Beibel Por Yuda Bo Dil ku Problema Finansiero?

Sí. E kuater prinsipionan bíbliko akí por yuda bo dil ku problema finansiero:

1. Traha un presupuesto. “E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.” (Proverbionan 21:5, Beibel Santu) No kore kumpra un kos djis pasobra e ta na baratio. Traha un presupuesto i tene bo na dje.

2. Evitá debe innesesario. “E fiadó ta bira esklabo di esun ku ta fi’é.” (Proverbionan 22:7, Beibel Santu) Si bo a hinka bo kurpa den un debe i no por pag’é bèk, purba negosiá un areglo di pago nobo. Hasi manera e hende menshoná na Proverbionan 6:1-5: “Bai, humiá bo mes, i insistí serka bo próhimo. No laga soño dominá bo wowo, ni madoho dominá bo klèp di wowo.” (Proverbionan 6:1-5, Beibel Santu). Kisas lo bo tin ku purba vários biaha. Si bo promé intento no duna e resultado deseá, no entregá sino sigui insistí pa bo yega na un akuerdo nobo.

3. Tene plaka na su lugá. “Hende haragan ta kore tras di rikesa, sin sa ku pobresa ta ward’é.” (Proverbionan 28:22, Beibel na papiamentu koriente) Envidia i golosidat por hiba na ruina ekonómiko i por pone hende pèrdè interes den asuntunan spiritual.

4. Keda satisfecho. “Si nos tin kuminda, paña i un dak riba nos kabes, nos lo keda kontentu ku e kosnan akí.” (1 Timoteo 6:8) Plaka no por kumpra felisidat. Algun di e hendenan mas felis na mundu no ta riku. Loke ta bal mas pa nan ta amor pa nan famia- i amigunan i un bon relashon ku Dios.—Proverbionan 15:17; 1 Pedro 5:6, 7.