Ken A Traha Dios?

Imaginá un tata ta papia ku su yu hòmber di shete aña. E tata ta bis’é: “Hopi tempu pasá, Dios a traha e tera i tur kos ku tin riba dje. Tambe el a traha luna, solo i e streanan.” E yu ta pensa un ratu riba esaki i despues e ta puntra su tata: “Papi, anto ta ken a traha Dios?”

E tata ta kontest’é: “Niun hende no a traha Dios. Semper el a eksistí.” E kontesta simpel ei ta sufisiente pa e yu pa e momento ei. Sinembargo, segun e yu ta krese, e pregunta ei ta bolbe lanta su kuriosidat. E ta haña e konsepto ku semper Dios a eksistí difísil pa komprondé pasobra asta universo tin un komienso. E ta puntra su mes: ‘Di unda Dios ta bini anto?’

Kiko Beibel ta bisa? Básikamente, loke e ta bisa ta meskos ku loke e tata den nos ehèmpel menshoná ariba a bisa. Moises a skirbi: “SEÑOR, . . . promé ku e serunan a nase, i ku bo a forma tera i mundu, sí, for di eternidat te na eternidat, abo ta Dios.” (Salmo 90:1, 2) Asina tambe profeta Isaías a deklará: “Bo no sa? Bo no a tende? E Dios Eterno, e SEÑOR, [ta] e Kreador di e finnan di tera!” (Isaías 40:28) E karta di Hudas tambe ta referí na Dios komo esun ku ta eksistí ‘pa tur eternidat.’—Hudas 25.

E tekstonan ei ta mustra ku Dios ta “e Rei di eternidat,” manera apòstel Pablo a yam’é. (1 Timoteo 1:17) Esaki ta nifiká ku maske kon leu nos wak bèk, semper Dios a eksistí i lo sigui eksistí den futuro. (Revelashon 1:8) Ku otro palabra, e no tin prinsipio ni fin; esei ta un di su karakterístikanan personal.

Dikon nos ta haña e idea akí difísil pa komprondé? Debí ku nos bida ta asina kòrtiku, nos konsepto di tempu ta totalmente diferente for di esun di Yehova. Komo ku Dios ta eterno, 1.000 aña ta manera ún dia p’e. (2 Pedro 3:8) Laga nos ilustr’é asina akí: Un dalakochi adulto ku ta biba apénas un 50 dia asina por komprondé nos bida di 70 òf 80 aña? Klaru ku nò! Pero Beibel ta splika ku na komparashon ku nos Gran Kreador, nos ta manera dalakochi. Asta nos kapasidat di komprondé kosnan ta kasi nada na komparashon ku esun di dje. (Isaías 40:22; 55:8, 9) No ta nada straño anto ku tin sierto aspektonan di Yehova ku mente humano no por komprondé.

Maske e konsepto di un Dios eterno por ta difísil pa komprondé, nos por mira su lógika sí. Si un otro persona lo a krea Dios, e ora ei e otro persona ei lo tabata e Kreador. Sin embargo, manera Beibel ta splika, Yehova ta esun ku “a krea tur kos.” (Revelashon 4:11) Ademas, nos sa ku no ta semper universo a eksistí. (Génesis 1:1, 2) Di unda el a bini? Esun ku a kre’é mester a eksistí promé kuné. E Kreador tabata eksistí tambe promé ku tur ser inteligente, entre otro su promé Yu i e angelnan. (Yòb 38:4, 7; Kolosensenan 1:15) Ta klaru anto ku Dios tabata eksistí su so promé. E no por a ser kreá pasobra no tabatin nada promé kuné ku por a kre’é.

Nos mes eksistensia i esun di henter universo ta duna prueba ku ta eksistí un Dios eterno. Esun ku a pone nos inmenso universo den moveshon i Esun ku a establesé leinan ku ta kontrol’é, mester tabata eksistí semper. Ta é so por a duna tur otro kriatura e rosea di bida.—Yòb 33:4.