“Akaso Tin Inhustisia Serka Dios?”

 1. Kon aktonan di inhustisia lo por afektá nos?

UN BIUDA di edat ta bira víktima di un estafa i ta pèrdè tur loke el a spar henter su bida. Un kriatura indefenso ta ser bandoná pa un mama sin heful. Un hòmber ta ser enkarselá pa un krímen ku e no a kometé. Kon abo ta reakshoná n’e situashonnan aki? Probablemente kada un di nan ta molestiá bo, i esei ta di komprondé tambe. Komo hende nos tin un sentido fuerte di loke ta bon i loke ta malu. Ora un inhustisia ser kometé, esei ta indigná nos. Nos kier p’e víktima haña un kompensashon i p’e delinkuente haña su kastigu. Si esei no sosodé, kisas nos ta puntra nos mes: ‘Dios no ta mira loke ta tumando lugá? Pakiko e no ta hasi nada?’

 2. Kon Habakuk a reakshoná na inhustisia, i pakiko Yehova no a skual e pa esaki?

² Atraves di historia, fiel sirbidónan di Yehova a hasi e mesun preguntanan aki. Por ehèmpel, profeta Habakuk a puntra Dios den un orashon: “Pakiko bo ta laga mi mira e inhustisia horibel ei? Pakiko bo ta laga violensia, maldat, krímen i krueldat plama bai tur kaminda.” (Habakuk 1:3, Contemporary English Version) Yehova no a skual Habakuk pa su preguntanan franko, pasobra ta E mes a duna hende e noshon di hustisia. Sí, Yehova a dota nos ku algu di su sentido profundo di hustisia.

 3. Pakiko nos por bisa ku Yehova ta mas konsiente di inhustisia ku nos?

³ Yehova no ta siegu pa inhustisia. E ta mira tur loke ta pasando. Beibel ta bisa nos relashoná ku e époka di Noe: “SEÑOR a mira ku maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so.” (Génesis 6:5) Pensa riba kiko esei ta enserá. Hopi bes, nos persepshon di inhustisia ta basá riba algun insidente ku sea nos a tende di dje òf pasa aden personalmente. Na kontraste, Yehova sí ta konsiente di e inhustisianan ku ta tumando lugá na eskala mundial. E ta mira tur kos! Es mas, e por diserní e inklinashonnan di kurason, esta, e pensamentunan perverso tras di aktonan di inhustisia.—Jeremias 17:10.

4, 5. (a) Kon Beibel ta mustra ku Yehova ta preokupá pa esnan ku ta risibí un trato inhustu? (b) Kon Yehova mes a ser afektá pa inhustisia?

⁴ Pero Yehova ta bai mas aleu ku djis tuma nota di inhustisia. E ta preokupá tambe pa esnan ku a bira víktima di dje. Ora nashonnan enemigu a trata su pueblo kruelmente, e “kehamentu pa motibu di esnan ku tabata oprimí i afligí [su pueblo]” a duel Yehova. (Huesnan 2:18) Tal bes bo a ripará ku mas inhustisia algun hende mira, mas nan ta pèrdè heful. Pero Yehova sí no ta asina! Pa un 6.000 aña kaba el a mira tur tipo di inhustisia, pero e sí no a pèrdè su repudio kontra dje. Al kontrario, Beibel ta sigurá nos ku Yehova ta odia kosnan manera “un lenga mentiroso,” “mannan ku ta drama sanger inosente,” i “un testigu falsu ku ta papia mentira.”—Proverbionan 6:16-19.

⁵ Pensa tambe riba e krítika fuerte ku Yehova a dirigí kontra e lidernan inhustu di Israel. “Boso no mester konosé hustisia?” e profeta inspirá a puntra nan. Despues ku el a deskribí na un manera gráfiko kon nan a abusá di poder, Yehova a profetisá kiko lo tabata e konsekuensianan p’e hòmbernan korupto aki: “Nan lo sklama na SEÑOR, ma e lo no kontestá nan. Al kontrario, e lo skonde su kara pa nan e tempu ei, pasobra nan echonan tabata malu.” (Mikeas 3:1-4) Yehova tin un repudio total kontra inhustisia, i esei no ta nada straño pasobra e mes a pasa aden! Pa míles di aña el a soportá e desafionan inhustu di Satanas. (Proverbionan 27:11) Ademas, e akto di mas horendo di inhustisia a afekt’é bastante. Esei tabata ora su Yu, kende “no a kometé piká,” a ser ehekutá komo kriminal. (1 Pedro 2:22; Isaias 53:9) Ta bisto anto ku Yehova no ta siegu ni indiferente p’e sufrimentu di víktimanan di inhustisia.

 6. Kon nos lo por reakshoná ora nos haña nos konfrontá ku inhustisia, i pakiko?

⁶ Tòg ora nos mira inhustisia—òf ora nos mes bira víktima di un trato inhustu—ta masha natural ku esaki ta lanta emoshon fuerte den nos. Nos a ser kreá den e imágen di Dios, i inhustisia ta kompletamente kontra tur loke Yehova ta representá. (Génesis 1:27) Pakiko anto Dios ta permití inhustisia?

 7. Splika kon e soberania di Yehova a ser desafiá.

⁷ E kontesta riba e pregunta aki ta relashoná ku e kuestion di soberania, esta, si Dios tin derecho di goberná. Manera nos a mira, e Kreadó tin derecho di goberná riba tera i tur su habitantenan. (Salmo 24:1; Revelashon 4:11) Sin embargo, for di den kuminsamentu di historia humano, e soberania di Yehova a ser desafiá. Kon esaki a tuma lugá? Yehova a duna e promé hòmber, Adam, e mandamentu pa no kome di un sierto palu den e Paradeis ku a sirbi komo su hogar. I kiko lo a sosodé si el a desobedesé? Dios a bis’é: “Lo bo muri sigur.” (Génesis 2:17) E mandamentu di Dios no a kita nada for di Adam òf su kasá Eva. No opstante, Satanas a konvensé Eva ku Dios a kita muchu libertat for di nan. Kiko lo a pasa si el a kome for di e palu? Satanas a bisa Eva sin niun ripara: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.”—Génesis 3:1-5.

 8. (a) Ku su deklarashonnan na Eva, kiko Satanas a duna di konosé? (b) Ki desafio Satanas a lansa kontra e soberania di Dios?

⁸ Ku e deklarashon aki Satanas a insinuá ku Yehova a keda sin duna Eva sierto informashon krusial, i ku El a gañ’é tambe. Satanas tabata sufisiente kouteloso p’e no kuestioná e echo ku Yehova ta e gobernante supremo. Pero sí el a lanta duda enkuanto si su soberania tabata legítimo, hustu i meresí. Ku otro palabra, el a pretendé ku Yehova no a ehersé Su soberania na un manera hustu i den e mihó interesnan di Su súpditonan.

 9. (a) Ki konsekuensia Adam ku Eva a sufri debí na nan desobedensia, i ki preguntanan di sumo importansia esaki a lanta? (b) Pakiko Yehova no a djis destruí e rebeldenan sin mas?

⁹ Mas despues, tantu Adam komo Eva a desobedesé Yehova dor di kome di e palu prohibí. Dor di nan desobedensia nan a risibí e kastigu di morto, nèt manera Dios a dekretá. E mentira di Satanas a lanta algun pregunta di sumo importansia. Bèrdat Yehova tin derecho di goberná humanidat, òf hende mester goberná nan mes? Yehova ta ehersé su soberania den e mihó manera posibel? Yehova por a usa su poder todopoderoso pa destruí e rebeldenan mesora. Pero e preguntanan ku Satanas a lanta no a kuestioná Dios su poder, sino su manera di goberná. Pues, si Dios a eliminá Adam ku Eva i Satanas, esei lo no a duna prueba ku su gobernashon ta hustu. Al kontrario, esei lo por a lanta mas duda ainda enkuanto su manera di goberná. E úniko manera pa determiná si hende ta kapas pa goberná nan mes, independiente di Dios, tabata pa laga tempu pasa.

10. Kiko historia a revelá tokante gobièrnu di hende?

¹⁰ Kiko tempu a demostrá? Den transkurso di e míles di añanan, hende a purba ku tur tipo di gobièrnu, manera outokrasia, demokrasia, sosialismo i komunismo. Beibel ta resumí frankamente e resultado di nan tur: “Hende a ehersé outoridat riba . . . otro hende pa su daño.” (Eklesiastés 8:9) Ku bon motibu, profeta Jeremias a deklará: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.”—Jeremias 10:23.

11. Pakiko Yehova a laga e rasa humano sufri?

¹¹ Yehova tabata sa for di prinsipio ku e independensia di hende, ku nan mes forma di goberná, lo a resultá den hopi sufrimentu. Tabata inhustu di su parti anto pa laga hende kosechá e fruta inevitabel di nan rebeldia? Di ningun manera! Pa ilustrá esaki, suponé ku bo yu tin ku hasi un operashon pa kura un enfermedat ku ta pone su bida na peliger. Bo ta konsiente ku e operashon lo pone bo yu sufri un poko, i esaki ta hasi bo hopi tristu. Na mesun tempu, bo sa ku e operashon lo permití bo yu disfrutá di un mihó salú mas despues den bida. Meskos tambe, Dios tabata sa—i asta a profetisá—ku dor di permití hende goberná nan mes, esei lo a trese sierto doló i sufrimentu kuné. (Génesis 3:16-19) Pero e tabata konsiente tambe ku e úniko alivio duradero i signifikativo lo tabata posibel si el a laga henter humanidat mira e mal fruta di nan rebelion. Den e manera aki, e kuestion lo por a wòrdu resolvé di unabes pa semper.

12. Manera e kaso di Jòb ta ilustrá, ki akusashon Satanas a lanta kontra tur ser humano?

¹² Tin un aspekto mas den e asuntu aki. Ora Satanas a lanta duda enkuanto si e gobernashon di Dios ta legítimo i hustu, no ta Yehova so el a kalumniá relashoná ku Su soberania; el a kalumniá e sirbidónan di Dios tambe pa loke ta nan integridat. Por ehèmpel, ripará kiko Satanas a bisa Yehova tokante hustu Jòb: “Bo no a traha un tranké rònt di dje, rònt di su kas, i rònt di tur loke e tin na tur banda? Bo a bendishoná e trabou di su man, i su propiedatnan a oumentá den e tera. Ma saka bo man awor i mishi ku tur loke e tin; siguramente e lo maldishoná bo den bo kara.”—Jòb 1:10, 11.

13. Kiko Satanas a insinuá ku su akusashonnan kontra Jòb, i kon esaki ta enbolbé tur ser humano?

¹³ Satanas a pretendé ku Yehova tabata usa Su poder di duna protekshon pa kumpra Jòb su deboshon. Ku esei el a insinuá ku e integridat di Jòb tabata puru hipokresia, ku Jòb a adorá Dios solamente pa loke e por a haña a kambio. Satanas a pretendé ku si Dios a kita su bendishon for di Jòb, asta e hòmber ei lo a maldishoná su Kreadó. Satanas tabata sa ku Jòb a sobresalí komo “un hende perfekto i rekto, ku [a] teme Dios i ku [a] apartá su mes for di maldat.”a Pues, si Satanas por a kibra e integridat di Jòb, kiko lo a para di e restu di humanidat? De echo anto, loke Satanas tabata kuestionando ta e lealtat di tur hende ku kier sirbi Dios. En bèrdat, ampliando riba e kuestion, Satanas a bisa Yehova: “Tur loke un hende [no Jòb so] tin e lo duna pa su bida.”—Jòb 1:8; 2:4.

14. Kiko historia a demostrá relashoná ku e akusashon ku Satanas a lanta kontra tur ser humano?

¹⁴ Kontrali na loke Satanas a pretendé, historia a demostrá ku hopi hende manera Jòb a keda leal na Yehova ounke nan tabatin ku soportá prueba. Ku nan fieldat nan a alegrá Yehova su kurason, i esaki a duna Yehova un kontesta pa e desafio di Satanas, kende tabatin e freskura di bisa ku hende lo stòp di sirbi Dios ora nan haña nan ku difikultat. (Hebreonan 11:4-38) Sí, hende di kurason rekto ta nenga di bira lomba pa Dios. I ora e situashonnan di mas angustioso konfundí nan, nan ta dependé asta mas riba Yehova p’e duna nan e forsa pa soportá.—2 Korintionan 4:7-10.

15. Ki pregunta por surgi relashoná ku Dios su huisionan di pasado i futuro?

¹⁵ Pero e manera ku Yehova ta ehersé su hustisia ta enserá mas ku e kuestionnan di soberania i hende su integridat. Beibel ta duna nos un relato di Yehova su huisionan relashoná ku sierto personanan i asta nashonnan kompletu. Tambe e ta kontené profesianan di e huisionan ku lo e ehekutá den futuro. Pakiko nos por tin sigur ku Yehova ta i semper lo ta hustu den su huisionan?

16, 17. Ki ehèmpelnan ta mustra ku hende tin un punto di bista limitá di loke ta berdadero hustisia?

¹⁶ Ku rason Beibel por bisa enkuanto Yehova ku “tur su kamindanan ta hustu.” (Deuteronomio 32:4) Ningun di nos por bisa algu asina di nos mes, pasobra hopi bes nos punto di bista limitá ta stroba nos di mira bon kla kiko ta korekto. Tuma por ehèmpel e kaso di Abraham. El a debatí ku Yehova enkuanto e destrukshon di Sodoma—apesar ku maldat a reina na gran eskala einan. El a puntra Yehova: “Di bèrdat bo ta bai destruí e hustu huntu ku e malbado?” (Génesis 18:23-33) Klaru ku e kontesta tabata nò. De echo, ta te ora hustu Lòt i su yu muhénan a yega n’e stat di Zoar sano i salvo Yehova a ‘laga yobe swafel i kandela’ riba Sodoma. (Génesis 19:22-24) Di otro banda, Jonas a keda masha “disgustá” ora Dios a mustra miserikòrdia n’e hendenan di Nínive. Jonas a anunsiá kaba ku nan lo ser destruí, pues tur loke e tabata kier ta pa nan wòrdu likidá—sin importá nan repentimentu sinsero.—Jonas 3:10–4:1.

¹⁷ Yehova a sigurá Abraham ku Su manera di husga a enserá no solamente destruí e malbadonan, sino tambe reskatá e hustunan. Di otro banda, Jonas tabatin ku siña ku Yehova ta miserikòrdioso. Si e malbadonan stòp di hasi malu, e ta “kla pa pordoná.” (Salmo 86:5) Distinto di algun hende ku ta insigur tokante nan mes, Yehova no ta imponé kastigu djis pa demostrá kuantu poder e tin, ni e no ta keda sin mustra kompashon pa miedu ku otronan lo haña ku e ta débil. Su sistema ta di mustra miserikòrdia semper i kuando tin base pa esei.—Isaias 55:7; Ezekiel 18:23.

18. Mustra for di Beibel ku Yehova no ta aktua djis a base di sintimentu.

¹⁸ Esaki no ta nifiká sí ku Yehova ta laga sintimentu sieg’é. Ora su pueblo a kai den idolatria, Yehova a deklará ku firmesa: “Lo mi husga bo segun bo kondukta, i lo mi pone tur bo abominashonnan riba bo. Lo mi no wak bo ku duele, ni spar bo tampoko, ma lo mi pone bo kondukta riba bo.” (Ezekiel 7:3, 4) Pues, ora hende kuminsá praktiká maldat sin ripara, Yehova ta husga nan segun loke nan meresé. Pero su huisio ta basá riba pruebanan sólido. Por ehèmpel, ora un “klamor” fuerte relashoná ku Sodoma i Gomora a alkansá su orea, el a deklará: “Lo mi baha awor i wak si nan a hasi kompletamente segun e klamor ku a yega na mi; si no, lo mi haña sa.” (Génesis 18:20, 21) Nos por ta masha gradisidu ku Yehova no ta manera hopi hende ku ta kla pa saka konklushon promé ku nan tende tur e detayenan! Bèrdat, manera Beibel ta bisa, Yehova ta “un Dios di fieldat i sin inhustisia.”—Deuteronomio 32:4.

19. Kiko nos por hasi si tin sierto kos ku nos no ta komprondé enkuanto Yehova su manera di husga?

¹⁹ Beibel no ta kontestá delaster un pregunta relashoná ku Yehova su akshonnan den pasado; ni e no ta duna tur detaye enkuanto kon Yehova lo husga sierto personanan i grupo di hende den futuro. Ora nos no ta komprondé un relato òf profesia den Beibel pa falta di sierto detaye, nos por desplegá e mesun lealtat di profeta Mikeas, kende a skirbi: “Lo mi spera riba e Dios di mi salbashon.”—Mikeas 7:7.

20, 21. Pakiko nos por ta sigur ku semper Yehova lo aktua na un manera rekto?

²⁰ Nos por ta sigur ku den tur situashon Yehova lo aktua na un manera rekto. Asta ora na nos pareser hende no ta hasi kaso di inhustisia, Yehova ta primintí: “Ta di mi vengansa ta, ami lo paga bèk.” (Romanonan 12:19) Si nos demostrá un aktitut di spera, nos tambe lo por bisa ku e mesun konvikshon firme di apòstel Pablo: “Akaso tin inhustisia serka Dios? Di ningun manera!”—Romanonan 9:14.

²¹ Miéntras tantu, nos ta biba den “tempunan trabahoso.” (2 Timoteo 3:1) Inhustisia i “aktonan di opreshon” a resultá den hopi abusu kruel. (Eklesiastés 4:1) Pero Yehova no a kambia. Ainda e ta odia inhustisia, i e tin interes profundo den esnan ku ta bira víktima di esaki. Si nos keda leal na Yehova i na su soberania, lo e duna nos e forsa pa wanta te ora yega e dia ku lo e korigí tur inhustisia bou di e gobernashon di su Reino.—1 Pedro 5:6, 7.