Combatiendo Pica Su Gara Riba E Carni Pecaminoso [Translator: The Following Article Is Based On Talk No. 12 Of The “Divine Teaching” District Convention.]

“Fihando e mente riba e carni kier men morto, pero fihando e mente riba e spiritu kier men bida i pas.”​—⁠ROMANO 8:⁠6.

“DIOS a pasa na crea hende den su imágen, den imágen di Dios el a cre’é; machu i hembra el a crea nan.” (Génesis 1:27) Un imágen ta e refleho di un obheto of un fuente. Pues, hende a ser creá pa ta un refleho dje gloria di Dios. Dor di manifestá cualidadnan piadoso​—⁠manera amor, bondad, husticia i spiritualidad​—⁠den tur nan empeñonan, nan ta duna gloria i onor n’e Creador, i tambe felicidad i satisfaccion na nan mes.​—⁠1 Corintio 11:7; 1 Pedro 2:⁠12.

² E promé pareha humano, creá den perfeccion, tabata bon ekipá p’e papel aki. Mescos cu spiel briyante cu ta fini acabá, nan tabata capas pa reflehá e gloria di Dios cu splendor i fidelidad. Sin embargo, nan a permití e estado briyante ei ser manchá ora nan deliberadamente a scoge pa desobedecé nan Creador i Dios. (Génesis 3:⁠6) Despues, nan no por a reflehá e gloria di Dios perfectamente mas. Nan no a alcansá e gloria di Dios, fayando e propósito pakico nan a ser creá den imágen di Dios. Cu otro palabra, nan a peca.a

³ Esaki ta yuda nos comprendé e berdadero naturalesa di picá, cua ta mancha hende su refleccion dje semehansa i gloria di Dios. Picá ta haci hende no-santu, esta, impuru i manchá den un sentido spiritual i moral. Henter humanidad, siendo desendiente di di Adam i Eva, a nace den tal estado manchá i impuru, herando Dios su expectativa di nan como su yunan. I e resultado? Bijbel ta splica: “Mescos cu pa medio di un solo homber picá a drenta mundu i morto pa medio di picá, asina morto a plama na tur hende pasobra nan tur a peca.”​—⁠Romano 5:12; compará cu Isaías 64:⁠6.

E Gara di Picá riba e Carni Pecaminoso

⁴ Mayoria hende awe no ta pensa di nan mes como impuru, manchá of pecaminoso. Realmente, picá, como palabra, prácticamente a disparcé for di mayoria hende su vocabulario. Talbes nan lo papia tocante erornan, falta di discrecion i mal calculacion. Pero papia di picá? Apénas! Asta pa esnan cu ainda ta pretendé di kere den Dios, “su siñansanan a constituí un set di creencia moral mas bien cu un código moralístico, e ‘10 sugerencianan’ mas bien cu e 10 mandamentunan,” un profesor di sociologia, Alan Wolfe, ta observá.

⁵ Kico ta e resultado dje manera di pensa aki? Nengamentu di, of por lo ménos ignorando e realidad di picá. Esaki a producí un generacion di hende cu un sentido malamente trocí di bon i malu, kendenan ta sinti nan mes liber pa fiha nan mes normanan di conducta i no ta sinti nan mes responsabel na ningun persona pa cualkier cos cu nan scoge di haci. Pa hende asina, sintiendo nan mes bon ta e solo criterio pa husga si un curso di accion ta apropiado of no.​—⁠Proverbio 30:​12, 13; compará cu Deuteronomio 32:​5, 20.

⁶ Por ehempel, den un charla na television, hóbennan a ser invitá pa expresá nan punto di bista dje asina yamá siete picánan mortal.b “Orguyo no ta un picá,” un participante a declará. “Bo mester tin un bon opinion di bo mes.” En cuanto flohedad, un otro a bisa: “Ta bon pa bo ta [floho] tin biaha. . . . Tin biaha ta bon pa bo relahá i duna bo mes tempu personal.” Asta e narador a duna e comentario breve aki: ‘E siete picánan mortal no ta obranan malbado sino, mas bien, impulsonan humano universal cu por ta molestoso i sumamente deleitabel.’ Sí, mescos cu e concepto di picá, asina tambe e sintimentu di culpa a desparcé, pasobra, despues di tur cos, sinti culpabel ta net contrali cu sinti bon.​—⁠Efesio 4:​17-19.

⁷ Na contraste skerpi cu tur esaki, Bijbel ta declará claramente: “Tur a peca i no ta alcansá e gloria di Dios.” (Romano 3:23) Asta apostel Pablo a reconocé: “Mi sa cu den mi, esta, den mi carni, no ta biba nada bon; pasobra e facultad di deseá ta presente cu mi, pero e facultad di obra loke ta excelente no ta presente. Pasobra e bon cu mi ta deseá, mi no ta haci, pero e malu cu mi no ta deseá ta loke mi ta practicá.” (Romano 7:​18, 19) Aki Pablo no tabata teniendo duele di su mes. Mas bien, debí cu el a realisá completamente con leu humanidad a hera no a alcansá e gloria di Dios, el a sinti mas dolorosamente e gara di picá riba e carni pecaminoso. “Homber miserabel cu mi ta!” el a declará, “ken lo rescatá mi for dje curpa padeciendo e morto aki?”​—⁠Romano 7:⁠24.

⁸ Kico ta bo punto di bista dje asuntu aki? Kisas bo ta reconocé cu como desendiente di Adam, abo, mescos cu tur otro hende, ta imperfecto. Pero con e conocimentu ei ta afectá bo pensamentu i bo manera di biba? Bo ta acept’é como un realidad di bida i simplemente ta sigui bo inclinacion natural? Of bo ta haci un esfuerso constante pa combatí picá su gara riba e carni pecaminoso, forsando pa reflehá mas briyantemente posibel e gloria di Dios den tur loke bo ta haci? Esaki mester ta di interes serio pa cada un di nos en bista di loke Pablo a bisa: “Esnan cu ta di acuerdo cu e carni ta fiha nan mente riba e cosnan di carni, pero esnan cu ta di acuerdo cu e spiritu riba e cosnan di spiritu. Pasobra fihando e mente riba e carni kier men morto, pero fihando e mente riba e spiritu kier men bida i pas.”​—⁠Romano 8:​5, 6.

Fihando e Mente riba e Carni

⁹ Kico Pablo tabata kier men ora el a bisa cu “fihando e mente riba e carni kier men morto”? E palabra “carni” hopi biaha ta ser usá den Bijbel pa denotá hende su estado imperfecto, ‘concibí den picá’ como un desendiente di Adam rebelde. (Salmo 51:5; Job 14:⁠4) Pues, Pablo tabata spiertando cristiannan pa nan no fiha nan mente riba e tendencianan, impulsonan i deseonan pecaminoso dje carni imperfecto i decaí. I pakico no? Un otro caminda Pablo a bisa nos loke e obranan di carni ta anto a agregá e spiertamentu: “Esnan cu ta practicá tal cosnan lo no heredá e Reino di Dios.”​—⁠Galatio 5:​19-21.

¹⁰ Pero no tin un diferencia grandi entre fiha bo mente riba algu i practik’é? Ta cierto cu pensamentu riba algu no semper ta hiba na hacimentu di dje. Sin embargo, fihando bo mente ta mas cu solamente tene un pensamentu pasahero. E palabra cu Pablo a usa ta phroʹne·ma na griego, i e ta denotá “manera di pensa, mente (-fihá), . . . meta, aspiracion, empeño.” P’esei, “fihando e mente riba e carni” ta nificá ser controlá, posesioná, dominá i asta motivá p’e deseonan dje carni pecaminoso.​—⁠1 Juan 2:⁠16.

¹¹ E punto ta ser bon ilustrá dor dje curso cu Cain a sigui. Ora yaluzí i rabia a lanta den Cain su curason, Jehova Dios a spiert’é: “Pakico bo ta cayente di rabia i pakico bo semblante a decaí? Si bo bira pa haci loke ta bon, lo no tin un halsamentu? Pero si bo no bira pa haci loke ta bon, tin picá di bùk n’e entrada, i su anhelo ta pa bo; i abo di bo parti lo logra domin’é?” (Génesis 4:​6, 7) Tabatin un scogementu dilanti Cain. Lo e “bira pa haci loke ta bon,” esta, fiha su mente, meta i aspiracion riba algu bon? Of lo e sigui fiha su mente riba e carni i enfocá su mente riba e mal tendencianan scondí den su curason? Manera Jehova a splica, picá tabata “di bùk n’e entrada,” wardando pa bula riba Cain i devor’é si e lo a permiti’é. En bes di combatí i ‘logra e dominio’ riba su deseo carnal, Cain a permiti’é domin’é​—⁠pa un fin desastroso.

¹² Kico di nos djawe? Siguramente nos no kier bai “den e caminda di Cain,” manera Hudas a lamentá relacioná cu algun entre e cristiannan di promé siglo. (Hudas 11) Nunca nos mester racionalisá i pensa cu un tiki complacencia of libertad tumá aki of aya ta sin daño. Al contrario, nos mester ta alerto pa identificá cualkier influencia malbado i corupto cu por a drenta den nos curason i mente i sak’é lihé promé cu e saca rais. Combatiendo picá su gara riba e carni pecaminoso ta cuminsá di paden.​—⁠Marco 7:⁠21.

¹³ Por ehempel, kisas bo bista a cai riba un esena spantoso of horibel, of un imágen particularmente sugestivo of erótico. Esei por ta un potret den un buki of un revista, un esena den un película of riba pantaya di television, un propaganda riba un borchi of asta den un situacion di bida real. Esei riba su mes no necesariamente ta alarmante, ya cu e por​—⁠i ta​—⁠sosodé. Sin embargo, e imágen of esena aki, aunke kisas el a dura solamente un par di seconde, por tin tendencia di keda den e mente i sali na superficie atrobe de bes en cuando. Kico bo ta haci ora esei sosodé? Bo ta tuma accion inmediatamente pa combatí tal pensamentu i sak’é for di bo mente? Of bo ta permiti’é biba den bo mente, talbes rebibando e experencia cada biaha cu e pensamentu bini ariba? Haciendo e último ei ta nificá risca pone den accion e cadena di sucesonan cu Santiago a describí: “Cada un ta ser probá dor di ser atraí i tentá pa su mes deseo. Anto e deseo, ora e bira fértil, ta duna lus na picá; en buelta, picá, ora el a ser realisá, ta producí morto.” Ta p’e motibu ei Pablo a bisa: “Fihando e mente riba e carni kier men morto.”​—⁠Santiago 1:​14, 15; Romano 8:⁠6.

¹⁴ Bibando den un mundu den cua inmoralidad sexual, violencia i materialismo ta ser glorificá​—⁠presentá abiertamente i liberalmente den buki, revista, película, programa di television i música popular​—⁠nos ta ser bombardeá literalmente cu pensamentu i ideanan robes tur dia. Con bo ta reaccioná? Bo ta sinti cu bo ta ser dibertí i entretené cu tur esaki? Of bo ta sinti manera hustu Lot a sinti, “kende tabata sumamente angustiá p’e complacencia dje hendenan desafiador di ley . . . tormentando su alma hustu pa causa di nan obranan malbado”? (2 Pedro 2:​7, 8) Pa tin éxito den combatí picá su gara riba e carni pecaminoso, nos mester ta determiná pa haci manera e salmista tabata: “Lo mi no pone dilanti mi wowonan ningun cos cu no ta sirbi pa nada. E obramentu dje apóstatanan ei mi a odia; e no ta pega na mi.”​—⁠Salmo 101:⁠3.

Fihando e Mente riba e Spiritu

¹⁵ Algu cu por yuda nos combatí picá su gara riba e carni pecaminoso ta loke Pablo a pasa na bisa: “Fihando e mente riba e spiritu kier men bida i pas.” (Romano 8:⁠6) Pues, en bes di laga e carni dominá nos, nos mester laga nos mente bini bou dje influencia dje spiritu i prosperá riba e cosnan dje spiritu. Kico nan ta? Na Filipense 4:​8, Pablo ta traha un lista di nan: “Finalmente, rumannan, cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.” Laga nos mira mas djacerca i haña un mihó comprendimentu di loke nos mester sigui considerá.

¹⁶ Na promé lugá, Pablo a mencioná ocho cualidad moral i a pone e palabra “cualkier” dilanti cada un. E expresion aki ta indicá cu cristiannan no ta ser limitá pa pensa tur ora solamente riba asuntunan di Scritura of di doctrina. Tin un gran cantidad di tema of tópico riba cua nos por fiha nos mente. Pero e cos importante ta cu nan mester cuadra cu e cualidadnan moral cu Pablo a specificá. Cada un dje categoria di “cosnan” cu Pablo a cita ta merecé nos atencion. Laga nos considerá nan un pa un.

◻ “Berdadero” ta encerá mas cu simplemente ser cierto of falsu. E ta nificá ser verídico, recto i digno di confiansa, algu cu ta real, no simplemente dunando e aparencia di ta asina.​—⁠1 Timoteo 6:⁠20.

◻ “Di consideracion serio” ta referí na cosnan cu ta dignificá i respetuoso. E ta lanta un sentido di reverencia, algu cu ta sublime, noble i onorabel mas bien cu vulgar i baho.

◻ “Hustu” ta nificá satisfacé Dios su norma, no di hende. Hende mundano ta ocupá nan mente cu plannan inhustu, pero nos mester pensa riba i haña deleite den cosnan cu ta hustu den bista di Dios.​—⁠Compará cu Salmo 26:4; Amos 8:​4-6.

◻ “Decente” ta nificá puru i santu no solamente den conducta (sexual of di otro manera) sino tambe den pensamentu i motibu. “E sabiduria djariba ta primeramente decente,” Santiago ta bisa. Jesus, kende ta “puru,” ta e Ehempel perfecto pa nos considerá.​—⁠Santiago 3:17; 1 Juan 3:⁠3.

◻ “Amabel” ta e loke ta incitá i inspirá amor den otronan. Nos mester “considerá un e otro pa incitá na amor i obranan excelente,” en bes di pone nos mente riba cosnan cu ta lanta odio, amargura i pleitu.​—⁠Hebreo 10:⁠24.

◻ “Bon reputacion” ta nificá no simplemente ser di “bon fama” of “bon informe” sino tambe, den e sentido activo, ser edificante i encomendabel. Nos ta fiha nos mente riba cosnan cu ta sano i edificante en bes di cosnan humiyante i ofensivo.​—⁠Efesio 4:⁠29.

◻ “Birtud” básicamente ta nificá “bondad” of “excelencia moral,” pero e por nificá tur clase di excelencia. Pues, nos por apreciá e cualidadnan balioso, méritonan i logronan di otro personanan conforme Dios su norma.

◻ “Cos digno di alabansa” ta berdaderamente asina si e alabansa ta bini di Dios of di autoridad debidamente reconocé dor di dje.​—⁠1 Corintio 4:5; 1 Pedro 2:⁠14.

Promesa di Bida i Pas

¹⁷ Ora nos ta sigui Pablo su spiertamentu i ta “sigui considerá e cosnan aki,” nos lo tin éxito den “fihando e mente riba e spiritu.” E resultado ta no solamente e bendicion di bida, esta, bida eterno den e mundu nobo primintí, sino tambe pas. (Romano 8:⁠6) Pakico? Pasobra nos mente ta ser protegá for dje mal influencia di cosnan carnal i nos no ta ser afectá asina tantu mas p’e bataya agonisante entre carni i spiritu manera Pablo a describí. Dor di resistí e influencia dje carni, nos ta gana tambe pas cu Dios “pasobra fihando e mente riba e carni kier men enemistad cu Dios.”​—⁠Romano 7:​21-24; 8:⁠7.

¹⁸ Satanas i su agentenan ta haciendo tur loke nan por pa mancha nos refleho dje gloria di Dios. Nan ta purba gana control di nos mente dor di bombarde’é cu deseonan carnal, sabiendo cu esaki cu tempu lo hiba na enemistad cu Dios i na morto. Pero nos por sali victorioso den e bataya aki. Mescos cu Pablo, nos tambe por proclamá: “Gracias na Dios mediante Jesucristo nos Señor” pa a duna nos e medio pa combatí picá su gara riba e carni pecaminoso.​—⁠Romano 7:⁠25.

[Footnotes]

[Study Questions]

1. Pa ki propósito hende a ser creá?

2. Con e promé pareha humano a hera e marca?

3. Kico ta e berdadero naturalesa di picá?

4-6. (a) Con mayoria hende ta mira picá awe? (b) Kico ta e resultado di puntonan di bista moderno di picá?

7. Segun Bijbel, con hende ta ser afectá dor di picá?

8. Ki preguntanan nos mester haci nos mes? Pakico?

9. Pakico “fihando e mente riba e carni kier men morto”?

10. Kico kier men “fihando e mente”?

11. Con Cain tabata fihando e mente riba e carni i kico tabata e resultado?

12. Kico nos mester haci pa no bai “den e caminda di Cain”?

13. Con un persona por ser “tentá pa su mes deseo”?

14. Cu kico nos ta ser confrontá diariamente i con nos mester reaccioná?

15. Ki yudansa nos tin pa combatí picá su gara riba nos?

16. Ki cualidadnan Pablo a animá nos pa “sigui considerá” i kico cada un ta encerá?

17. Ki bendicionnan nos lo haña for di “fihando e mente riba e spiritu”?

18. Ki bataya Satanas ta bringando i con nos por sali victorioso?

[Caption on page 15]

Cain a permití tendencianan carnal domin’é pa su mes ruina

[Caption on page 16]

Fihando e mente riba e spiritu kier men bida i pas

[Caption on page 17]

Bo Por Splica?

◻ Kico ta picá, i con e por desaroyá un gara riba e carni pecaminoso?

◻ Con nos por combatí “fihando e mente riba e carni”?

◻ Kico nos por haci pa promové “fihando e mente riba e spiritu”?

◻ Con “fihando e mente riba e spiritu” ta trece bida i pas?