sosten di hende religioso. Ademas, a bira normal pa mira lider religioso riba lista di partido polítiko. I den algun pais, tin religion ku ta yama nan mes kristian ta e religion ofisial di e pais òf estado.

Kiko bo ta pensa? Un siguidó di Kristu mester ta enbolbí den asuntu polítiko? E ehèmpel di Hesus ta duna e kontesta. Hesus a bisa: “Mi a duna boso un ehèmpel, pa boso tambe hasi manera mi a hasi ku boso.” (Huan 13:15) Ki ehèmpel Hesus a pone ora a trata di asuntu polítiko?

Nò. Hesus no tabata enbolbí den asuntu polítiko di e mundu akí.

Hesus no a drenta polítika pa e por a haña poder. Ora Diabel, esta, Satanas, a ofresé Hesus pa e bira gobernante di “tur e reinonan di mundu,” Hesus a rechasá e oferta ei. (Mateo 4:8-10)a Mas despues, ora e hendenan a ripará ku Hesus lo por a bira un bon lider, nan a purba di fòrs’é pa drenta polítika. Beibel ta bisa: “Komo ku Hesus tabata sa ku nan tabata serka di bin gar’é pa hasié rei, el a kita for di einan i bolbe bai su so den seru.” (Huan 6:15) Hesus no a hasi loke e hendenan tabata ke; el a nenga di drenta polítika.

Hesus no a skohe banda ora tabata trata di asuntu polítiko. Por ehèmpel, e hudiunan den tempu di Hesus no tabata ke paga e gobièrnu romano belasting. E hudiunan tabata haña ku e belasting ku e gobièrnu tabata kobra tabata inhustu. Nan tabata ke pa Hesus duna su opinion tokante e asuntu, pero Hesus no a kuminsá ku un debate pa wak si e belasting ei tabata hustu òf nò. Hesus a djis bisa nan: “Duna Sésar loke ta di Sésar, ma Dios loke ta di Dios.” (Marko 12:13-17) Hesus a keda neutral, pero el a bisa nan sí ku nan mester a paga e belasting ku Sésar, esta, e gobièrnu romano, a eksigí nan paga. Hesus a mustra bon kla tambe ku obedensia na gobièrnu tin su límite. Un hende no mester a duna gobièrnu algu ku ta pertenesé na Dios. Por ehèmpel, nos ta leal na Dios i nos ta adorá e so, no gobièrnu.—Mateo 4:10; 22:37, 38.

Hesus tabata apoyá un gobièrnu den shelu, esta, e Reino di Dios. (Lukas 4:43) Hesus no tabatin nada di haber ku polítika pasobra e tabata sa ku e gobièrnunan humano no por kumpli ku e propósito ku Dios tin pa tera; ta e Reino di Dios so por kumpli ku Dios su propósito. (Mateo 6:10) Hesus tabata sa ku Dios lo no usa gobièrnu humano; e tabata sa ku e Reino di Dios lo remplasá tur gobièrnu.—Daniel 2:44.

Nò. Hesus a bisa su siguidónan ku nan ‘no mester tabata parti di mundu,’ i nan a obedesé e mandamentu ei. (Huan 15:19) Nan a sigui Hesus su ehèmpel i nan no a mete den asuntu polítiko. (Huan 17:16; 18:36) En bes di mete den e asuntunan ei, nan a hasi e trabou ku Hesus a manda nan hasi: Nan a prediká tokante e Reino di Dios i siña hende tokante e Reino ei.—Mateo 28:18-20; Echonan 10:42.

Pa e kristiannan di promé siglo, obedensia na Dios tabata e kos di mas importante. Pero nan tabata sa tambe ku nan mester a obedesé e outoridatnan di gobièrnu. (Echonan 5:29; 1 Pedro 2:13, 17) Nan a obedesé lei, i nan a paga belasting. (Romanonan 13:1, 7) Aunke nan no a mete den asuntu polítiko, nan a benefisiá di sierto protekshon ku lei a ofresé i otro servisio ku gobièrnu tabata duna.—Echonan 25:10, 11; Filipensenan 1:7.

Beibel ta mustra bon kla ku ni Hesus ni su promé siguidónan no tabata enbolbí den polítika. Pa e motibu ei, Testigunan di Yehova, kendenan tambe ta kristian, ta keda kompletamente neutral. Meskos ku tabata e kaso ku e kristiannan di e promé siglo, Testigunan di Yehova tambe ta hasi e trabou ku Hesus a manda kristian hasi, esta, prediká ‘bon notisia di e Reino.’—Mateo 24:14.