LÈS 26
Dikon Kos Malu Ta Sosodé i Dikon Hende Ta Sufri?
Ora algu malu sosodé, ta normal pa hende puntra: “Dikon e kos akí a pasa?” Nos ta masha felis ku Beibel ta kontestá e pregunta ei!
1. Kon maldat a kuminsá riba tera?
Satanas, esta, Diabel, a rebeldiá kontra Dios. Satanas tabata ke goberná riba hende, pues el a influensiá e promé pareha, Ádam ku Eva, pa nan tambe rebeldiá kontra Dios. Kon Satanas a hasi esei? El a gaña Eva. (Génesis 3:1-5) El a pone Eva pensa ku Yehova tabata tene kos bon for di nan. El a insinuá ku hende lo ta mas felis si nan no obedesé Dios. Satanas a bisa e promé mentira; el a gaña Eva ku lo e no muri. P’esei, Beibel ta yama Satanas “un gañadó i e tata di mentira.”—Huan 8:44.
2. Ki desishon Ádam ku Eva a tuma?
Yehova tabata masha generoso ku Ádam ku Eva. El a bisa nan ku nan por kome di tur e palunan den hòfi di Éden ku eksepshon di un palu. (Génesis 2:15-17) Tòg, nan a disidí di kome fruta di e palu ei. Eva “a kohe fruta i kome.” Despues, Ádam “tambe a kome.” (Génesis 3:6) Nan tur dos a desobedesé Dios. Komo ku Ádam ku Eva tabata perfekto, tabata fásil pa nan hasi loke ta korekto. Pero, ora nan a skohe pa desobedesé Dios, nan a peka i a rechasá Dios komo nan Gobernante. E desishon ei a pone nan sufri masha hopi mes!—Génesis 3:16-19.
3. Kon e desishon di Ádam ku Eva a afektá nos?
Ora Ádam ku Eva a peka, nan a bira imperfekto i a pasa imperfekshon pa tur nan desendientenan. Beibel ta bisa lo siguiente tokante Ádam: “Pa medio di ún hende piká a drenta mundu, i morto pa medio di piká, i asina morto a pasa pa tur hende.”—Romanonan 5:12.
Pero dikon nos ta sufri? Tin biaha, nos ta sufri pasobra nos ta tuma mal desishon. Nos por sufri tambe ora otro hende tuma mal desishon. Anto tin ora nos por sufri debí na suseso imprevisto.—Lesa Eklesiástes 9:11.
KIKO MAS NOS POR SIÑA?
Wak dikon Dios no ta responsabel pa e maldat i sufrimentu ku tin den mundu i wak kon e ta sinti ora nos ta sufri.
4. Ken ta responsabel pa nos sufrimentu?
Hopi hende ta pensa ku ta Dios ta goberná mundu. Pero, esei ta bèrdat? Pasa e VIDIO.
Lesa Santiago 1:13 i 1 Huan 5:19. Despues, analisá e siguiente pregunta:
Ta Dios ta responsabel pa sufrimentu i maldat?
5. Kiko a pasa desde ku Satanas a kuminsá goberná?
Lesa Génesis 3:1-6. Despues, analisá e siguiente preguntanan:
Kiko Satanas a gaña Eva?—Wak versíkulo 4 i 5.
Kon Satanas a insinuá ku Yehova a skonde algu bon for di hende?
Kon Satanas a insinuá ku hende no tin mester di Yehova komo nan Gobernante pa nan ta felis?
Lesa Eklesiástes 8:9. Despues, analisá e siguiente pregunta:
Kiko a sosodé desde ku Yehova no ta goberná mundu?
Ádam ku Eva tabata perfekto, i nan tabata biba den Paradeis. Pero nan a skucha Satanas i a rebeldiá kontra Yehova
Despues di e rebelion, piká, sufrimentu i morto a plama rònt mundu
Yehova lo kaba ku piká, sufrimentu i morto. E ora ei, hende lo ta perfekto atrobe, i nan lo biba den Paradeis
6. Yehova ta sinti pa nos ora nos ta sufri
Dios ta wòri ora nos ta sufri? Wak kiko Rei David i Apòstel Pedro a skirbi. Lesa Salmo 31:7 i 1 Pedro 5:7. Despues, analisá e siguiente pregunta:
Kon bo ta sinti awor ku bo sa ku Dios ta mira nos sufrimentu i ku e ta sinti pa nos?
7. Dios lo kaba ku tur sufrimentu
Lesa Isaías 65:17 i Revelashon 21:3, 4. Despues, analisá e siguiente pregunta:
Dikon ta un konsuelo pa sa ku Dios lo eliminá tur kos malu ku hende ta eksperensiá?
Bo tabata sa?
Ora Satanas a gaña pa promé biaha, el a daña nòmber di Yehova. Ku otro palabra, el a daña Yehova su reputashon i a pone hende kere ku Dios ta un mal Gobernante i ku e no ta hustu. Ora ku Yehova kaba ku tur sufrimentu den futuro, lo e vindiká su nòmber, esta, eliminá kualke idea robes ku hende por tin tokante dje. Pues, lo e demostrá ku su manera di goberná ta mihó. Vindikashon di Yehova su nòmber ta e kos di mas importante den universo.—Mateo 6:9, 10.
LOKE HENDE SA BISA: “Dios ta pone nos sufri pa pone nos fe na prueba.”
Kiko lo bo bisa?
RESÚMEN
Satanas, esta, Diabel, i e promé pareha ta prinsipalmente responsabel pa e maldat ku tin riba tera. Yehova ta sinti pa nos ora nos ta sufri i pronto lo e kaba ku tur sufrimentu.
Repaso
Kiko Satanas, esta, Diabel, a gaña Eva?
Kon Ádam ku Eva su desishon pa rebeldiá kontra Dios a afektá nos tur?
Kon nos sa ku Yehova ta sinti pa nos ora nos ta sufri?
MAS INFORMASHON INTERESANTE
Wak kiko Beibel ta bisa ku piká ta.
Lesa mas tokante e kuestion ku Satanas, esta, Diabel, a lanta den hòfi di Éden.
“Dikon Dios Ta Permití Sufrimentu?” (E Toren di Vigilansia di 1 di yanüari 2014)
Wak kon kontesta pa un pregunta difísil por konsolá nos.
“Dikon e Holokousto A Tuma Lugá? Dikon Dios No A Par’é?” (artíkulo riba jw.org)
Wak kiko un hòmber a siña tokante e sufrimentu ku e tabata mira rònt di dje.