E forma di un kurpa humano, unda un gobièrnu literal no por eksistí

E Reino di Dios Ta Algu den Bo Kurason?

Loke Beibel ta bisa

Nò, e Reino di Dios no ta algu den kurason di kristiannan.a Beibel ta bisa klaramente unda e Reino ei ta. E ta yam’é “e reino di shelu.” (Mateo 4:17, Beibel Santu) Beibel ta mustra tambe ku e Reino di Dios ta un gobièrnu real ku ta gobernando for di shelu. Ban wak.

E Reino di Dios tin gobernante, súpdito, lei i un mandato pa establesé Dios su boluntat den shelu i riba tera.—Mateo 6:10; Revelashon 5:10.
Dios su gobièrnu, òf Reino, lo goberná riba “tur pueblo, nashon i hende di tur idioma” riba tera. (Daniel 7:13, 14) Su outoridat pa goberná no ta bini for di su súpditonan, sino direktamente for di Dios.—Salmo 2:4-6; Isaías 9:7.
Hesus a bisa su fiel apòstelnan ku nan lo ta huntu kuné den e Reino di shelu. Pa hasi kiko? Hesus a bisa: “Pa boso . . . sinta riba trono,” esta, pa nan ta rei huntu kuné.—Lukas 22:28, 30.
E Reino di Dios lo kaba ku su enemigunan.—Salmo 2:1, 2, 8, 9; 110:1, 2; 1 Korintionan 15:25, 26.

Pues, Beibel no ta siña ku e Reino di shelu ta den bo kurason den e sentido ku e ta goberná via bo kurason. Sinembargo, Beibel ta siña sí ku e “palabra di Reino” òf e “bon notisia . . . di e Reino” por i mester influensiá nos kurason.—Mateo 13:19; 24:14.

Kiko e ekspreshon “e reino di Dios ta meimei di boso” ta nifiká?

Algun hende no ta komprondé bon unda e Reino di Dios ta pa motibu di e manera kon algun hende a splika Hesus su palabranan na Lukas 17:21. Por ehèmpel, algun hende a bisa ku Hesus su palabranan ta nifiká ku e Reino di Dios ta den hende su kurason. Pa komprondé e versíkulo akí bon, nos mester analisá e konteksto.

Algun di e lidernan religioso ku tabata odia Hesus — Ta imposibel ku Reino di Dios tabata den kurason di e hòmbernan ku kier a mata Hesus

Hesus tabata papiando ku e fariseonan, un grupo di lider religioso ku tabata odi’é i ku a yuda plania su morto. (Mateo 12:14; Lukas 17:20) Akaso Hesus kier a bisa ku e hòmbernan malbado ei tabatin e Reino di Dios den nan kurason? Niun ratu so. P’esei mes Hesus a bisa nan: “Paden boso ta yen di hipokresia i maldat.”—Mateo 23:27, 28.

Pues, e Reino di shelu tabata “meimei” di e fariseonan den e sentido ku Hesus, esun ku Dios a skohe pa goberná komo Rei, tabata pará dilanti nan.—Lukas 1:32, 33.

a Hopi religion kristian ta siña hende ku e Reino di Dios ta den un persona òf den un persona su kurason. Por ehèmpel, e Kongreso di Iglesia Boutista di Zùit na Merka a bisa ku e Reino di Dios en parte ta “e reinado di Dios den e kurason i bida di kada persona.” Di mes manera, Papa Benedikto XVI a skirbi den su buki, Jesus of Nazareth, “e Reino di Dios ta den e kurason di esun ku ta skucha.”