Dios Ta Ferwagt pa Nos Kuida Nos Mayornan ora Nan Bira Grandi?

Yu adulto tin e responsabilidat importante pa perkurá pa nan mayornan di edat avansá. Beibel ta bisa ku yu adulto mester “siña promé pa kuida nan hendenan di kas di akuerdo ku deboshon na Dios i paga nan mayornan pa loke nan a hasi . . . , pasobra esei ta agradabel den bista di Dios.” (1 Timoteo 5:4) Ora yu adulto ta kuida nan mayornan di edat avansá, nan ta obedesé tambe e mandamentu di Beibel pa onra nan mayornan.—Efesionan 6:2, 3.

Beibel no ta duna instrukshon spesífiko tokante kuido di nos mayornan di edat avansá. Sinembargo, Beibel ta menshoná algun hòmber i muhé fiel ku a hasi esei. Ademas, Beibel ta duna konseho práktiko ku por yuda hende ku tin ku duna kuido.

• Kon algun miembro di famia a perkurá pa nan mayornan di edat avansá den tempu bíbliko?

• Ki konseho práktiko den Beibel por yuda hende ku tin ku duna kuido?

• Beibel ta bisa ku mester kuida nos mayornan di edat avansá na kas?

Nan a hasi esei na vários manera, dependiendo di e sirkunstansianan.

• Yosef a biba leu for di su tata, Yakòb. Ora a bira posibel, Yosef a sòru pa su tata bin biba mas serka dje. Yosef a perkurá kas, kuminda i protekshon pa su tata.—Génesis 45:9-11; 47:11, 12.

• Rut a muda bai pais di su suegra i a traha duru pa perkurá p’e.—Rut 1:16; 2:2, 17, 18, 23.

• Hesus a skohe un hende pa kuida su mama, Maria, kende probablemente tabata biuda na e momento ei. Hesus a hasi esei djis promé ku su morto.—Huan 19:26, 27.a

Duna kuido na nos mayornan di edat avansá por ta un desafio. Pero Beibel ta kontené algun prinsipio ku por yuda hende ku tin ku duna kuido trata ku e desafionan ei ku, tin biaha, por afektá nos físikamente i emoshonalmente.

• Onra bo mayornan.

  Loke Beibel ta bisa: “Onra bo tata i bo mama.”—Éksodo 20:12.

  Kon bo por apliká e prinsipio akí? Bo por mustra onor na bo mayornan, si bo ta permití nan ta independiente te asina leu ku nan sirkunstansianan ta permití. Si ta posibel, laga nan mes skohe e forma di kuido ku nan ta preferá. Ademas, bo por mustra onor na nan si bo hasi tur loke bo por pa yuda nan.

• Sea komprensivo i kla pa pordoná.

  Loke Beibel ta bisa: “Prudensia di un hende ta hasi ku e no ta rabia lihé, i pa laga un ofensa pasa ta su gloria.”—Proverbionan 19:11.

  Kon bo por apliká e prinsipio akí? Puntra bo mes: Si un di mi mayornan di edat avansá papia malu ku mi òf no ta apresiá e esfuerso ku mi ta hasi pa kuid’é, kon lo mi a sinti mi si ami tabata den su situashon? Si bo ta komprensivo i kla pa pordoná, lo bo evitá di hasi e situashon pió.

• Konsultá ku mas hende.

  Loke Beibel ta bisa: “Pa falta di konseho plannan ta frakasá, ma ku hopi konsehero nan ta wòrdu lográ.”—Proverbionan 15:22

  Kon bo por apliká e prinsipio akí? Buska informashon tokante kon pa trata ku sierto problema di salú ku bo mayornan tin. Hasi investigashon pa haña sa si tin instansia den bo pais ku por yuda bo ku kuido di bo mayornan. Papia ku otro hende ku ta perkurá pa nan mayornan di edat avansá. Si bo tin mas ruman, pone un reunion pa boso papia tokante e nesesidatnan di boso mayornan, kon pa perkurá pa nan i kon pa parti e responsabilidatnan.

  

• Sea modesto.

  Loke Beibel ta bisa: “Sabiduria ta serka e humildenan.”—Proverbionan 11:2.

  Kon bo por apliká e prinsipio akí? Sea konsiente di bo limitashonnan. Por ehèmpel, tur hende ta limitá na tempu i energia. E limitashonnan akí por pone ku bo no por perkurá pa bo mayornan manera bo ta deseá. Si kuido di bo mayornan di e edat avansá ta muchu pa bo so hasi, pidi otro miembro di bo famia òf hende eksperto yuda bo.

• Perkurá pa bo mes.

  Loke Beibel ta bisa: “Pasobra ningun hende hamas a odia su mes kurpa; ma e ta aliment’é i trat’é ku masha kariño.”—Efesionan 5:29.

  Kon bo por apliká e prinsipio akí? Aunke bo tin e responsabilidat di kuida bo mayornan, si bo ta kasá, bo tin ku perkurá pa bo propio nesesidatnan i esnan di bo famia tambe. Bo mester kome bon, sosegá bon i drumi sufisiente. (Eklesiástes 4:6) Bo tin ku tuma pousa ora ta nesesario. Si bo hasi esei, lo bo ta den mihó kondishon—emoshonalmente, mentalmente i físikamente—pa kuida bo mayornan.

Beibel no ta duna ningun instrukshon spesífiko ku ta mustra ku yu mester kuida nan mayornan na kas. Algun famia ta skohe pa laga nan mayornan keda biba na kas mas tantu posibel. Ku tempu, un kas di kuido lo ta un mihó opshon. E famia por reuní huntu pa disidí kiko ta mihó pa tur hende enbolbí.—Galationan 6:4, 5